foto-ram.ru сайтри сӑн

Куславкка районӗнче хӗрарӑм опекӑна илнӗ хӗрачан укҫипе усӑ курнӑ. Ача ун патӗнче 3 ҫул пурӑннӑ.

Ҫакӑ паллӑ: «опекӑпа попечительлӗх органӗ ирӗк панипе» хӗрарӑм хӗрачан счечӗ ҫинче укҫана хушӑран илкеленӗ. Пӗтӗмпе – 1 миллион ытла тенкӗ. Унпа вӑл хӑй пӗлнӗ пек усӑ курнӑ. Тӗслӗхрен, йӑлара усӑ курмалли техника туяннӑ /кайран вӑл ӑна хӑйӗн валлиех хӑварнӑ/.

Халӗ прокуратура суд урлӑ опекун пулнӑ хӗрарӑмран 350 пин тенкӗ шыраса илме, ача укҫипе илнӗ япаласене каялла тавӑрса пама ыйтать.

uralinform.ru сӑнӳкерчӗкӗ

Чӑваш Енре коррупципе кӗрешессине йӗркелекен комиссин ларӑвӗ иртнӗ. Унта Чӑваш Ен Элтеперӗн Администрацийӗн коррупципе кӗрешес енӗпе ӗлекен управленийӗн ертӳҫи Петр Куприн палӑртса хӑварнӑ тӑрӑх, 2020 ҫулта республикӑри сывлӑх сыхлавӗн учрежденийӗсенче коррупципе ҫыхӑннӑ 31 преступление тупса палӑртнӑ. Пӗлтӗр ку цифра кӑштах сахалланнӑ. Кӑҫал вара пилӗк уйӑх ҫурӑрах ҫак кӑтарту ӳсни сисӗнет тенӗ вӑл.

Тухтӑрсем чирлисенчен парне илни тӗл пулать. Сӑмахран, больничнӑй илес тесе ҫынсем тухтӑрсене укҫа е парне сӗнеҫҫӗ. Е тата каччӑсене ҫара ярас мар тесе ашшӗ-амӑшӗ тухтӑрсемпе калаҫса таӑлма тӑрӑшать.

https://dzen.ru/a/Y4kjw4SzyWCqXc8X сӑнӳкерчӗкӗ

Рейтингри 85 регионтан Чӑваш Ен пурлӑх шайӗ енчен 73-мӗш йӗркене йышӑннӑ. «PROГород» кӑларӑм шухӑшланӑ тӑрӑх, пирӗн республикӑра пурнӑҫ шайӗ чакса пырать. 2022 ҫулхи кӑтартӑва илсен, халӑхӑн 14,8 проценчӗ чухӑн пурӑнать.

Асӑннӑ кӑларӑм Шупашкарта пурӑнакансене пурӑнма мӗн чухлӗ укҫа кирлипе хула ҫыннисемпе калаҫнӑ май кӑсӑкланнӑ.

«Укҫа нумай кирлӗ мар. Ертӳҫӗсен коррупципе сахалтарах ҫыхланмалла. Манӑн ачасем алла диплом илсенех Чӑваш Енрен тухса кайрӗҫ. Шалу пӗчӗк, малашлӑхлӑ ӗҫ вырӑнӗсене е пысӑк ҫынсен тӑванӗсем йышӑннӑ, е хӑваласа кӑларса яма май ҫуккисем», — тесе шухӑшлать иккен, сӑмахран, Сергей Ежов.

Пуҫа ытларах ӗҫлеттермелле, чӗлхепе нумай калаҫатпӑр текен те пулнӑ.

Чӑваш Енре тин ҫуралнӑ ачасене чӑваш тӗрриллӗ парне пама тытӑннӑ. Кӑҫал парнесене туянма резерв хыснинчен 19 миллион та 268,4 пин тенкӗ уйӑрнӑ. Ку хушӑва ЧР Элтеперӗ Олег Николаев алӑ пуснӑ.

