Социаллӑ пулӑшу илекенсен тӗрлӗ ҫӑмӑллӑхпа усӑ куракансем пӗр вӑхӑтра хутсемпе пӑрахнӑччӗ. Кӑшӑлвирус алхаснӑ вӑхӑтра ӑна хушма хутсем тӑратмасӑр, заявлени ҫырмасӑр паратчӗҫ. Халӗ йӗрке улшӑннӑ. Ҫӗнӗлӗх пуш уйӑхӗн 1-мӗшӗнчен вӑя кӗнӗ.
«Сахал тупӑшлӑ ҫемьесене 6 уйӑхлӑха шута илеҫҫӗ. Регистраци вӑхӑчӗ пуш уйӑхӗн 1-мӗшӗ хыҫҫӑн вӗҫленнисен тӳлеве малашне те илес тесен кирлӗ хутсене ҫӗнӗрен пухмалла, заявлени ҫырмалла», — ӑнлантарнӑ Чӑваш Енӗн ӗҫлевпе социаллӑ хӳтлӗх министрӗ Алена Елизарова брифингра.
Пӗрремӗш ачашӑн федераци бюджетӗнчен паракан тӳлеве ҫулталӑклӑха ҫирӗплетеҫҫӗ. Тӳлев вӑхӑчӗ пуш уйӑхӗн 1-мӗшӗ хыҫҫӑн тухнисен заявление ҫӗнӗрен шӑрҫалама тивӗ.
Ҫурт-йӗрпе коммуналлӑ хуҫалӑх тӳлевӗшӗн уйӑракан субсидие 2020 ҫулхи юпа уйӑхӗн 1-мӗшӗнчен пуҫласа кӑҫалхи ака уйӑхӗн 1-мӗшӗччен тивӗҫнисене тата тепӗр 6 уйӑхлӑха тӑсса парӗҫ. Уншӑн таҫта кайса хут ҫырма кирлӗ мар.
Улатӑр районӗнче пурӑнакан пӗр хӗрарӑм атӑ сутас тесе улталаннӑ. Пушмака вӑл тӗнче тетелӗнчи тӳлевсӗр пӗлтерӳсем вырнаҫтармалли сайтсенчен пӗринче асӑрханӑ.
51 ҫулти хӗрарӑм йӗрке хуралҫисене пӗлтернӗ тӑрӑх, пӑтӑрмах кӑҫалхи кӑрлач уйӑхӗн вӗҫӗнче пулса иртнӗ. Сайтра вӑл атӑ сутасси ҫинчен пӗлтерӳ вырнаҫтарнӑ. Кӗҫех «туянас кӑмӑллӑ» ҫын та тупӑннӑ. Хӗрарӑмран вӑл укҫа ӑҫта куҫарса памалли пирки ыйтнӑ. Ют ҫынна ӗненсе хӗрарӑм счет ҫинчи 120 пин тенкӗсӗр тӑрса юлнӑ.
Йӗрке хуралҫисем ултавҫӑна тупса палӑртнӑ. Вӑл Мускав облаҫӗнче пурӑнакан 18 ҫулти каччӑ иккен. Ун тӗлӗшпе пуҫиле ӗҫ пуҫарнӑ.
90 ҫулти кинемейӗн юбилейне япӑх пулӑм тӗксӗмлетнӗ. Вӑл укҫасӑр тӑрса юлнӑ.
Нумаях пулмасть пӗр халӑх тетелӗнче ӑна социаллӑ тӳлев пама тивӗҫ тесе хыпарланӑ. Ку 2700 тенкӗпе танлашать-мӗн.
Анчах тӳлеве илес тесен банк карттин номерне, хыҫалти кодне, усӑ курмалли срокне калама ыйтнӑ. Кинемей япӑххи пирки шухӑшламан – йӑлтах пӗлтернӗ.
Ватӑскер тепӗр кунхине 90 ҫулхи юбилейне паллӑ тума хатӗрленнӗ. «Кӗтмен парне» уява тӗксӗмлетнӗ. Ултавҫӑсем унӑн картти ҫинчен 9 пин тенкӗ куҫарнӑ.
Чӑваш Ен Арбитраж сучӗ республикӑн Спорт министерствин тавӑҫне тишкерме килӗшмен.
