culture.cap.ru сайтран илнӗ сӑнӳкерчӗк

Чӑваш Енӗн ача-пӑчапа ҫамрӑксен вулавӑшӗнче литература пултарулӑхӗн регионсем хушшинчи IX «Ҫӗнӗ ятсем уҫатпӑр» конкурсӗн ҫӗнтерӳҫисене чысланӑ. Кӑҫалхи конкурса Константин Иванов ҫуралнӑранпа 135 ҫул ҫитнине халалланӑ.

Чӑвашла сӑвӑ сыракан 15-25 ҫулсенчи ҫамрӑксем хушшинче пӗрремӗш вырӑна Ҫӗрпӳри 2-мӗш вӑтам шкулти чӑваш чӗлхипе литератури учителӗ Ксения Леонтьева ҫӗнсе илнӗ. 25-35 ҫулсенчи авторсенчен Шупашкарти И. Тургенев ячӗллӗ вулавӑшри Кристина Васильева пӗрремӗш вырӑна тивӗҫнӗ.

Чӑвашла проза ҫыракан 25-35 ҫулсенчи ҫамрӑксенчен жюри Вӗренӳ тата ачасене комплекслӑ пулӑшакан центрӑн вырӑс чӗлхи учителӗн Елена Кудрявцевӑн ӗҫне суйласа илнӗ.

Кунсӑр пуҫне 2-мӗш тата 3-мӗш вырӑна тухнисене те палӑртнӑ, вырӑсла ҫыракан авторсене те чысланӑ.

Чӑваш Енӗн Экономика министерствин сӑнӳкерчӗкӗ

Чӑваш Ен республикӑмӑр туристсене мӗнпе илӗртме пултарни ҫинчен Китайра каласа кӑтартнӑ. Пекин хулинче пӗтӗм тӗнчери China Outbound Travel & Tourism Market курав иртет. Чӑваш Ен те унта хутшӑнать.

Курава 70 ҫӗршыври туризм отраслӗн 20 пине яхӑн специалисчӗ, эксперчӗсем пуҫтарӑннӑ иккен. Чӑваш Енпе Раҫҫейӗн Discover Russia стенчӗ патӗнче паллашма май туса панӑ. Кун пирки республикӑн Экономика министерстви пӗлтернӗ.

Чӑваш кӗнеке издательствинче Валентин Константиновӑн кӗнеки пичетленсе тухнӑ.

Вӑл «Ют ҫын ачи» ятлӑ. Кӗнекери хайлавсене икӗ ушкӑна пайласа вырнаҫтарнӑ.

Пӗрремӗшӗ, «Тӗрӗслӗх пурах тӗнчере» ятлӑ. Унта вулакана шухӑшлаттаракан, тавлаштаракан хайлавсем кӗнӗ. Иккӗмӗш ярӑмра – шӳтлӗ хайлавсем.

Палӑртса хӑварар: Валентин Константинов – журналист, ҫыравҫӑ, хальхи вӑхӑтра Куславкка районӗн хаҫачӗн тӗп редакторӗнче ӗҫлет.

Ольга Туркайӑн "Контактра" страницинчен илне сӑнӳкерчӗк

Чӑваш Енӗн Наци вулавӑшӗнче тӑван чӗлхене вӗрентекенсен пысӑк форумӗ иртнӗ.

Ольга Туркай радиожурналист пӗлтернӗ тӑрӑх, мероприяти вӑхӑтӗнче Наци библиотеки йӗркелесе ирттернӗ «Тӑван сӑмах» вулакансен аудиокӗнеке конкурс ҫӗнтерӳҫисене чысланӑ. «Республика шайӗнче иртнӗ конкурса 90 яхӑн ҫын хутшӑнчӗ. Пиллӗк номинаципе ҫӗнтерӳҫӗсене палӑртрӑмӑр. Ӑста вулакансем нумай пулчӗҫ. Тӗлӗнмелле пултаруллӑ халӑх пирӗн! Ҫакӑн пек кирлӗ, лайӑх конкурс ирттернӗшӗн Наци библиотекин ӗҫченӗсене пысӑк тав!» — хыпарланӑ Ольга Туркай.

