Чӑваш Енри пӗр районти 35-ри тӗп бухгалтер 5 ҫул хушшинче медицина учрежденийӗн 11 миллион тенкине кӗсйине чикнӗ – ҫапла шухӑшлаҫҫӗ следовательсем. Ун тӗлӗшпе пуҫарнӑ пуҫиле ӗҫе ШӖМӗн Чӑваш Енри следстви управленийӗ суда пӑхса тухма ярса панӑ.

Следстви пынӑ вӑхӑтра тӗп бухгалтера килти ареста лартнӑ, унӑн 1 миллион ытла тенкӗлӗх куҫман пурлӑхне арестленӗ. Айӑпланакан хӗрарӑм тӑкака саплаштарма пуҫланӑ, хальлӗхе 300 пин тенкӗ панӑ.

Следовательсем тӗпчесе пӗлнӗ тӑрӑх, тӗп бухгалтер пульница валли укҫа-тенкӗ запрос тунӑ чухне хушма нухрат кирлине те палӑртнӑ. Кайран вӑл ҫав укҫапа хӑй пӗлне пек усӑ курнӑ. Хӗрарӑм хӑйӗн хура ӗҫӗсене пытарас тесе иккӗллӗ бухгалтерипе усӑ курнӑ.

Паян ирхине Шупашкарти Калинин урамӗнче вырнаҫнӑ «Акконд» лавкка ӗҫченӗсем ҫӑлав службине шӑнкӑравласа пулӑшу ыйтнӑ. Лавкка павильонӗнче ҫӗлен шуса ҫӳрет-мӗн.

Сергей Ершов, Валерий Овчинников тата Алексей Шатаев ҫӑлавҫӑсем нумай кӗттермен - вырӑна часах ҫитнӗ. Вӗсем ҫӗлене шыраса икӗ хутлӑ лавккана пӑхса ҫаврӑннӑ. 1 метра яхӑн тӑршшӑ хурӑн пуҫлӑ ҫӗлене урайӗнчи ещӗксен хушшинче тупнӑ. Вӑл хӑранипе унта пытаннӑ.

Кӗтмен хӑнана ҫӑлавҫӑсем тытнӑ, машинӑна хурса вӑрмана, ҫынсем тата машинӑсем ҫӳремен вырӑна, кайса янӑ.

Чӑваш Ен спортсменки Испанире иртнӗ пӗтӗм тӗнче турнирӗнче ылтӑн медаль ҫӗнсе илнӗ. Ӑмӑрту Мадрид хулинче утӑ уйӑхӗн 4-7-мӗшӗсенче пулнӑ.

Спорт кӗрешӗвӗнче вӑй виҫме 24 ҫӗршыври 300 ытла спортсмен пухӑннӑ. Спортсменсем виҫӗ енлӗ кӗрешӳре вӑй виҫнӗ: ирӗклӗ, грек-рим, хӗрарӑмсен. Раҫҫейӗн пӗрлештернӗ команди 6 ылтӑн тата 3 пӑхӑр медальсем ҫӗнсе илнӗ.

Канаш районӗнче ҫуралса ӳснӗ, Раҫҫей спорт мастерӗ Вероника Чумикова та пухмача медальпе пуянлатнӑ. Вӑл 57 килограмм тайман виҫе категорийӗнче Индири Дханду Пооха спортсменкӑпа вӑй виҫнӗ, ӑна ҫӗнсе ылтӑн медаль илнӗ.

Ӗнер, утӑ уйӑхӗн 8-мӗшӗнче, Элӗк районӗнчи пӗр ялта ачапа пӑтӑрмах пулнӑ. Кун пирки «Про Город» хаҫата халӑх корреспонденчӗ каласа кӑтартнӑ.

Ӗнер 8 сехет те 45 минутра пулнӑ ку. Ял ҫыннисем каланӑ тӑрӑх, ашшӗ электропӑчкӑпа ӗҫленӗ. Унӑн 3 ҫулти хӗрӗ вара инҫех мар выляса ҫӳренӗ.

Ача электропӑчкӑн цепӗ ҫине ӳкнӗ. Пӗчӗкскерӗн пичӗ суранланнӑ – сылтӑм енчи питҫӑмарти касӑлнӑ. Ачана пульницӑна илсе кайнӑ.

