cap.ru сӑнӳкерчӗкӗ

Комсомольски районӗнче вӑрман ҫунма пуҫланӑ.

Юрать, ӑна хӑвӑрт сӳнтернӗ.

61-мӗш кварталта пушар тухни пирки иртнӗ шӑматкун, утӑ уйӑхӗн 15-мӗшӗнче, 15 сехет те 55 минутра пӗлтернӗ. Пушарпа кӗрешекенсем вырӑна хӑвӑрт ҫитнӗ. Тепӗр ҫур сехетрен ҫулӑма сарӑлма чарнӑ, унтан пачах сӳнтернӗ.

Пушар 0,1 гектар ҫинче алхаснӑ. Телее, ҫулӑм вӑрман хуҫалӑхне тӑкак кӳмен.

Халӗ пушар мӗнрен тухнине уҫӑмлатаҫҫӗ.

"Про Город" сайтӗнчи сӑн

Утӑ уйӑхӗн 14-мӗшӗнче Чӑваш Енре арҫын 90 килограмм таякан ҫуйӑн тытнӑ. Кун пирки "Про Город" хаҫата пулӑҫ ывӑлӗ Алексей Малашин пӗлтернӗ.

Пулла Атӑлта, утрав ҫинче, тытнӑ. Вӑл рак ҫине ҫакланнӑ. 90 килограмм таякан пулӑ ҫын ҫӳллӗшӗнчен те пысӑкрах.

djala-gold.com сайтри сӑн

Республикӑра типӗ ҫӗр пулнипе инкеклӗ лару-тӑру режимӗ пулнине палӑртнӑ. Элтепер хушӑва ӗнер, утӑ уйӑхӗн 14-мӗшӗнче, алӑ пуснӑ. Вӑл ятарлӑ хушу тухиччен вӑйра пулӗ.

Малтанлӑха палӑртнӑ тӑрӑх, Канаш, Вӑрмар, Тӑвай тата Куславкка районӗсенче ял хуҫалӑх культурисем типӗрен шар курнӑ, ҫак тӑватӑ районта тӑкак 211,2 миллион тенкӗпе танлашнӑ. Халӗ республикипех ял хуҫалӑхӗсем мӗн чухлӗ тӑкак пулнине шутлаҫҫӗ. Ҫитес вӑхӑтра ЧР Ял хуҫалӑх министерстви ял хуҫалӑхӗсен тӑкакӗсене чакармалли план хатӗрлӗ.

cap.ru сӑнӳкерчӗкӗ

Республикӑра медиахолдинг тӑвасшӑн. Ҫавна май ЧР Элтеперӗ Олег Николаев ӑна туса хурас енӗпе ӗҫлекен ушкӑн йӗркелесси пирки хушу алӑ пуснӑ. Ӑна экономика министрӗ Дмитрий Краснов ертсе пырӗ. Унӑн ҫумӗ Элтепер администрацийӗн ертӳҫи Вячеслав Борисов пулӗ.

Ӗҫлӗ ушкӑнра - 8 ҫын. Ҫав шутра "Чӑваш Ен" ИПК директорӗ Алексей Ключников та пур. Аса илтерер: республикӑра медиахолдинг тӑвасси пирки ун чухне цифра министрӗ пулнӑ Кристина Майнина калаҫу тапратнӑ.

"Лиза Алерт" архивӗнчи сӑн

Йӗпреҫре пурӑнакан Виталий Геннадьевич Кириллова шыраҫҫӗ. Вӑл ҫӗртме уйӑхӗн 23-мӗшӗнченпе киле таврӑнман.

50 ҫулти арҫын 165 сантиметр ҫӳллӗш, хыткан кӗлеткеллӗ. Куҫӗ кӑвак, ҫӳҫӗ ҫырӑ. Килтен тухса кайнӑ чухне мӗн тӑхӑнни паллӑ мар.

Виталий Кириллов пирки мӗн те пулин пӗлетӗр тӗк ҫак номерсемпе шӑнкӑравлама ыйтаҫҫӗ: 8(800)700-54-52 е 112.

v-kurse.ru сайтри сӑн

Ӗнер Республикӑри ҫӑлавпа шырав специалисчӗсен арҫынна вӑрмантан йӑтса тухма тивнӗ. Вӑл кӑмпана кайнӑ та урине хуҫнӑ.

Кӑмпаҫӑ ура хуҫни пирки 12 сехет те 10 минутра шӑнкӑравласа пӗлтернӗ. Ҫӑлавҫӑсене васкавлӑ медпулӑшу ӗҫченӗсем чӗннӗ, мӗншӗн тесен пациента машина таран йӑтса ҫитермелле пулнӑ. Арҫын Шупашкар районӗнчи Лапсар тата Карачура хушшинчи вӑрманта кӑмпа татнӑ чухне урине хуҫнӑ.

Ҫӑлавҫӑсем наҫилккасемпе килсе пациента вӑрмантан илсе тухнӑ, васкавлӑ медпулӑшу машини ҫине хунӑ.

esse.24newnews.ru сайтри сӑн

Шӑмӑршӑ районӗнче Африка мурӗпе чирленӗ хир сыснине тупса палӑртни пирки пӗлтернӗччӗ. Ҫавна май унта карантин пулнине йышӑннӑ. Хушӑва ЧР Пуҫлӑхӗ Олег Николаев алӑ пуснӑ.

Карантин – «Исток» агрофирмӑн «Шӑмаршӑ» сунар вырӑнӗнче. Унта Ветеринари йӗркипе килӗшӳллӗн меропряитисем ирттерӗҫ.

Аса илтерер: Африка мурӗпе чирлӗ хир сыснине сунарҫӑ тытнӑ.

noav.ru сайтри сӑн

Чӑваш Енре васкавлӑ медпулӑшу водителӗсене уйӑхсерен хушса тӳлеме тытӑнӗҫ. Ҫӗнӗ пулӑшӑва кӑҫалхи кӑрлач уйӑхӗн 1-мӗшӗнчен пама йышӑннӑ.

Водительсене уйӑхсерен 4,5 пин тенкӗ хушса тӳлӗҫ. Аса илтерер: кӑҫал пуш уйӑхӗн вӗҫӗнче Шупашкарти васкавлӑ медпулӑшу водителӗсем видео ӳкерсе тӗнче тетелне вырнаҫтарнӑ. Вӗсем пӗчӗк шалу пулсан машина валли запчаҫсене, ытти материала, хӳтӗлев формисене хӑйсем туяннине каланӑ. Кун хыҫҫӑн вӗсене преми пама пӑрахнӑ-мӗн.

РФ Следстви комитечӗн пуҫлӑхӗ Александр Бастрыкин ку тӗслӗх тӗлӗшпе тӗрӗслев ирттерме хушнӑ. Темиҫе эрнерен ЧР сывлӑх сыхлавӗн министрӗ Владимир Степанов коллетивпа тӗл пулнӑ. Унта вӑл водительсене тӳлевсем пирки йышӑну тӑвассине кӗтме, служба ҫырӑвӗсем ҫырма хушнӑ.

cap.ru сайтри сӑн

Шӑмӑршӑ районӗнче «Исток» агрофирмӑн сунар вырӑнӗнче тытнӑ хир сыснин Африка мурӗ пулнине палӑртнӑ.

Тытнӑ хир сыснине Чӑваш Республикин ветлабораторине тӗрӗслеме ӑсатнӑ. Унӑн Африка мурӗ пулни чӑнах та ҫирӗпленӗ. Ҫавна май Патшалӑх ветеринари служби ҫав вырӑнта карантин йышӑнма хушу проектне хатӗрленӗ. Ӑна йышӑнсан блок-постсем вырнаҫтарӗҫ. Хальхи вӑхӑтра Африка мурне тупнӑ вырӑнта ятарлӑ отряд ӗҫлет.

mincult12.ru сайтри сӑн

Муркаш районӗнчи Амоксар утравӗнче, Атӑл варринче, Мари Элти археологсем шырав ирттернӗ те 11-мӗш ӗмӗрти вилтӑприсене тупнӑ. Ку ӗҫе Мари археологи экспедицийӗ тата нимеҫӗсем пурнӑҫланӑ.

Вӗсем вилтӑприсенче алка-эреш, хӗҫ-пӑшал, ӗҫ хатӗрӗ, антропологи материалӗсем тупнӑ. Археологсем палӑртнӑ тӑрӑх, инвентаре тата виле пытарнин йӑли-йӗркине пӑхсан вилтӑприсем марисенни пек. Ҫапах урӑхлараххисем те пур.

Аса илтерер: утӑ уйӑхӗн 8-мӗшӗнче кӑнтӑрла Амоксар утравӗ ҫинче пушар тухни курӑннӑ.