Елчӗк районӗнче пурӑнакан пӗр хӗрарӑм Единство»коммерциллӗ мар организацирен кредит илмен. Анчах унта ӗҫлекенсем ӑна парӑма парса татма ыйтнӑ. Хӗрарӑм кӑҫал нарӑс уйӑхӗнче унтан 30 пин тенкӗ займ илнӗ-мӗн.

Ку ӗҫ тӗлӗшпе тӗрӗслев ирттернӗ. Ҫапла майпа кооператив ӗҫченӗ ҫав хӗрарӑмӑн персоналлӑ даннӑйӗсемпе усӑ курнине, ун евӗр алӑ пуснине, ун ячӗпе займ пама документсем хатӗрленине палӑртнӑ. Ҫав укҫапа вӑл хӑй пӗлнӗ пек усӑ курнӑ.

Кооператив ӗҫченӗ тӗлӗшпе пуҫиле ӗҫ пуҫарнӑ.

ҪҪХПИ тунӑ сӑн

Ҫул-йӗрпе патруль инспекторӗсем хӑйсем мӗнле ӗҫленине халӑх тетелӗсенчи страницисенче те ҫутатса тӑраҫҫӗ. Патшалӑх автоинспекцийӗ Инстаграмри страницинче инспекторсем ырӑ ӗҫ туни пирки ҫырнӑ. Вӗсем ҫухалнӑ кинемее киле ҫитме пулӑшнӑ.

Ҫул-йӗрпе патруль службин ӗҫченӗсем Куславкка районӗнче машинӑпа пынӑ. Хайхискерсем ҫул хӗрринче кинемей алӑпа сулкалашнине курнӑ та чарӑннӑ. Ватӑскер ҫухалса кайнӑ-мӗн. Вӑл пакунлисене ывӑлӗ патне леҫсе яма ыйтнӑ.

«Кинемей ӑҫта пурӑннине палӑртрӑмӑр, ӑна киле ҫитертӗмӗр. Вӑл пире тав турӗ. Хамӑрӑн та чунра ӑшӑ туйӑм хуҫаланчӗ», - ҫырнӑ ҪҪХПИн халӑх тетелӗнчи страницинче.

Паян Шупашкарти Пирогов урамӗнчи 6-мӗш ҫуртра вырнаҫнӑ психиатри пульницинчен обществӑшӑн хӑрушӑ пациент тухса тарнӑ. Ку 11 сехет тӗлнелле пулнӑ.

Атмалкин Александр Алекссевич унта суд йышӑнӑвӗпе килӗшӳллӗн сипленнӗ. Вӑл 1991 ҫулта ҫуралнӑ, Шупашкар районӗнчи Кӳкеҫ поселокӗнче пурӑнать. Атмалкин А.А. 2010 ҫулта ҫаратнӑшӑн, вӑрланӑшӑн тата машина хӑваласа тарнӑшӑн судпа айӑпланнӑ.

Тухса тарнӑ арҫын 170 сантиметр ҫӳллӗш, ҫӳҫӗ хӗрлӗ сарӑ, кӗске. Хӑй ӗҫ тумне тӑхӑннӑ пулнӑ.

Йӑлана кӗнӗ тӑрӑх, Республика кунӗ Шупашкарта тата пӗр районта иртет. Ҫитес ҫул уява ӑҫта ирттерӗҫ-ха?

2019 ҫулта Республика кунӗнчи уявсем Шупашкарта тата Улатӑр районӗнче ирттерӗҫ. Ҫавна май муниципалитета грант уйӑрса парӗҫ. Ку укҫа-тенкӗпе районта хӑтлӑх, илем кӗртӗҫ.

Аса илтерер: кӑҫал Республика кунне Шупашкарта тата Красноармейски районӗнче ирттернӗ.

Александр Иванов министр

Паян Чӑваш Енӗн вӗренӳ тата ҫамрӑксен политикин министрне Александр Иванова «Чӑваш Республики умӗнчи тава тивӗҫлӗ ӗҫсемшӗн» орденпа чыслама йышӑннӑ. Хушӑва Чӑваш Ен Элтеперӗ Михаил Игнатьев ала пуснӑ. 119-мӗш номерлӗ ӗҫлӗ хута ЧР влаҫ органӗсен офицаллӑ порталӗнче вырнаҫтарнӑ.