Ҫакӑ паллӑ: ҫемье Элӗк районне Шупашкартан килнӗ.

forum.na-svyazi.ru сайтри сӑн

Шупашкарти пилӗк вӗренӳ учрежденийӗ валли пуҫлӑх шыраҫҫӗ. Документсене утӑ уйӑхӗн 22-мӗшӗччен йышӑнаҫҫӗ.

2-мӗш вӗренӳ центрӗ, 3-мӗш лицей, 44-мӗш лицей, 31-мӗш шкул, «Ҫӗнӗ хула» микрорайонта ҫӗкленекен шкул валли директорсем кирлӗ. Юлашкинчен асӑннӑ шкула ертсе пыма кӑмӑл пуррисенчен документсене утӑ уйӑхӗн 25-мӗшӗччен йышӑнаҫҫӗ.

Конкурса хутшӑнас тесен заявлени ҫырмалла, анкета тултармалла, паспорт, ӗҫ кӗнекин, вӗреннине ҫирӗплетекен документсен, СНИЛС, ИНН, ҫар билечӗн ксерокопийӗсене, медицина справки, ҫулталӑкри тупӑш справки, судпа айӑпланманнине ӗнентеркен справка, ЕГРИПра сведенисем ҫуккине тата коммерци организацийӗсене пая кӗменнине ӗнентерекен справка кирлӗ.

РИА Новости тунӑ сӑн

Раҫҫейри кашни ҫула мӗне те пулин халалласси йӑлана кӗчӗ. Кӑҫал – Театр ҫулталӑкӗ. Ҫитес ҫула мӗне халаллӗҫ-ха?

2020 ҫулта Тӑван ҫӗршывӑн Аслӑ вӑрҫи пӗтнӗренпе 75 ҫул ҫитет. Ҫулталӑка та ҫакӑнпа ҫыхӑнтарӗҫ: вӑл Астӑвӑмпа мухтав ҫулталӑкӗ пулӗ. РФ Президенчӗ Владимир Путин хушӑва ӗнер, утӑ уйӑхӗн 8-мӗшӗнче, алӑ пуснӑ. Ҫакна Владимир Владимирович историе асра тытмаллине тӗпе хурса тунӑ.

Аса илтерер: 2018 ҫул Раҫҫейре Хӑйирӗкҫӗсен ҫулталӑкӗ пулнӑ, 2017 ҫул – Экологи ҫулталӑкӗ, 2016 ҫул – Раҫҫей киновӗн ҫулталӑкӗ, 2015 ҫул – Литература ҫулталӑкӗ.

Чӑваш Енӗн шалти ӗҫсен министрӗнче 2016 ҫулхи ака уйӑхӗнчен тытӑнса кӑҫалхи утӑ уйӑхӗн пуҫламӑшӗччен ӗҫленӗ Сергей Неяскина хисеплӗ ят панӑ.

«Чӑваш Республикин шалти ӗҫсен органӗсен тава тивӗҫлӗ ӗҫченӗ» хисеплӗ ят парасси ҫинчен калакан хушӑва республика Элтеперӗ Михаил Игнатьев ӗнер, утӑ уйӑхӗн 8-мӗшӗнче, алӑ пуснӑ.

Аса илтерер, Сергей Неяскина Владимир Путин хушӑвӗпе утӑ уйӑхӗн 3-мӗшӗнче ӗҫрен кӑларнӑ. Усал чӗлхесем ҫирӗплетнӗ тӑрӑх, министр ҫемье пукансӑр юлни унӑн ывӑлӗ спецназӑн «Гром» (чӑв. Аслати) базинче каннӑ чухне пушар тухнипе (унта вара пули-пулми ҫынсене кӗртме юраман) ҫыхӑннӑ. Министр ывӑлӗ, сӑмах май, — Чӑваш Енӗн юстици министрӗн ҫумӗ.

Кӑҫалхи кӑрлач уйӑхӗнче Сергей Неяскин Чӑваш Ен Элтеперне Михаил Игнатьева Раҫҫейӗн Хисеп грамотипе чысланӑччӗ.

