Ҫурла уйӑхӗн 22-мӗшӗнче ҫапларах ҫанталӑк пулӗ

Чӑваш Енре ҫак кунсенче шӑрӑх ҫанталӑк тӑрать. Термометрсем паян пирӗн тӑрӑхра 30 градус ӑшӑ кӑтартӗҫ. Улшӑнса тӑракан пӗлӗтлӗ ҫанталӑк пулнӑран шӑрӑха ытлашши туймӑпӑр. Ыран, ҫурла уйӑхӗн 22-мӗшӗнче, Чӑваш Енри ҫанталӑк улшӑнӗ.

Чылай вӑхӑт шӑрӑх тӑнӑ хыҫҫӑн вӑйлӑ ҫумӑр ҫума, аслати авӑтма, вӑйлӑ ҫил вӗрме пултарӗ.

Ҫитес эрнере пирӗн тӑрӑхра сулхӑнрах ҫанталӑк тӑрӗ. Кӑнтӑрла сывлӑш температури 20-25 градус пулӗ. Ҫитес канмалли кунсенче кӗске вӑхӑтлӑха каллех шӑрӑх килӗ. Синоптиксем ун чухне 30 градус ӑшӑ пулассине систереҫҫӗ.

ШӖМ тунӑ сӑн

Паян ирхи 4 сехетре Шупашкарта хӗрарӑм машинӑна тытса чарас тесе вилнӗ. Ку Кадыков урамӗнчи 6-мӗш ҫурт ҫывӑхӗнче пулнӑ.

Иртен-ҫӳрен ирхине картишре хӗрарӑм вилли выртнине асӑрханӑ. Пӑтӑмрах мӗнле пулса иртнине ҫынсем курнӑ. Хӗрарӑм тапраннӑ «Хендай» машинӑна чарас тесе алӑк хӑлӑпӗнчен ярса тытнӑ. Водитель чарӑнман, малаллах кайнӑ. Хӗрарӑм вара вилмеллех суранланнӑ.

Ҫав водителе ҫийӗнчех тупнӑ. Унӑн машини ҫав урамрах 16-мӗш ҫурт умӗнче ларнӑ. 30 ҫулти арҫын ӳсӗр курӑннӑ. Ӑна тытса чарнӑ.

"Про Городран" илнӗ сӑн

Паян кӑнтӑрла 12 сехет тӗлӗнче Шупашкарти пляжра арҫын путса вилнӗ. Кун пирки ҫынсем «Про Город» хаҫата ҫийӗнчех каласа кӑтартнӑ.

Вӗсем каланӑ тӑрӑх, каччӑ хӗре ишме вӗрентнӗ. Унччен те пулман, хӑй шыв айне анса кайнӑ. Вӑл 24 ҫулта пулнӑ.

Каччӑпа хӗр шыва кӗмелли вырӑнтах пулнӑ, вӗсем юраман вырӑналла кӗрсе кайман. Ахӑртнех, вӗсем ишнӗ вырӑнта чӑнкӑ ҫыран, каччӑ тӑрук анса кайнӑ. Пляжри ҫынсем ӑна тупма хӑтланнӑ, анчах усӑсӑр. Ҫӑлавҫӑсем те шырама пуҫланӑ.

special.bhub.com.ua сайтри сӑн

Ҫу уйӑхӗн 29-мӗшӗнче 29-мӗш эрнере ҫуралнӑ хӗрачана ашшӗ-амӑшӗ Дия ят панӑ. Вӑл 980 грамм тайнӑ. Тухтӑрсем ӑна пӑхнӑ, йӑлтах йӗркеллӗ пулнӑ.

Анчах пӗр кун ачан пыршӑлӑхӗ ӗҫлеме пӑрахнӑ. Вӑл ҫиеймен, тула каяйман. Ӑна часрах операци тума тивнӗ. Ӑна Республикӑри ача-пӑча клиника пульницин тухтӑрӗсем ирттернӗ.

