cheb-centr.soc.cap.ru сӑнӳкерчӗкӗ

Шупашкарта пурӑнакан Мария Пигенешева паян 90 ҫул тултарнӑ.

Мария Борисовна Муркаш районӗнчи Мӑн Шашкар ялӗнче 1936 ҫулти ака уйӑхӗн 9-мӗшӗнче ҫуралнӑ. Ачалӑхӗ вӑл вӑхӑтри нумай танташӗнни пекех йывӑр килнӗ.

Паян кинемее Шупашкарти халӑхӑн социаллӑ ыйтӑвӗсене тивӗҫтерекен комплекслӑ центрӗн социаллӑ ӗҫченӗ Надежда Фёдорова (сӑнӳкерчӗкре сулахайри) пӑхса пулӑшать. Кинемей хӗрӗпе пурӑнать, анчах хӗрарӑм хӑй те чирлет, ҫавӑнпа вӑл амӑшӗ валли социаллӑ ӗҫчен тытнӑ.

Мария Борисовна 18 ҫулта качча тухнӑ, ултӑ ача ҫуратнӑ, анчах виҫҫӗшӗ вилнӗ. 1959 ҫулта ҫемье Шупашкара куҫса килнӗ, пӳрт лартнӑ. Хӑй вӑл Шупашкарти заводсенчен пӗринче 30 ҫула яхӑн ӗҫленӗ. Тава тивӗҫлӗ канӑва тухсан арҫынсен мӑнастирӗнче кухньӑра 8 ҫул ӗҫлесе пурӑннӑ.

ЧППУ сӑнӳкерчӗкӗ

Ака уйӑхӗн 7-мӗшӗнче Анатолий Фишер артист куҫне ӗмӗрлӗхе хупнӑ. Вӑл 87 ҫулта пулнӑ.

Анатолий Абрамович 1969 ҫулта Чӑваш патшалӑх оперӑпа балет театрӗн хорне ертсе пыма тытӑннӑ. Ку ӗҫре вӑл 50 ҫул ытла тӑрӑшнӑ.

Анатолий Фишер 1938 ҫулхи утӑ уйӑхӗн 8-мӗшӗнче Ижевскра ҫуралнӑ. 1958 ҫулта Мускаври музыкӑпа педагогика училищинчен, 1963 ҫулта Мускаври патшалӑх консерваторийӗнчен вӗренсе тухнӑ.

1963–1969 ҫулсенче Бурят Республикинчи оперӑпа балет театрӗнче тӗп хормейстер пулса ӗҫленӗ, 1969–2021 ҫулсенче Чӑваш патшалӑх оперӑпа балет театрӗнче тӑрӑшнӑ.

Сӑмах май каласан, вӑл преподаватель те пулнӑ. 1963–1969 ҫулсенче театрта тимленипе пӗрлех Хӗвелтухӑҫ-Ҫӗпӗр культура инстиутутӗнче преподавательте тӑрӑшнӑ, 1991 ҫултанпа Чӑваш патшалӑх педагогика университечӗн доценчӗ, 1998 ҫултанпа — профессор пулнӑ.

«Контактри» сӑн

Сайтра Шупашкарта пурӑнакан Идрис Мингазов 100 ҫул тултарни пирки тин кӑна пӗлтернӗччӗ. Республикӑри тепӗр ҫын паян пӗр ӗмӗре парӑнтарнине паллӑ тунӑ.

Вӑл — Минигель Якупова. Минигель Абдулкадировна Патӑрьел округӗнчи Тутар Сӑкӑчӗ ялӗнче пурӑнать. Пурнӑҫӗ ҫӑмӑл килмен – ачалӑх ҫулӗсем Тӑван ҫӗршывӑн Аслӑ вӑрҫипе пӗр килнӗ. 14 ҫулта чухне унӑн окоп чавма тивнӗ. Кайран вӑрман каснӑ ҫӗрте ӗҫленӗ. Йывӑрлӑхсем ӑна хуҫман. Пачах тепӗр май, кӑмӑлне ҫирӗплетнӗ.

Качча кайсан вӑл мӑшӑрӗпе 5 ача ҫуратса ӳстернӗ. Халӗ Минигель Абдулкадировна пысӑк ҫемйипе савӑнать: унӑн 12 мӑнук, 24 кӗҫӗн мӑнук, вӗсен 4 ачи. Паянхи кун кинемей кӗҫӗн ывӑлӗн ҫемйипе пурӑнать.

Вера Иванова сӑнӳкерчӗкӗ

Паян, ака уйӑхӗн 8-мӗшӗнче, Шупашкарта пурӑнакан Идрис Мингазов 100 ҫул тултарнӑ. Идрис Хангареевич — Тӑван ҫӗршывӑн аслӑ вӑрҫин ветеранӗ.