Михаил Игнатьев хушура палӑртнӑ тӑрӑх, Александр Степановича наградӑна «Чӑваш Республикин социаллӑ пурнӑҫӗпе экономикине аталантарма тӳпе хывнӑшӑн тата нумай ҫул тӳрӗ кӑмӑлпа ӗҫленӗшӗн» пама йышӑннӑ.

Александр Иванов Муркаш районӗнче ҫуралнӑ. И.Я. Яковлев ячӗллӗ ЧППУран вӗренсе тухсан вӗрентекенте, шкул директорӗнче, Шупашкар район администрацийӗнче ӗҫленӗ. Кайран вӑл Чӑваш Енӗн Патшалӑх Канашӗн Аппарачӗн Ертӳҫи те, Чӑваш Енӗн Элтеперӗн Администрацийӗн Ертӳҫи те, ЧР информаци политикин министрӗ те пулчӗ.

Чӑваш Енӗн строительство тата транспорт министрӗ Владимир Иванов «Мегафон» компанийӗнче 15 ҫул каялла ӗҫленине аса илнӗ.

Министр Фейсбукра пӗлтернӗ тӑрӑх, унта вӑл 15 ҫул каялла коммерци директорӗнче тимлеме тытӑннӑ.

Ҫав пукана вӑл ертсе пырас опыта федерацин пысӑк компанийӗнче пухас тӗллевпе кӳлӗннӗ. Коммерци директорӗн пуканне йышӑнас текенсем уҫҫӑн тура 35-ӗн пухӑннӑ. «Мана ӗҫе илнӗ вӑхӑтра Чӑваш Енре 5-6 ҫын ҫеҫчӗ — Чӑваш Енри офис директорӗ Александр Свечников, тӗп йӗркелӳҫӗ Александр Родионов (вӑл кайран Чӑваш Енри МТСа чылай ҫул ертсе пычӗ), техника директорӗ Анатолий Жижко, айти Николай....., сете планлакан Саша Алякин пулнӑ», — аса илнӗ министр 15 ҫул каяллахине. Компани ӗҫченӗсем хӑйсенчен ҫирӗп ыйтнӑ, клиентсене вара хӑвӑрт пулӑшма тӑрӑшнӑ

2004 ҫулхи ҫурла уйӑхӗн 17-мӗшӗ тӗлне, 10 уйӑхра, республикӑра вӑйлӑ сеть йӗркеленӗ, 130 дилер центрӗ уҫнӑ. Коммерци директорӗнче ӗҫленӗ пирвайхи кунне 5 пин абонент «Мегафон» компани пулӑшӑвӗпе усӑ курма пуҫланӑ.

«Мегафонти опыт халӗ мана Чӑваш Енӗн Транспорт тата ҫул-йӗр хуҫалӑхӗн министерствине ертсе пыма пулӑшать», — тесе ҫырнӑ министр.

Малалла...

«Про Город» сайтран илнӗ сӑн

Шупашкарта пурӑнакан Сергей Алексеевич Александров ҫурла уйӑхӗн 28-мӗшӗнчех ҫухалнӑ. «Лиза Алерт» отряд ӑна халӗ те шырать.

Сергей Александров – строитель. Ҫурла уйӑхӗн 28-мӗшӗнченпе ӑна никам та курман, тӑванӗсем нимӗн те пӗлмеҫҫӗ.

Ҫамрӑк строитель 180 сантиметр ҫӳллӗш, хыткан кӗлеткеллӗ, ҫӳҫӗ ҫутӑрах, куҫӗ симӗс. Ҫухалнӑ чухне хура ветровка, Париж сӑнланӑ шурӑ футболка, хура шӑлавар, хура пушмак тӑхӑннӑ пулнӑ.

Сергей Александров пирки мӗн те пулин пӗлетӗр тӗк полицие 02 номерпе шӑнкӑравласа пӗлтерӗр.

