Следстви комитечӗ тунӑ сӑн

Следстви комитечӗн Ҫӗмӗрлери районсен хушшинчи уйрӑмӗн ӗҫченӗсем пушарта нимсӗр юлнӑ нумай ачаллӑ ҫемьене пулӑшнӑ. Вӗсем укҫа-тенкӗ, тумтир, усӑ курма кирлӗ япаласем пухнӑ та ҫемьене пырса панӑ.

Улатӑр тӑрӑхӗнчи Алтышево ялӗнче пурӑнакан 3 ачаллӑ ҫемье нарӑсӑн 26-мӗшӗнче ҫуртсӑр юлнӑ. Пушар ӑна тӗппипех тӗп тунӑ. Инкекре никам та шар курман. Анчах ҫемьен халӗ тӑванӗсем патӗнче пурӑнма тивет.

Нумай ача амӑшӗ Следстви комитечӗн ӗҫченӗсене тав сӑмахӗ каланӑ.

"Лиза Алерт" сайтри сӑн

Шупашкарта 36 ҫулти арҫынна пӗр уйӑха яхӑн шыраҫҫӗ. Евгений Соколов килтен нарӑс уйӑхӗн 11-мӗшӗнче тухса кайнӑ. Унтанпа унран хыпар ҫук. Вӑл мӗнле майпа ҫухални те паллӑ мар.

Евгений - ҫӳллӗ, хыткан арҫын. Ҫӳҫӗ хура, куҫӗ симӗс. Ун пирки мӗн те пулин пӗлекенсене 8-800-700-54-52 е 112 номерпе шӑнкӑравлама ыйтаҫҫӗ.

Сӑмах май, пушӑн 15-мӗшӗнче «Лиза Алерт» Наци вулавӑшӗнче ҫынсене шырама пулӑшас текенсемпе тӗл пулаҫҫӗ. Мероприяти 18 сехет ҫурӑра пуҫланать.

"Контактри" сӑн

Виҫӗ ача ӳстерекен Эльвирӑпа Михаил Павловсем пӳрт маччи ҫинче чечексем ӳстереҫҫӗ. Хӑйне евӗр пахчана вӗсем хӑйсем хута янӑ. Унта чун ӑшшине кӑна мар, 300 пин тенкӗ те хывма тивнӗ.

Маччана вӗсем ӑшӑнмалла тунӑ, электричество кӗртнӗ. Унта ӳсен-тӑран хӑйне питӗ лайӑх туять.

Павловсем мачча тӑрринче тюльпансем, чечек калчисем ӳстереҫҫӗ, кайран вӗсене сутаҫҫӗ. «Малтан мачча пушӑччӗ, халӗ вара унта пирӗн пӗчӗк хуҫалӑх», - тет кил хуҫи.

cheb.mk.ru сайтри сӑн

Суд приставӗсен федераци службин Чӑваш Енри управленийӗ Полина ятлӑ бота ӗҫлеттерме пуҫланӑ. Унпа ҫак номерпе ҫыхӑнма пулать: 8 (800) 303-00-00.

Машина интеллекчӗ шӑнкӑравлакан ҫыннӑн сассине ӑнланса ун валли хурав хатӗрлет. Суд приставӗсен службин сайтӗнче парӑм пирки пӗлме пулать. Полина ботпа та ҫаплах - анчах вӑл ыйтусене сасӑпа хуравлать. Бот верификаци валли ИНН тата СНИЛС номерӗсене ыйтать. Кайран шӑнкӑравлакан ҫыннӑн служба базинчи тулли статусӗ пирки калать.

Прокуратура архивӗнчи сӑн

Вӑрмар округӗн арҫыннине йывӑҫ каснӑшӑн суд тӑвӗҫ.

Пӗлтӗр юпа уйӑхӗнче вӑл Тӑвай округӗнчи вӑрманта пулнӑ. Унта 10 юман тата 4 вӗрене каснӑ. Пӗрисем йӗркеллисемех пулнӑ, теприсем - хӑрнисем. Анчах унӑн йывӑҫ касма паракан докумен пулман.

Унтан арҫын йывӑҫсене вакланӑ, пӗр пайне хӑйӗн машинипе тиесе кайнӑ, теприсене кайран килсе килме шутланӑ. Анчах вӑрман инспекторӗсем ӑна тытса чарнӑ.

Арҫын вӑрман фондне кӳнӗ тӑкака, 67 пин тенке, саплашарнӑ. Ҫапах унӑн судра явап тытма тивӗ.

"Чӑваш Ен" ПТРК видеовӗнчен илнӗ скриншот

Ҫӗмӗрле тӑрӑхӗнчи Якуртушкӑнь ялӗнчи Илья Сафонов Пӗтӗм Раҫҫейри «Сырӑш-2024» конкурсра ҫӗнтернӗ. Ҫамрӑк Чӑваш Енӗн Культура министерствинче тӑрӑшать.