Халӗ пӗчӗк хӗрача хӑйне лайӑхах туять. Ӑна киле каларма хатӗрлеҫҫӗ. Аса илтерер: нумаях пулмасть 603 грамм ҫуралнӑ ачана тухтӑрсем пӑхса ӳстерни пирки пӗлтернӗччӗ.

cap.ru сӑнӳкерчӗкӗ

Елчӗк районӗнче пурӑнакан нумай ачаллӑ Исаковсем патшалӑхран ҫурт тивӗҫӗс тесе 2014 ҫултанпа черетре тӑнӑ. Вӗсен ӗмӗчӗ тинех пурнӑҫланнӑ.

Нумаях пулмасть вӗсем икӗ хутлӑ ҫурт уҫҫине илнӗ, ҫӗнӗ пӳрт уявне паллӑ тунӑ. Ҫурт лаптӑкӗ 123,5 тӑваткал метрпа танлашать. Ӑна тумашкӑн 3 миллион та 261 пин тенкӗ уйӑрнӑ. Подрядчик ӗҫе кӗске вӑхӑтра хӑвӑрт туса пӗтернӗ.

Павелпа Тамара 7 ача ҫуратнӑ. Асли качча кайнӑ, хӑйӗн те ача пур. Тӑватӑ ывӑлӗ шкулта вӗренет. Кӑҫал хӗрӗ Ангелина парта хушшине ларма хатӑрленет. Семен килте амӑшӗпе-ха.

Унччен Исаковсем 40 тӑваткал метрлӑ ҫуртра пурӑннӑ. Туалет тулта пулнӑ. Халӗ ҫӗнӗ ҫуртра пӗтӗм хӑтлӑх пур.

Ҫурла уйӑхӗн 18-мӗшӗнче 14 сехет те 20 минутра пӗрлехи диспетчер службине Ҫӗмӗрлери ҫӳп-ҫап полигонӗ ҫунни пирки шӑнкӑравласа пӗлтернӗ.

Вырӑна пушарнӑйсем ҫитнӗ. Вӗсем тата свалкӑра ӗҫлекен ҫынсем ҫулӑма сӳнтерме пултарнӑ. Пушар вырӑнне Ҫӗмӗрле районӗн администрацийӗн пуҫлӑхӗ Валерий Шигашев та ҫитнӗ.

Аса илтерер: кӑҫал ҫулла Улатӑрти ҫӳп-ҫап купи нумай вӑхӑт ҫунчӗ. Унти ҫулӑмпа пушарнӑйсем 1,5 уйӑх кӗрешнӗ.

deep-review.com сайтри сӑн

Ҫурла уйӑхӗн пуҫланнӑранпа Чӑваш Енре 177 ҫыннӑн пурнӑҫӗ кӑшӑлвируса пула татӑлнӑ. Юлашки талӑкра 9 ҫын вилнӗ. Ку таранччен чиртен 1897 ҫын сывалайман.

Юлашки талӑкра 80 ҫын чирленине палӑртнӑ. 68 ҫын вара сывалнӑ. Паянхи кун тӗлне республикӑра 30830 ҫын кӑшӑлвируспа чирленӗ. Вӗсенчен 28041-шӗ сывалнӑ. Кӑшӑлвирус диагнозӗ ҫирӗпленнӗ кашни 16-мӗш ҫын вилнӗ.

Хальхи вӑхӑтра стационарта тата килте амбулатори мелӗпе 892 пациент кӑшӑлвирусран сипленет.

Чӑваш патшалӑх филармонине юсаса ҫӗнетесси йывӑррӑн пулса пырать тесен те ытлашши йӑнӑшмастпӑр пулӗ. Маларах Питӗрти «Спецстрой» организаци республикӑн Культура, национальноҫсен ӗҫӗсен тата архив ӗҫӗн министерствипе судлашнине пӗлтернӗччӗ. Аса илтерер: организаци хӑйӗн тивӗҫне пурнӑҫланӑ, анчах саккасҫӑ ӑна тӳлесе пӗтермен-мӗн. Парӑм виҫи 6,651 миллион тенкӗ тӑрса юлнӑ. Суд парӑма шыраса илме йышӑннӑ.

