ШӖМ тунӑ сӑн

Красноярск крайӗнчи йӗрке хуралҫисем Чӑваш Енре 16 ҫулти каччӑна тытса чарнӑ. Вӑл порнографи материалӗсене сарнӑ тесе шутлаҫҫӗ. Материалсем ҫинче вара Красноярск крайӗнчи 12 ҫулти хӗрача пулнӑ.

Каччӑ каҫал кӑрлач уйӑхӗнче ҫак хӗрачана порнографи содержаниллӗ сӑнсем, видеосем ӳкерсе яма ӳкӗте кӗртнӗ. Вӗсене илсен вара хӗрачан пӗлӗшӗсем патне тӗнче тетелӗ урлӑ ярса панӑ.

Ҫу уйӑхӗнче ҫак каччӑна йӗрке хуралҫисем тытса чарнӑ. Ун тӗлӗшпе пуҫиле ӗҫ пуҫарнӑ.

Армени ШӖМӗ тунӑ сӑн

Вӑйлӑ ҫумӑр ҫуса иртнӗ хыҫҫӑн Дебед шывӗ ҫыранӗсенчен тухнӑ.

Арменире Дебед юханшыв ҫырансенчен тухнӑран ял-хуласене шыв илме тытӑннӑ. Кун пирки Армени ШӖМӗн пресс-служби пӗлтернӗ.

Вӑрах вӑхӑт хушши ҫӑвакан ҫумӑрсене пула шыв шайӗ шар кӑтартма пултаракан виҫерен иртнӗ. Хальхи вӑхӑтра шыв айне Алаверди, Ахтала, Ташир хуласем, тата темиҫе поселок пулнӑ.

Грузи енне каякан патшалӑх трассине хупнӑ, Ванадзор – Алаверди автоҫул вырӑнӗ-вырӑнӗпе арканнӑ. Ҫавӑн пекех Каркоп салана ҫыхӑнтаракан Дебед урлӑ хывнӑ кӗпер ишӗлсе аннӑ. Ереван – Тбилиси чукун ҫула та вӑхӑтлӑха хупса хунӑ. «Баграташен» тӗрӗслесе кӑларакан пункт урлӑ иртме май ҫукран Грузие «Гогаван» тата «Бавра» КПП урлӑ лекме пулать.

Юханшыва Opel автомобиль кӗрсе ӳкнӗ, водительпе пӗрлех. Малтанлӑха пӗлтернӗ тӑрӑх, вӑл вилнӗ — ӑна шырас ӗҫ малалла пырать. Шыв илнӗ районсенчен 77 ҫынна эвакуациленӗ. Ҫӑлав службисем хӑйсен ӗҫне малалла пурнӑҫлаҫҫӗ — шар курнисене пулӑшас ӗҫре пурӗ 300 ытла ҫӑлавҫӑ тӑрӑшать.

@ Marco Verch / Flickr

2014 ҫулта Румыни влаҫӗсем Кӑнтӑр Карпатра зубрсен йышне ӳстерме тытӑннӑ. Халӗ унта 170 чӗрчун пурӑнать. The Guardian тесе ҫырнӑ тӑрӑх, ӑсчахсем ҫакна тӗпчесе пӗлнӗ: вӗсем экосистемӑна пуянлатаҫҫӗ тата климат улшӑнӑвӗн сиенне ҫемҫетеҫҫӗ.

Зубрсен кӗтӗвӗ ҫулталӑкра 54 000 тонна углеродпа вараланнине сиенсӗрлетет. Ку вара сывлӑша варалакан 43 000 автомобильпе танлашать.

Чӗрчунсем 50 тӑваткал ҫухрӑм лаптӑк улӑхсенче пурӑнаҫҫӗ. Вӗсем курӑка «кӗскетеҫҫӗ», ҫӗре тислӗкпе имҫамлаҫҫӗ, ӳсентӑран вӑрлӑхне вырӑнтан вырӑна куҫараҫҫӗ тата ҫӗре хытараҫҫӗ. Ҫакӑ пӗтӗмпех ӳсен-тӑранпа тӑпрара пухӑннӑ парник газӗсене сывлӑша тухасран сыхлать.