Арҫын 5 ҫул ӗнтӗ йывӑҫран тӗрлӗ хатӗрсем, эрешсем касса кӑларать. «Ку ӑсталӑх ӑна юнпа куҫнӑ темелле. Аслашшӗпе асламӑшӗ хӑва хуллинчен хуҫалӑхра кирлӗ тӗрлӗ япала ҫыхнӑ», — тесе пӗлтернӗ «Чӑваш Ен» патшалӑх телерадиокомпанийӗ.

«Ӑста кулленхи пурнӑҫра усӑ курмалли хатӗрсем ӑсталать, ытларах чухне – савӑт-сапа. Кашни япалана хӑйне майлӑ тума тӑрӑшать», — хыпарланӑ маларах асӑннӑ ҫӑлкуҫра.

Присавсен службин архивӗнчи сӑн

Елчӗк муниципаллӑ округӗнче пурӑнакан 48 ҫулти арҫын «Лада Ларгус» машинӑна кредитпа илнӗ. Анчах вӑл парӑма татма васкаман. Ҫапла парӑм 500 ытла тенкӗ пухӑннӑ.

Малтан приставсем ӑна машинӑна регистраци тӑвассипе ҫыхӑннӑ ӗҫсене тума чарнӑ. Унтан транспорта арестленӗ.

Арҫын машинӑна сутасран хӑраса парӑма йӑлтах татнӑ. Исполнительнӑй сбор суммине те, 40 пин тенке, тӳленӗ.

ШӖМ тунӑ сӑн

Нарӑс уйӑхӗн вӗҫӗнче Муркаш округӗн полици уйрӑмне арҫын пиччӗшӗ ҫухални пирки пӗлтернӗ. Лешӗ эрехпе айкашма юратнӑ. Вӑл нарӑс уйӑхӗн 24-мӗшӗнче ҫӗрле ҫухалнӑ. Ҫемйи ун пирки нимӗн те пӗлмен.

Москакасси ялӗнче пурӑнакан ҫак арҫынна полицейскисем тепӗр кунхине Юнкӑ ялӗнче тупнӑ. Аслӑ инспектор Алексей Илларионов тата Марина Блинова инспектор ӑна полици уйрӑмне илсе ҫитернӗ, вӑл тупӑнни пирки тӑванӗсене пӗлтернӗ.

forum.na-svyazi.ru сайтри сӑн

Красноармейски округӗн пуҫлӑхӗ нарӑс уйӑхӗн 10-мӗшӗнче Санькасси ялӗнче халӑхпа пуху ирттернӗ. Анчах ку тавлашупа вӗҫленнӗ. Тавлашупа кӑна мар-ха. Пуҫлӑх пӗр сусӑра ҫапса амантнӑ.

Пуҫлӑх киличчен ҫынсем ыйтусем хатӗрленӗ. Электричество мӗншӗн сӳнсе ларать? Ҫула мӗншӗн хырмаҫҫӗ? Шыв хӑҫан пулӗ? Пӗр сусӑр, 30 ҫулти арҫын, ҫакна телефонӗ ҫине ӳкерсе тӑнӑ. Ҫынсем ялта йӗрке пултӑр тесе ыйтнӑ. Анчах, видеона пӑхнӑ тӑрӑх, округ пуҫлӑхӗ вӗсене итлемест те, сасӑ хӑпартса калаҫать. Юлашкинчен вӑл сусӑра аллинчен ҫапса телефонне туртса илет.

«Ҫынсем ҫак пухӑва кӗтнӗ вӗт. Пирӗн хушӑра ҫар ӗҫӗсен ветеранӗсем те пур. Пулӑшу вырӑнне ял ҫыннисен пуҫлӑх хӑйне ҫапла тытнине курма тиврӗ», - тенӗ ял ҫыннисем.

Сусӑр ҫын вара пуҫлӑхран халӗ те каҫару ыйтнине кӗтсе илеймен.

Видеопа аялти каҫӑпа кайса паллашма пулать.

ШӖМ тунӑ сӑн

Нарӑс уйӑхӗн 28-мӗшӗнче ирхи 3 сехетре Шупашкарта 19 ҫулти таксист патне икӗ ҫамрӑк пынӑ та хула хӗррине леҫсе яма ыйтнӑ. Унта ҫитсен вара вӗсем водителе багажнике чиксе хунӑ та хӑйсем руль умне ларса Канаша вӗҫтернӗ.

Унта багажникри водитель тарма пултарнӑ. Вӑл кун пирки тӳрех полицие хыпарланӑ.

Машина номерӗсене полици нарячӗсене пӗлтернӗ. Кӗҫех вӗсене асӑрханӑ, чарӑнма ыйтнӑ. Анчах лешсем малалла вӗҫтернӗ, полицейскисем - вӗсем хыҫҫӑн. Каччӑсем тарнӑ чухне ҫул пӑрӑнчӑкӗнче ҫаврӑнса ӳкнӗ. Пӗрне, унччен те судпа айӑпланнӑ 19-ти ҫамрӑка, тытса чарнӑ.