Тавӑҫа ведомство «Алза» тулли мар яваплӑ общество тӗлӗшпе хатӗрленӗ. 2019 ҫулта панкрута тухнӑ строительство организацийӗнчен ведомство 124,6 миллион тенкӗ шыраса илме хӑтланнӑ. «Алза» биатлон комплексне тума пуҫланӑ, анчах ӗҫе вӗҫлемен. Асӑннӑ 124,6 миллион тенкӗрен 46,3 миллионне сӑлтавсӑр пуйнӑшӑн шыраса илес тенӗ, 76,5 миллионне – ӗҫе вӑхӑтра пурнӑҫламаншӑн, 1,9 миллионне – оборудование вӑхӑтра туянманшӑн.
Суд ларӑвӗнче стройорганизаци парӑмне кредитор требованийӗсен реестне кӗртни палӑрнӑ. Раҫҫейӗн Тӗп банкӗ рефинансировани ставкине пӗчӗклетнине кура пени виҫине 76,5 миллион тенкӗрен 58 миллиона ҫити чакарнӑ.
Шупашкарти биатлон комплексне тӑвас пирки килӗшӗве 2013 ҫулта алӑ пуснӑ. Объекта 2016 ҫулта хута ямалла пулнӑ. Ӗҫ хакӗ 371 миллион тенкӗпе танлашнӑ. 2019 ҫулта контракта пӑрахӑҫланӑ, «Алзаран» парӑма шыраса илессине уйрӑм производствӑна уйӑрнӑ.
Улатӑр тӑрӑхӗнче пурӑнакан 29 ҫулти арҫын тӗлӗшпе пуҫиле ӗҫ пуҫӑрнӑ. Ӑна вырӑнти предприяти укҫине кӗсьене чикнӗшӗн айӑпласшӑн.
Арҫын предприятире экспедиторта ӗҫленӗ. Следстви пӗлтернӗ тӑрӑх, 2019 ҫулхи раштавран пуҫласа 2020 ҫулхи ҫӗртмеччен вӑл продукци кӳрсе килнине тӗрӗслесе тӑнӑ. Ӑна куншӑн укҫа панӑ, нухрата вара предприяти кассине хумалла пулнӑ. Анчах арҫын харпӑр усламҫӑсенчен илнӗ укҫан пӗр пайне кассӑна хуман, хӑйӗн кӗсйине чикнӗ. Ҫапла майпа вӑл 16 пин тенкӗ вӑрланӑ тесе шутлаҫҫӗ.
Ун тӗлӗшпе пуҫарнӑ уголовлӑ ӗҫе айӑплав алӑ пусмашкӑн прокуратурӑна ярса панӑ.
Паян ирхине 4 сехет ҫурӑра Шупашкарти Патрис Лумумба урамӗнче пурӑнакан 82 ҫулти хӗрарӑмӑн хваттерӗнче телефон шӑнкӑртатнӑ. Ыйхӑран вӑранса ҫитеймен кинемее ывӑлӗ шӑнкӑравланӑ пек туйӑннӑ.
Лешӗ макӑра-макӑра пулӑшма ыйтнӑ, ҫул ҫинче аварие лекнӗ-мӗн. Явап тыттарасран пӑрӑнас тесе укҫа кирлӗ имӗш.
Кинемей ҫав ҫын каласа пынипе пухса пынӑ 150 пин тенкине хутаҫа чикнӗ те пӗлтернӗ вырӑна кайса хунӑ. Хайхискер кун хыҫҫӑн тин ывӑлӗ патне шӑнкӑравлама шутланӑ. Лешӗ нимӗнле аварие те ҫакланман, сып-сывах, чип-чиперех. Анчах хутаҫа каялла илсе ӗлкӗреймен – ӑна ултавҫӑ илсе кайнӑ.
Чӑваш Енре ҫуралнӑ Вячеслав Павлов Мускавра хуралҫӑра вахта мелӗпе ӗҫлет. Нумаях пулмасть вӑл 1 миллион тенкӗ выляса илнӗ. Вӑл Ҫӗнӗ ҫул хыҫҫӑн лотерея вылянӑ.
Ҫав вӑхӑтра вӑл Мускавра ӗҫре пулнӑ. Билетсене вӑл кайран сарӑм урлӑ тӗрӗсленӗ. Хисепсене курсан питӗ тӗлӗннӗ. Вӑл 1 миллион тенкӗ выляса илнӗ-ҫке-ха.