Зубрсем Румынине ҫухалнӑ хыҫҫӑн икӗ ӗмӗр иртсен таврӑннӑ — XIX ӗмӗр варринче вӗсене сунарҫӑсем тӗппипех пӗтернӗ пулнӑ. Ҫак йӗкӗр чӗрнеллӗ чӗрчунсем — сунчӑк евӗрлӗ чӗрчунсен тӗсӗ шутне кӗрекенскерсем. Вӗсем регионта пулни ытти организма аван аталантарма майсем туса парать. Хальхи вӑхӑта илес пулсан Кӑнтӑр Карпатра пӗр-пӗрне кансӗрлемесӗр пурӗ 350-450 зубр пурӑнма пултарнӑ пулӗччӗ.

© Stefano Tammaro / Shutterstock/FOTODOM

Европӑри пысӑк вулкан районӗнче — Флегрей уйӗсенче — час-часах ҫӗр чӗтреннине сӑнама пуҫланӑ: Неапольте юлашки кунсенче ҫӗр айӗнчи кисренӳсене темиҫе хут регистрациленӗ. Специалистсем шухӑшӗпе юнашар пурӑнакан халӑха эвакуацилемелле.

Флегрей уйӗн супервулканӗ Везувирен инҫех мар вырнаҫнӑ, анчах вӑл ҫӗр айӗнче выртать, вӑл пуррине чылайӑшӗ пӗлмест те. Апла пулин те ҫак капмар вулканта 24 кратер пур, йӗри-тавра вара халӑх йышлӑ пурӑнакан хуласемпе ялсем, ҫав шутра Неаполь те, вырнаҫнӑ.

Тӗпчевҫӗсем шутланӑ тӑрӑх, супервулкан 40 пин ҫул каялла хӑйӗн вӑйне питӗ хӑватлӑ кӑтартнӑ. Сӑмах май, пӗр версипе, неандерталецсем шӑпах ӑна пула вилсе пӗтнӗ те.

Супервулкана 24/7 вӑхӑт хушши темиҫе патшалӑхри ҫӗр-ҫӗр эксперт сӑнаса тӑрать. Вӑл вут-хӗм кӑларма тытӑнсан шар курма пултаракан «хӗрлӗ» зонӑра 500 пин ҫын пурӑнать — вӗсен шутне Поццуолипе Баколи хуласем тата Неаполь ҫумӗнчи хӑшпӗр ял-хула кӗрет. Хулан ытти пайӗ «сарӑ» зонӑра — вулкан кӗл кӑларсан вӑл кунта йышлӑ тӑкӑнас хӑрушлӑх пур.

ҪҪХПИ тунӑ сӑн

Ҫу уйӑхӗн 24-мӗшӗнче 20 сехет те 15 минутра Хӗрлӗ Чутай округӗнчи Мучикасси ялӗнче «Санг Енг» машина «Лада Веста» ҫине пырса кӗнӗ. «Веста» рулӗ умӗнче ларнӑ 25 ҫулти хӗрарӑм вырӑнтах вилнӗ. Унӑн пассажирӗ, 9 ҫулти ача, аманнӑ, ӑна пульницӑна илсе кайнӑ.

«Санг Енг» рулӗ умӗнче 44 ҫулти арҫын ларнӑ. Аварие курнӑ ҫынсем каланӑ тӑрӑх, вӑл ӳсӗр пулнӑ. Ӑна хӑйне те тухтӑрсен пулӑшӑвӗ кирлӗ пулнӑ.

"Контактри" сӑн

«Ырӑ кун. Элӗк округӗнчи Вырӑс Сурӑм ялӗнче Паллӑ мар салтака халалласа лартнӑ палӑка ишсе антарнӑ. Вӑл 50 ҫул ытла ларнӑ. Юнтапа ял тӑрӑхӗн пуҫлӑхӗ халӑха ӑна гипсран тунӑ, ун вырӑнне ҫӗнӗ асӑну комплексӗ тумалла тесе ишсе антармалла терӗ (экспертиза пулман).