Аса илтерер: унччен республика 11,9 миллион тенкӗпе 5167 парне туяннӑ. Ҫулталӑкра вара республикӑра 10 пине яхӑн ача кун ҫути курать.

Аса илтерер: тин ҫуралнӑ ачана чӑваш тӗрриллӗ вырӑн таврашӗ, ал шӑлли тата «Чӑваш Енри халӑхсен юмахӗсем» кӗнеке параҫҫӗ.

RUSSIA-DRIVER.TAXI сайтри сӑн

Шупашкарти Юханшыв портӗнче кӑҫал 28 таксист чи лайӑххи пулассишӗн тупӑшнӑ. Вӗсем ҫул-йӗр правилисене, республикӑри паллӑ вырӑнсене мӗнле пӗлнине кӑтартнӑ. Ҫавӑн пекех водитель ӑсталӑхӗпе паллаштарнӑ.

Чи лайӑх таксист ятне Артур Михайлов тивӗҫнӗ. Сӑмах май, вӑл ку ята пиллӗкмӗш хут илнӗ. Иккӗмӗш вырӑна Георгий Никоноров тухнӑ. Виҫҫӗмӗш вырӑнта - Дмитрий Иванов. Малти вырӑнсене йышӑннисене 15, 10 тата 5 пин тенкӗпе хавхалантарнӑ. Ҫавӑн пекех конкурс партнерӗсенчен парнесем пулнӑ.

Вконтакте сайтри сӑн

Куславккари 2-мӗш шкулӑн вӗренекене укҫа тӳлесе татмалла. Ку прокуратура тӗрӗсленӗ хыҫҫӑн палӑрнӑ.

Ача сусӑр пулнӑран килте вӗренет. Анчах шкул ӑна апатлану компенсацине тӳлемен.

Тӗрӗслев хыҫҫӑн прокуратура шкула ачан саккунлӑ представительне 7 пин те 140 тенкӗ тӳлеттермелле тунӑ. Ку - 2022-2023 вӗренӳ ҫулӗшӗн.

chwom.rchuv.ru сӑнӳкерчӗкӗ

Ӗнер пирӗн республикӑра «Я – женщина» (чӑв. Эпӗ — хӗрарӑм) конкурса пӗтӗмлетнӗ. Унта тӗрлӗ отрасльте ӗҫлекен 614 хӗрарӑм хутшӑннӑ. Вӗсен пултарулӑхне темиҫе номинацире хакланӑ.

«Общество интересӗшӗн» (Журналистика, патшалӑх тата муниципалитет служби) номинацире Шупашкарти Оксана Замятина Гран-прие тивӗҫнӗ, вӗрентӳпе ӑслӑлӑх енӗпе — Улатӑрти Юлия Давыдова, право хуралӗ тата ҫар служби енӗпе — Шупашкарти Инга Вазикова, ҫамрӑксен политики енӗпе — Шупашкарти Мария Васильева, культура енӗпе — Шупашкарти Светлана Григорьева, сывлӑх сыхлавӗ енӗпе — Шупашкарти Оксана Рындина; промышленность, строительство, транспорт, суту-илӳ, йӑла-йӗрке, банк тытӑмӗ енӗпе — Шупашкарти Вера Степанова, предпринимательство енӗпе — Шупашкарти Елена Кривокижа, ял хуҫалӑхӗ тата ҫутҫанталӑк енӗпе — Тӑвай районӗнчи Надежда Фёдорова; килте ларакан хӗрарӑмсем, нумай ачаллӑ амӑшӗсем, пенсионерсем хушшинче — Ҫӗнӗ Шупашкарти Татьяна Димитриева.

chgtrk.ru сайтран илнӗ сӑнӳкерчӗк

Чӑваш Ен Элтеперӗ Олег Николаев Республика кунӗпе саламланӑ.