morgau.cap.ru сӑнӳкерчӗкӗ

Иртнӗ эрнере, ака уйӑхӗн 24-мӗшӗнче, Муркашри культура ҫуртӗнче «Муркаш» фольклор коллективӗн 25 ҫулхине уявланӑ. Коллектива Чӑваш Республикин культурӑн тава тивӗҫлӗ ӗҫченӗсем А.В. Аникин, Ф.Ф. Григорьева, С.А. Каликов ертсе пыраҫҫӗ.

Чӑваш халӑх юррине ламран лама парса хӑварассипе йыш пысӑк тӳпе хывать. Асӑннӑ ансамбльтен ача-пӑчан «Шӑнкӑрав» тата «Шӑпчӑк» ансамблӗсем йӗркеленсе кайнӑ.

Юбилейпа саламлама Йӗпреҫ районӗнчи «Ахах», Шупашкарти «Эткер», Мари Элти «Мырылтенӑ, кушталтенӑ» ансамбльсем пырса ҫитнӗ. Унсӑр пуҫне Муркаш тӑрӑхӗнчи «Тӑванлӑх», «Екрем», «Хавас» ансамбльсем те саламланӑ.

"На связи" форумри сӑн

Шупашкарти Хӗрлӗ тӳремри Раҫҫейӗн тӗрленӗ карттин музейӗ ака уйӑхӗн 25-мӗшӗнче уҫӑлнӑ. Хальлӗхе – савӑнӑҫлӑ лару-тӑрусӑрах. Музея официаллӑ лару-тӑрура каярахпа тӳре-шарапа уҫӗҫ. Анчах хальлӗхе ку хӑҫан пулассине пӗлтермен.

Музей паянхи кун тест режимӗнче ӗҫлет. Унта кӗрсе курма тӳлевлӗ. Аслисен билечӗ – 300, 7 ҫултан аслӑрах ачасен билечӗ 150 тенкӗ тӑрать. 7-рен кӗҫӗнреххисене тӳлевсӗр кӗртеҫҫӗ. Ют ҫӗршывран килнӗ ҫынсен 1 пин тенкӗ тӳлемелле.

Аса илтерер: планпа килӗшӳллӗн ҫак музейӗн 2024 ҫулхи чӳк уйӑхӗн 26-мӗшӗнче, Чӑваш тӗррин кунӗнче, уҫӑлмалла пулнӑ.

Чӑваш патшалӑх академи драма театрӗн сӑнӳкерчӗкӗ

Ҫу уйӑхӗн 29-30-мӗшӗсенче Чӑваш патшалӑх академи драма театрӗнче режиссёрсене вӗрентӗҫ. Професси енчен хушма пӗлӳ парпкан программӑна ӑша илес текенсем «Театрсенче

тата концерт залӗсенче сасӑ режиссуринчи професси вӑрттӑнлӑхӗсем» енӗпе вӗренӗҫ.

Программӑна ГИТИСпа пӗрле хатӗрленӗ. Курс икӗ куна пырӗ. Ун вӑхӑтӗнче теори тата практика занятийӗсем пулӗҫ.

Курс преподавателӗсемк: Станислав Шевцов, ГИТИСӑн сасӑ режиссурин кафедрин заведующийӗ, доцент, техника наукисен кандидачӗ; Михаил Трофименко, маларах асӑннӑ кафедра преподавателӗ.

culture.cap.ru сӑнӳкерчӗкӗ

Чӑваш патшалӑх ӳнер музейӗн М.С. Спиридоновӑн мемориаллӑ музей-хваттерне юсаса ҫӗнетнӗ хыҫҫӑн уҫнӑ.