Курӑр-ха, палӑкран мӗнле мӑшкӑланӑ. Палӑкпа юнашар ҫырма пур, йӑлт ҫавӑнта кайса тӑкнӑ та тӑпрапа хупланӑ. Палӑк пуҫӗ, ытти пайӗ уйрӑм выртать. Эпир ҫу уйӑхӗн 9-мӗшӗнче унта фашистсене ҫӗнтернӗ паттӑрсене пуҫ тайма ҫӳренӗ, чечек хунӑ. Ҫакӑн пек тискерлӗхе курсан чун юнпа тулать.

Палӑк юлашкисене пӑхсан ӑна гипсран туманни паллӑ. Ахӑртнех, бетонран. Ӑна юсаса ҫӗнетнӗ тӗк вӑл нумай ҫул ларӗччӗ», - ҫапла ҫырна «Контактри» халӑх тетелӗнчи «Вести Чувашии» ушкӑнра.

cap.ru сӑнӳкерчӗкӗ

Ҫӗртме уйӑхӗн 24-мӗшӗнче, Республика кунӗнче, ЧР Элтеперӗн Кубокне ҫӗнсе илессишӗн лашапа чупса ӑмӑртӗҫ.

ЧР Ял хуҫалӑх министерстви пӗлтернӗ тӑрӑх, кун пек тупӑшу иккӗмӗш хут пулӗ. Ӑмӑрту Ҫӗнӗ Шупашкарти лаша спорчӗн ача-пӑча спорт шкулӗ ҫумӗнче иртӗ. Лапама 10 пин ытла куракан вырнаҫма пуларать.

Ӑмӑртӑва тӗрлӗ регионти лашапа чупакан спортсменсем хутшӑнӗҫ.

Инкеклӗ лару-тӑру министерстви тунӑ сӑн

Паян кӑнтӑрла Ҫӗмӗрле округӗнчи Мисчӗ ялӗнче икӗ хутлӑ ҫурт ҫуннӑ. Пушарнӑйсем ҫитнӗ тӗле ҫулӑм пӗрремӗш хутри отделкана тата иккӗмӗш хута хӑпармалли картлашкана ярса илнӗ.

Пушара сӳнтерекенсем иккӗмӗш хутра 15 ҫулти хӗрачана тупнӑ, ӑна тухтӑрсен аллине панӑ. Анчах, шел те, ӑна ҫӑлма май килмен - вӑл вилнӗ.

13 сехет те 2 минутра пушара сӳнтернӗ. Халӗ ҫулӑм мӗнрен тухнине тӗпчеҫҫӗ.

www.zp21rus.ru сӑнӳкерчӗкӗ

Чӑвашсен пӗрремӗш хаҫачӗн, «Хыпарӑн», никӗслевҫи ҫуралнӑранпа 146 ҫул ҫитнине халалласа Муркаш муниципаллӑ округӗнчи Купӑрля ялӗнче митинг иртнӗ.

Николай Никольский — чӑвашсен пӗрремӗш профессорӗ, историк, этнограф, общество ӗҫченӗ.

Купӑрляри Н.В. Никольский ячӗллӗ паркри уява вырӑнти тӳре-шара, ҫав шутра Муркаш муниципаллӑ округӗн пуҫлӑхӗ Алексей Матросов, пырса ҫитнӗ. Хӑнасен йышӗнче Никольский эткерлӗхне тӗпчесе кӗнеке кӑларнӑ Алексей Леонтьев та (вӑл халӗ – Чӑваш патшалӑх гуманитари ӑслӑлӑхӗсен институчӗн ӑслӑлӑх ӗҫченӗ) пулнӑ.

www.zp21ru сӑнӳкерчӗкӗ

Муркаш тӑрӑхӗнчи Лантӑш ялӗ патӗнчи уҫланкӑра Акатуй иртӗ. Уява муркашсем ҫӗртме уйӑхӗн 8-мӗшӗнче пуҫтарӑнӗҫ. Асӑннӑ уява ҫурхи ака-суха ӗҫне вӗҫлесен ирттереҫҫӗ.

Акатуй 11 сехетре уҫӑлӗ, 12 сехет те 30 минутра уҫланкӑра концерт пуҫланӗ. Сцена ҫине малтан округри пӗрлештернӗ хор тухӗ, унтан – тӗрлӗ коллектив. Спорт ӑмӑртӑвӗсем иртӗҫ, ача-пӑча лапамӗсем ӗҫлӗҫ.