видеори кадр

Чӑваш Енре те, Раҫҫейри пекех, 65 ҫултан аслӑрах ҫынсем карантинра лараҫҫӗ. Ку коронавирус сарӑлнипе ҫыхӑннӑ, мӗншӗн тесен специалистсем вирус ытларах ваттисене ернине палӑртнӑ.

Италире те халӗ ҫирӗп карантин пырать. Унта ҫынсем балкон ҫинче юрӑ шӑрантарнине МИХсенче те ҫырнӑччӗ. Шупашкарта пурӑнакан, халӗ килте карантинра ларакан кинемей те вӗсенчен тӗслӗх илнӗ. Октябрь: 50 ҫул урамра иртсе пыракансем ватӑ хӗрарӑм юрланине илтсен ҫакна телефон ҫине видео ӳкернӗ.

Хайхи кинемей купӑс каласа чӑвашла юрланӑ. Тӗнче тетелне вырнаҫтарнӑ ҫак видеона паянхи кун тӗлне 3 пине яхӑн ҫын пӑхнӑ.

ҪҪХПИ тунӑ сӑн

Канаш районӗнче пуш уйӑхӗн 25-мӗшӗнче 16 сехет те 55 минутра мотороллер кювета чӑмнӑ. Руль умӗнче 36 ҫулти арҫын ларнӑ.

«Муравей» мотороллер рулӗ умне ларнӑ арҫын Кивӗ Шелттем ялӗ ҫывӑхӗнче кювета чӑмнӑ. Ҫакна куракансем часрах васкавлӑ медпулӑшу чӗннӗ.

Тухтӑрсем килнӗ ҫӗре водитель тӑна кӗнӗ. Анча хайхискер ӳсӗр пулнӑ, хӑйӗнпе мӗн пулса иртнине тата ӑҫта пулнине ӑнланайман. Фельдшерсем аманнӑскере пульницӑна илсе кайнӑ. Кайран вӑл чӑнах та ӳсӗр пулни ҫирӗпленнӗ.

Мотороллер ҫуллахи резинӑпа тата номерсемсӗр пулнӑ.

Коронавируса пула пирӗн ҫӗршывра та, Чӑваш Енре те ҫирӗп мерӑсем йышӑнчӗҫ. Республика Элтеперӗн тивӗҫӗсене вӑхӑтлӑх пурнӑҫлакан Олег Николаев паян ятарлӑ хушу кӑларнӑ. Коронавирус, малтан шухӑшланӑ пекех, экономикӑн пур отрасльне те пырса ҫапрӗ. Ҫавна тӗпе хурса ҫӗршыв Президенчӗ Владимир Путин социаллӑ пурнӑҫпа ҫыхӑннӑ хушма мерӑсем йышӑнасси пирки ӗнер пӗлтерчӗ. Ҫавсен шутӗнче ӗҫсӗрлӗх пособийӗпе ҫыхӑнни те пулчӗ. Ӗҫсӗррисене тӳлекен ҫак пособин чи пысӑк виҫи 8 пин тенкӗччӗ. Малашне ӑна 1,5 хута яхӑн ӳстерӗҫ.

Раҫҫей Ӗҫ тата социаллӑ хӳтлӗх министерстви пӗлтернӗ тӑрӑх, ҫӗнӗ йӗрке ака уйӑхӗнчен вӑя кӗрӗ.

Ӗҫсӗррисене тӳлекен пособи виҫи 12 пин те 130 тенкӗ (ку вӑл – пурӑнма кирлӗ чи пӗчӗк укҫа виҫи) пулӗ.

Пенси ҫулне ҫывхаракан ӗҫсӗр ҫынсене тӳлекен виҫе те ҫавӑн чухлех пулӗ. Хальлӗхе унӑн виҫи – 11 пин те 280 тенкӗ.

mediacratia.ru сайтри сӑн

Раҫҫейре коронавирус сарӑлнӑ май мерӑсем йышӑнаҫҫӗ. Чӑваш Енре те ку енӗпе ӗҫлеҫҫӗ. Сӑмах май, хальлӗхе республикӑра 1 ҫын коронавируспа чирлет.

Шупашкар хула администрацийӗ ҫитес вӑхӑтра нумай хваттерлӗ ҫуртсен подъезчӗсене дезинфекцилеме хушнӑ. Ҫак ӗҫе управляющи компанисен тата ТСЖсен тумалла. Урая хлоркӑпа ҫумалла, лифтри пускӑчсене сӑтӑрмалла, алӑк хӑлӑпӗсемпе перилӑсене тасатмаллла.

