ШӖМ тунӑ сӑн

Ҫурла уйӑхӗн 9-мӗшӗнче ирхине Шупашкарта патрульпе пост службин нарячӗ пысӑк михӗ йӑтса утакан арҫынна чарнӑ. Михӗре мороженӑй пулнӑ. Ӑҫтан тупнӑ вӑл ӑна?

Михӗре 70 мороженӑй пулнӑ. Ҫак ӳсӗр арҫын каланӑ тӑрӑх, вӑл вӗсене Президент бульварӗнчи морозильник контейнерӗнчен вӑрланӑ. Пӗтӗмпе 90 мороженӑй йӑкӑртнӑ. Ыттине урампа утнӑ чухне ҫынсене валеҫсе пӗтернӗ.

Ҫак арҫын кунти мар, вӑл - Киров облаҫӗнчен. Ун тӗлӗшпе пуҫиле ӗҫ пуҫарнӑ.

cheb.ru сӑнӳкерчӗкӗ

Шупашкарта пурӑнакан арҫын хӑйӗн кӳршине, 56 ҫулти хӗрарӑма, кӳрентерсе пӗтернӗ. Хӗрарӑм 33 ҫулти кӳршӗ арҫыннине подъездра пирус туртнӑшӑн тата 23 сехет хыҫҫӑн шавланӑшӑн асӑрхаттарнӑ.

Вӑйпитти этем каҫару ыйтас вырӑнне хӗрарӑма кӳрентерме тапранса кайнӑ.

Кӳршин сӑмахне хӗрарӑм чӗре ҫывӑхне илнӗ, ӑна япӑх пулса кайнӑ. Хӗрарӑм патне васкавлӑ пулӑшу машини чӗнсе илнӗ, ӑна больницӑна вырттарма тивнӗ.

Хӗрарӑма кӳрентерсе пӗтернӗ арҫынна суд административлӗ майпа явап тыттарса 3 пин тенкӗ штраф хуса пама йышӑннӑ.

chuvashia.sledcom.ru сӑнӳкерчӗкӗ

Канаш хулинче пӗр арҫын хӑйӗнпе пӗр класра вӗреннӗ тусне вӗлернӗ.

59 ҫулти арҫын кӑҫалхи утӑ уйӑхӗн 7-мӗшӗнче Канашри общежитисенчен пӗринче тусӗпе тӗл пулнӑ. Ҫав арҫынпа вӗсем пӗр класра вӗреннӗ. Ытти чухне ялан юлташлӑ пурӑннӑскерсем ҫав каҫхине тавлашса кайнӑ. Хӑна алла ҫӗҫӗ ярса илнӗ те унпа чикнӗ.

Шар курнине больницӑна ӑсатнӑ-ха. Анчах тухтӑрсем унӑн пурнӑҫне ҫӑлса хӑварайман. Йывӑр суранланнӑ арҫын тепӗр икӗ кунтан вилсе кайнӑ.

Алла ҫӗҫӗ ярса илсе унпа ҫынна чикнӗ этем тӗлӗшпе пуҫиле ӗҫ пуҫарнӑ.

Cap.ru сӑнӳкерчӗкӗ

«Канаш ен» хаҫат тухма пуҫланӑранпа 20 ҫул ҫитнӗ. Чӑваш Енӗн Цифра аталанӑвӗн, информаци политикин тата массӑллӑ коммуникацисен министерствинче пӗлтернӗ тӑрӑх, ҫурла уйӑхӗ – чылай хаҫатшӑн паллӑ уйӑх.

Канашсен хаҫачӗ ӗнер, ҫурла уйӑхӗн 22-мӗшӗнче, 20 ҫул тултарнӑ.

Унӑн пӗрремӗш номерне 2002 ҫулхи ҫурла уйӑхӗн 22-мӗшӗнче кун ҫути кӑтартнӑ. Ун чухне хаҫат эрнере виҫӗ хутчен тухнӑ. Паян вӑл эрнере пӗр хутчен пичетленет.

«Канаш ен» унчченхиллех район тата ял ҫыннин пурнӑҫӗпе паллаштарать. Самана таппипе тан пырас тесе хаҫатҫӑсем тӗнче тӗтелӗнчи халӑх ушкӑнӗсенче хӑйсен страницисене хастар тытса пыраҫҫӗ.

www.chuvash.org сайта маларах вырнаҫтарнӑ сӑнӳкерчӗк

Ҫурла уйӑхӗн 22-мӗшӗнче Ҫӗнӗ Шупашкарта 5 ҫулти ача 9-мӗш хутран ӳкнине Чӑваш халӑх сайчӗ пӗлтернӗччӗ. Аса илтерер: инкек Юханшыв урамӗнчи 6-мӗш ҫуртра пулнӑ.

Ӗнерхи хыпарта ача чӗрӗ пулнине хыпарланӑччӗ те, анчах йӑнӑшнӑ иккен. Пӗчӗкскер куҫне ӗмӗрлӗхе хупнӑ.

