culture.cap.ru сӑнӳкерчӗкӗ

Шупашкарта ҫу уйӑхӗн 26-мӗшӗнчен тытӑнса ҫӗртме уйӑхӗн 1-мӗшӗсенче иртекен пӗтӗм тӗнчери кинофестиваль вӑхӑтӗнче чӑваш фильмӗсене кӑтартӗҫ.

Ҫу уйӑхӗн 27-мӗшӗнче Чӑваш ҫамрӑксен театрӗнче 18 сехет те 50 минутра Елена Еделеева режиссёрӑн «Мальчик из Шоршел» фильмне, ҫу уйӑхӗн 29-мӗшӗнче 16 сехетре «Волжский» кинотеатрта тата ҫу уйӑхӗн 30-мӗшенче 15 сехетре Халӑхсен туслӑхӗн ҫуртӗнче Александр Осипов режиссёрӑн «Праведник» фильмне, ҫу уйӑхӗн 31-мӗшӗнче 17 сехет те 15 минутра «Волжский» кинотеатрта Алексей Ивановӑн «Мёртвый рассвет» фильмне кӑтартӗҫ.

Чӑваш киновӗн кунӗнче, ҫу уйӑхӗн 29-мӗшӗнче, сӑмахран, Ҫамӑксен театрӗнче 17 сехетре Станислав Одров режиссёрӑн «У мечты нет возраста», 17 сехет те 40 минутра Сергей Щербаков режиссерӑн «Слеза ангела», 18 сехет те 20 минутра Ольги Палан режиссёрӑн «Посреди мира» / «Уй варринче», Сергей Щербаков режиссёрӑн «Вубар», 19 сехете те 30 минутра Николай Яковлевӑн «Один из нас»/ «Пиртен Пӗри» фильмӗсене кӑтартӗҫ.

Кинофестиваль программипе https://kino-cap.ru сайра тӗплӗнрех паллашма пулать.

Елена Николаева. culture.cap.ru сӑнӳкерчӗкӗ

Паян, ҫу уйӑхӗн 25-мӗшӗнче, Ҫеҫпӗл Мишши ячӗллӗ Чӑваш патшалӑх ҫамрӑксен театрӗн директорӗ Елена Николаева 50 ҫул тултарнӑ.

Елена Николаева 1973 ҫулта Етӗрне районӗнчи Тури Ачак ялӗнче ҫуралнӑ. И.Н. Ульянов ячӗллӗ Чӑваш патшалӑх университетӗнче вӗреннӗ вӑхӑтрах шкулта чӑваш чӗлхипе литературине вӗрентме тытӑннӑ. 2002 ҫулта вӑл Республикӑн халӑх пултарулӑхӗн ӑслӑлӑхпа методика центрне ӗҫлеме пуҫланӑ, каярах вӑл Республикӑн культура программисен дирекцине куҫнӑ.

Ҫамрӑксен театрӗн директорӗнче вӑл 2011 ҫултанпа ӗҫлет. Театрта палӑртнӑ тӑрӑх, культура учрежденине Елена Николаева ертсе пыма тытӑннӑранпа театр пурнӑҫпа тан утма тытӑннӑ.

Спектакльсем лартма театра тӗрлӗ ҫӗрти пултаруллӑ режиссерсене, художниксене тата композиторсене пӗрмаях чӗнсе илеҫҫӗ. Театр ӗҫченӗсем хӑйсен пултарулӑхне Мускавра, Питӗрте тата Хусанта туптаҫҫӗ.

ШӖМ тунӑ сӑн

Ӗнер Елчӗк районӗнче пулнӑ аварире нумай ҫын шар курнӑ. Шел те, вӗсенчен пӗри вырӑнтах вилнӗ.

Ку авари "Елчӗк - Курнавӑш" ҫул ҫинче 16 сехетре пулнӑ. ШӖМ пӗлтернӗ тӑрӑх, "Лада Гранта" умӗнче пыракан "Лада Калина" ҫине пырса тӑрӑннӑ. "Калинӑри" 61 ҫулти пассажирка ҫавӑнтах вилнӗ. 7 ҫынна больницӑна илсе кайнӑ.