Юбиляра хулари тӳре-шарапа пӗрлех чӑваш парламенчӗн депутачӗсем, Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центр директорӗ Светлана Милкина саламланӑ.

Идрис Хангареевич Тутарстанра ҫуралнӑ, анчах шӑпа ӑна Чӑваш Енпе ҫыхӑнтарнӑ.

Хӑй вӑхӑтӗнче вӑл Инҫет Хӗвелтухӑҫ фронтӗнче ҫарта пулнӑ, Японие хирӗҫ ҫапӑҫусене хутшӑннӑ.

Ветеран паян та ӑспа-тӑнпа пурӑнать, пӳртре ятарлӑ хатӗрпе тытӑнса утса ҫӳрет. Куҫне катарактӑран операци тунӑ та куҫлӑхсӑрах хаҫат вулать. Унсӑр пуҫне вӑл телевизор пӑхма юратать.

Ҫулла ҫитсен хӗрӗ пулӑшнипе урама тухса кӗрет.

Ыран, ака уйӑхӗн 9-мӗшӗнче, Шупашкарти К.В. Иванов ячӗллӗ Литература музейӗнче Николай Полоруссов-Шелепи ҫуралнӑранпа 145 ҫул ҫитнине халалланӑ литературӑпа музыка каҫӗ иртӗ. Унта кирек кам та кайса курма пултарать.

Николай Полоруссов-Шелепи Хусан кӗпӗрнинчи Ҫӗнӗ Ӳсел ялӗнче ҫуралнӑ.

Шкулта 5 ҫул ҫеҫ вӗреннӗ ҫамрӑка Николай Ашмарин тюрколог халӑх сӑмахлӑхне, юррине пухма ыйтнӑ. Сӑвӑҫ ӑсталӑхне туптама ялти учитель Александр Кузьмин пулӑшнӑ. Полоруссов-Шелепи пӗр вӑхӑт Ҫӗпӗрте ӗҫлесе пурӑннӑ. 1922-мӗш ҫулта вӑл Шупашкара куҫса килнӗ. Тутар писателӗсен хайлавӗсене чӑвашла куҫарнӑ. Чӑваш халӑх поэчӗ ята ӑна 1936-мӗш ҫулта панӑ.

Ҫыравҫӑ 1945-мӗш ҫулта пурнӑҫран уйрӑлнӑ. Ӑна Шупашкарти Богдан Хмельницки урамӗнчи масарта пытарнӑ.

«Контактри» сӑн

Елчӗк округӗнчи чи ватӑ ҫын ҫак кунсенче 104-мӗш ҫуралнӑ кунне паллӑ тунӑ.

Сӑмах — Аслӑ Елчӗк ялӗнче пурӑнакан Ефросения Мясикова пирки. Нушине нумай курнӑ вӑл, ачалӑх ир вӗҫленнӗ: 4-мӗш класс хыҫҫӑн ҫемйине пулӑшас тесе ӗҫлеме тытӑннӑ. Вӑрҫӑ пуҫлансан пиччӗшӗсене пурне те фронта илсе кайнӑ, вӑл вара аппӑшӗ-йӑмӑкӗпе пӗрле Улатӑр патӗнче окоп чавнӑ. Кайран Ефросения Максимовна вӑрман хатӗрленӗ ҫӗрте ӗҫленӗ, Орехово-Зуевӑра торф кӑларнӑ, Свердловскри предприятире вӑй хунӑ.

Вӑрҫӑ пӗтсен тӑван ялне таврӑннӑ, 1949 ҫулта качча кайнӑ. Вӗсем мӑшӑрӗпе 5 ача ҫуратса ӳстернӗ. Паянхи кун та Ефросения Максимовна алӑ усса лармасть, кӑштӑртатса ҫӳрет, кил-тӗрӗшре пулӑшма тӑрӑшать, ҫивӗч ӑс-тӑнпах калаҫать.

«Контактри» сӑн

Вӑрнар округӗнчи Кульцав ялӗнче пурӑнакан Анатолий Елизаров 90 ҫулхи юбилейне паллӑ тунӑ.

Анатолий Афанасьевич Тӑван ҫӗршывӑн Аслӑ вӑрҫи вӑхӑтӗнчи бомбӑсене разминировка тунӑ ҫӗре хутшӑннӑ, Ҫар-Тинӗс флотӗнче 4 ҫул службӑра тӑнӑ.

