Пӗлтӗр ҫуркунне мотоциклист Шупашкарти База проездӗнче ҫул ҫинчи шӑтӑка пырса тӑрӑннӑ та «тимӗр урхамахне» сиенлетнӗ.

Кун хыҫҫӑн шӑтӑка виҫнӗ. Вӑл 1,1 метр тӑршшӗ, 90 сантиметр сарлакӑш, 14 сантиметр тарӑнӑш пулнӑ. Нормативпа килӗшӳллӗн вара сарлакӑшӗ 60 сантиметртан, тӑршшӗ 15 сантиметртан, тарӑнӑшӗ 5 сантиметртан ытларах пулмалла мар.

Экспертиза «Ямаха» мотоцикла юсамашкӑн 193 пин те 717 тенкӗ кирлӗ тесе палӑртнӑ. Вӑл вӗр ҫӗнӗ пулманнине кура – 71 пин те 800 тенкӗ. Мотоциклист ҫак укҫана ку ҫула пӑхса тӑракан организацирен суд урлӑ ыйтнӑ.

Суд мотоциклист майлӑ пулнӑ. Судья организацирен 71 пин те 800 тенкӗ шыраса илме йышӑннӑ. Кунсӑр пуҫне экспертиза тунӑшӑн – 2500 тенкӗ, ытти расхутшӑн 9 пин ытла тенкӗ тӳлемелле.

Пӑрахӑҫа кӑларнӑ «Шупашкар» ҫар карапне Шупашкарти арҫынсен мӑнастирне хирӗҫ вырнаҫтарӗҫ. Хула администрацийӗ ӑна вырнаҫтармашкӑн проект ӗҫӗсене саккас панӑ. Ку тӗллевпе хула хыснинчен 3,5 миллион тенкӗ уйӑрнӑ.

Проектпа уҫӑ аукцион ҫу уйӑхӗн 4-мӗшӗнче иртӗ. Унӑн ҫӗнтерӳҫин проекта кӑҫалхи чӳк уйӑхӗн 11-мӗшӗччен хатӗрлемелле. Кунсӑр пуҫне ҫав вырӑнта Атӑл хӗррине 200 метр хӑтлӑлатмалла.

Карапа юханшыв хӗрринчен темиҫе метрта вырнаҫтарӗҫ. Ун патне 3 метр сарлакӑш кӗпер илсе ҫитерӗ. Карап ҫывӑхӗнче ҫутӑ пулӗ.

Шупашкарти икӗ ача пахчине пӗрлештернӗ. Реорганизаци 137-мӗш тата 6-мӗш ача пахчисене пырса тивнӗ. Кун пирки Шупашкар хула администрацийӗн вӗренӳ управленийӗнче пӗлтереҫҫӗ.

Вӗренӳ управленийӗ ҫакӑ вӗренӳ пахалӑхне лайӑх витӗм кӳнине пӗлтерет. Чылайӑшӗ, ахӑртнех, унти хӑш-пӗр специалист ӗҫсӗр тӑрса юлӗ тесе шухӑшлӗ. Ҫук, кулянма кирлӗ мар. Икӗ ача пахчинчи штата та упраса хӑварӗҫ.

137-мӗш ача пахчинче ку япӑх куракан шӑпӑрлансем валли ушкӑн пур. Ӑна та пӗтермӗҫ, вӑл малашне те ӗҫлӗ. Икӗ учреждение пӗрлештернӗ хыҫҫӑн вӗсенче 562 ҫын ӗҫлӗ.

Шупашкарта пурӑнакан хӗрарӑм каҫхине яланхи пекех ҫывӑрма выртнӑ. Хайхискер уринчен темӗн ҫыртнипе вӑранса кайнӑ. Йӗкехӳре иккен!

Нумай хваттерлӗ ҫав ҫуртра камӑн кушак пур – ҫавсем ҫеҫ лӑпкӑ ҫывараҫҫӗ-мӗн. Унта йӗкехӳре нумай иккен. Хӗрарӑм хваттере нумай пулмасть туяннӑ. Вӑл тӳрех йӗкехӳре шӑтӑкне хупланӑ. Анчах кӑшлакан чӗрчунсем урай айӗнче шатӑртаттарнӑ, хваттере тухма хӑтланнӑ.

