hmediazavod.ru сайтри сӑн

Пуш уйӑхӗн 18-мӗшӗнче 17 сехет те 20 минутра «Сӗнтӗрвӑрри» ҫӑлав станцине пулӑшу ыйтса шӑнкӑравланӑ.

Инкеклӗ лару-тӑру патшалӑх комитечӗ пӗлтернӗ тӑрӑх, Атӑл леш енче, Мари Республикинче, виҫӗ арҫын пулӑ тытнӑ. Вӗсенчен пӗри пӑр айне анса кайнӑ.

«Сӗнтӗрвӑрри» ҫӑлав станцин пуҫлӑхӗ Атӑлӑн леш ҫыранне часах ҫитнӗ. Ҫав вӑхӑтра тусӗсем арҫынна хӑйсем кӑларма хӑтланнӑ. Шел те, пулӑшу ҫитиччен арҫын сивӗ шывра шӑннипе вилсе кайнӑ.

Ҫӑлавҫӑпа пулӑҫсем вилнӗ арҫынна кӑларнӑ, ҫирӗпех мар пар тӑрӑх ӑна кимӗ таран илсе ҫитернӗ. Вӗсем вилене полицие тата васкавлӑ медпулӑшӑва панӑ.

google.com сайтри сӑн

Чӑваш Енре коронавирусран страхлама тытӑннӑ. Ку ӗҫе «ОВАС Страховани» компани пурнӑҫлать.

Страхлавпа килӗшӳллӗн, коронавируспа чирлесе вилнӗ ҫыннӑн тӑванӗсем 1 миллион тенкӗ таран страховка илееҫҫӗ. Пандеми сарӑлнӑ май Раҫҫейри страхлав компанийӗсем ятарлӑ программӑсем хатӗрлеҫҫӗ. Полис строкӗ – 1 ҫул. Диагноза ҫирӗплетсен компенсаци 20, 50 е 100 пин тенкӗпе танлашать. Ку хӑш программӑна суйланинчен килет. Страховкӑна сиплев, тухтӑр шырани, амбулатори сиплевӗ, эмелсен хакӗсем кӗреҫҫӗ.

Аса илтерни пӑсмӗ: ҫак тапхӑрта алла уйрӑмах лайӑх, тӑтӑш ҫумалла, медицина маски тӑхӑнмалла, ҫын ҫӳрекен вырӑна тухмалла мар.

Раҫҫей ӑсчахӗсем коронаавирус геномне палӑртнӑ тесе пӗлтернӗ паян «Российская газета» хаҫат ҫӗршывӑн Сывлӑх сыхлав министерстви хыпарлани тӑрӑх.

Грипӑн А.А. Смородинцев ячӗллӗ ӑслӑлӑхпа тӗпчев институчӗн ӑсчахӗсем SARS-CoV-2 коронавирусӑн тулли геномне палӑртнӑ. Тепӗр майлӑ каласан, ДНК молекулинче нуклеотидсен йӗркине тишкернӗ.

Генома палӑртни ҫӗнӗ коронавирус епле аталаннине тата вӑл епле аталаннине ӑнланма кирлӗ. COVID-19 коронавирус — ҫӗнӗ йышши вирус. Генома ӑнланни вирус Раҫҫее епле лекнине тата вӑл мӗнле аталанассине палӑртма май парӗ. Ӑсчахсем пӗлнӗ информацие тӗпе хурса коронавируса хирӗҫ вакцина тата коронавируса хирӗҫле препаратсем хатӗрлеме май килӗ. Ҫапла ӗнентереҫҫӗ специалистсем.

osnmedia.ru сӑнӳкерчӗкӗ

Вӑрмар районӗнчи Пӑртас ялӗнче выльӑхӑн урнӑ чирне тупса палӑртнӑ. Асӑннӑ территорире ҫавна май паянтан карантин тесе йышӑннӑ. Хушӑва Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев паян алӑ пуснӑ.

Хӗрлӗ Чутай районӗнче тискер чӗрчунсен урнӑ чирне тупса палӑртнине Чӑваш халӑх сайтӗнче пӗлтернӗччӗ. Ҫавна май унта та карантин тесе йышӑннӑччӗ. Хушӑва Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев пуш уйӑхӗн 4-мӗшӗнче алӑ пуснӑччӗ. Элӗк районӗнчи Кармал ялӗнче чӗрчунсен урнӑ чирне тупса палӑртнӑ.

