cap.ru сайтран илнӗ сӑнӳкерчӗк

Раҫҫейри ҫыравҫӑсемпе издательсен союзӗн ассоциацийӗ прозаиксене Литература резиденцине йыхравлать. Ҫакӑ калем ӑстисене пичетре ӗҫлекенсемпе ҫывӑхлатасса шанаҫҫӗ.

Литература резиденцийӗнче писательсем лӑпкӑ лару-тӑрура чун канӑҫлӑхне тупайӗҫ, ҫӗнӗ шухӑш-кӑмӑлпа хавхаланӗҫ. Литература резиденцийӗ 20 кун ӗҫлӗ. Ҫав вӑхӑтра ҫыравҫӑсем калас тенине хут ҫине куҫарнипе пӗрлех пӗр-пӗринпе паллашӗҫ, вырӑнти вулакансемпе тата литераторсемпе паллашӗҫ. Пултарулӑх тӗлпулӑвӗсенче пултаруллӑ ҫыравҫӑсем, редакторсемпе издаельсем сӗнӳ-канашпа пулӑшайӗҫ.

Литература резиденцийӗ Пенза ҫывӑхӗнчи ялта авӑн уйӑхӗн 3-23-мӗшӗсенче ӗҫлӗ. Заявкӑсене Раҫҫейри ҫыравҫӑсемпе издательсен союзӗн ассоциацийӗн (АСПИР) сайтӗнче утӑ уйӑхӗн 31-мӗшӗччен йышӑнӗҫ.

t.me/nikamran каналтан илнӗ сӑнӳкерчӗк

Ыран, утӑ уйӑхӗн 8-мӗшӗнче, Тутарстанри Элкел районӗнчи Сиктӗрме ялӗнче республика шайӗнчи Уяв иртӗ.

Уяв ирхи 8 сехетрех пуҫланӗ. Вӑл 16 сехетчен пырӗ. Ҫав вӑхӑтра Сиктӗрмере тӗрлӗ курав, ӑстлӑх лаҫҫисем ӗҫлӗҫ.

Телеграмри «Пуринчен малтан. Ҫывӑрса юлмасан» каналта пӗлтернӗ тӑрӑх, 10 сехетре «Янра хут купӑс» конкурс пуҫланӗ. Унта 75 купӑсҫӑ хутшӑнӗ.

«Уяв пики» конкурсра 12 хӗр ӑмӑртӗ, вӗсенчен виҫҫӗшӗ Чӑваш Енрен кайӗ.

Кӑҫалхи Уявра «Ача-пӑча вӑйӑ карти» те пулӗ.

drama21.ru сӑнӳкерчӗкӗ

К.В. Иванов ячӗллӗ Чӑваш патшалӑх академи драма театрӗнче юбилейлӑ 105-мӗш сезона хупма хатӗрленеҫҫӗ.

Сезона «Юрлар-и, ташлар-и, фольклорпа джаз кӗввипе» ӗҫпе утӑ уйӑхӗн 14-мӗшӗнче хупӗҫ. Ӑна СССР халӑх артсичӗ Валерий Яковлев лартнӑ.

Унччен вара утӑ уйӑхӗн 12-мӗшӗнче театрта «Ҫын пурнӑҫӗ» спектакль кӑтартӗҫ. Ӑна Леонид Андреев пьеси тӑрӑх Василий Иванов режиссёр лартнӑ. Пьесӑна 1906 ҫулта ҫырнӑ. Ӑна чӑвашла Чӑваш Республикин культурӑн тава тивӗҫлӗ ӗҫченӗ Ольга Туркай куҫарнӑ.

2023 ҫулта Элӗк, Ҫӗрпӳ, Ҫӗмӗрле муниципалитет округӗсен культура тата кану учрежденийӗсем автоклубсем туяннӑ.

Нумаях пулмасть Ҫӗмӗрле тӑрӑхӗнчи культура ӗҫченӗсем ҫӗнӗ автоклубпа ҫула тухнӑ. Вӗсем хӑйсен пултарулӑхӗпе вырӑнтисене паллаштарнӑ.

Чӑн та, пур ялта та клубсем ҫук, тепӗр ҫӗрте пулсан та вӗсем йӗркеллӗ ӗҫлемеҫҫӗ. Автоклубсемпе концертсемпе район тӑрӑх ним мар ҫӳреме пулать.

cap.ru сӑнӳкерчӗкӗ

Чӑваш Ене туристсем йышлӑн килсе ҫӳреҫҫӗ.

Пӗлтӗрхи пӗрремӗш кварталтипе танлаштарсан кӑҫалхи кӑрлач-пуш уйӑхӗсенче пирӗн пата туристсем килесси 45 процент нумайланнӑ, 147 пин ҫынпа танлашнӑ.

Юлашки икӗ ҫулта пирӗн тӑрӑха туристсем килнин йышӗ 2,5 хут ӳснӗ, пӗтӗмӗшле цифрӑна илсен пирӗн тӑрӑхпа 546 пин турист паллашнӑ.

Круиз турисчӗсен йышӗ 23 пин ҫын чухлӗ нумайланнӑ. Ҫак тата ытти цифрӑна республикӑра туризма аталантарассипе ӗҫлекен координаци канашӗн ларӑвӗнче асӑнса хаварнӑ.

cap.ru сӑнӳкерчӗкӗ

Утӑ уйӑхӗн 7-мӗшӗнче Чӑваш патшалӑх ӳнер музейӗнче Иван Яковлев ҫуралнӑранпа 175 ҫул ҫитнине халалланӑ курав уҫӑлӗ.