Йӗкехӳресем хваттере тухсан ачасен кравачӗ ҫине хӑпарса ҫывӑрнӑ. Нумаях пулмасть вӗсем хӗрарӑма ҫывӑрнӑ чухне уринчен ҫыртса илнӗ. Халӗ унӑн темиҫе кун пульницӑра выртма тивет, унта ӑна вакцинаци тӑваҫҫӗ тата суранне сиплеҫҫӗ.

Ҫуртӑн пӗрремӗш хутӗнче апат-ҫимӗҫ лавкки вырнаҫнӑ. Йӗкехӳресем ҫавӑнтан килеҫҫӗ-мӗн. Ҫынсем лавкка тӗлӗшпе ҫӑхав темиҫе хутчен те ҫырнӑ. Анчах хальлӗхе нимӗнле улшӑну та ҫук. Лавкка лицензи мӗнле илнинчен тӗлӗнмелли ҫеҫ юлать.

Шупашкарта 32 ҫулти усламҫӑ регистрацилемен эмелсене «Контактра» халӑх тетелӗ урлӑ сутнӑ. Ҫавӑнпа ун тӗлӗшпе пуҫиле ӗҫ пуҫарнӑ.

Следстви версийӗ тӑрӑх, 2016 ҫулхи юпа уйӑхӗнче ҫак арҫын «Ҫыхӑнура» халӑх тетелӗнче икӗ страница уҫнӑ. Вӗсенче вӑл эмел сутни пирки пӗлтернӗ. Эмелӗсен вара патшалӑх регистрацийӗ пулман, патшалӑх реестрӗнче пулман.

Хайхи арҫын вӗсене Чӑваш Енре кӑҫалхи пуш уйӑхӗччен сутнӑ. Ҫак вӑхӑтра вӑл 150 пин ытла тупӑш тунӑ.

Арҫын хӑйӗн айӑпне йышӑннӑ. Полицейскисем унӑн хваттерне ухтарнӑ, 850 ытла эмел туртса илнӗ. Пӗри 100 тенкӗ тӑрать. Халӗ следовательсем эмелсем ӑҫтан тупӑннине уҫӑмлатаҫҫӗ.

2017 ҫулта Шупашкарти 201-мӗш тата 7-мӗш ача пахчисем РФ Вӗренӳпе ӑслӑлӑх министерствин грантне – пӗтӗмпе 14 миллион тенке яхӑн – ҫӗнсе илнӗ. Кӑҫалхи нарӑс уйӑхӗнче 201-мӗш ача пахчин консультаци центрне ҫӗнетнӗ. Ӗнер вара 7-мӗш ача пахчин «Умка» ашшӗ-амӑшӗн консультаци центрне савӑнӑҫлӑ лару-тӑрура уҫнӑ.

Центр Социализм урамӗнчи 2-мӗш ҫуртри 2-мӗш корпусра вырнаҫнӑ. Ачана дефектолог, логопед, психолог, педагог пулӑшӑвӗ кирлӗ пулсан унти специалистсем ашшӗ-амӑшне тӳлевсӗрех пулӑшма хатӗр.

Центрта хатлӑ: ачасем вали интерактивлӑ сӗтел-пукан вырнаҫтарнӑ. Ҫавӑн пекех пепкене аталантаракан теттесем те пур.

Центра лекес тесе унта пымалла е 22-26-83 номерпе шӑнкӑравласа заявка хӑвармалла. Заявкӑсене cheb-dosh7@mail.ru электронлӑ почтӑпа та йышӑнаҫҫӗ.

Шупашкарти «Ярмӑрккӑ» суту-илӳ комплексӗнче «Вӗри кукӑль» киоск ӗҫӗ-хӗлне чарса лартнӑ. Ӑна «Юрма» тара панӑ. Киоск икӗ эрне ӗҫлемӗ.

Киоска «Ярмӑрккӑпа» «Юрма» агрохолдинг хуҫинчен Узбекистанра ҫуралса ӳснӗ арҫын тара илнӗ. Вӑл вара хӑйӗн ентешне ӗҫлеме илнӗ. Анчах лешӗн кирлӗ документсем пулман.