Управляющи компнийӗсем подъездсенче уйӑхра пӗр хутчен тусан сӑтӑраҫҫӗ, коронавирус сарӑлнӑ май халӗ ав дезинфекцилеме те тивӗ.

Сӑмах май, Шупашкарта троллейбуссене те кунне икӗ хутчен дезинфекцилени пирки ҫырнӑччӗ.

versiya.info сайтри сӑн

МИХсенче Лев Лещенко коронавируспа чирлени пирки хыпар тухнӑ. Арӑмӗпе вӗсем Мускаври Коммунаркӑра, инфекции пульницинче, выртаҫҫӗ-мӗн. Артист реанимацире выртать имӗш, унӑн сывлӑхӗ йывӑр.

«Суя! Ҫакна кам ҫырать – ҫавӑн коронавирус!» - пӗлтернӗ Лев Лещенкӑн ҫывӑх тусӗ Владимир Винокур. Унӑн коронавирус ҫук тесе ӗнентернӗ, ӳпки шыҫнӑран реанимацире процедурӑсем тӑвать-мӗн.

78 ҫулти Лев Лещенко тата 66-ри мӑшӑрӗ Ирина Коммунаркӑра сипленеҫҫӗ. Иккӗшӗн те ӳпки шыҫнӑ иккен. Палӑртмалла: Лев Лещенко нумаях пулмасть АПШран гастрольтен таврӑннӑ. Анчах тӳрех Мускава вӗҫсе килеймен, Францире тепӗр самолета ларнӑ.

photocentra.ru сайтри сӑн

Синоптиксем пӗлтернӗ тӑрӑх, кӑҫал ака уйӑхӗ ӑшӑ та типӗ килӗ. Сывлӑш температури нормӑран пысӑкрах пулмалла. Кунашкалли 1975 ҫулта пулнӑ, кӑҫал та ун пек ҫанталӑк килес шанчӑк пур.

Ака уйӑхӗн пуҫламӑшӗнче кӑштах сивӗтсе илӗ, йӗпе юр ҫума пултарӗ. Анчах хальлхинчи пек юр ҫуса лартмӗ. Пӗрремӗш декада вӗҫлениччен татах сивӗтме пултарӗ.

10-мӗш хыҫҫӑн ӑшӑ та типӗ ҫанталӑк хуҫаланӗ. Тӑпра та типме пултарӗ. Ака уйӑхӗнче ҫуллахи пек ӑшӑ пулас шанчӑк та пур – виҫҫӗмӗш декадӑра сывлӑш температури 20-25 градус таран ӑшӑнӗ.

Анчах ҫу уйӑхӗнчи канмалли кунсенче сивӗтессине пӗлтереҫҫӗ. Ку шӑтса тухнӑ курӑка, ӳсен-тӑрана сиенлетме пултарӗ

Паян ҫӗршыв Президенчӗ Владимир Путин Раҫҫей ҫыннисем патне хӑйне евӗр чӗнӳпе тухрӗ. Унта вӑл коронавируспа ҫыхӑннӑ лару-тӑрӑва хускатрӗ.

Тӗнчипе сарӑлнӑ амака сарасран йышӑнакан мера шутӗнче — ҫынсене пуш уйӑхӗн 28-мӗшӗнчен пуҫласа ака уйӑхӗн 5-мӗшӗччен кантарма йышӑнни. Килте ларншӑн укҫа тӳлӗҫ. Тӳрех палӑртар: лавккасем, банксем, аптекӑсем, пульницӑсем хупӑнмӗҫ, транспорт ҫӳреме чарӑнмӗ, тӳре-шара ӗҫлӗ. «Халӗ чи хӑрушсӑрри — килте ларни», — тенӗ президент. Паянах Владимир Путин ятарлӑ хушӑва алӑ пуснӑ.