Ӗмӗр тӑршшӗпех Ленин ячӗллӗ тӑван колхозӗнче ӗҫленӗ вӑл: водитель пулнӑ, бригадӑна ертсе пынӑ. Мӗн пӗчӗкрен ӗҫченлӗхӗпе палӑрнӑ — 13 ҫулта чухнех колхозра тӑрӑшма тытӑннӑ.

Анатолий Афанасьевич мӑшӑрӗпе Варвара Сергеевнӑпа икӗ ача ҫуратса ӳстернӗ. Халӗ вӑл хӗрӗн ҫемйипе пурӑнать, мӑнукӗсемпе савӑнать.

"Россия 1" видеовӗнчен илнӗ сӑнӳкерчӗк

Ӗнер, ака уйӑхӗн 1-мӗшӗнче, Тамара Гурьева юрӑҫ 75 ҫул тултарнӑ.

Тамара Изосимовна — Чӑваш АССРӗн тава тивӗҫлӗ артистки (1982 ҫултанпа), чӑваш халӑх артистки (1995 ҫултанпа).

Вӑл 1951 ҫулта Ҫӗрпӳ районӗнчи Шуртавӑш ялӗнче ҫуралнӑ. Ачаранпах юрлама юратнӑскер тата хитре юрлама пӗлекенскер Шупашкарти Ф. П. Павлов ячӗллӗ музыка училищине вӗренме кӗнӗ.

Малтан Чӑваш патшалӑх юрӑпа ташӑ ансамблӗнче юрланӑ, кайран — Чӑваш патшалӑхӗн телевиденипе радиовӗн комитечӗн хорӗнче. 1992 ҫулта вӑл Чӑваш патшалӑх академи симфони капеллинче ӗҫлеме пуҫланӑ.

Тамара Гурьева халӑх юррисене тата чӑваш композиторӗсем хайланӑ юрӑсене солист евӗр шӑрантарнӑ. Унӑн паллӑрах юррисем: Ф. Лукинӑн «Уҫланкӑри палан», Г. Хирпӳн «Савнӑ Шупашкарӑм», Ю. Жуковӑн «Юратнӑ, кӑмӑллӑ аннем».

Лариса Петрова сӑн ӳкерчӗкӗ

Чӑваш патшалӑх пукане театрӗнче Надежда Алферова артисткӑн пултарулӑх каҫӗ иртнӗ.

РФ тава тивӗҫлӗ артистки пуш уйӑхӗн 25-мӗшӗнче 75 ҫул тултарнӑ. Вӑл пукане театрӗнче 40 ҫул ӗҫленӗ.

«Эпӗ артистсен ҫемйинче ӳснӗ, ҫавӑнпа хам валли урӑх ҫул курман та», - тенӗ вӑл савӑнӑҫлӑ мероприятире сцена ҫине тухсан. Кун пирки МАХра «Хыпар - Вести Чувашии» каналта пӗлтернӗ.

Надежда Валентиновна 150 ытла сӑнар калӑпланӑ, вӗсенчен чылайӑшӗ театрӑн ылтӑн фондне кӗнӗ. Вӑл — пултаруллӑ артист ҫеҫ мар, режиссёр та.

Пултарулӑх каҫне пухӑннисем Надежда Алферова вылякан тата вӑл лартнӑ спектакльсен сыпӑкӗсене курса киленнӗ. Куракансем кашни номере ӑшшӑн йышӑннӑ, тӑвӑллӑн алӑ ҫупса чунтан тав тунӑ, хӑйсем юратнине пӗлтернӗ.

vk.ru/gov_cap_ru сӑнӳкерчӗкӗ

«Муниципалитет хыснине те йӗркелет, укҫа-тенкӗпе пӗлсе усӑ курма та вӗрентет», — ҫакӑн пек ырласа ҫырнӑ республикӑн влаҫ органӗсен официаллӑ порталӗн халӑх тетелӗнчи пабликӗнче. Кунта сӑмах Рената Ананьева пирки пырать.

Рената Ананьева Муркаш тӑрӑхӗн администрацийӗнче пуҫлӑхӑн ҫумӗ пулса тӑрӑшать. Профессири вӑрӑм кун-ҫулне вӑл совхозри тӗп бухгалтертан пуҫланӑ. Халӗ 35 ҫул ӗнтӗ Рената Иосифовна — финанс енӗпе пысӑк специалист.

Вӑл ертсе пыракан ушкӑн «Лучшее муниципальное образование России» (чӑв. Раҫҫейри чи лайӑх муниципалитет пӗрлешӗвӗ) конкурсра темиҫе хутчен те ҫӗнтернӗ.

Рената Иосифовна нумаях пулмасть «Чӑваш Республикин тава тивӗҫлӗ экономисчӗ» хисеплӗ ята тивӗҫнӗ.