foto.cheb.ru сӑнӳкерчӗкӗ

Ҫӗртме уйӑхӗн 19 тата 20-мӗшӗсенче халӑха ҫӑва ҫине турттаракан общество транспорчӗ ятарлӑ графикпа ӗҫлӗ.

Муниципалитетсем хушшинчи 249-мӗш маршрутпа (вӑл вокзал ҫумӗнчи «Цветы» (чӑв. Чечексем) лавкка патӗнчен ҫула тухать) – Явӑш (хула масарӗ)» ҫӳрекен автобуссен йышне 20 единицӑна ҫитерӗҫ. Вӑл маршрутпа автобуссем ирхи 6 сехетрен пуҫласа 20 сехетчен хутлӗҫ.

30-мӗш номерлӗ автобусӑн ҫулне вӑхӑтлӑха ылмаштарӗҫ. Вӑл Чукун ҫул вокзалӗ умӗнчи вокзал умӗнчи лапамран Явӑш ялӗ патӗнчи ҫӑва патне кайӗ. Ку маршрутпа 28 автобусран кая мар ҫӳрӗ. 30-мӗш маршрутпа 10 автобус унчченхилле ҫулпах ҫӳрӗ.

Вӑрнар шосси хӗрринче вырнаҫнӑ масар патне 46-мӗш маршрутпа ҫӳрекен 8 автобус турттарӗ. Заовражнӑй урамри ҫӑва патне 52-мӗш маршрутпа кайма май килӗ.

Муниципалитетсем хушшинчи 331-мӗш «Шупашкар-Ҫӗнӗ Шупашкар» маршрут Карачурана ҫити ҫӳрӗ. Лини ҫинче 20 единица транспорт пулӗ.

Шӑматкунпа вырсарникун 5:00 сехетрен пуҫласа 20:00 сехетчен Улатӑр шоссине Г. Айги урамӗнчен тытӑнса Карачура патӗнчи чукун ҫул каҫҫи таран хупласа хурӗҫ.

Ӗнер, ҫӗртме уйӑхӗн 17-мӗшӗнче, Ҫеҫпӗл Мишши ячӗллӗ Чӑваш патшалӑх ҫамрӑксен театрӗ черетлӗ 88-мӗш сезона «Уйӑпсем те шӑнса хытрӗҫ» спектакльпе хупнӑ.

Спектакль умӗн Чӑваш Енри Театр ӗҫченӗсен союзӗн ертӳҫи Сергей Павлов пӗрлешӗвӗн чи пысӑк наградипе — медальпе — чысланӑ.

«Чӑваш Енӗн театр ӳнерне аталантарма пысӑк тӳпе хывнӑшӑн» медальпе тата асӑнмалӑх парнепе Чӑваш Республикин халӑх артисчӗсене Валентина Суриковӑна, Лидия Назаровӑна тата Чӑваш Республикин тава тивӗҫлӗ артисткине Раиса Поляковӑна чысланӑ.

Союз йышне кӗнӗ ҫамрӑк артистсене: Дмитрий Михайлова тата Надежда Полячихина-Сергеевӑна — пӗрлешӗвӗн пайташӗ пулнине ӗнентерекен удостоверенисем панӑ.

Шупашкар районӗнчи Чӑрӑшкассинчи вӑтам шкулта (директорӗ — Ирина Гаврилова) Виктор Чугаров режиссёрӑн «Чӑваш чӗлхи» фильмне кӑтартнӑ.

Аса илтерер: Виктор Чугаровӑн ӗҫне кӑҫалхи ака уйӑхӗн 24-мӗшӗнче Чӑваш Ен Наци вулавӑшӗнче хӑтланӑччӗ.

Режиссёр Фейсбукра пӗлтернӗ тӑрӑх, фильма ӳкерме Чӑрӑшкассинчи шкулта пуҫланӑ. Унта ачасене чӑваш чӗлхипе литературӑна юратма Алина Николаева чунтан тӑрӑшса чылай ҫул вӗрентет.

Ачасем фильмпа кӑсӑкланса паллашнӑ, Виктор Чугаров ыйтӑвӗсене тупӑшса тенӗ пек хуравланӑ.

Режиссёра шкул дирекцийӗ Тав хучӗпе хавхалантарнӑ.

lenta.ru сайтри сӑн

Тӑвай районӗнчи сӗт савучӗ панкрута тухнӑ. Вӑл виҫӗ ҫул та ӗҫлеймен. Элӗк районӗнчи сӗт поставщикӗ ӑна пункрута кӑларма ыйтнӑ.

Нарӑс уйӑхӗн 1-мӗшӗнче Арбитраж сучӗ ҫакна йышӑннӑ, предпряитие сӑнама хушнӑ. Ҫӗртме уйӑхӗн 10-мӗшӗнче суд савута панкрут тесе йышӑннӑ. Конкурс производствине 6 уйӑхлӑха уҫнӑ – раштав уйӑхӗн 10-мӗшӗччен.

Палӑртмалла: Тӑвайри сӗт савучӗ Элӗк районӗнчи «Иволга-Молоко» поставщик умӗнче 1 миллион тенкӗ парӑма кӗнӗ. Пӗлтӗр ҫулла суд ӑна татмалла тесе йышӑннӑ. Анчах парӑм ҫаплипех юлнӑ.

"Про Город" сайтри сӑн

Ҫӗнӗ Шупашкарта ача ҫӑмӑл машина кустӑрми айне пулнӑ. Авари Собор лапамӗнче пулнӑ.

Ку паян 17 сехетре Собор лапамӗнче 14-мӗш шкул ҫывӑхӗнче пулнӑ. Ҫынсем курнине ӗненес тӗк, 10 ҫулти хӗрачана ҫӑмӑл машина ҫапса хӑварнӑ.

