cap.ru сӑнӳкерчӗкӗ

Паян ирхине, 8 сехет те 44 минутра, Йӗпреҫ районӗнчи Костер поселокӗнче дача ҫуннине асӑрханӑ. Пушара тепӗр сехетрен сӳнтернӗ. Анчах унччен 3 дача ҫунса кайнӑ.

Юрать-ха, пушартан шар курнисем, суранланнисем пулман. Халӗ ҫулӑм епле майпа тухнине тӗпчеҫҫӗ.

Палӑртмалла: ҫуркунне пуҫланнӑранпа республикӑра дачӑсем пӗрре мар ҫуннӑ. Ытларах чухне инкек типӗ курӑк ҫунтарнине пула сиксе тухать.

ШӖМ архивӗнчи сӑн

Ҫӗнтерӳ кунӗ тӗлне Чӑваш Енри ветерансене 10 пин тенкӗ парӗҫ. Кӑҫал ӑна 100 ҫын тивӗҫӗ. Вӗсем - вӑрҫӑ ветеранӗсемпе сусӑрӗсем.

Ҫын шутне ака уйӑхӗн 1-мӗшӗнчи кӑтартусем тӑрӑх шута илӗҫ. Ҫав кун хыҫҫӑн ветеран вилнӗ тӗк укҫана тӑванӗсем тивӗҫӗҫ.

10 пин тенке илес тесен нимӗнле заявлени те ҫырмалла мар. Вӑл пенси укҫипе пӗрле килӗ.

Сӑмах май, пӗлтӗр 10 пин тенке республикӑри 141 ветеран тивӗҫнӗ. Шел те, вӗсем сахаллансах пыраҫҫӗ.

moshenik.ru сайтри сӑн

Вӑрмар районӗнчи ҫамрӑк фермера шӑнман пӑр ҫине лартса хӑварнӑ ултавҫӑсене тытса чарнӑ. Вӗсем - Ҫыр Чаллӑри икӗ арҫын. Хайхскерсем ытти регионти ҫынсене те улталанӑ.

Акӑ мӗн пулса иртнӗ: кӑҫал нарӑс уйӑхӗнче 26 ҫулти фермер тӗнче тетелӗнчи пӗлтерӳ урлӑ удобрени туянас тенӗ. Вӑл сутуҫа 440 пин тенкӗ куҫарса панӑ. Лешӗ кун хыҫҫӑн ҫыхӑнӑва тухма пӑрахнӑ. Фермер укҫасӑр та, удобренисӗр те тӑрса юлнӑ.

Ҫыр Чаллӑри 25-ри тата 26 ҫулти арҫынсем тӗлӗшпе пуҫиле ӗҫ пуҫарнӑ.

Прокуратура архивӗнчи сӑн

Ака уйӑхӗн 14-мӗшӗнче Хӗрлӗ Чутай районӗнчи Шулю ялӗнче шыв башни персе аннӑ. Кун пирки "Про Город" хаҫата халӑх корреспонденчӗ пӗлтернӗ.

Малтанлӑха пӗлтернӗ тӑрӑх, башня вӑйлӑ ҫиле пула ӳкнӗ. Вӑл - ҫӗнӗ, ӑна вырнаҫтарса лартнӑ кӑна, шыв яма та ӗлкӗреймен. Ҫак башньӑн икӗ ял ҫыннисене шывпа тивӗҫтермелле.

Халӗ прокуратура тӗрӗслев ирттерет.

foto-ram.ru сайтри сӑн

Ҫанталӑк ӑшӑтнӑ май республикӑра сӑвӑссем те вӑраннӑ. Паянхи кун тӗлне 5 ҫын пульницӑна сӑвӑс ҫыртнӑ хыҫҫӑн медпулӑшу илме пынӑ.

Роспотребнадзор пӗлтернӗ тӑрӑх, шар курнисен йышӗнче Шупашкар арҫынни тата ача пур. Пӗлтӗр ҫак вӑхӑт тӗлне 3 ҫын сӑвӑс ҫыртнипе пульницӑна пулӑшу ыйтма пынӑ.

Палӑртмалла: пӗлтӗр боррелиозпа 20 ҫын чирленӗ. Унран вакцина ҫук.

cap.ru сӑнӳкерчӗкӗ

Ҫӗрпӳ районӗнче пуш уйӑхӗн 16-мӗшӗнченпе карантин пулнӑ. Ку Кивӗ Тутайкасси ялӗнче икӗ ҫын вӑкӑр пуснӑ хыҫҫӑн Ҫӗпӗр мурӗпе чирленипе ҫыхӑннӑ. Вӗсене пушӑн 15-мӗшӗнче пульницӑна вырттарнӑ.

Карантин пӗр уйӑха тӑсӑлнӑ. Ӗнер ЧР Элтеперӗ Олег Николаев карантин вӗҫленни пирки хушу алӑ пуснӑ.

hypar.ru сайтри сӑн

Республика кунӗнче «Асамат» фейерверксен фестивальне ирттересси йӑлана кӗнӗ. Кӑҫал вӑл Шупашкарта ҫӗртме уйӑхӗн 23-24-мӗшӗсенче иртӗ.

Экономика министрӗ Дмитрий Краснов пӗлтернӗ тӑрӑх, кӑҫал унта 5 команда хутшӑнма кӑмӑл тунӑ. Пӗри – Беларуҫрен.

Фейерверксен фестивальне 2008 ҫултанпа ирттереҫҫӗ. Ун чухне ӑна ҫу уйӑхӗн 9-11-мӗшӗсенче йӗркеленӗ.

Шупашкарта Ӑс-тӑн арпашасран пулӑшакан центр (вырӑсла ӑна Центр профилактики когнитивных расстройств тенӗ) уҫӑлнӑ.

Асӑннӑ центр Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта вырнаҫнӑ.

Ҫул кайнӑҫемӗн ӑс-тӑн ан арпаштӑр тесен пуҫа вӗҫемех ӗҫлетермелле. Пуҫа кӑна мар, кӗлеткене те хускатмалла. Пӳрнесене вылятни таранах пӗлтерӗшлӗ.

«Сирӗн занятисене пӑхрӑм та вӗсене эсир питех е тӗрӗс суйласа илни курӑнчӗ», — ырланӑ центра Республикӑн наркодиспансерӗн тӗп врачӗ — Чӑваш Енӗн Сывлӑх сыхлав министерствин психотерапевчӗ Елена Калинина. Республикӑн тӗп гериатрӗ Нина Сидорова та кун пек центра уҫнине пысӑка хурса хакланӑ.

cap.ru сӑнӳкерчӗкӗ

Кӑҫал пирӗн республикӑра Ҫуркуннепе ӗҫ уявне анлӑн уявламӗҫ. Ку хыпара республкиӑн влаҫ органӗсен официаллӑ порталӗнче пӗлтернӗ.

Мероприятисене тӗп хулари тӑватӑ лапамра ирттерӗҫ, ҫав кун ӗҫлекен коллективсем валли онлайн-трансляцисем йӗркелӗҫ.

Ҫуркуннепе ӗҫ уявне пысӑк йышпа саркаланмасӑр ирттерес йышӑнӑва хӑрушсӑрлӑхпа сӑлтавланӑ. Чӑвашрессовпрофӑн ертӳҫи Анатолий Коршунов ҫавӑн пек сӗннӗ-мӗн. Хӑршусӑрлӑхсӑр пуҫне татти-сыпписӗр ӗҫлекен производствӑсене те чарса лартасшӑн мар.

cap.ru сайтри сӑн

Паян республикӑра ҫӗнӗ перевозчик туса хунӑ. Вӑл «Чӑваш транспорт управленийӗ» ятлӑ.

Ӑна Шупашкарти тата Ҫӗнӗ Шупашкарти троллейбус управленийӗсенчен туса хунӑ. Унччен вӗсем муниципалитет харпӑрлӑхӗнче пулнӑ.

Ҫӗнӗ предприяти социаллӑ пӗлтерӗшлӗ маршрутсем валли автобуссем туянма палӑртнӑ. Ҫав шутра – районсем валли те. Ҫитес вӑхӑтра 153 троллейбус туянасшӑн. Вӗсен йышӗнче автономлӑ мелпе ҫӳрекеннисем те пулӗҫ.