carposting.ru сайтри сӑн

Ака уйӑхӗн 4-мӗшӗнче Патшалӑх истори архивӗнче «Архиври каҫ» акци иртӗ. ЧР Культура министерстви пӗлтернӗ тӑрӑх, кӑҫал вӑл «Пӗлме, упрама, астума» девизпа килӗшӳллӗн иртӗ.

Акцие Раҫҫейри Ҫемье ҫулталӑкне, Чӑваш Енри Экологи ҫулталӑкне тата Андриян Григорьевич Николаев космонавт ҫуралнӑранпа 95 ҫул ҫитнине халаллӗҫ.

«Архиври каҫ» 16 сехетре пуҫланать те 20 сехетре вӗҫленет.

culture.cap.ru сӑнӳкерчӗкӗ

Ыран, ака уйӑхӗн 2-мӗшӗнче, Шупашкара «Ылтӑн маска» пӗтӗм Раҫҫейри театр премийӗн жюри членӗсем килӗҫ. Вӗсем Чӑваш патшалӑх пукане театрӗн «Король Лир» спектакльне хаклӗҫ.

Ҫав ӗҫе «Ылтӑн маска» премие илме тӑватӑ номинаципе тӑратнӑ: «Чи лайӑх спектакль», «Чи лайӑх режиссёр ӗҫӗ», «Чи лайӑх художник ӗҫӗ», «Чи лайӑх актёр ӗҫӗ».

Мускавран килнӗ ӑстасем Чӑваш патшалӑх культура институчӗн студенчӗсене тата патшалӑх театрӗсенче литература енӗпе ӗҫлекен специалистсене ӑсталӑха вӗрентӗҫ.

Унччен спектакль-номинантсене Мускавра кӑтартнӑ пулсан кӑҫал вӗсене жюри членӗсем театрсене ҫитсе курса хаклаҫҫӗ.

www.музуч.рф сӑнӳкерчӗкӗ

Ака уйӑхӗн 15-мӗшӗнче Шупашкарти Ф. Павлов ячӗллӗ музыка училищинче РСФСР искусствӑсен тава тивӗҫлӗ ӗҫченӗ, Анисим Асламас композитор ҫуралнӑранпа 100 ҫул ҫитнине халалласа концерт иртӗ. Вӑл 18 сехет те 30 минутра пуҫланӗ. Концерт тӳлевсӗр пулӗ.

Программӑна анлӑ сарӑлнӑ тата сайра янӑракан оркестр, хор, инструмент тата вокал хайлавӗсене кӗртӗҫ. Сцена ҫине пултарулӑх коллективӗсем, музыка училищин преподавателӗемпе студенчӗсем, Чӑваш патшалӑх оперӑпа балет театрӗн артисчӗсем тухӗҫ.

culture.cap.ru сӑнӳкерчӗкӗ

Пирӗн республикӑра ҫитес уйӑхра иртекен балет фестивалӗ ҫитиччен нумай вӑхӑт юлмасть. Аса илтерер: вӑл ака уйӑхӗн 5-14-мӗшӗсенче Чӑваш патшалӑх оперӑпа балет театрӗнче иртӗ. Пӗтӗм тӗнчери XXVIII балет фестивалӗ вӑхӑтӗнче Шупашкарта ҫулсеренех пысӑк шайри ӑстасем пуҫтарӑнаҫҫӗ. Ҫӗршыври чаплӑ театрсем вӑл вӑхӑтра пирӗн тӑрӑха гастрольсемпе килӗҫ.

Кӑҫал, сӑмахран, «Пушкиниана» премьерӑпа паллаштарӗ. Ӑна Александр Пушкинӑн «Маленькие трагедии» ярӑмне тӗпе хурса хатӗрленӗ. Ӗҫе вилӗмсӗр вырӑс классикӗ ҫуралнӑранпа 225 ҫҫитнине халалланӑ.

Фестиваль Коми Республикинчи оперӑпа балет театрӗн «Крик» балечӗпе уҫӑлӗ.

culture.cap.ru сӑнӳкерчӗкӗ

Пуш уйӑхӗн 28-мӗшӗнче Чӑваш патшалӑх филармонийӗн залӗнче «Его величество орган» (чӑв. Мӑнаҫлӑ орган) органпа симфони музыкин концерчӗ иртнӗ.

Унта Раҫҫей халӑх артисчӗ, чаплӑ органист Рубин Абдуллин тата Раҫҫей халӑх артисчӗ Морис Яклашкин ертсе пыракан Чӑваш патшалӑх симфони капеллин оркестрӗпе хорӗ хутшӑннӑ.

Концертра Иоганн Себастьян Бах, Василий Калиниников, Джулио Каччини тата Отторино Респиги хайлавӗсем янӑранӑ.

culture.cap.ru сӑнӳкерчӗкӗ

Профессионал стрит-арт художниксемпе ӳкерме юратакансем«ФормART» фестивале хутшӑнма пултараҫҫӗ. Ӑна 18 пуҫласа 35 ҫулчченхи ҫамрӑксем валли йӗркелеҫҫӗ.

Фестивалӗн кашни тематикипе пӗр ҫынран 3 заявкӑран ытла йышӑнмӗҫ. Вӗсенесумлӑ экспертсем, сӑнарлӑ тата урамри искусство, архитектура тата хула строительстви енӗпе ӗҫлекен специалистсем хаклӗҫ.