Ҫӗнӗ ҫулта вара Вячеслав шампань эрехӗ ӗҫнӗ чухне ӗмӗтне хут ҫине ҫырнӑ, ӑна ҫунтарнӑ, кӗлне бокала янӑ та ӗҫсе янӑ. Ӗмӗчӗ пурнӑҫланнӑ! Ку укҫапа вӑл ҫурт лартма ӗмӗтленет халӗ.
Чãваш Енре ҫӳп-ҫап турттарассипе ӗҫлекен «Экоцентр» регионти операторãн партнер-предприятисем умӗнчи парӑмӗ ҫӗршер миллион тенке ҫитнӗ. Ҫӳп-ҫап операторӗн тӑкакӗсем республикӑн Тариф службине тата Ҫутҫанталӑк ресурсӗсемпе экологи министерствине шухӑша янӑ. «Экоцентрӑн» панкрута тухас хӑрушлӑх пур.
Аса илтерер: 2018 ҫул вӗҫӗнче пирӗн республикӑра йӑлари хытӑ каяша турттарассипе ҫӗнӗ тытӑм ӗҫлеме пуҫларӗ. Малтанхи вӑхӑтра тӗрлӗ ӑнланманлӑх час-часах сиксе тухкаларӗ. Халӗ пур ҫӗрте те ҫӳп-ҫап контейнерӗсем пур (2019 ҫулта компани 4 пин ытла контенйер туяннӑ), машинӑсем йӑлари хытӑ каяша турттарса тӑраҫҫӗ.
«Экоцентр» халӗ Чӑваш Ени 1704 ялти йӑлаи хытӑ каяша турттарса тӑрать. Анчах ӗҫшӗн халӑхӑн 85 проценчӗ ҫеҫ тӳлет иккен.
Пӗлтӗр Шупашкар хулинче ҫӗрсене инвентаризациленӗ чухне ҫӗр саккунне пӑсакансене самай тупса палӑртнӑ.
Цифрӑсен чӗлхипе каласан, ҫӗре ҫынсем е организацисем хӑйсем тӗллӗн ярса илнӗ тӗслӗхе 747 хутчен асӑрханӑ, 9 пин объектӑн право хуҫине палӑртман, 20 пин ытла участока кадастр учетӗнче шута илмен.
Ҫӗрпе ҫыхӑннӑ кӑлтӑка палӑртма хальхи вӑхӑтри инноваци технологийӗсем те самай пулӑшнӑ. Кунта пилотсӑр вӗҫекен хатӗрсене (дрон) асӑнса хӑвармалла.
Ҫӗр саккунне пӑсакансене явап тыттарнӑ май хула хыснине пӗлтӗр 70 ытла миллион тенкӗ шыраса илме май килнӗ. Кӑҫал ҫав виҫе 20 пин тенкӗрен кая мар пуласса шанаҫҫӗ. Ҫӗрпе усӑ курнине тӗрӗслес ыйтӑва ӗнер хула администрацийӗн ирхи планеркинче сӳтсе явнӑ. «Бюджета кӗнӗ укҫапа хула хуҫалӑхне аталантарма усӑ курӑпӑр», – тенӗ Шупашкарӑн сити-менеджерӗ Алексей Ладыков.
Чӑваш Ен шыв ҫийӗн ҫӳрекен «Валдай» карап туянасси пирки Чӑваш халӑх сайчӗ пӗлтернӗччӗ. Аса илтерер: республика ертӳҫисем карап туянсан «Шупашкар – Хусан» тата «Шупашкар – Чулхула» маршрутсем уҫас ӗмӗтлӗ. Кунсӑр пуҫне вӗсем Куславккапа Сӗнтӗрвӑррине хутлӗҫ. Карапсене кӑҫал туянмалла. Виҫӗ «Валдай» илме бюджетран 330 миллион тенкӗ уйӑрнӑ.
Сӑмах май каласан, карапсене республикӑри ятлӑ-сумлӑ ҫынсен ячӗсене парасшӑн. Ӑна халӑхпа суйлӗҫ. Сасӑлава тӗнче тетелӗнчи «Контактра» ушкӑнра йӗркеленӗ. Карап ятне парассине сумлӑ ҫак ҫынсенчен суйлӗҫ: Андриян Николаев космонавт, Граждан вӑрҫин участникӗ Василий Чапаев, велоспорт енӗпе тава тивӗҫлӗ спорт мастерӗ Валерий Ярды, карап ӑсти Алексей Крылов тата Геннадий Айги поэт.
Сасӑлав нарӑс уйӑхӗн 25-мӗшӗнче вӗҫленӗ.
-6.7 °C