«Хочу в Чувашию» каналти видеоран илнӗ сӑнӳкерчӗк

Пӗтӗм тӗнчери 34-мӗш опера фестивалӗ ҫак эрнере, эрнекун, пуҫланӗ.

Шупашкарти оперӑпа балет театрӗн сцени ҫине Мускаври ҫеҫ мар, Китайри артистсем те тухӗҫ.

«Волга Опера» (чӑв. Атӑл Опера) театр анлӑ программа хатӗрленӗ. Фестиваль К. Молчановӑн «Зори здесь тихие» оперипе уҫӑлӗ. Вӑл — премьера.

Cap.ru сӑнӳкерчӗкӗ

Вырӑс драма театрӗ «Всероссийская книга Почета» (чӑв. Пӗтӗм Раҫҫейри Хисеп кӗнеки) 2024 ҫулхи реестра лекнӗ.

Реестра патшалӑх тата муниципалитет влаҫӗсемпе пӗрле 15 ҫул ытла йӗркелесе пыраҫҫӗ иккен. Унта лекни театр Чӑваш Енӗн культура уҫлӑхӗнче тивӗҫлипе ӗҫленине пӗлтерет.

Вырӑс драма театрӗн историйӗ 1922 ҫултанпа пырать.

Владислав Кириллов страницинчен илнӗ сӑнӳкерчӗк

Кӑҫал республикӑри колхоз театрӗсене пуҫарса янӑранпа 90 ҫул ҫитнине эпир унччен пӗлтернӗччӗ-ха. Аса илтерер: ҫавна Шупашкар районӗнче тӗрлӗ мероприяти ирттерчӗҫ те ӗнтӗ. Чӳк уйӑхӗн 23-мӗшӗнче вара Патӑрьелте республикӑри халӑх театрӗсен анлӑ фестивалӗ иртӗ.

Шупашкар муниципаллӑ округӗнчи Апашри халӑх театрӗн артисчӗ Владислав Кириллов халӑх тетелӗнчи хӑйӗн страницинче пӗлтернӗ тӑрӑх, СССР халӑх артисчӗ Борис Алексеев ячӗллӗ Апаш халӑх театрӗ уява хатӗрленсе Н. Угарин пьесипе лартнӑ «Юнланнӑ пӗркенчӗк» спектаклӗн пӗр сыпӑкне сцена ҫине тепӗр хут кӑларас тесе ӗҫлеме тытӑннӑ та.

Алёна Сергеева страницинчи сӑнӳкерчӗк

Чӑваш юрӑҫи Алёна Сергеева Дивноморскра юрлать.

Алёна халӑх тетелӗнчи хӑйӗн страницинче пӗлтернӗ тӑрӑх, вӑл яланах юрлама юратнӑ.

Кирек ӑҫта пурӑнсан та чунӗ юрласшӑн,ю пулнӑ. Сыктывкарта ӗҫлесе пурӑннӑ чух аслӑ шкул преподавателӗсемпе хора ҫӳренӗ, коми юррисене шӑрантарнӑ. «Студентсем ман ҫине тӗлӗнсе пӑхатчӗҫ. Халӗ Геленджик-Дивноморскра пурӑннӑ чух вырӑс халӑх тата Кубань юррисене юрлатӑп», — пӗлтернӗ Алёна. Вӑл «Дивноморские подружки» халӑх ансамблӗнче юрлать.

Светлана Гордеева страницинчен илнӗ сӑнӳкерчӗк

Чӑваш наци музейӗ кӑҫал республикӑри темиҫе районта фольклорпа этнографи экспедицийӗ ирттернӗ. Музей ӗҫченӗсем Улатӑр, Пӑрачкав тата Етӗрне муниципаллӑ округӗсенче пулнӑ май унта вырӑссем 16 ӗмӗртен пурӑннӑ вырӑнсемпе кӑсӑкланнӑ. Экспедицисенчи тата Сӗнтӗрвӑррипе Шупашкар районӗсенчи музейсенчи япаласемпе Чӑваш тӗррин музейӗнче «Русские» (чӑв. Вырӑссем) куравра паллашма пулать.

https://vk.com/wall-169628991_11323 сӑнӳкерчӗкӗ

Шупашкар хули «Волжский вояж» (чӑв. Атӑл вояжӗ) чукун ҫул туризм маршрутне лекнӗ. Ӑна «Раҫҫейӗн чукун ҫулӗсем» акционерсен обществи йӗркеленӗ.

Туристсем валли хатӗрленӗ ҫӗнӗ маршрут ҫапларах: «Мускав — Шупашкар — Йошкар-Ола —Чулхула».

«Атӑл вояжӗ»

круиз поезӗ ҫула ҫитес ҫулхи ака, ҫурла тата юпа уйӑхӗсенче тухӗ.

Билета Раҫҫейӗн чукун ҫулӗсен официаллӑ сайтӗнче ҫитес вӑхӑтра сутма тытӑнӗҫ.

"Контактри" сӑн

Ӗнер Патӑрьел тӑрӑхӗнчен тухнӑ ентешсем уява пухӑннӑ – ентешлӗх уявӗ иртнӗ.

Патӑрьел ҫӗрӗ ҫинчен паллӑ ҫынсем сахал мар тухнӑ. Нумайӑшӗ ӗнӗр ентешлӗх уявне хутшӑннӑ. Унта пухӑннисене пултаруллӑ ҫынсем юрӑ-ташӑпа савӑнтарнӑ.

Сӑмах май, Патӑрьелсен ентешлӗхӗ, 1993 ҫулта йӗркеленнӗ.

Cap.ru сӑнӳкерчӗкӗ

Чӑваш Енӗн Наци вулавӑшӗнче ӗнер, чӳк уйӑхӗн 8-мӗшӗнче, «Десять деревень. Звёзды над Булой» кӗнекипе паллаштарнӑ. Унӑн авторӗ — паллӑ журналист, художника, режиссёр, краевед Владимир Галошев.

Хӑйӗн ӗҫӗнче автор Елчӗк районӗнчи Аслӑ Пӑла Тимеш тӑрӑхӗнчи вунӑ ялпа, унти паллӑ пулӑмсемпе, хисеплӗ ҫынсемпе паллаштарать.

Cap.ru сӑнӳкерчӗкӗ

Шупашкара В. С. Попов ячӗллӗ пысӑк ача-пӑча хорӗ пуҫласа килӗ. Вӑл Чӑваш патшалӑх филармонийӗн сцени ҫине нарӑс уйӑхӗн 12-мӗшӗнче тухӗ.

Ача-пӑча коллективӗн репертуарӗнче –

«Веселый ветер», «Орлята учатся летать», «Учитель наш», «Трус не играет в хоккей», «Мой щенок», «Вместе весело шагать», «Крылатые качели», «Прекрасное далеко», «По секрету всему свету», «Улыбка», «Одна земля на всех» тата ытти юрӑ. Вӗсене Александра Пахмутова, Владимир Шаинский тата Евгений Крылатов композиторсем Юрий Энтин, Михаил Танич, Николай Добронравов, Василий Лебедев-Кумач сӑввисемпе юрра хывнӑ.

«Бичурин тата хальхи самана» страницинчен илнӗ сӑнӳкерчӗк

Ыран, чӳк уйӑхӗн 10-мӗшӗнче, «Культура» Чӑваш Енри турист маршручӗсемпе паллаштаракан кӑларӑм эфира тухӗ.

«Неизвестные маршруты России. Чувашия. Из Чебоксар к Мокринскому мосту» кӑларӑм 11 сехет те 30 минутра пуҫланӗ.

Ун вӑхӑтӗнче пирӗн тӑрӑхри кӑсӑклӑ маршрутсемпе паллаштарӗҫ. Ҫав шутра — Кӳкеҫри «Бичурин тата хальхи самана» музейпа та.