Фестиваль темиҫе номинаципе иртӗ, Ҫавна май кашниех хӑйне ҫывӑххине суйласа илме пултарӗ.

Ҫӗнтерӳҫӗсене хӑйсен ӗҫӗсене Федерацин Атӑлҫи округӗнчи 14 регионта пурнӑҫа кӗртме май туса парӗҫ.

"Контактри" сӑн

Пӗрремӗш каналпа кӑтартакан «Поехали!» кӑларӑм ертӳҫисем Чӑваш Ене килесси пирки пӗлтернӗччӗ. Вӗсем кунтах-ха.

Пуш уйӑхӗн 27-мӗшӗнче ӳкерӳ ушкӑнӗ Канаш муниципаллӑ округӗнчи Ҫӗнӗ Шелттем ялӗнче пулнӑ. Унта хӑнасене «Элгер» фолк-эстрада ушкӑнӗ юрӑ-кӗвӗпе кӗтсе илнӗ.

Телеертӳҫӗсем унта чӑваш пылне тутанса курнӑ, крем-пыл мӗнле тунине сӑнанӑ. Ҫавӑн пекех федераци каналӗн журналисчӗсем ҫурта тӑвас енӗпе ӑсталӑх класне хутшӑннӑ.

Джанита Абевикрема Лиянаге тата Ирина Меньшикова. culture.cap.ru сӑнӳкерчӗкӗ

Пуш уйӑхӗн 27-мӗшӗнче Чӑваш тӗррин музейӗнче «Сказания Шри-Ланки (Tales of Sri Lanka)» курав уҫӑлнӑ.

Ӑна уҫма Шри-Ланкӑн Раҫҫей Федерацийӗнчи чрезвычайлӑ тата тулли пайталлӑ элчи Джанита Абевикрема Лиянаге профессор, Раҫҫейӗн Ют ҫӗршыв ӗҫӗсен министерствин Чулхулари представительствин Чӑваш Енри уйрӑмӗн ертӳҫи Александр Погодейкин, Чӑваш Енӗн культура министрӗ Светлана Каликова, И.Я. Яковлев ячӗллӗ Чӑваш патшалӑх педагогика университечӗн ректорӗ Игорь Кожанов, Чӑваш наци музейӗн директорӗ Ирина Меньшикова хутшӑннӑ. Курав валли элчӗ посольствӑран 25 экспонат илсе килнӗ.

ЧППУра вара Шри-Ланкӑн центрне уҫнӑ.

culture.cap.ru

Ӗнер, пуш уйӑхӗн 27-мӗшӗнче, Пӗтӗм тӗнчери театр кунӗнче, Театр ӳнерӗн «Чӗнтӗрлӗ чаршав» республикӑри конкурса пӗтӗмлетнӗ.

Гран-прие Чӑваш патшалӑх пукане театрӗнче У. Шекспир хайлавӗпе Борис Манджиев режиссёр лартнӑ «Король Лир» спектакль ҫӗнтернӗ.

«Ҫулталӑкри чи лайӑх спектакль» – И. Тургеневӑн пьеси тӑрӑх Дмитрий Миронов режиссёр лартнӑ «Пӗр уйӑх ҫеҫ пӗрле» ӗҫ, «Ачасем алли лартнӑ чи лайӑх спектакль» – А. Болдинов пьеси тӑрӑх Денис Андронов режиссёр лартнӑ «Сказка о добром сердце».

«Чи лайӑх хӗрарӑм ролӗ» номинацире «Пӗр уйӑх ҫеҫ пӗрле» спектакльти Наталья Петровна сӑнарне калӑпланӑ Эмилия Назаровӑна палӑртнӑ, «Чи лайӑх арҫын ролӗ» номинацире «Шурҫамка» спектакльти Шурҫамка сӑнарӗшӗн Сергей Никитина чысланӑ.

«Чи лайӑх сценографи» – «Король Лир» спектакль (ӑна Эмиль Капелюш илемлетнӗ). «Музыка енчен чи лайӑх илемлетни» – «Сказка о добром сердце» спектакль (композиторӗ — Андрей Галкин).

«Иккӗмӗш планти чи лайӑх роль» номинацире «История одной встречи» спектакльти Денис Латышева палӑртнӑ.

https://vk.com/wall-211725618_1626 сӑнӳкерчӗкӗ

Пуш уйӑхӗн 29-мӗшнче Чӑваш Енӗн нци вулавӑшӗнче Владимир Левуков ҫыравҫӑпа тӗлпулу иртнӗ май унӑн «Ӗмӗр пӗрле пуласчӗ» кӗнекине хӑтлӗҫ.

Владимир Леонтьевич — журналист, прозаик, Раҫҫейри писательсен союзӗн членӗ. Физик пӗлӗвӗллӗскер чӑвашла сӑвӑсем, калавсем, повеҫсем ҫырать.

Ҫыравҫӑ Тутарстанри Аксу районӗнчи Кивӗ Тимушкел ялӗнче ҫуралнӑ. 1979 ҫултанпа вӑл Самар облаҫӗнчи Тольятти хулинче пурӑнать. Вырӑнти «Истоки» вулавӑшра чӑваш чӗлхипе культурин клубне ертсе пырать.