Ӗҫсӗр ҫынсен пособине ӳстересси пирки те каланӑ паян ҫӗршыв ертӳҫи. Тупӑш 30 процентран ытларах чакнисене ипотека каникулӗ парасси, банкра укҫа тытакансене тупӑшран илекенсен налук тӳлеттересси (кӗмӗл виҫи 1 миллион тенкӗрен иртсен) тата ытти хӑш-пӗр самант пирки те каланӑ Владимир Путин.

sdo.gounpopu6.ru сӑнӳкерчӗкӗ

Коронавируса пула шкулсенче тата аслӑ шкулсенче вӗрентме пӑрахасси пирки асӑрхаттарчӗҫ. Уроксемпе занятисене инҫет вӗрентӳ мелӗпе епле йӗркелӗҫ? Компьютер тата тӗнче тетелне тухма май ҫуккисен мӗн тумалла? Вӗсем тантӑшӗсенчен катӑк пулӗҫ-и? Тусӗсем вӗреннӗ вӑхӑтра программӑна ӑша хываймӗҫ-и? Ҫак тата ытти нумай ыйту ҫуралать паян ашшӗ-амӑшӗн те, вӗрентекенсен те. Аслӑ шкулта дистанци мелӗпе вӗрентекен пӗр педагог ку ӗҫе вӗсен, преподавательсен, хӑйсен тӗллӗн пурнӑҫлама тивнине пӗлтернӗччӗ.

«Хӗрӳ линие» Чӑваш Республикин Вӗренӳ институтӗнче уҫнӑ. Унӑн телефон номерӗ — 8 (8352) 58-37-89. Унсӑр пуҫне Раҫҫей Ҫутӗҫ министерствине те шӑнкӑравлама юрать. Унтисен телефон номерӗ — +7 (800) 200-91-85. Шӑнкӑравлама учительсен те, ашшӗ-амӑшӗн те юрӗ.

Телекӑларӑм саманчӗсем

Ҫак кунсенче Чӑваш Енри ҫемьесем пӗри хыҫҫӑн тепри федераци каналне лекеҫҫӗ. Шел те, мухтанмалли-савӑнмалли сӑлтавпа мар. Ҫемьесенчи пӑтӑрмахлӑ историе пула ҫакланаҫҫӗ вӗсем.

Ӗнер, пуш уйӑхӗн 24-мӗшӗнчи Людмила Степанова пулчӗ. Кӑларӑм пуҫламӑшӗнче вӑл хӑйӗн ачисене тавӑрса пама тата хӑйӗн ҫемйинчен хӑпма ыйтрӗ.

Ӗнерхи кӑларӑмра кӑтартнӑ ҫичӗ ача амӑшӗн тӗпренчӗкӗсенчен пӗри ҫеҫ, сакӑр уйӑхри пепке, хӑйӗнпе иккен. Ыттисем тӗрлӗ ҫӗре саланнӑ. Тӗрӗсрех каласан, е реабилитаци центрӗнче, е ҫынсем ӳстереҫҫӗ. Кам — Крымра, кам — Улатӑрта. Хӗрарӑм амӑш укҫипе Сӗнтӗрвӑрри районӗнче икӗ пӳлӗмлӗ хӑтсӑр хваттер туяннӑ. Анчах ӑна юсама халӗ те пуҫӑнман. Ҫемье ӑҫта кирлӗ, пурӑнмалли кӗтес унта тара илсе пурӑнать. Опекӑпа попечительство органӗсем ҫемье ҫинчен пӗр ырӑ сӑмах та калаймаҫҫӗ.

top.st сӑнӳкерчӗкӗ

Чӑваш Енре пурӑнакан ҫынсен, ватлӑх енне сулӑннисен (теприсене ку сӑмах, тен, килӗшмест те пулӗ-ха. Анчах ҫамрӑк тенипе яшланаймӑпӑр), карантинта пулмалла.

65 ҫултан аслӑраххисем коронавирус чирне йывӑррӑн тӳссе ирттернине тухтӑрсем текех калаҫҫӗ-ха. Ҫул кайнӑҫем сывлӑх тӗрекленсе пыманнине ӑнланма пулать. Тӗрлӗ амак аптӑратакан ватӑсем инфекци чирӗсене йывӑррӑн тӳссе ирттереҫҫӗ. Ҫавӑн пек чух вӗсен ытти чирӗ шала кайма пултарать.

Аслӑ ҫулхисен карантинта пулмалли вӗсене чирлеттерес маррипе ҫыхӑннӑ.

Сӑмах май, паянхи ир тӗлне пирӗн республикӑра 419 ҫынна тухтӑрсем сӑнаса тӑраҫҫӗ. Коронавируспа чирли малтанхиллех пӗр ҫын ҫеҫ. Республикӑн Сывлӑх сыхлав министерстви пӗлтернӗ тӑрӑх, пӗтӗмпе 694 ҫынна тӗрӗсленӗ.