Музейра тата уйрӑм ҫын коллекцийӗнче упранакан 70-е яхӑн графика, живопись тата скульптура прозведенийӗсем пулӗҫ унта.

Чӑваш алфавитне йӗркелесе янӑ мухтавлӑ ҫыннӑн, пултаруллӑ вӗрентекенӗн, ҫыравҫӑн тата тӑлмачӑн, тӑван халӑхшӑн тӑрӑшса ӗмӗрне ирттернӗскерӗн сӑнарне нумай художник кӑтартса пама тӑрӑшнӑ. Сӑмахран, Петр Сизов, Элли Юрьев, Иван Дмитриев, Николай Овчинников, Виталий Петров (Праски Витти), Юрий Ксенофонтов, Георгий Кузнецов тата ыттисем.

krarm.cap.ru сӑнӳкерчӗкӗ

Утӑ уйӑхӗн 1-мӗшӗнче Красноармейски районӗнчи Чатукасси ялӗнче «Хоровая наставническая столица Чувашии» фестиваль-конкурс иртнӗ. Ӑна Филипп Лукин паллӑ чӑваш композиторӗ ҫуралнӑранпа 110 ҫул ҫитнине халалланӑ.

Унта Элӗк, Ҫӗрпӳ, Канаш, Елчӗк, Ҫӗмӗрле, Комсомольски, Шупашкар, Сӗнтӗрвӑрри тата Красноармейски тӑрӑхӗсенчи, Ҫӗмӗрле, Ҫӗнӗ Шупашкар, Шупашкар хулисенчи халӑх хорӗсемпе вокал ансамблӗсем, Раисӑпа Николай Андреевсем, Тутарстанпа Мари Элти пултарулӑх коллективӗсем хутшӑннӑ.

Пухӑннисем умӗнче паллӑ чӑваш композиторӗн мӑнукӗсем Марианна Левитова тата Филипп Патеев, «Трак ен» ентешлӗх ертӳҫи Иван Архипов тата ыттисем тухса калаҫнӑ.

agro.cap.ru сӑнӳкерчӗкӗ

Питравра, утӑ уйӑхӗн 12-мӗшӗнче, пирӗн республикӑра ҫырла фестивалӗ иртессине Чӑваш халӑх сайчӗ пӗлтернӗччӗ-ха. Аса илтерер: фестиваль Шупашкар районӗнчи Хыркассинче «Ивушка» питомникре пулӗ.

Ҫав кун ҫынсене Шупашкартан ятарлӑ автобус турттарӗ. Ирхи 10 сехет те 30 минутран пуҫласа 15 сехет те 30 минутчен ҫав кун кашни сехетре пӗр хутчен автобус ҫула тухӗ. Автобуссем «Шупашкар» универмаг тӗлӗнче, «Вокзал ҫум» чарӑнура, «Питер» суту-илӳ центрӗ патӗнче пулӗҫ.

Унсӑр пуҫне Хыркассине общество транспорчӗпе те ҫитме пулать.Ҫӗнӗ Шупашкартан — 157-мӗш автобуспа, Шупашкартан — 107-мӗш тата 113-мӗшсем.

Куславкка районӗнче «Чӗмсӗр чикӗсен строителӗсене халалласа» асӑну комплексӗнче кӗҫех музей уҫӑлӗ. Ӑна юпа уйӑхӗн 28-мӗшӗнче уҫма палӑртнӑ.

Ҫак куна ахальтен суйламан. Вӑл Хусан тата Сӑр хӳтӗлев чиккисен строителӗсене асӑнмалли кун.

Ҫавӑн пекех, ЧР культура министрӗ Светлана Каликова пӗлтернӗ тӑрӑх, асӑну компексӗнче Тӑван ҫӗршывӑн Аслӑ вӑрҫи вӑхӑтӗнче фронтра тата тылра пуҫ хунӑ ҫынсене асӑнма часавай тӑвӗҫ.

"Чӑван Ен" ПТРК видеовӗнчен илнӗ скриншот

Чӑваш Енре кӑҫалхипе 24-мӗш хутчен «Кӗмӗл сасӑ» фестиваль иртнӗ. Шупашкарти Ухсай Яккӑвӗ ячӗллӗ культура кермене 6 регионти чӑваш ҫамрӑкӗсем пуҫтарӑннӑ.

Хӑйсен пултарулӑхӗпе, сӑмахран, Пушкӑрт Республикинчи, Чӗмпӗр, Тӗмен, Оренбург тӑрӑхӗнчисем савӑнтарнӑ. Фестивале пӗтӗмпе 12 солистпа 4 ансамбль хутшӑннӑ. Сцена ҫинче халӑх юррисем, паллӑ авторсен хайлавӗсем шӑраннӑ.

Уйрӑм юрлакансен йышӗнче ҫӗнтерӳҫӗ ята Элӗк тӑрӑхӗнчи Зоя Семенова, ансамбльсем хушшинче Тӑвай тӑрӑхӗнчи «Асамлӑх» ушкӑн ҫӗнсе илнӗ. Лауреатсен йышӗнче — Чӗмпӗр тӑрӑхӗнчи Полина Серебряковапа Канаш тӑрӑхӗнчи Юлия Васильева.