Кӑрлач уйӑхӗн 28-мӗшӗнче ЧР Наци вулавӑшӗ ҫумӗнче йӗркеленнӗ «Варкӑш» литература клубӗнче ҫамрӑк ҫыравҫӑн, журналистӑн Дмитрий Моисеевӑн «Хуҫасӑр ҫуртри сехет сасси» кӗнекине сӳтсе явӗҫ.

Кӗнекене 12 хайлав кӗнӗ: «Хӗл чӗппи», «Наркоз витӗмӗнчи тӗлӗк», «Ӗне вӑррисем», «Хуҫасӑр ҫуртри сехет сасси», «Питбайкер йыхравӗ», «Телефонри ҫыру», «Илемпи, кӗт мана», «Шанма пурте пӑрахсан та…», «Митя», «Инкек кӳнӗ тӗлӗк», «Сивӗ сӑмах», «Урасӑр салтак». Кашнинчех паянхи ҫамрӑксен пурнӑҫне, ҫивӗч ыйтӑвӗсене хускатнӑ.

Мероприяти 18 сехетре пуҫланӗ.

culture.cap.ru сӑнӳкерчӗкӗ

Чӑваш патшалӑх филармонийӗнче Раҫҫейри паллӑ артистсен концерчӗсем иртӗҫ. Нарӑс уйӑхӗн 19-мӗшӗнче унта Раҫҫейӗн тава тивӗҫлӗ артисчӗ, хальхи вӑхӑтри чи пултаруллӑ виолончелистсенчен пӗри Борис Андрианов пултарулӑхӗпе киленме май килӗ. Фортепианӑпа пӗтӗм тӗнчери конкурссен лауреачӗ, пултаруллӑ солист тата концертмейстер Петр Лаул калӗ.

Чӳк уйӑхӗн 11-16-мӗшӗсенче Чӑваш патшалӑх академи драма театрӗнче наци театрӗсен регионсем хушшинчи «Чӗкеҫ» II Вера Кущзьмина ячӗллӗ фестивалӗ иртӗ.

Фестиваль Раҫҫейри чи лайӑх театрсене пухӗ. Театр мероприятийӗн кӑҫалхи теми «Женщина в искусстве» (чӑв. Ӳнерти хӗрарӑм) пулӗ.

culture.cap.ru сӑнӳкерчӗкӗ

Кӑрлач уйӑхӗн 23-мӗшӗнче Ҫеҫпӗл Мишши ячӗллӗ Чӑваш патшалӑх ҫамрӑксен театрӗнче Венера Пайгильдина артисткӑн 50 ҫулхине халалланӑ уяв каҫӗ иртӗ. Мероприяти 18 сехетре пуҫланӗ.

Венера Пайгильдина — Чӑваш Республикин тава тивӗҫлӗ артистки, Чӑваш Республикин Патшалӑх премийӗн лауреачӗ. Пултаруллӑ сцена ӑсти 1974 ҫулхи кӑрлач уйӑхӗн 7-мӗшӗнче Элӗк районӗнчи Тури Татмӑш ялӗнче ҫуралнӑ. Сцена ҫине пуҫласа шкулта вӗреннӗ чухнех, «Ҫутӑ ӗмӗт» вокал ансамбльпе тухнӑ. Хӗр Ф.Павлов ячӗллӗ музыка училищине вӗренме кӗнӗ, унта Ҫамрӑксен театрӗн директорӗпе, Зоя Ярдыкова режиссерпа паллашнӑ. 1996 ҫулта Зоя Дмитриевна училище вӗренсе пӗтернӗ Венерӑна театра ӗҫлеме чӗннӗ.

Кӑрлач уйӑхӗн 17-мӗшӗнче Чӑваш тӗррин музейӗнче «От древности до современности» (чӑв. Аваллӑхран паянхи кунччен) курав уҫӑлӗ. Унта Анастасия Зимина, Ксения Туктарова тата Алёна Ефимова ҫамрӑк художниксен ӗҫӗсемпе паллашма май килӗ.

Вӗсем халӑх пултарулӑхне тӗпе хурса ӗҫлеҫҫӗ. Хӗрсен ӗҫӗсенчи пӗрпеклӗх — мифсемпе легендӑсем, чӑваш халӑхӗн историйӗпе культури. Ҫав вӑхӑтрах кашни авторӑн хӑйӗн стилӗ.

Кураври экспонатсен шутӗнче – шӑрҫаран тата пӑхӑр жетонсенчен хатӗрленӗ капӑрлӑхсем, тӗрлӗ тӗслӗ керамика, графика, фотопичет.