Виктор Шметков

Чӑваш Енӗн Шалти ӗҫсен министерствине ертсе пыма каллех ют регионти ҫынна шанма пултараҫҫӗ. Ҫакӑн пирки Александр Белов журналист пӗлтернӗ. Ҫук-ха, ҫирӗплетсех каламан.

Пирӗн республикӑри шалти ӗҫсен министрӗн тилхепине Виктор Шметкова тыттарма пултараҫҫӗ имӗш. Вӑл — шалти службӑн генерал-майорӗ. Хальхи вӑхӑтра Виктор Анатольевич Шалти ӗҫсен министерствин Волгоград облаҫӗнчи Тӗп управленийӗ пуҫлӑхӗн ҫумӗ пулса тӑрӑшать. Вӑл 1963 ҫулта Аҫтӑрхан хулинче ҫуралнӑ. 1985 ҫулта Аҫтӑрханти патшалӑхӑн пулӑ промышленноҫӗпе хуҫалӑхӗн техника институтӗнчен, 1996 ҫулта Раҫҫейӗн ШӖМӗн Управлени академийӗнчен вӗренсе тухнӑ. Шалти ӗҫсен тыӑмӗнче тӗрлӗ должноҫре тӑрӑшнӑ. Волгоград облаҫне ӑна 4 ҫул каялла куҫарнӑ.

Аса илтерер, Чӑваш Енӗн шалти ӗҫсен министрне Сергей Неяскина Раҫҫей Президенчӗ ӗҫрен кӑларма йышӑннӑччӗ. Документа утӑ уйӑхӗн 3-мӗшӗнче алӑ пуснӑччӗ.

Раҫҫейӗн вице-премьерӗ Дмитрий Медведев ҫӗршыври мӗнпур ҫынна диспансеризаци кӑларасси ҫинчен хушу кӑларнӑ.

Чӑваш Ен Сывлӑх сыхлав министерстви пӗлтернӗ тӑрӑх, тухтӑрсем патне 21 ҫултан аслӑраххисен тата ҫул виҫҫе пайланакансен каймалла.

Кӑҫалхи кӑрлачӑн 1-мӗшӗнчен пирӗн ҫӗршывра тепӗр йышӑну турӗҫ. Ӗҫлекен ҫынсен кашни виҫӗ ҫулта пӗрре диспансеризаци тухмашкӑн пӗр кану кунӗ илме ирӗк пур. Ҫав куншӑн вӗсене шалу тӳлемелле. Пенси умӗнхи ҫулӗнчисене ҫак тӗллевпе ҫулсерен икшер кун кантармалла.

Пӗтӗм Раҫҫейри диспансеризацие 2019 тата 2020 ҫулсенче ирттермелле.

Раҫҫейӗн премьер-министрӗ Татьяна Голикова ӑнлантарнӑ тӑрӑх, 40 ҫултан аслӑраххисене диспансеризаци тӗрӗслевӗ витӗр ҫулсерен кӑларӗҫ.

Анвар Закиров

Суд приставӗсен федераци службин Чӑваш Енри управленине ҫӗнӗ ҫын ертсе пыма тытӑннӑ. Унпа паян Чӑваш Ен Элтеперне Михаил Игнатьева Мускавран килнӗ ҫын, федераци службин директорӗн ҫумӗ — Раҫҫейӗн тӗп суд приставӗн ҫумӗ Денисом Фирстов, паллаштарнӑ.

Чӑваш Енри суд приставӗсен ертӳҫи пулма Анвар Закирова шаннӑ. Хушӑва РФ Юстици министерствинче ӗнер алӑ пусса ҫирӗплетнӗ.

Анвар Закиров юстици органӗсенче 2001 ҫултанпа ӗҫлени паллӑ. 2018 ҫулхи раштав уйӑхӗнче ӑна пирӗн республикӑри суд приставӗсен управленийӗн ертӳҫин тивӗҫне пурнӑҫлама шаннӑччӗ.

Аса илтерер, ку должноҫре ӗҫлеме тытӑниччен Анвар Закиров РФ Суд приставӗсен федераци службин Тутарстанри управленийӗн пуҫлӑхӗнче вӑй хунӑ. Чӑваш Енре ҫак должноҫре тӑрӑшнӑ Анатолий Иванов вара пӗлтӗрхи ҫӗртме уйӑхӗнче Мари Эла ӗҫлеме куҫнӑччӗ.