turvopros.com сӑнӳкерчӗкӗ

Кӑрлач уйӑхӗн 12-мӗшӗнче Шупашкартан Мускава каҫхи авиарейспа вӗҫсе кайма ӗмӗтленнӗ пассажирсен тепӗр ирччен кӗтме тивнӗ.

Асӑннӑ рейспа хутлакан «Победа» авиакомпанин самолёчӗ ҫула 10 сехет те 30 минут кая юлса хускалнӑ.

Шупашкара Мускавран вӗҫсе килнӗ самолёт анса ларнӑ хыҫҫӑн унӑн тӗп шассинче пушар пирки систерекен тытӑм ӗҫлесе кайнӑ. Ҫавӑн хыҫҫӑн пилотсем «Тревога» сигнал панӑ. Инкекпе ҫӑлав расчечӗсем ҫийӗнчех ура ҫине тӑнӑ.

Телее, ним те ҫунма пуҫламан. Самолёта ятарлӑ вырӑна туртса илсе кайса лартнӑ.

Чӑваш Республикин культурӑн тава тивӗҫлӗ ӗҫченӗ Пётр Мазуркин 75 ҫул тултарнӑ.

Муркаш районӗнчи (халӗ — муниципаллӑ округ) Мӑн Токшикре 1949 ҫулхи кӑрлач уйӑхӗн 4-мӗшӗнче ҫуралнӑскерӗн аллинче кирек епле туратпа кирек епле тӗмеске те илеме ҫаврӑнать.

Унӑн эрешӗсем ҫурт-йӗре юмах тӗнчинчи евӗр туса хума пултараҫҫӗ. Тӑван килне те вӑл ҫавӑн пек илемлетнӗ.

Пётр Мазуркин йывӑҫран 2 пин ытла тӗрлӗ япала ӑсталанӑ.

Ылтӑн алӑллӑскер Шупашкарта тӗрлӗ ҫӗрте художникра, каярах Муркаш районӗнчи Калайкассинчи шкулта тӑрӑшнӑ.

Юбиляра вырӑнтисем савӑнӑҫлӑ лару-тӑрура саламланӑ.

ptoday.ru сайтри сӑн

Хусанта пурӑнакан ҫынсем вӑхӑта 2 сехет куҫарма ыйтаҫҫӗ. Унашкаллисем нумаййӑн тупӑннӑ.

Хусансем Мускав вӑхӑчӗпе пурӑнаҫҫӗ. Чылайӑшне ку килӗшмест иккен. Хусана куҫса килнисем ку вӑхӑта халӗ те хӑнӑхаймаҫҫӗ имӗш, вӗсене кун ҫути кӗске пулни тӗлӗнтерет-мӗн.

Сӑмах май, ЧР Элтеперӗ унччен сехете куҫарма килӗшмен.

"Контактри" сӑн

Шупашкарта пурӑнакан Иван Кирилловичпа Галина Михайловна Львовсем пӗрле 50 ҫул пурӑннине паллӑ тунӑ. Вӗсем икӗ хӗр ӳстернӗ, халӗ тӑватӑ мӑнукпа савӑнаҫҫӗ.

Иван Львович пурнӑҫӗн ытларах пайне строительствӑна халалланӑ, Шупашкарти пир-авӑр комбинатӗнче инженерта ӗҫленӗ. Галина Михайловна медицина тытӑмӗнче вӑй хунӑ. Вӑл иглорефлексотерапи мелӗпе хӗсӗрлӗхе сипленӗ.

21.мвд.рф сӑнӳкерчӗкӗ

Ҫӗмӗрлере пӗр ҫыннӑн килӗ умӗнчи кӑвак чӑрӑша касса кайнӑ. Пӑтӑрмах иртнӗ ҫулхи раштавӑн 20-мӗшӗнче пулса иртнӗ. Кил хуҫи йывӑҫа мӑнукӗсем валли 17 ҫул ӳстернӗ.

...Ҫав каҫхине Патшалӑхӑн автоинспекцийӗн ӗҫченӗсем ҫул хӗррипе арҫын утса пынине асӑрханӑ. Вӑл михӗпе пулнӑ, миххе чӑрӑш чикнӗ.

44 ҫулти арҫын хулари Киров урамӗнчи пӗрисен умӗнче ӳсекен 1 метр та 20 сантиметр ҫӳллӗш чӑрӑша каснӑ иккен. Арҫын пӗччен пурӑннине пӗлтернӗ, йывӑҫа уяв валли капӑрлатас тенӗ-мӗн.

forum.na-svyazi.ru сӑнӳкерчӗкӗ

Шупашкарта рельс тӑрӑх ҫӳремен пӑравуспа ярӑнтарӗҫ. Хӗрлӗ тӗҫлӗ ҫӗнӗ аттракциона Гостехнадхор инспекцийӗнче тӗрӗсленӗ.

