cap.ru сӑнӳкерчӗкӗ

"Муркаш - Турай" ҫулпа халӗ ҫӳреме питӗ лайӑх: трасса яп-яка. Ӑна наци проекчӗпе килӗшӳллӗн юсаса ҫӗнетнӗ. Палӑртма та кӑмӑллӑ: ӗҫсене палӑртнинчен 4 уйӑх маларах вӗҫленӗ.

Ӗҫӗ вара ансатах пулман: икӗ дамбӑллӑ ҫырма пур. Пӗтӗмпе 960 метр ҫула ҫӗнетнӗ.

ЧР Транспорт министерстви пӗлтернӗ тӑрӑх, 2024 ҫулта ҫак ҫула тата малалла юсӗҫ. Ҫитес ҫул 3,5 ҫухрӑм ҫула ҫӗнетме палӑртнӑ.

cap.ru сӑнӳкерчӗкӗ

Шкулта вӗренекен пултаруллӑ ачасене Чӑваш Ен Элтеперӗн стипендийӗпе хавхалантараҫҫӗ. Унӑн виҫи ку таранччен 400 тенкӗпе танлашнӑ.

Халӗ пултаруллӑ ачасем уйӑхсерен ытларах стипенди илӗҫ. Унӑн виҫине 150 тенкӗ пысӑклатма йышӑннӑ. Ҫапла вӑл 550 тенкӗпе танлашать.

Палӑртмалла: стипендие вӗренӳре палӑрнӑшӑн, тӗнче, ҫӗршыв, регион шайӗнчи олимпиадӑсенче ҫӗнтернӗшӗн параҫҫӗ

cap.ru сӑнӳкерчӗкӗ

Патӑрьел районӗн тӗп пульницин инфекци уйрӑмне юсаса ҫӗнетӗҫ. Ҫавна май аукцион ирттереҫҫӗ.

Юсав ӗҫӗсене ирттерме 17,2 млн тенкӗ уйӑрма хатӗр. Подрядчике ҫурла уйӑхӗн 7-мӗшӗнче палӑртӗҫ. Чӳк уйӑхӗн 30-мӗшӗччен уйрӑма юсаса пӗтермелле: фасадне, шалтине ҫӗнетӗҫ, унитазсемпе умывальниксене, душ кабинисене улӑштарӗҫ, инженери сечӗсене юсӗҫ.

Палӑртмалла: пандеми вӑхӑтӗнче унта 20 койкаллӑ ковид-госпиталь пулнӑ.

mosregion.info сайтри сӑн

Куславкка хулинче ачана йытӑ ҫыртнӑ. Куншӑн район администрацийӗнчен 70 пин тенкӗ шыраса илесшӗн.

Шӑпӑрлан ача-пӑча лапамӗнче пулнӑ. Ҫав вӑхӑтра ӑна килсӗр-ҫуртсӑр йытӑ тапӑннӑ та пуҫӗ тӗлӗнчен ҫыртнӑ. Ачана пульницӑна медпулӑшу пама илсе кайнӑ. Тухтӑрсем ӑна кӳнӗ суран йывӑрах пулманнине палӑртнӑ. Ҫапах ӑна урнӑ чиртен вакцинаци тӑваҫҫӗ. Ҫавна май прокуратура кӑмӑл-сипет тӗлӗшӗнчен сиен кӳнӗшӗн 70 пин шыраса илме суда тавӑҫ тӑратнӑ.

"Контактри" сӑн

Комсомольски район администрацийӗн пуҫлӑхӗ Александр Осипов паян ӗҫрен кайнӑ. Кун пирки вӑл "Контактра" халӑх тетелӗнчи страницинче пӗлтернӗ.

Александр Осипов ку должноҫре 2017 ҫултанпа ӗҫленӗ. Унччен вӑл "Сӗнтӗр" ЯХПКра тӗрлӗ должноҫре, общество тата коммерци организацийӗсенче, Шупашкар хула администрацийӗнче тӗп специалистра, "Спартак" спорт шкулӗн директорӗнче ӗҫленӗ.

cap.ru cӑнӳкерчӗкӗ

Ҫӗнӗ Шупашкарта икӗ техникума пӗрлештерӗҫ. Химипе механика тата политехника техникумӗсем малашне пӗр вӗренӳ учрежденийӗ шутланӗҫ. Реорганизацие кӑҫал ҫулталӑк вӗҫлениччен туса пӗтермелле.

Икӗ техникума пӗрлештернӗ хыҫҫӑн политехника техникумӗнчи штат 15 единица чухлӗ чакассине пӗлтереҫҫӗ. Анчах вӗсем ӗҫсӗр тӑрса юлмӗҫ — реорганизациленӗ учрежденире урӑх должноҫсем тупӑнӗҫ. Ҫав вӑхӑтрах преподавательсемпе производство вӗрентӗвӗн мастерӗсен шучӗ чакмалла мар-мӗн.

Реорганизаци укҫа-тенке перекетлеме май парӗ, Химипе механика техникумӗнче хальхи вӑхӑтри вӗрентӳпе лаборатори бази пулӗ тесе шантараҫҫӗ.

vk.com/pravdapfo сӑнӳкерчӗкӗ

Чӑваш Енӗн Правительствинче юлашки кунсенче кадр улшӑнӑвӗсем ҫине-ҫинех пулса пычӗҫ.

Ӗнер, утӑ уйӑхӗн 25-мӗшӗнче, республикӑн строительство, архитектура тата ҫурт-йӗрпе коммуналлӑ хуҫалӑх министрӗн ҫумӗсенчен пӗрне ӗҫрен кӑларнӑ. Кунта сӑмах Илья Ионочкин пирки пырать.

Илья Олеговича ӗҫрен кӑларни ҫинчен калакан йышӑнӑва Чӑваш Ен Министрсен Кабинечӗн Председателӗн тивӗҫӗсене пурнӑҫлакан Павел Данилов алӑ пуснӑ.

Видео скринӗ

Улатӑрти Киров урамӗнчи 36, 38 тата 60-мӗш, Ленин урамӗнчи 43-мӗш ҫуртра пурӑнакансем видео ӳкерсе Чӑваш Ен влаҫӗнчен пулӑшу ыйтнӑ. 2 ҫул каялла вӗсем хӑйсем укҫа пухса ачасем валли вылямалли лапам тунӑ, тӑвайкки вырнаҫтарнӑ. Ӑна хӑйсем пӑхса тӑраҫҫӗ, унта чечексем лартаҫҫӗ.

Анчах ҫак илем ҫывӑхра пурӑнакан пӗр хӗрарӑма чӑрмантарать. Ачасем шавлаҫҫӗ-мӗн. Ҫавӑнпа вӑл прокуратурӑна заявлени ҫырнӑ. Ведомство вара суда тавӑҫ тӑратнӑ.

Ҫынсем ача-пача лапамне пӑстарасшӑн мар, ҫавӑнпа пулӑшу ыйтаҫҫӗ те. Унта ытти микрорайонти ачасем те выляма килеҫҫӗ.

cap.ru сӑнӳкерчӗкӗ

Ҫулла пахчара ытларах ӗҫлеме тивнӗрен суранланакансем те нумай. Акӑ нумаях пулмасть Республикӑри офтальмологи центрне пӗр хӗрарӑм пынӑ. Унӑн сулахай куҫне тем чӑрмантарнӑ. Хӑй каланӑ тӑрӑх, малтанхи кун вӗсем уйра утӑ хатӗрленӗ.

Тухтӑр куҫне тӗрӗсленӗ те унта ҫӳпӗ кӗрсе кайнине асӑрханӑ. Тӗрӗсрех каласан, куҫ хупанкин коньюктивине нӑрӑ кӗрсе кайнӑ. Тухтӑр ӑна пинцетпа кӑларнӑ.

Палӑртмалла: Республикӑри офтальмологи центрне ҫулталӑкне 10 пин ытла ҫын пулӑшу ыйтма пырать.

Паян ҫанталӑк шӑрӑх - 27 градус. Ыран та ҫаплах тӑрӗ. Эрнекунпа шӑматкун вара пушшех те шӑрӑх пулӗ - 36 градус таранах. Кун пек шӑрӑх 2010 ҫултанпа пулман.

Кайран кӑшт уҫӑлтарӗ. Вырсарникун, тунтикун тата ытларикун 22-27 градус тӑрӗ. Ҫурлан 4-7-мӗшӗсенче каллех шӑрӑх хуҫаланӗ - 30 градус ытла пулӗ. Ҫитес вырсарникун вара - 38 градус.

Малтанлӑха пӗлтернӗ тӑрӑх, ҫурла уйӑхӗн 8-мӗшӗнче кӑна ҫанталӑк уҫӑлтарӗ. Ун чухне 15-20 градус пулмалла.