Пӑтӑрмах хыҫҫӑн прокуратура ӗҫченӗсем тӗрӗслев пуҫарнӑ. Надзор органӗнче пӗлтернӗ тӑрӑх, профилактика органӗсем епле ӗҫлени таранах тӗрӗслӗҫ.

runews24.ru сайтри сӑн

ЧР Транспорт министерстви ҫумӗнче ведомствӑсен хушшинчи ӗҫлӗ ушкӑн йӗркелӗҫ, вӑл пассажирсене илсе ҫӳрекен транспортсене тӗрӗслӗ. Ку ушкӑна йӗркелеме ЧР Элтеперӗ Олег Николаев хушнӑ.

Олег Алексеевич транспорт министрӗпе Владимир Осиповпа Шупашкарта 33-мӗш маршрутпа ҫӳрекен автобус ҫуннӑ тӗслӗхе сӳтсе явнӑ. Аса илтерер: ку пӑтӑрмах ҫурлан 17-мӗшӗнче 13 сехетре Мир проспектӗнче пулнӑ. Автобус пынӑ чухне мотор отсекӗнче ҫулӑм тухнӑ. Салонра 15 пассажир пулнӑ, пурте урама тухса ӗлкӗрнӗ.

Ӗҫлӗ ушкӑн йышӗнче Инкеклӗ лару-тӑру министерстви, прокуратура, ШӖМ, Транспорт министерстви, Шупашкар хула администрацийӗн элчисем пулӗҫ.

cap.ru сайтри сӑн

Авӑн уйӑхӗн 1-мӗшӗнчен Раҫҫейре ҫӗнӗ вӗренӳ стандарчӗсем вӑя кӗрӗҫ. Унпа килӗшӳллӗн, шкул ачисем финанс пӗлӗвне ӑса хывӗҫ. Авӑн уйӑхӗн 1-мӗшӗнче Чӑваш Енре ҫакнашкал уроксем пулӗҫ.

Уроксем 9-11-мӗш классенче иртӗҫ. Республикӑра пӗтӗмпе 22 пин ача ҫак темӑна итлесе ларӗ. Шупашкарта тата Ҫӗнӗ Шупашкарта уроксене Финанс министерствин ӗҫченӗсем ирттерӗҫ. Ытти ҫӗрте вара – вырӑнти администрацисен финанс пайӗн ӗҫченӗсем, централизациленӗ бухгалтерире тӑрӑшакансем. Ҫавӑн пекех ку енӗпе нимеҫӗсемпе экспертсене чӗнӗҫ.

Шупашкар мэрӗпе Олег Кортуновпа ыран, ҫурла уйӑхӗн 24-мӗшӗнче, Шупашкарти Яков Ухсай ячӗллӗ культура керменӗнче 11-12:30 сехетсенче сывпуллашӗҫ. Унтан, 13 сехетре, Татиана соборӗнче кӗлӗ ирттерӗҫ.

Аса илтерер: Олег Кортунов ӗнер , ҫурлан 22-мӗшӗнче, каҫхине вилнӗ. Малтанлӑха пӗлтернӗ тӑрӑх, вӑл чӗре чирне пула сывлама пӑрахнӑ.

minprom.cap.ru сӑнӳкерчӗкӗ

Чӑваш Енӗн промышленность тата энергетика министрӗн заместительне Ольга Григорьевӑна ӗҫрен кӑларнӑ. Хушӑва республика ертӳҫи Олег Николаев ӗнер, ҫурла уйӑхӗн 22-мӗшӗнче, алӑ пуснӑ.

Ольга Вячеславнӑна ӗҫрен хӑтарни ҫинчен калакан документа республикӑн влаҫ органӗсен официаллӑ порталӗнче вырнаҫтарнӑ.

Промышленность тата энергетика министрӗн Александр Кондратьевӑн ҫапла вара халӗ пӗр заместитель ҫеҫ тӑрса юлнӑ. Вӑл – Борис Марковцев.

ШӖМ тунӑ сӑн

Ӗнер каҫхи 10 сехетре «Энӗш» автоҫулӑн 79-мӗш ҫухрӑмӗнче авари пулнӑ. Унта виҫӗ ҫыннӑн пурнӑҫӗ татӑлнӑ. Пурте – ҫамрӑк.

Авари Чакаҫ ялӗ ҫывӑхӗнче, Канашран Йӗпреҫе каймалли ҫул ҫинче, пулнӑ. ВАЗ-2112 машина «Форд Фокуспа» ҫапӑннӑ. ШӖМ пӗлтернӗ тӑрӑх, аварире икӗ каччӑн тата пӗр хӗрӗн пурнӑҫӗ татӑлнӑ.

Халӗ ӗҫ-пуҫа уҫӑмлатаҫҫӗ.