Унпа ярӑннишӗн 250 тенкӗ тӳлемелле. Пӗчӗк ачасене аслисемсӗр лартмӗҫ.

Маларах эпир Гостехнадзор терӗмӗр те, аттракционсене тӗрӗслесе тӑрать. Пӑравуса туяннӑ чухне хула ертӳҫисем ӑна Мускав ҫыранӗпе ҫӳреттерес ӗмӗтлине пӗлтернӗ.

"Контактри" сӑн

Юстици ӗҫӗсен патшалӑх служби пӗлтернӗ тӑрӑх, пӗлтӗр республикӑра 6129 мӑшӑр пӗрлешнӗ. Авӑнӑн 23-мӗшӗнчи чи нумай ҫемье чӑмӑртаннӑ - ун чухне 93 мӑшӑр пӗрлешнӗ.

Хӗрсенчен ытларахӑшӗ 23 ҫулта качча кайнӑ. Чылай каччӑ 25-ре ҫемье ҫавӑрнӑ.

Пӗлтӗр чи ватӑ мӑшӑр 90-ран иртнӗ ҫынсем пулнӑ. Арҫын - 95-ре, хӗрарӑм 94 ҫулта пулнӑ.

Хыпар» издательство ҫурчӗн халӑх тетелӗнчи страницинчен илнӗ сӑнӳкерчӗк

Чӑваш Енре Пичет кунӗ умӗн журналистсен премине тивӗҫ калем ӑстисене палӑртнӑ.

Ҫемен Элкер ячӗллӗ журналистсен премине «Чӑваш Ен» НТРКра тӑрӑшакан Родион Архипова пама йышӑннӑ. Радиожурналист «Присягая Родине» ҫарпа патриотизм кӑларӑмӗсен ярӑмне йӗркелесе пыать.

Леонид Ильин ячӗллӗ журналистсен премине «Хыпар» издательство ҫурчӗн «Ҫамрӑксен хаҫатӗнче» тӑрӑшакан Ирина Ивановӑна экологипе тата ял хуҫалӑхӗпе ҫыхӑннӑ ҫивӗч ыйтусене хускатнӑшӑн парас тенӗ.

forum.na-svyazi.ru сайтран илнӗ сӑн

ЧР Элтеперӗ иртнӗ ҫул вӗҫӗнче тӳрӗ лини ирттернӗ вӑхӑтра Ҫӗнӗ Шупашкарти Совет урамӗнчи 20-мӗш ҫуртра пурӑнакансем ыйту янӑ. Вӗсен ҫурт стени ҫурӑлса кайнӑ. Ҫынсем управляющи компанипе кӗрешсе ывӑннӑ-мӗн. Вӗсем хӑйсен укҫипе экспертиза тутарнӑ. «Ҫурт ҫынсемпе пӗрле йӑтӑнса анасса кӗтеҫҫӗ-и?» - тенӗ унта пурӑнакансем.

Республикӑри патшалӑх ҫурт-йӗр инспекцийӗ ку ыйтӑва сӑнаса тӑрать. Ҫурт – общежити, ӑна 1967 ҫулта хута янӑ. Унта пӗтӗмпе 161 хваттер. Раштавӑн 22-мӗшӗнче лару иртмелле пулнӑ. Унта ҫурта авариллисен йышне кӗртмелле пулнӑ. Анчах «Никама пӑхӑнман экспертиза» организаци тунӑ отчетра кирлӗ даннӑйсем ҫук-мӗн. Ҫавӑнпа ларӑва куҫарма йышӑннӑ. Хӑҫана хальлӗхе паллӑ мар.

Чӑваш наци музейӗн сӑнӳкерчӗкӗ

Мускаври ВДНХра «Раҫҫей» курав малалла ӗҫлет. Чӑваш наци музейӗнче пӗлтернӗ тӑрӑх, паянхи куна унта чӑваш тӗррин кунне халалланӑ.

Курава пырса куракансем чӑва эрешӗллӗ брошка хатӗрлеме пултараҫҫӗ. Ҫав енӗпе вӗсене Чӑваш тӗррин музейӗнче ӗҫлекен Татьяна Петрова пулӑшать. Наци тумне тӑхӑнса сӑн ӳкерӗнме те май пур. Пысӑк экран ҫинче вара чӑвашсен виҫӗ этнографи укшӑнӗпе паллаштаракан фильм кӑтартаҫҫӗ.