Каранти тесе йышӑннӑ тӑрӑхра йытӑсемпе кушаксен куравне йӗркелеме, чӗрчунсене зоопарка илсе каймашкӑн тытма, килти выльӑх-чӗрлӗхе сутма, кушаксемпе йытӑсене ял территорийӗнчен илсе тухма юрамасть.

Александр Робота

Федерацин айӑплава пурнӑҫа кӗртес енӗпе ӗҫлекен службин Чӑваш Енри управленийӗн учрежденийӗсенче медицина маскисем ҫӗлеме тытӑнӗҫ. Кун пирки асӑннӑ управлени пуҫлӑхӗ Александр Робота пӗлтернӗ. Вӑл республикӑн Правительство ҫуртӗнче Чӑваш Ен Элтеперӗн тивӗҫсене вӑхӑтлӑх пурнӑҫлакан Олег Николаевпа тӗл пулнӑ. Унта енсем управленин производстви пирки калаҫнӑ. Ведомствӑна пӑхӑнакан учрежденисенче ҫӗвӗ производстви, тимӗр-тӑмӑртан япала туса кӑларасси, йывӑҫ-чус тирпейлесси тата ял хуҫалӑхӗ вӑйлӑ аталаннӑ.

«Пирӗн 2500 гектар ытла ҫӗр пур. Пахчаҫимӗҫпе, сысна ашӗпе, сӗтпе эпир хамӑра тивӗҫтеретпӗр. Ҫӗрулмие тата ытти пахчаҫимӗҫе кӑҫал Мари Эла та ӑсатрӑмӑр», – каласа кӑтартнӑ Александр Робота.

«Раҫҫей Правительстви хушнипе пирӗн тытӑм медицина маскисем хатӗрлеме тытӑнчӗ. Эпир те унта хутшӑнӑпӑр», — тенӗ Федерацин айӑплава пурнӑҫа кӗртес енӗпе ӗҫлекен службин Чӑваш Енри управленийӗн пуҫлӑхӗ.

Ҫак кунсенче коронавирус пирки ӳркенмен ҫын кӑна калаҫмасть пулӗ. Теприсем, хытах шикленсе ӳкнисем, канӑҫа ҫухатнӑ. Ҫавсем чирлесрен ҫеҫ мар, выҫлӑх вӑхӑчӗ ҫитесрен те шикленеҫҫӗ. Сыхланакана Турӑ сыхланине пӗлетпӗр-ха. Анчах шикли шикленнӗ, кӗрӗк пӗркеннӗ тенине те асра тытмалла. Канӑҫсӑрланса кам лавккана, кам аптекӑна васкать.

Чӑваш Ен Элтеперӗн тивӗҫсене вӑхӑтлӑх пурнӑҫлакан Олег Николаев паян «Чӑвашҫӑкӑрпродукчӗ» предприятире пулнӑ. Республика ертӳҫи Инстаграмра пӗлтернӗ тӑрӑх, унта чӗртавар ҫӗнӗ тыр-пул тухӑҫне пуҫтарса кӗртиччен пурӑнмалӑх та ҫитет. Апла пулсан ҫӑнӑх та ҫителӗклӗ пулӗ, кӗрпе-макарон та.

...Пӗр вӑхӑтра, астӑватӑр-и, тӑвар хакланать терӗҫ, тепрехинче — сахӑр песукӗ, хуратул.

Шупашкарта пӗр ҫын коронавируспа чирлине тупса палӑртнӑ. Кун пирки Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев Инстаграмра та, Фейсбукра та пӗлтернӗ.

Унта ҫырнӑ тӑрӑх, ҫав ҫын чикӗ леш енчен таврӑннӑ хыҫҫӑн пульницӑна кайнӑ, сывлӑхне тӗрӗслеттернӗ. Вирус тупнӑскере сипленме вырттарнӑ. Вӑл хӑйне япӑх туймасть. Ют ҫӗршывра пулнӑскере Васкавлӑ медицина пулӑшӑвӗн пульницинчи инфекци уйрӑмне вырттарнӑ.

