Максим Иванов тунӑ сӑн

Сӗнтӗрвӑрри районӗнчи Хуракасси шкулӗнче 1961 ҫулхи чӳкӗн 5-мӗшӗнче пулнӑ пушарта вилнӗ ачасемпе вӗрентекенсен ячӗпе часавай ҫӗклӗҫ. Ку инкекре 106 ачан тата 4 вӗрентекенӗн пурнӑҫӗ татӑлнӑ. Вӗсене тӑванла вилтӑпринче пытарнӑ.

Часавай тӑвасси пирки пӗлтӗр чӳк уйӑхӗнчех калаҫма пуҫланӑ, вырӑнне сӑвапланӑ та. РФ Патшалӑх Думин депутачӗ пулӑшма шантарнӑ. Анчах ӗҫ пӑчланнӑ. Кӑҫал юпа уйӑхӗнче тин пӗрремӗш кирпӗче хунӑ. Халӗ унта иртен пуҫласа каҫчен ӗҫсем пыраҫҫӗ. Часавая ҫитес ҫул ҫулла туса пӗтермелле.

novyefoto.ru сайтри сӑн

Роспотребнадзор Йӗпреҫ районӗнчи Березовка шкулӗнче плана кӗртмен тӗрӗслев ирттернӗ. Ҫитменлӗхсене тупса палӑртнӑ.

Ачасене палӑртнӑ менюпа килӗшӳллӗн ҫитермен, ирхи апатра порцисем виҫерен пӗчӗкрех пулнӑ. Кунсӑр пуҫне ачасене кашни кун сӗт юр-варӗ, улма-ҫырла паман. Апат блокӗнче ҫимӗҫсене маркировкӑсӑр упранӑ.

Роспотребнадзор шкул директорне 3 пин тенкӗлӗх штрафлама йышӑннӑ. Шкула вара асӑрхаттару ҫырса панӑ.

cap.ru сӑнӳкерчӗкӗ

Чӑваш Енре ӳпке шыҫҫипе чирлекен ачасен йышӗ ӳснӗ. Иртнӗ эрнере васкавлӑ медпулӑшу ҫак чирпе аптӑранӑ 53 ача патне ҫитнӗ. Ун умӗнхи эрнере вара 30 шӑпӑрланӑн ӳпке шыҫҫи пулнине палӑртнӑ.

Пневмонипе чирлекен ачан ӳт температури 39 градус ытла хӑпарать, 3 кунран ытларах ҫапла тӑрать. Малтан типӗ ӳслӗк аптӑратать, кайран ҫемҫелет. Сывлама йывӑрланать, чӗри хӑвӑрттӑн тапать.

Тухтӑрсем ашшӗ-амӑшне хӑйсем тӗллӗн сиплеме сӗнмеҫҫӗ, васкавлӑ медпулӑшу чӗнмелле.

cap.ru сӑнӳкерчӗкӗ

Вӑрнар районӗнче 65 ҫултан аслӑрах ҫынсене пульницӑна ятарлӑ машинӑпа илсе ҫӳреҫҫӗ. Ара, ватлӑхра пульницӑна ҫӳресси ҫӑмӑлах мар вӗт. Транспорта сывлӑх енчен хавшак ҫынсен те ларма май пур. Кӳмепе ҫӳрекенсем те унта вырнаҫма пултараҫҫӗ.

Специалистсем ял ҫыннисене транспорта лартаҫҫӗ те пульницӑра пӳлӗмсене кӗртсех яраҫҫӗ. Кайран киле ӑсатаҫҫӗ.

"Пурӑннӑ чухне кун пек асамлӑх курасси пирки шутламан та. Пирӗншӗн, пирӗн сывлӑхшӑн тӑрӑшакансене пысӑк тав сӑмахӗ", - савӑннине палӑртнӑ 78 ҫулти Дарья Степанова.

Яндекс.дзен сайтри сӑн

Шупашкарти Калинин районӗн администрацийӗ ачасене ытларах мӗнле ят хунине тишкернӗ. Ҫулталӑк пуҫланнӑранпа ку районта 1900 ача ҫуралнӑ.

Хӗрачасене ытларах Ева, Варвара, Дарья, Елизавета ят хунӑ. Арҫын ачасен хушшинче ытларах - Тимур, Даниил, Михаил.

Хӑш-пӗр ашшӗ-амӑшӗ ачине сайра тӗл пулакан ят парать. Кӑҫал Калинин районӗнче ҫакнашкаллисем тӗл пулнӑ: Каролина, Эвелина, Амелия, Агния, Ариэль, Августина, Оливия, Камилла, Злата, Теона, Ясмина, Маргарита, Зайнад, Златан, Арслан, Осман, Рафаэль, Али, Демьян, Граф, Ян, Амир, Дамир, Филипп.

er.ru/person сӑнӳкерӗкӗ

Паян Раҫҫей Федерацийӗн вӗрентӳ ӗҫӗ отличникӗ Александр Иванов 65 ҫул тултарнӑ.