Курав 16 сехетре уҫӑлӗ.

Музей адресӗ: Шупашкар хули, К. Маркс урамӗ, 32-мӗш ҫурт. Ыйтса пӗлмелли телефон номерӗ +7 (8352) 62-03-44.

Чӑваш кӗнеке издательствин сӑнӳкерчӗкӗ

Чӑваш кӗнеке издательствинче «В Стране Светлого дня» кӗнеке пичетленсе тухнӑ. Унта чӑваш юмахӗсем кӗнӗ.

Ҫӗнӗ кӑларӑма тӗрлӗ ҫулта Семен Шуртаков (1918–2014), Семен Григорьев-Эсрел (1907–1996), Ольга Васильевоа, Надежда Ильина чӑвашлран вырӑсла куҫарнӑ юмахсем кӗнӗ.

Юмахсене Виктор Бритвин (1955–2023) художник илемлетнӗ, кӗнеке хуплашкине — Ирина Калентьева.

Кӑрлач уйӑхӗн 15-мӗшӗнче Шупашкарти К.В.Иванов ячӗллӗ литература музейӗнче «Ачасен чи ҫывӑх тусӗ» курав уҫӑлӗ.

Ӑна Николай Ытарай ҫыравҫӑ, халӑх фольклорне пухнӑ, Раҫҫейри писательсен союзӗ членӗ Николай Ытарай ҫуралнӑранпа 100 ҫул ҫитнине халаллӗҫ. Курав 14 сехетре уҫӑлӗ.

Елизавета Долгова страницинчен илнӗ сӑнӳкерчӗк

Елизавета Долгова ҫыравҫӑ тата педагог Пӗтӗм тӗнчери тӗрӗксен патриотизм конкурсне хутшӑннӑ. Уншӑн вӑл Казахстанри «Bilim-Orkenieti» ӑслӑлӑхпа тӗпчев центрне тата «Жаңа Қазақстан» пӗрлешӗве тав туса халӑх тетелӗнчи хӑйӗн страницинче пӗлтернӗ.

Вёл хыпарланӑ тӑрӑх, конкурсра ҫӗнтерни чӑн-чӑн тӗлӗнтермӗш тата пысӑк савӑнӑҫ пулнӑ. Конкурса Казахстанри, Кӑркӑстанри, Узбекистанри, Азербайджанри, Туркменистанри тата Турцири хастарсем хутшӑннӑ.

Асӑннӑ конкурса тӗрӗк халӑхӗсен хушшинчи туслӑха ҫирӗплетес тӗллевпе ирттернӗ.

culture.cap.ru сӑнӳкерчӗкӗ

Шупашкарти Сӑнавлӑ театр 2024 ҫулта аталанӑвӑн ҫӗнӗ тапхӑрӗ ҫине тухнӑ.

Пӗлтӗрхи ҫӗртме уйӑхӗнче театра Чӑваш Республикин культурӑн тава тивӗҫлӗ ӗҫченӗ Дмитрий Капустин ертсе пыма тытӑннӑ. Вал репертуара тата учрежденин фирма стильне ҫӗнетнӗ. Театра ҫамрӑксем ҫӳреме юратаҫҫӗ.

Пӗлтӗр театр 8 премьера сцена ҫине кӑларнӑ. Пӗлтӗр ҫурта тултан тата шалтан юсаса ҫӗнетнӗ. Театра хальхи вӑхӑтри сасӑ, ҫутӑ, видеопроекци оборудованийӗпе тивӗҫтернӗ.

Учреждени ребрендингне ылмаштарнӑ, логотипа авангард стилӗпе хатӗрленӗ. Театр тӗрлӗ лапама тухса имерсилле стпектакльсем те лартма пуҫласшӑн.

«Хавхалану» клуб страницинчен илнӗ сӑнӳкерчӗк

Кӑрлач уйӑхӗн 23-мӗшӗнче Чӑваш Енӗн Наци вулавӑшӗнчи «Хавхалану» клубне ҫӳрекенсен черетлӗ поэзи уявне ирттерме палӑртнӑ. Кун пирки клуб халӑх тетелӗнчи хӑйӗн страницинче пӗлтернӗ.

«Хальхинче раштав уйӑхӗнче ҫуралнӑ поэтсен пултарулӑхӗпе тӗплӗн паллашӑпӑр», — хыпарланӑ унта. Раиса Сарпие, Владимир Андреева асӑнса хӑварнӑ, раштавра ҫуралнисене пурне те йыхравлассине пӗлтернӗ.

Мероприяти вулавӑшӑн «Чӑваш кӗнеки» центрӗнче 15 сехетре пуҫланӗ.