Коронавирус ҫаклатнӑ ҫынпа ҫывӑх пулнисен сывлӑхне те тӗрӗсленӗ. Вӗсем чирлӗ маррине палӑртнӑ.

Паян пирӗн республикӑра коронавируса сарассине хирӗҫ ӗҫлекен оперативлӑ штаб черетлӗ канашлӑва пухӑннӑ. Унӑн ӗҫне Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев ертсе пынӑ.

cap.ru сайтри сӑн

Пуш уйӑхӗн 16-мӗшӗнче Ҫӗнӗ Шупашкарта ҫӑлавҫӑсем Атӑл юханшывӗнче, пӑр ҫинче, ҫамрӑк ҫынсем ярӑннине асӑрханӑ. Хайхискерсем пӑр катӑкӗ ҫине тӑнӑ та ишнӗ.

Ҫӑлавҫӑсем ҫав икӗ каччӑна асӑрханӑ. Ҫав самантра пӗри тусне патак тӑсса панӑ та вӑл ҫыран хӗррине тухнӑ. Александр Лесников ҫӑлавҫӑ тепӗр ҫамрӑка пулӑшнӑ, ӑна та ҫыран хӗррине кӑларнӑ.

Анчах ҫав каччӑсем камсем пулнине палӑртайман – вӗсем тарма ӗлкӗрнӗ. Ҫӑлавҫӑсем асӑрхаттараҫҫӗ: пӑр катӑкӗ ҫинче ярӑнма юрамасть. Ку инкек патне илсе ҫитерме пултарать.

myslo.ru сайтри сӑн

Пуш уйӑхӗн 17-мӗшӗнче 21 сехет ҫурӑра Вӑрнар районӗнчи Нурӑсра ҫул-йӗрпе патруль службин ӗҫченӗ ҫул хӗрринче, общество чарӑнӑвӗнчен инҫех маар, ача пушмаксӑр чупнине асӑрханӑ. Вӑл чарӑннӑ.

Ӳсӗр амӑшӗ ачине пӑхса ӗлкӗреймен-мӗн. Хӗрарӑм Нурӑса Елчӗк районӗнчен килнӗ, анчах каялла каяйман. Ҫул-йӗрпе патруль службин аслӑ инспекторӗ Андрей Траков ӳсӗр хӗрарӑма пулӑшнӑ. Вӑл ӑна ачипе служба машинине лартнӑ та ҫывӑхри пульницӑна илсе ҫитернӗ, унта вӗсене тухтӑрсем пӑхнӑ.

Халӗ ачан сывлӑхӗпе пурнӑҫӗ хӑрушлӑхра мар. Ку ҫемье пирки информацие ҫул ҫитменнисемпе ӗҫлекен органсене пӗлтернӗ.

https://www.obltv.ru сӑнӳкерчӗкӗ

Вӑрнарта вырӑнти мунчапа кӗпе ҫумалли комплекс пуҫлӑхӗ пулнӑ ҫын тӗлӗшпе пуҫиле ӗҫ пуҫарнӑ. Ӑна халӗ суда ярса панӑ.

Чӑваш Ен прокуратуринче пӗлтернӗ тӑрӑх, мунча пуҫлӑхӗнче тӑрӑшнӑскер Раҫҫей Пуҫиле кодексӗн 160-мӗш статйин 3-мӗш пайӗпе айӑпласшӑн. Ку статьяпа пуҫиле ӗҫе ӗҫ вырӑнӗпе усӑ курнисем тӗлӗшпе пуҫараҫҫӗ. Муниципалитетӑн унитарлӑ предприятине вӑл кӳнӗ тӑкака та шыраса илесшӗн.

Пуҫлӑх пулнӑскер предприяти кассинчен 60 пин тенкӗ илнӗ. Унсӑр пуҫне банкри хӑйӗн счеч ҫине 65 пин тенкӗ куҫарнӑ. Ҫав укҫана вӑл мунча валли вутӑ туянма тӑкаклатӑп, аллӑн татӑлӑп тесе ӗнентернӗ. Анчах тӗпчевҫӗсем пуҫлӑх пулнӑ ҫын сӑмахне ӗненмен. Тӗрӗсрех каласан, ҫавна ҫирӗплетсе паракан фактсене тупайман.