Александр Степанович Муркаш районӗнчи Ҫатракасси ялӗнче ҫуралнӑ. И.Я. Яковлев ячӗллӗ Чӑваш патшалӑх педагогика институтӗнчен (халӗ — университетӗнчен) вӗренсе тухнӑскер ӗҫ биографине 1979 ҫулта шкулти математика учителӗнчен пуҫланӑ. Унтан вӑл шкул директорӗ пулнӑ, Шупашкар райкомӗн пӗрремӗш секретарӗнче тӑрӑшнӑ, Чӑваш обкомӗнчи йӗркелӳ пайӗн заведующине ҫитнӗ.

2001-2010 ҫулсенче Александр Иванов Чӑваш Енӗн Патшалӑх Канашӗн Аппарачӗн ертӳҫи пулнӑ. 2010 ҫулхи авӑн уйӑхӗнче ӑна республика Президенчӗн Администрацийӗн ертӳҫи пулма шаннӑ. 2014-2018 ҫулсенче вӑл информаци политикипе массӑллӑ коммуникацисен министрӗ пулнӑ, 2018 ҫулхи ҫу-юпа уйӑхӗсенче — вӗрентӳ тата ҫамрӑксен политикин министрӗ.

Александр Степановича «Чӑваш Республики умӗнчи тава тивӗҫлӗ ӗҫсемшӗн» медаль орденӗпе тата орденпа чысланӑ.

Чӑваш Енре юлашки ҫулсенче фельдшерпа акушер пункчӗсене нумай ҫӗнетрӗҫ. Ҫӗнӗрен туса лартнӑскерсене кӗрсе тухма кӑмӑллӑ.

Ҫав вӑхӑтрах вӗсенче эмел тавраш сутмаҫҫӗ. Кун пирки «Контактра» халӑх ушкӑнӗнчи «Чувашская Республика» ушкӑнра та сӑмах хускатнӑ.

Алексей Григорьев ятлӑ ҫын ҫырнӑ тӑрӑх, Сӗнтӗрвӑрри районӗнчи Сӗнтӗрпуҫ ялӗнче эмел сутассине «виҫҫӗмӗш ҫул ӗнтӗ йӗркелеймеҫҫӗ». Вӑл палӑртнӑ тӑрӑх, ватӑ ҫынсен тата ялта пурӑнакансен хулари аптекӑсене кайма тивет.

Хастар арҫын палӑртнӑ тӑрӑх, кӑҫалхи кӑрлач уйӑхӗнче саккуна улшӑну кӗртнӗ. Фельдшерпа акушер пункчӗсенче эмел сутма лицензи илмелле мар.

Чӑваш Енӗн Сывлӑх сыхлав министерстви ыйтӑва тишкерме шантарнӑ.

culture.cap.ru сӑнӳкерчӗкӗ

Паян, чӳк уйӑхӗн 7-мӗшӗнче, Вырӑс драма театрӗн режиссёрӗ, Чӑваш Республикин халӑх артисчӗ Владимир Красотин 70 ҫул тултарнӑ.

Владимир Алексеевич пурнӑҫӗ урӑхларах пулма та пултарайман тейӗн. Артистсен ҫемйинче ҫуралнӑскер пӗчӗкренех театр ӳнерӗн сывлӑшӗпе ӳснӗ. Унӑн ашшӗ – РСФСР халӑх артисчӗ Алексей Красотин, амӑшӗ — Чӑваш Республикин халӑх артистки Тамара Красотина.

Владимир Красотин 1952 ҫулта Кӑнтӑр Сахалинск хулинче ҫуралнӑ. А.В. Луначарский ячӗллӗ ГИТИСран вӗренсе тухсан тӗрлӗ театрта ӗҫленӗ. 1978 ҫулта ӑна Шупашкарти Вырӑс драма театрне чӗнсе илнӗ. Ҫавӑнтанпа вӑл 40 ытла спектакль лартнӑ.

http://elbib.nbchr.ru сӑнӳкерчӗкӗ

Паян Арсентий Андреев (07.11.1937-19.07.1968) чӑваш поэчӗ ҫуралнӑранпа 85 ҫул ҫитнӗ.

Арсентий Кузьмич Патӑрьел районӗнчи Тури Тӑрмӑш ялӗнче ҫуралнӑ. Чӑваш патшалӑх ял хуҫалӑх академийӗнче вӗреннӗ. Казахстанра трактористра ӗҫленӗ, Сахалин облаҫӗнче вара вӑл совхоз директорӗн заместителӗнче тӑрӑшнӑ. Чӑваш Енӗн Наци вулавӑшӗнче пӗлтернӗ тӑрӑх, поэт Сахалинта сарӑмсӑр вилнӗ.

Арсентий Андреевӑн малтанхи хайлавӗсем «Тӑван Атӑл» альманахра 1956 ҫулта пичетленнӗ. Унӑн тӗп кӗнекисем: «Тӗл пулу», «Сахалинӑм манӑн, Сахалин».

Ҫӗмӗрле ҫывӑхӗнче Сӑр юханшывӗ урлӑ каҫмалли понтон кӗпере илнӗ. Хальлӗхе унта каҫса ҫӳреме ҫук. Кун пирки Чӑваш Енри шыравпа ҫӑлав служби пӗлтерет.

Понтон кӗпер Ҫӗмӗрле хулипе Чулхула облаҫӗнчи Навата ҫыхӑнтарнӑ. Хӗл лариччен ҫав вырӑнтан каҫмалли кӗпер пулмӗ. Юханшыв пӑрпа витӗнсен тин хӗллехи каҫӑ пулӗ.