Полици ҫав киоска тӗрӗсленӗ. Унта самса сутакан узбека та асӑрханӑ. Каярахпа ҫакӑ та тӑрӑ шыв ҫине тухнӑ: унӑн Раҫҫейре ӗҫлемешкӗн ирӗк пулман.

Постановлени илнӗ хыҫҫӑн суд приставӗсем киоска хупса хунӑ. Ӑна 15 кун тӗрӗслесех тӑрӗҫ.

Шупашкарти «Ҫӗнӗ хула» микрорайона троллейбус ярасси пирки унччен сайтра пӗлтернӗччӗ. Ҫак кунсенче ҫав ӗҫе кам тӑвассине палӑртнӑ. Аукционра «ТУС» акционерсен пӗрлӗхӗ ҫӗнтернӗ.

Аукциона икӗ заявка килнӗ: «ТУС» акционерсен пӗрлӗхӗнчен тата ҫак микрорайона хӑпартакан «ИСКО-Ч» акционерсен пӗрлӗхӗнчен. «ИСКО-Ч» ҫак ӗҫе 223,6 миллион тенкӗпе тума шантарнӑ, «ТУС» вара — 200,9 миллион тенкӗпе. Ҫапла майпа иккӗмӗшӗ аукциона выляса илнӗ.

Подрядчик ӗҫе виҫӗ тапхӑрпа пурнӑҫлӗ. Пӗрремӗшӗнче районти ҫула ҫӗнетесшӗн. Иккӗмӗшӗнче Сӗнтӗрвӑрри ҫулӗпе Трактор Тӑвакансен проспектӗнчи ҫула лайӑхлатӗҫ. Виҫҫӗмӗшӗнче троллейбус линийӗсене карӗҫ. Ӗҫе ҫитес ҫулхи ҫу уйӑхӗн 31-мӗшӗччен вӗҫлемелле.

Чӑваш патшалӑх оперӑпа балет театрӗ умӗнчи тӳрем валли ят шыраҫҫӗ. Ӑна театр никӗслевҫин Борис Марковӑн ятне пама пултарӗҫ. Ку ыйтӑва пуш уйӑхӗн 28-мӗшӗнче иртекен комисси ларӑвӗнче пӑхса тухӗҫ.

Борис Марков — Раҫҫей тата Чӑваш халӑх артисчӗ, тава тивӗҫлӗ ӳнер ӗҫченӗ, К. Иванов ячӗллӗ Чӑваш патшалӑх премийӗн лауреачӗ. Оперӑпа балет театрӗ умӗнче ҫавӑн пекех унӑн бюстне те вырнаҫтарасшӑн.

Ларура ултӑ ыйту пӑхса тухӗҫ. Вӗсен йышӗнче — Трактор тӑвакансен проспектӗнчи парка «Кадетсен рашчи» тата хулари пӗр урама КПСС Чӑваш обкомӗн пӗрремӗш секретарӗн Илья Прокопьевӑн ятне парасси.

Нумай хваттерлӗ ҫуртсенче пурӑнакансем ҫуркунне ҫитсен хваттерсенче ытла ӑшӑ пулнишӗн, уншӑн укҫа кӑлӑхах тӳлеме тивнишӗн пӑшӑрханнине илтме тивет.

Ӑшӑтмалли хатӗрсем кашни хваттерте чухне ҫын хӑйне кирлӗ пек йӗркелесе тӑраять-ха. Ҫапах та ун пек май ҫуккисен те, пӗрле пухӑнса, хӑйсен ҫуртӗнче ятарлӑ хатӗр вырнаҫтарма ирӗк пур.

Шупашкарти нумай хваттерлӗ ҫуртсенчен 26 проценчӗ ҫав майпа хальлӗхе усӑ курнӑ. Ӑшша йӗркелесе тӑракан хатӗр температурӑна хӑй тӗллӗн майлаштарса пырать.

Шупашкар хулин Ҫурт-йӗрпе коммуналлӑ хуҫалӑх, энергетика, транспорт тата ҫыхӑну управленийӗнче пӗлтернӗ тӑрӑх, ятарлӑ хатӗр вырнаҫтарни ӑшӑ тӑкакне 35 процент таран чакарма май парать. Хатӗре вырнаҫтарса тӑкакланнин хӑй хаклӑхӗ ӑшӑтмалли 1-2 тапхӑрта саплашӑнать.