Музей Чӑваш Енре изобразительнӑй ӳнере пуҫарса янӑ пултаруллӑ ҫыннӑн пурнӑҫӗпе тата пултарулӑхӗпе паллаштарать. «Хрущевкӑри» иккӗмӗш хутра вырнаҫнӑҫав хваттерте художник хӑйӗн пурнӑҫӗн юлашки 15 ҫулне пурӑнса ирттернӗ.

Музей-хваттере ака уйӑхӗн 25-мӗшӗнче уҫнӑ.

Иртнӗ эрнекун К.В. Иванов ячӗллӗ Чӑваш патшалӑх академи драма театрне Раҫҫей тава тивӗҫлӗ, Чӑваш халӑх артистки Валентина Трифонова сцена искусствине кӑмӑллакансене пуҫтарчӗ. Юбилей каҫне пултарулӑх ушкӑнӗсем, уйрӑм артистсем, культура ӗҫӗн ветеранӗсем хутшӑнчӗҫ.

…Экран ҫинче чылай ҫул каялла куракансене пӑлхантарнӑ сӑнарсем пӗрин хыҫҫӑн тепри улшӑнса пыраҫҫӗ. Акӑ ытарайми Сафия («Алхасуллӑ ҫамрӑклӑх», А. Абдулин), тӳрӗ кӑмӑллӑ, ачаш Ахахпи («Сан ятупа», П. Афанасьев), канӑҫсӑр Майя («Ашшӗ, амӑшӗ, ачисем», Г. Хухавили), ҫемҫе кӑмӑллӑ София («Телейсӗрскер» И. Тоболевич)… Вӗсенчен кашнинех актриса хӑнӑхнӑ меслетсемпе мар, пурнӑҫа лайӑх сӑнаса, автор уҫса кӑтартнӑ самантсене пур енлӗн шута илсе калӑпланӑ, ҫавӑнпа вӗсем тарӑн та ӑнланмалла пулса тухнӑ.

Ҫакна тухса калаҫакансенчен нумайӑшӗ, ку шутра театрӑн директорӗ Елена Николаева та, палӑртса хӑварчӗ.

– 1967 ҫулта эпир, вунсакӑр каччӑпа хӗр, театр ӑсталӑхне вӗренме тухса кайрӑмӑр, – тет Ленинградри театр, музыка тата кино институтӗнчен вӗренсе тухнӑ Владимир Бурмистров.

Малалла...

Чӑваш патшалӑх ҫамрӑксен театрӗн сӑнӳкерчӗкӗ

Ҫак эрнере Чӑваш патшалӑх

ҫамрӑксен театрӗнче «Ҫӑкӑр чӗлли» драма кӑтартнӑ. Пьеса авторӗ — Ева Лисина прозаик.

Театрта пӗлтернӗ тӑрӑх, Ева Лисина Тӑван ҫӗршывӑн аслӑ вӑрҫи хыҫҫӑнхи ҫулсенче выҫӑпа вилнӗ ачасене асӑнса «Ҫӑкӑр чӗлли» калав ҫырнӑ.

«Ашшӗсӗр тӑрса юлнӑ ҫемьен йывӑр пурнӑҫӗ калавра хӗрача куҫӗпе уҫӑлса пырать. Ҫула май чӑваш халӑхӗн наци характерӗ те курӑнсах тӑрать кунта.

Вӑрҫӑ хыҫҫӑнхи чӑваш ялӗн выҫӑллӑ-тутӑллӑ пурнӑҫне кӑтартнӑ май писательница ҫав вӑхӑтри йывӑрлӑхсене, пӗчӗк хӗрача ҫӑкӑршӑн ҫав тери тунсӑхланине кӑтартса парать.

«Ҫут тӗнчере савӑнӑҫпа хурлӑх пӗр тан валеҫӗнес пулсан, ман ҫӗршывӑм тахҫанах ырӑлӑхра пурӑнмалла», – пӗтӗмлетсе калать автор вӗҫӗнче», — хыпарланӑ театрта.