Вырӑна ҪҪХПИ инспекторӗсем, васкавлӑ медпулӑшу килнӗ. Хӗрача асфальт ҫинче выртнӑ, тухтӑрсем ӑна пулӑшу кӳнӗ.

Пӗлтӗр утӑ уйӑхӗн 9-мӗшӗнче Канаш районӗнчи Вӑрӑмпуҫ ялӗнче 6-ри арҫын ачапа 5 ҫулти йӑмӑкӗ аслӑк ҫинче шӑрпӑкпа вылянӑ. Утӑ ҫунма тытӑннӑ, сарай ҫине куҫнӗ. Ачасем ҫулӑма сӳнтереймен, тухса тарнӑ, кун пирки никама та каламан.

Пушар тухнине амӑшӗ кая юлса курнӑ. Ҫулӑм вите-сарая тӗп тунӑ, кӳршисен хуҫалӑхӗ ҫине куҫнӑ. Вӗсен те ҫунса кайнӑ.

Кӳрши тӑкака саплаштармалла тесе суда тавӑҫ тӑратнӑ. Суд ун майлӑ пулнӑ: ачасен амӑшне 1 миллион та 103 пин те 405 тенкӗ тӳлеттерме йышӑннӑ. Кунсӑр пуҫне расхутсемшӗн тӳлемелле: 18 пин.

autogear.ru сайтри сӑн

Атӑлҫи тӑрӑхӗнчи ытти республикӑпа танлаштарсан, пирӗн патра апат-ҫимӗҫ хакӗ питех пысӑк мар. Юлашки вӑхӑтра ҫынсем ҫӗрулми, кишӗр хакӗ хӑпарнӑшӑн кӑмӑлсӑрланнӑ. Чӑваш Ен ҫӗрулми хакӗпе Раҫҫейри регионсен хушшинче 6-мӗш вырӑн, Атӑлҫи тӑрӑхӗнче 10-мӗш вырӑн йышӑнать.

Чӑваш Енре, Атӑлҫи тӑрӑхӗнчи регионсемпе танлаштарсан, пӗҫернӗ, тӗтӗмленӗ кӑлпасси хакӗсем чи йӳннисем. Ҫӗршывра республика ку енӗпе 2-мӗш вырӑн йышӑнать.

Ҫавӑн пекех шурӑ ҫӑнӑх, помидор, ҫӑмарта ҫӑкӑр, услам ҫу, сыр йӳнӗрех.

forum.na-svyazi.ru сӑнӳкерчӗкӗ

Кӑҫал Ҫӗрпӳ ярмӑркки утӑ уйӑхӗн 8-11-мӗшӗсенче иртӗ. Ӑна хӑҫан тата епле уявлассине нумаях пулмасть ятарлӑ ларура сӳтсе явнӑ. Ку хыпара Ҫӗрпӳ районӗн администрацийӗ Фейсбукра пӗлтернӗ.

Вырӑнтисем хыпарланӑ тӑрӑх, суту-илӗве йӗркелессине ҫеҫ мар (хальхи вӑхӑтра тавара таҫта та тупса илме пулать. Укҫа пултӑр ҫеҫ), культурӑпа спорт мероприятийӗсене те сӳтсе явнӑ.

Суту-илӳ палаткисемпе пӗрлех ача-пӑча хули пулӗ, фольклор коллективӗсем пуҫтарӑнӗҫ. Ярмӑрккӑ вӑхӑтӗнче Акатуй та иртӗ. Маттур ҫемьесене Пӗтӗм тӗнчери ҫемье кунӗпе чыслӗҫ.

telegramma.info сӑнӳкерчӗкӗ

Чӑваш Енӗн Патшалӑх Канашне депутатсене хӑҫан суйлассине палӑртнӑ.

Паян чӑваш парламенчӗн улттӑмӗш созыври депутачӗсем черетлӗ аллӑмӗш сессийӗ иртнӗ.

Федераци саккунӗнче палӑртнӑ тӑрӑх, Чӑваш Республикин Патшалӑх Канашӗн депутачӗсене уйӑхӑн виҫҫӗмӗш вырсарникунӗнче суйламалла. Чӑваш парламенчӗн депутачӗсен полномочийӗ Патшалӑх Думине депутатсене суйламалли ҫул вӗҫленет. Апла пулсан Патшалӑх Думине тата республикӑн Патшалӑх Канашне депутатсене пӗр кунта суйлӗҫ. Тепӗр майлӑ каласан, суйлав авӑн уйӑхӗн 19-мӗшӗнче иртӗ.

Шупашкарти «Мегаполис» коммерци банкӗн вӑхӑтлӑх администрацийӗ палӑртнӑ тӑрӑх, асӑннӑ кредит учрежденине ятарласа панкрута кӑларни палӑрнӑ.

Банкӑн лицензине туртса иличченхи виҫӗ ҫулта кредит организацийӗ туса ирттернӗ операцисемпе ытти сделкӑна тишкернӗ. Сӑмахран, пысӑк ликвидлӑ активсенех тавӑрса парас шанчӑк ҫукрах кредитпа ылмаштарнине асӑрханӑ. Ҫапла майпа банк 346 миллион та 904 пин тенкӗлӗх тӑкак тӳснӗ.

Аса илтерер: «Мегаполис» банка кӑҫалхи пуш уйӑхӗн 26-мӗшӗнче лицензисӗр хӑварнӑ. Ҫӗртме уйӑхӗн 7-мӗшӗнче Чӑваш Енӗн Арбитраж сучӗ панкрут тесе йышӑннӑ.