РФ Следстви комитечӗн Чӑваш Енри следстви управленийӗн ертӳҫи Александр Полтинин республикӑра тин ҫуралнӑ ачасен пурнӑҫне ҫӑлас тӗллевпе бэби-бокссем вырнаҫтарма сӗннӗ. Тӳрех палӑртмалла: кунашкал бокссем чылай регионта пур, ҫав шутра – Тутарстанра та.

Бэби-бокссем чӑннипех те кирлӗ. Кӑҫал ав республикӑра амӑшӗсем тин ҫуралнӑ виҫӗ ачана вӗлернӗ. Кунашкал тӗслӗх Шупашкарта иккӗ пулнӑ, Ҫӗнӗ Шупашкарта – пӗрре. Пӗлтӗр вара пӗр амӑшӗ ачана вӗлернӗ.

Аса илтерер: авӑнӑн 16-мӗшӗнче Шупашкарти Б.Хмельницкий урамӗнчи пӗр ҫуртра ҫӳп-ҫап проводӗнче ача виллине тупнӑ. Амӑшне, 17-ри студенткӑна, тӳрех тупнӑ. Вӑл хӗр пӗрчине ҫуратнӑ та тухса пенӗ.

Бэби-бокса амӑшӗ тин ҫуралнӑ ачине анонимлӑ майпа килсе хума пултарать. Вӑл – ачана ҫӑлмалли вырӑн. Килсе хунӑ пепкене тухтӑрсем илӗҫ, сывлӑхне тӗрӗслӗҫ.

Юлашки вӑхӑтра «Янлекс. Такси» лайӑхах мар енӗпе палӑрчӗ темелле. Ҫак таксире ӗҫлекен водительсем аварисене час-часах ҫакланаҫҫӗ. Тӗслӗхрен, Шупашкарта Ленин Комсомолӗн урамӗнче «Яндекс. Такси» 11-ти хӗрачана вилмеллех ҫапса кайнӑччӗ.

Ҫак таксипе пӑтӑрмах нумай пулнине кура Патшалӑх автоинспекцийӗ ӑна ҫирӗп тӗрӗслеме тытӑннӑ. Ведомствӑн «Контактра», «Инстаграм» халӑх тетелӗсенчи страницисенче ӳсӗр водителе тытса чарни пирки хыпар пур.

«Яндекс. Такси» службӑра ӗҫлекен водителе ӗнер, юпа уйӑхӗн 21-мӗшӗнче, Шупашкар районӗнче тытса чарнӑ. Ҫакнашкал водительсене асӑрхасан 62-00-22 номерпе шӑнкӑравлама ыйтаҫҫӗ.

«Про Город» сайтран илнӗ сӑн

Шупашкарта 22 ҫулти каччӑна пиллӗкмӗш кун шыраҫҫӗ. Артем Петрович Макаровран юпа уйӑхӗн 17-мӗшӗнченпе сас-хура ҫук. Юлашки хутчен ӑна савнӑ хӗрӗ курнӑ.

Ҫав каҫ вӗсем кафере пулнӑ. Артем савнине киле ҫите ӑсатнӑ, хӑй ӗҫсем пур тесе кайнӑ. Ӑҫта тата камсем патне кайнине каччӑ каламан. «Нумайлӑха мар», - ҫапла ҫеҫ пӗлтернӗ вӑл.

Анчах Артем ҫӗрле те таврӑнман. Пике пӑшӑрханса ӳкнӗ. Тусӗсем те Артем ӑҫта пулнине пӗлмеҫҫӗ. Тӑванӗсем полицирен пулӑшу ыйтнӑ.

Артем Макаров 170 сантиметр ҫӳллӗш, вӑтам пӳ-силлӗ, куҫӗ кӑвак, ҫӳҫӗ кӗске. Ҫухалнӑ кун куртка, кӑвак джинс, кроссовка тӑхӑннӑ пулнӑ. Артем ӑҫта пулнине пӗлекенсене 89196683600 (ашшӗ) е 02 номерпе шӑнкӑравлама ыйтаҫҫӗ.