Филармоние малалла юсаса ҫӗнетессипе ирттернӗ конкурсра Шупашкарти подряд организацийӗ, «3-мӗш стройтрест», ҫӗнтернӗ. Вӑл 157,7 млн тенкӗпе ӗҫлеме килӗшнӗ. Конкурса тек хутшӑнакан пулман. Анчах халӗ контракта алӑ пусассине вӑхӑтлӑха чарса лартнӑ.

Екатеринбурги «Джули» фирма аукцион документацине закупкӑпа ҫыхӑнман оборудованипе тивӗҫтерессине кӗртнӗ тесе шухӑшлать иккен. Республикӑн Культура министерстви, сӑмахран, апатланмалли сӗтеле, ҫемҫе пукана, тӗрӗслевпе касса машинине, пӗчӗк хумлӑ кӑмакана, кофе вӗретмелли машинӑна тата ыттине кӗртнӗ.

Ҫав япаласене строительство материалӗсемпе пӗрле илни конкурса хутшӑнакансен правине пӑсать тесе ҫӑхавланине монополипе кӗрешекенсем ҫурла уйӑхӗн 24-мӗшӗнче пӑхса тухӗҫ.

Малалла...

forum.na-svyazi.ru сайтри сӑн

Атӑл леш енче Мари вӑрманӗсем ҫунма тытӑннӑ. Пушар вӑйлах алхасать. «Ҫыхӑнура» форумра каҫхине ӳкернӗ сӑнсене вырнаҫтарнӑ. Сӑнсене Карась кӳлӗ патӗнче ӳкернӗ. Вӗсене пӑхсанах паллӑ: пушар питӗ пысӑк лаптӑкра алхасать.

Пушар лаптӑкӗ, шел те, пысӑклансах пырать. Ӗнер Сосновый Бор поселокӗнчи ҫынсене эвакуациленӗ.

Шупашкарта тӳррӗн каҫас тӑк ҫунакан вырӑн пирӗнтен 40 ҫухрӑмра.

Хула администрацийӗн экс-пуҫлӑхӗ рашчара ӗҫлет. Иртнӗ уйӑхӑн 21-мӗшӗнчен Ҫӗнӗ Шупашкарти «Ельниковская роща» (чӑв. Ельниково рашчи) автономи учрежденине Валерий Андреев ертсе пыма тытӑннӑ. «Ҫыхӑнура» порталта хыпарланӑ тӑрӑх, хальлӗхе — пуҫлӑх тивӗҫне пурнӑҫлакан пулса.

Валерий Викентьевич Ельниково рашчинче пуҫлӑх пулса унччен ӗҫленӗ. Унпа контракта 2019 ҫулхи ҫӗртме уйӑхӗнче татнӑ. Эпир маларах асӑннӑ ҫӑлкуҫ пӗлтернӗ тӑрӑх, ӗҫ килӗшӗвне пӑрахӑҫланин официаллӑ майпа ҫирӗплетмен сӑлтавӗ — йывӑҫсене каснӑ пирки прокуратура тӗрӗслев пуҫарни.

Андреев Ҫӗнӗ Шупашкар хула администрацийӗн пуҫлӑхӗ пулса та тӑрӑшнӑ. Ҫав лава 2002 ҫулхи нарӑс уйӑхӗнчен тытӑнса 2008 ҫулхи пуш уйӑхӗччен туртнӑ. Халӑхра ҫӳрекен сӑмах-юмаха ӗненсен, Валерий Андреев отставкӑна кайнин сӑлтавӗ — Шупашкарпа Ҫӗнӗ Шупашкара пӗрлештерессипе ирттернӗ референдума тивӗҫлипе йӗркелеме пултарайманни.

Аса илтерер: 2008 ҫулхи референдумра Шупашкар ҫыннисен 75 проценчӗ спутник-хулапа пӗрлешес тенӗ, Ҫӗнӗ Шупашкар ҫыннисен 61 проценчӗ хирӗҫ сасӑланӑ. Вӑл вӑхӑтра Чӑваш Ене Николай Федоров ертсе пынӑ.

Кайран Валерий Андреев тӗлӗшпе сӗтев илнӗ, улталанӑ, ӗҫ вырӑнӗпе усӑ курнӑ тесе пуҫиле ӗҫ пуҫарнӑ.

Малалла...