Ҫакӑ паллӑ: "Лада Грантӑри" водитель ӳсӗр пулнӑ.

21.мвд.рф сӑнӳкерчӗкӗ

Ӗнер, ҫу уйӑхӗн 24-мӗшӗнче, ирхи 2 сехетре Шупашкарта ҫамрӑк водитель инкеке лекнӗ.

Пӑтӑрмах Граждан урамӗнчи 66-мӗш ҫурта хирӗҫ вырӑнта пулса иртнӗ. «Лада Гранта» автомашинӑн 19 ҫулти водителӗ руле тытса чарайманнипе ҫултан пӑрӑнса кайса бетон блок ҫине пырса кӗнӗ.

Инкекре икӗ хӗрпе пӗр каччӑ аманнӑ. Вӗсем — 17-19 ҫулсенчискерсем. Аманнӑскерсене больницӑна ӑсатнӑ, пикесенчен пӗрне пирвайхи пулӑшу кӳнӗ хыҫҫӑн килне янӑ, иккӗшне больницӑна вырттарнӑ.

Каччӑ водитель правине илнӗренпе виҫӗ эрне те ҫитмен иккен. Хӑй вӑл ӳсӗр пулман. Машина чӳречине ҫутӑ кӗме чаракан кантӑк вырнаҫтарнӑ.

culture.cap.ru сӑнӳкерчӗкӗ

Чӑваш Енӗн Наци вулавӑшӗнче Станислав Юхтарпа тӗлпулу иртӗ.

Станислав Юхтар — Чӑваш Республикин тава тивӗҫлӗ художникӗ, Раҫҫей художникӗсен союзӗн членӗ, Нестер Янкас тата Ҫеҫпӗл Мишши ячӗллӗ премисен лауреачӗ.

Станислав Юхтар – республикӑри паллӑ иллюстраторсенчен пӗри. Вӑл чӑваш ҫыравҫисен нумай кӗнекине хӑйӗн ӳкерчӗкӗсемпе илемлетнӗ.

Тӗлпулӑва вулавӑшра «Параллели: песни мудрости народов Поволжья» курав ӗҫленӗ май йӗркелеме йышӑннӑ.

Тӗлпулу искусство литературин секторӗнче ҫу уйӑхӗн 25-мӗшӗнче 15 сехетре пуҫланӗ.

culture.cap.ru сӑнӳкерчӗкӗ

Чӑваш Республикин Халӑхсен туслӑхӗн ҫуртӗнче Ҫӗнӗ Шупашкарта пурӑнакан Виктор Артемьевӑн «С любовью к родной земле» (чӑв. Тӑван ҫӗре юратса) куравӗ усӑлнӑ. Экспозицире вырӑн тупнӑ ӗҫсенче ӗҫ ҫыннине, ял ҫыннине сӑнланӑ.

Халӑхсен туслӑхӗн ҫурчӗн ертӳҫи Юрий Токмаков Виктор Артемьевӑн ӗҫӗсене пысӑка хурса хакланӑ май вӗсем Республика кунӗ тӗлне лайӑх парне пулассине палӑртса хӑварнӑ.

Вӑл пӗлтернӗ тӑрӑх, куравпа ҫамрӑксем те, ҫав шутра шкул ачисемпе студентсем, вӗсен преподавателӗсем паллашӗҫ.

Художник тивӗҫлӗ канура пулин те ӳкерме вӑл малтанхиллех юратать иккен.

Ӗнер, ҫу уйӑхӗн 23-мӗшӗнче, 7 сехет те 33 минутра Пӑрачкав ялӗнче «КамАЗ» Комсомольски урамӗнчи 72-мӗш ҫурт ҫывӑхӗнчи газ пӑрӑхне лектерсе йӑтса антарнӑ. Ҫывӑхри ҫурта газ лекнӗ, электричество замыканийӗ пулса пушар тухнӑ.

Пушарнