РФ Федераци Канашӗнче паттӑрлӑх кӑтартнӑ ачасене чысланӑ. Вӗсен йышӗнче Чӑваш Енри Макар Мушков та пулнӑ.

Арҫын ача ҫулла паттӑрлӑх кӑтартнӑ. Вӑл путма пуҫланӑ 4 ҫулти арҫын ачана ҫӑлнӑ. Макар пӗчӗкскер инкеке лекнине курсан пӗр шухӑшламасӑрах пулӑшма ыткӑннӑ.

Наградӑна 54 регионти 154 ача тивӗҫнӗ. Чӑваш Енри тепӗр арҫын ачана та чыслӗҫ. Вӑл - Даниил Порфирьев.

Чӑваш чӗлхин корпусне пухас ӗҫ ҫӑмӑлах мар. Лайӑх корпус пултӑр тесен 20 миллион сӑмах пухни ҫеҫ ҫителӗксӗр, унта тӗрлӗ йышши текстсем пулмалла. «Чӑваш чӗлхин икчӗлхеллӗ ҫӳпҫине» сӑнасарах пӑхсан паянхи кун унта ытларах пайне литература хайлавӗсем йышӑннине курма пулать. 2019 ҫулта урӑх ҫитменлӗхччӗ — нумай пулмасть корпуса чӑвашла куҫарнӑ Библие кӗртнӗччӗ те тӗн тексчӗ пысӑк пай йышӑнатчӗ. Вӑт хайхи ӗнтӗ, ҫав танмарлӑха пӗтерес тесе эпӗ юлашки вӑхӑтра тӗнче тетелӗнче чӑвашла текстсем шыратӑп та.

Уйрӑмах хаҫат-журнал статйисен йышне ӳстермелле. Вӑл текстсем тем тесен те чӑваш халӑхӗн пурнӑҫӗнче пысӑк пай йышӑнаҫҫӗ. Апла-тӑк, вӗсене ытларах кӗртмелле. Шел те, республикӑра тухакан чылай хаҫат хӑйсен тексчӗсене сайтсенче вырнаҫтармасть. Ытларах чухне вӗсем «вӗсене сайта вырнаҫтарсан пирӗн хаҫата кам ҫырӑнӗ» тесе тӳрре тухма хӑтланаҫҫӗ. Ҫав вӑхӑтрах вара купи-купипе вырӑсла текст вырнаҫтараҫҫӗ. Ҫакӑ вӗсен тиражне чакармасть пулас. Шел те капла ӗҫлени чӑваш чӗлхипе усӑ курнине чакарса та чакарса пырать.

Ҫутӑ ҫул

Хаҫат статйисене шыракаланӑ май паян «Ҫутӑ ҫул» хаҫатӑн сайтне пырса кӗтӗм.

Малалла...

cheb.cap.ru сӑнӳкерчӗкӗ

Хӗрлӗ Чутай районӗнчи икӗ яла: Хусанушкӑньне тата Тури Ҫӗрпӳкассине — асфальт ҫулпа ҫыхӑнтарӗҫ. Кун пирки Чӑваш Ен Элтеперӗ Олег Николаев патне йышӑнӑва кайсан асӑннӑ тӑрӑхри хастарсем пӗлсе килнӗ.

Республика ертӳҫи паян йышӑну ирттернӗ. Ун патне Юлия Федорова тата Раиса Соколова пынӑ. Вӗсем икӗ яла ҫулпа ҫыхӑнтарас ыйтӑва хускатнӑ.

Чӑваш Енӗн Транспорт тата ҫул-йӗр хуҫалӑхӗн министерствинче пӗлтернӗ тӑрӑх, хальхи вӑхӑтра проектпа смета документацине хатӗрлесе ҫитернӗ. Ҫул сарма хушма укҫа уйӑрас ыйтӑва бюджета тишкернӗ чухне пӑхса тухмалла.

2Про Город" сайтран илнӗ сӑн

Паян ирех Шупашкарта хваттер ҫуннӑ. Кун пирки «Про Город» хаҫата халӑх корреспонденчӗ пӗлтернӗ.

Ирхи 8 сехет тӗлӗнче Ленин Комсомолӗн урамӗнчи 38-мӗш ҫуртри пӗр хваттер чӳречинчен ҫӑра тӗтӗм явӑнса тухнӑ. Вӑл чи ҫӳлти, 9-мӗш хутри, хваттер пулнӑ.

Пушарнӑйсем вырӑна хӑвӑртах ҫитнӗ. Халӗ ҫулӑм мӗнрен тухнине тӗпчеҫҫӗ.

9111.ru сайтри сӑн

Уяв кунӗсенче нумайрах каннӑ май тивӗҫлӗ канури ҫынсем пенси укҫине маларах илӗҫ. Кун пирки Пенси фончӗн Чӑваш Енри управленийӗ пӗлтерет.

Чӳкӗн 5-мӗшӗнчен пенсие графикпе килӗшӳллӗн валеҫме тытӑнӗҫ. Банка 5-7-мӗшӗсемшӗн чӳкӗн 3-мӗшӗнче ҫитӗ. Малалла – графикпе килӗшӳллӗн.

Социаллӑ пулӑшу илекенсене яланхи пекех куҫарса парӗҫ – чӳкӗн 3-мӗшӗнче.

chebs.cap.ru сӑнӳкерчӗкӗ

Шупашкар муниципалитет округӗн пуҫлӑхӗ пулма 53 ҫулти Николай Хорасева суйланӑ.

Николай Евгеньевич 1969 ҫулхи нарӑс уйӑхӗн 2-мӗшӗнче Шупашкар районӗнчи Салапайкасси ялӗнче ҫуралнӑ. Ҫартан таврӑнсан «Химпром» предприятире, 1993-2008 ҫулсенче Шалти ӗҫсен министерствин тытӑмӗнче ӗҫленӗ. 2010-2015 ҫулсенче вӑл Шупашкар районӗнчи Вӑрман-Ҫӗктер ял тӑрӑхӗн администрацине ертсе пынӑ, унтан Депутатсен районти пухӑвне суйланнӑ. 2018 ҫулхи нарӑс уйӑхӗнче ӑна Депутатсен пухӑвӗн председателӗ пулма суйланӑ, 2020 ҫулхи пуш уйӑхӗнче район администрацине ертсе пыма тытӑннӑ. Икӗ ҫуллӑха пынӑ контракт вӑхӑчӗ вӗҫленсен 2022 ҫулхи пуш уйӑхӗнче ӑна каллех районӑн сити-менеджерӗ пулма шаннӑ. Халӗ вӑл муниципалитет округне ертсе пырӗ.

Аса илтерер: ҫулталӑк вӗҫлениччен 19 районта муниципалитет округӗсем йӗркелӗҫ.

culture.cap.ru сӑнӳкерчӗкӗ

Шупашкарти ӳнер училищинче Тутарстанри анимаци киновӗн ертсе пыракан специалисчӗсемпе тӗл пулу иртнӗ. Ҫамрӑксемпе тӗл пулса калаҫма «Тутармультфильм» пултарулӑх пӗрлешӗвӗн тӗп режиссёрӗ Сергей Киатров тата анимаци киновӗн режиссёрӗ Елизавета Скворцова килсе ҫитнӗ.

Тӗлпулу чӑваш юмахӗсем тӑрӑх ӳкернӗ «Иван-батыр» (чӑв. Иван паттӑр) мультфильма кӑтартнинчен пуҫланнӑ. Чӑваш Улӑпӗ — «Тутармультфильм» пултарулӑх пӗрлешӗвӗн «Волжские богатыри» (чӑв. Атӑлҫи паттӑрӗсем) анимаци проекчӗн сӑнарӗсенчен пӗри. Проектра — 6 мультфильм. Унта чӑваш, тутар, вырӑс, мари, мордва, удмурт фольклорне тӗпе хурса хатӗрленӗ ӗҫсем кӗреҫҫӗ.

Сергей «Татармультфильм» пултарулӑх пӗрлешӗвӗ ҫинчен каласа кӑтартнӑ. Асӑннӑ студие Тутарстанри энтузиастсем пӗр шухӑшлӑ пулнипе 2009 ҫулта йӗркеленӗ. Йыша мультипликаторсем, художниксем, сценаристсем кӗнӗ. Ҫавӑнтанпа тӗрлӗ халӑх юмахӗсенчи сюжетсене тӗпе хурса ачасем валли 90 мультфильм хатӗрленӗ.

Елизавета Долгова страницинчен илнӗ сӑнӳкерчӗк

Иртнӗ уйӑхӑн юлашки кунӗнче Г.Н. Волков академик ҫуралнӑранпа 95 ҫул ҫитнине эпир пӗлтернӗччӗ-ха. Ҫав ятпа Шупашкарти 12-мӗш шкулта педагогсен «Халӑх вӗрентӗвӗн йӑла-йӗркийӗ – вӗрентекенӗн чун-чӗре культурин тӗп шӑнӑрӗ» ятпа наукӑпа меслетлӗх конференцийӗ иртнӗ.

Елизавета Долгован тӗнче тетелӗнчи халӑх ушкӑнӗсенчен пӗринчи страницинче пӗлтернӗ тӑрӑх, конференцие хулари чӑваш чӗлхи вӗрентекенӗсем ҫеҫ мар, пӗтӗм республикӑри учительсем хутшӑннӑ. Тутар, Пушкӑрт республикисенчен, Мускав облаҫӗнчен педагогсем те хутшӑннӑ.

«Конференци ӗҫне ӳнерпе ӑслӑлӑх академин пайташӗсем: В.А. Иванов, Н.И. Димитриева, В.А. Федотов, Ю.М. Виноградов, Е.К. Иванова хутшӑнса сӑмах каларӗҫ. Ку конференци этнопедагогика ыйтӑвӗпе ирттерекен пулӑмсенчен 10-мӗш пулчӗ. Вӗсене пурне те чӑваш чӗлхи учителӗ, Чӑваш Республикин тава тивӗҫлӗ учителӗ Анисия Павловна Игнатьева йӗркелесе ертсе пычӗ», — тесе пӗлтернӗ хыпарта.

Елизавета Долгова страницинчен илнӗ сӑнӳкерчӗк

Иртнӗ уйӑхӑн вӗҫӗнче, юпа уйӑхӗн 29-мӗшӗнче, Ҫеҫпӗл Мишши ячӗллӗ ҫамрӑксен театрӗнче Екатерина Ефремова ячӗллӗ «Ахах-мерчен аваллӑхӗ» фестиваль иртнӗ.

Елизавета Долгова тӗнче тетелӗнчи халӑх ушкӑнӗсенчен пӗринче пӗлтернӗ тӑрӑх, халӑхсен хушшинчи «Ахах-мерчен аваллӑхӗ» фестиваль офлайн тата онлайн мелӗпе виҫҫӗмӗш​ хут иртнӗ. Унӑн авторӗ халӑх маҫтӑрӗ Зинаида Воронова иккен.

«Чӑваш ҫи-пуҫӗнче, тӗрринче халӑхӑмӑрӑн кун-ҫулӗ, ӑс-тӑнӗ, мухтавӗ, шухӑшлавӗ, илемлӗхе туйма пӗлни упранать. «Ахах-мерчен аваллӑхӗн» пӗлтерӗшӗ ҫав тери пысӑк, вӑл чӑваш халӑхӗн йӑли-йӗрки пуянлӑхне уҫса парать. Фестиваль авалтан упранса ҫирӗпленнӗ ал-ӗҫ йӑли-йӗркине упраса хӑварма, ҫитӗнекен ӑрӑва тӑван культура патне туртӑнтарма, ӑстасен пӗлӗвне сарма пулӑшать», — тесе палӑртнӑ Елизавета Долгова.

culture.cap.ru сӑнӳкерчӗкӗ

Йошкар-Олара «Раҫҫей халӑхӗсен Наци костюмӗ» фестиваль-конкурсӗ иртнӗ. Унта пухӑннӑ модельерсем, этнографсемпе ӑстасем наци костюмӗсемпе пӗрлех хальхи вӑхӑтри этноколлекцисемпе, тӗрлӗ капӑрлӑхпа тата автор пуканисемпе пуҫтарӑннӑ.

Чӑваш ӳнер училищинче театрпа декораци искусствине вӗренеен 2 тата 3 курс студенчӗсем «Аслӑ Юман» чӑваш тумтирӗн пуххипе тата наци тумне тӑхӑнтартнӑ пуканесемпе тухса кайнӑ.

«Сцена костюмӗ» номинацире Екатерина Ефимова тата Анастасия Сильвестрова иккӗмӗш вырӑна тухнӑ.