«Тӑван Чӑваш Ен – наци йӑли-йӗркипе мӑн асаттемӗрсен ӑс-хакӑл еткерлӗхӗ типтерлӗн сыхланса упранакан, расна тӗне ӗненекен тӗрлӗ халӑх ҫыннисем туслӑн та килӗштерсе пурӑнакан ҫӗр пин юрӑ, ҫӗр пин тӗрӗ ҫӗршывӗ», — тенӗ Олег Николаев саламра.

«Эпир пурте республикӑн хальхи пурнӑҫӗпе унӑн пуласлӑхӗшӗн тӑрӑшатпӑр, кашнин пултарулӑхнех туллин уҫса пама пулӑшакан лайӑх майсем йӗркелетпӗр, экономикӑпа промышленноҫ вӑй-хӑвачӗн, ял хуҫалӑхӗн ӳсӗмне тивӗҫтеретпӗр, социаллӑ сферӑна аталантаратпӑр.

Пирӗн мухтанмаллисем пур, вӗсенче – кашнийӗн тӳпи – республикӑн хаклӑ ҫыннисем!» — тесе палӑртнӑ Элтепер.

Ӗнер Кӳкеҫ поселокӗнче арҫынна тупнӑ. Вӑл ӑс-тӑн хавшаккипе аптӑрани палӑрать. Ҫавӑнпах хӑй ӑҫтан пулнине калаймасть. «Лиза Алерт» хастарӗсем унӑн тӑванӗсене шыраҫҫӗ.

Хӑйне вӑл Иван Смирнов тет. Вӑл 65 ҫулсенчи пек курӑнать. Ӑна вӑхӑтлӑха Шупашкарти сиплев учрежденине вырнаҫтарнӑ. Вӑл сӑрӑ тӗслӗ куртка, хура шӑлавар тӑхӑннӑ. Ӑна пӗлекенсене ҫак номерпе шӑнкӑравлама ыйтаҫҫӗ: 8 800 700-54-52 е 89520203557.

Чӑваш наци музейӗн страницинчен илнӗ сӑнӳкерчӗксем

Ҫӗртме уйӑхӗн 21-мӗшӗнче Чӑваш Республикин ҫар мухтавӗн музейӗнче «У истоков зоргенского движения» (чӑв. Зорге юхӑмӗн пуҫламӑшӗнче) курав уҫӑлнӑ. Ӑна асӑннӑ юхӑма Чӑваш Енре пуҫарса янӑ Мария Красновӑна халалланӑ.

Курава уҫма Мария Александровнӑн ҫывӑх ҫыннисем хутшӑннӑ. Музея вӗсем фотосемпе документсен архивне, ҫав шутра Зорген тӑвванӗсемпе тата ӗҫтешӗсемпе ҫӳретнӗ ҫырусене, легендарлӑ разведчикӑн уйрӑм япалисене парнеленӗ.

Мария Краснова хӑй вӑхӑтӗнче Патӑрьелӗнчи шкулта пионервожатӑйра ӗҫленӗ. Вӑл Зорге пурнӑҫӗпе кӑсӑкланма тытӑннӑ. Вӑл ертсе пынипе 1965 ҫулта Чӑваш Енрен Бакуна, Зорген иккӗмӗш сыпӑкри аппӑшӗ патне тухса кайнӑ. Ҫавӑн хыҫҫӑн пирӗн республикӑра Зорге юхӑмӗ пуҫланса кайнӑ. 1978 ҫулта Шупашкарти 3-мӗш шкулта Р. Зорге ячӗллӗ мемориал комплексӗ уҫнӑ. Мария Краснова вӑл вӑхӑтра унта ӗҫленӗ. Хӗрарӑм ҫав пуянлӑха пысӑкрах шая кӑларма ӗмӗтленнӗ, анчах хӑй туса ӗлкӗреймен, халӗ унӑн ҫывӑх ҫыннисем ҫав ӗмӗте пурнӑҫланӑ.