never.pnzreg.ru сайтран илнӗ сӑнӳкерчӗк

Пенза облаҫӗнчи Неверкино районӗнчи Бикмурзино ялӗнче чӑваш таврапӗлӳҫисен слечӗ иртнӗ. Ӑна Зинаида Чайко, Олег Жемчугов тата ял ҫыннисем тӑрӑшнипе йӗркеленӗ. Кун пирки «Хыпар» хаҫат пӗлтернӗ.

Слета Тольятти, Чӗмпӗр тата Шупашкар хулисенчи таврапӗлӳҫӗсем пырса ҫитнӗ. Вӗсене вырӑнти хастар Михаил Щербаков «Илем» туризм сукмакӗпе паллаштарнӑ.

«Слета хутшӑннисене чӑваш-апат-ҫимӗҫӗпе сӑйланӑ. Вӗсем салма яшки, ҫичӗ тӗрлӗ кӗрперен пӗҫернӗ пӑтӑ, хуплу, чӑкӑт, килте вӗретнӗ сӑрана тутанса пӑхнӑ», — тесе ҫырнӑ хӑйӗн хыпарӗнче Валентина Петрова.

culture.cap.ru сӑнӳкерчӗкӗ

Нумаях пулмасть Шупашкарти ӳнер музейӗнче унтан кӑҫал вӗренсе тухнисене чысланӑ. Пурӗ 59 ҫамрӑк дизайнерпа художник дипломне илнӗ.

Дипломлӑ специалистсене саламлама республикӑн культура министрӗн ҫумӗ Татьяна Казакова пырса ҫитнӗ. Пиллӗкпе ҫеҫ вӗреннисене вӑл дипломсемпе хавхалантарнӑ.

Училище директорӗ Владимир Ануфриев саламлан, ӳнер училищине ан манса кайӑр, килсех ҫӳрӗр тесе чӗнсе каланӑ май такӑр ҫул суннӑ.

culture.cap.ru сӑнӳкерчӗкӗ

Шупашкарти «Радуга» (чӑв. Асамат кӗперӗ) культурӑпа курав центрӗнче Людмила Лоскутова уйрӑм ҫын коллекцийӗнчи картинӑсен «Вернисаж души» (чӑв. Чун вернисажӗ) куравӗ уҫӑлнӑ. 

Куракансене унта Чӑваш Енри паллӑ ӳнер ӑстисен живопись тата графика ӗҫӗсемпе, пурӗ 80 картинӑпа, паллаштараҫҫӗ. Унта Николай Карачарсков, Николай Овчинников, Виктор Немцев, Анатолий Рыбкин, Раиса Терюкалова, Нина Алимасова, Станислав Воронов, Анатолий Силов тата ытти художник, пурӗ 33 ҫыннӑн, ӗҫӗсем пур.

Тӑван тӑрӑхӗн ытарайми илемӗпе хавхаланнӑ Людмила Лоскутова ҫав картинӑсене 40 ҫул ытла пухса пынӑ.

culture.cap.ru сӑнӳкерчӗкӗ

Шупашкар хулинче кӗнеке йышӑнакан контейнерсем вырнаҫтарса тухнине эсир те, тен, асӑрханах пулӗ. Ҫак йӗркесен авторӗ вӗсене икӗ ҫӗрте курма ӗлкӗрчӗ.

Республикӑн Культура министерстви пӗлтернӗ тӑрӑх, ялти вулавӑшсене пулӑшас тӗллӗвӗллӗ акци ҫӗртме уйӑхӗн 16-мӗшӗнче пуҫланнӑ.

Пирӗнтен кашнин килӗнчех унччен вуласа тухнӑ кӗнекесем ҫӳлӗк ҫинче тусанланса выртни вӑрттӑнлӑх мар. Кӗнекене е журнала тухса пеме шел, анчах кама памаллине пӗлместӗн. Ун пек чухне ӑна ятарлӑ контейнера кайса ямалла. Кӗнекене пӗр-пӗр ялти вулавӑша илсе кайӗҫ.

Кӗнеке боксӗсем Иван Франко урамӗнчи 10-мӗш тата 20-мӗш, П. Лумумба урамӗнчи 6-мӗш, Октябре 50 ҫул урамри 16-мӗш¸ Николаев космонавт урамӗнчи 46-мӗш, Гагарин урамӗнчи 26 тата 19-мӗш, Чапаев урамӗнчи 8 корпусри 2-мӗш, Энгельс урамӗнчи 3/1-мӗш,  Н. Смирнов урамӗнчи, 7-мӗш, Кадыков урамӗнчи 28 тата 34-мӗш, Гастелло урамӗнчи 3 А, Пролетарски урамри 21 тата 22-мӗш , 9-мӗш Пилӗкҫуллӑх урамӗнчи 4В тата 32А, Хусанкай урамӗнчи 6, 23А, 32-мӗш, Шумилов урамӗнчи 11А ҫуртсен умӗнче пур.

днт21.рф сайтри сӑн

Кӑҫал Ҫӗрпӳри Тихвин ярмӑркки утӑ уйӑхӗн 3-мӗшӗнче 17:30 сехетре уҫӑлать. Ҫав кун сцена ҫине вырӑнти ансамбльсем, чӑваш эстрада юрӑҫисем тата «Мантана» ушкӑн тухӗҫ.

Утӑ уйӑхӗн 4-мӗшӗнче наци картишӗ пулӗ тата гастрономи фестивалӗ уҫӑлӗ, халӑх пултарулӑхӗн ӑстисен конкурсӗ те иртӗ. Каҫхине «Сказки Грим» ушкӑн концерчӗ пулӗ. Ҫавӑн пекех ҫулӑмлӑ шоу курма май пулӗ.

Утӑ уйӑхӗн 5-мӗшӗнче ача-пӑча «Акатуйӗ», «Цивильские перезвоны» фестиваль, «Добрые крышечки» эко-ыркӑмӑллӑх фестивалӗ иртӗ. Ҫав кунах «Служу Отечеству» ушкӑн концерт кӑтартӗ. Каҫхине фейерверк пулӗ.

Утӑ уйӑхӗн 6-мӗшӗнче ярмӑрккӑна пӗтӗмлетӗҫ.

Паян Андрей Малаховӑн «Песни от всей души» кӑларӑмӗнче (ӑна «Раҫҫей 2» каналпа шӑматкунпа вырсарникун эфира кӑлараҫҫӗ) паян Чӑваш Енри «Формат» ушкӑна кӑтартрӗҫ.

Русланпа Владимир хӑйсем ҫырнӑ юрӑсене шӑрантараҫҫӗ, ҫӗршыв тӑрӑх концертсемпе ҫӳреҫҫӗ.

Руслан ачаллах тӑлӑха юлнӑ, ача ҫуртне лекнӗ. Анчах кӑштахран ӑна ҫывӑх тӑванӗ хӑй килне илсе кайнӑ. Ӑна Руслан «тётя» тет пулин те телефонта «мама» тесе ҫырса хунӑ. Хӑй пӗчӗкрех кӗлеткеллӗ пулин те ача чухне никам та кӳрентермен.

Владимир ачалӑхӗ те ҫӑмӑл пулман — вӑл усал ашшӗне (вӑл тахҫанах вилнӗ) каҫарма пултарни пирки паян та иккӗленет.

Ҫак кунсенче Етӗрне округӗнчи Килтӗш ялӗнче ҫӗнӗ культура ҫурчӗ уҫӑлнӑ.

Ял ҫыннисем ку ӗҫе сахал мар тӳпе хывнӑ. Клуба пуҫаруллӑ бюджетировани программипе килӗшӳллӗн хута янӑ. Вӑл хальхи пурнӑҫпа килӗшсе тӑрать.

Клуба савӑнӑҫлӑ лару-тӑрура уҫнӑ. Ял ҫыннисемшӗн чӑн-чӑн уяв пулнӑ. Сцена ҫинче «Мучар Ен» ансамбль, Советски шкулӗн ачисем, Хӗрлӗ Чутай тата Ҫӗмӗрле округӗсенчи пултарулӑх ушкӑнӗсем юрӑ-ташӑпа савӑнтарнӑ.

chuvbook.ru сӑнӳкерчӗкӗ

Нумаях пулмасть Чӑваш кӗнеке издательствинче Константин Ивановӑн вилӗмсӗр «Нарспи» поэми кун ҫути курнӑ. Ӑна ике чӗлхепе пичетлесе кӑларнӑ. Вырӑсла варианчӗ - Петӗр Хусанкай чӑваш халӑх поэчӗ куҫарни.

Аса илтерер: поэма пуҫласа 1908 ҫулта кун ҫути курнӑ. Унтанпа пӗр ӗмӗр ытла иртнӗ. Ҫав вӑхӑтра вӑл темиҫе хут та пичетленсе тухнӑ. Автор чӗлхипе ҫеҫ мар, хайлава ытти халах чӗлхи ҫине те куҫарнӑ.

Чӑваш кӗнеке издательствинче пӗлтерне тӑрах, ҫӗнӗ кӑларӑм хуплашкине Александр Федоров ҫамрӑк художник хатӗрленӗ, кӗнекене Наталия Орлова илемлетнӗ.

cheb-centr.soc.cap.ru сӑнӳкерчӗкӗ

Шупашкарти ватӑсем паян Куславккари Николай Лобачевскийӗн музей-ҫуртӗнче пулса курнӑ. Хулара пурӑнакан хастар пенсионерсем Шупашкарти комплекслӑ центрта пурнӑҫлакан «Социаллӑ туризм» проект май панипе тӗрле ҫӗре тухса ҫӳреҫҫӗ. Нумаях пулмасть вӗсем Йошкар-Олара пулнӑччӗ, маларах Хусана ҫитсе килнӗччӗ.

Николай Лобачевский паллӑ математик пурӑннӑ ҫуртпа та вӗсем кӑсӑкланса паллашна. «Пире ҫакӑн пек ҫулҫӳревсем питех те кирлӗ. Ун тухса ҫуресен эпир хавхаланатпӑр, кӑмӑл та уҫӑлать», - палӑртса хӑварнӑ 78 ҫулти Геннадий Краснов.

www.cap.ru сӑнӳкерчӗкӗ

Шупашкарти Чӑваш тӗррин музейне уҫнӑранпа ҫӗртме уйӑхӗн 23-мӗшӗнче 10 ҫул ҫитнӗ. Ҫав ятпа музея тӗрле хӑнана йыхравланӑ, ҫав шутра Шупашкарта декораципе прикладной ӳенерен ӑстисен пӗтӗм Раҫҫейри XXII конкурсне хутшӑнакансем те пулнӑ.

Культура учрежденийӗнче тӑрӑшакансем Чӑваш тӗррин музейӗ чӑваш тӗррипе халӑха кӑсӑклантарассинче самай пысӑк вырӑн йышӑннине палӑртаҫҫӗ. Совет саманиччен чӑваш тӗррилле япаласене сутса илес йӑла-йӗрке пулман. Ку вӑл тӗрӗн хӑйне евӗр асамлӑхӗ пулнине пӗлтерет. Паян чӑваш тӗрриллӗ ҫипуҫа сцена ҫинче ҫеҫ мар, ытти ҫӗрте те курма пулать.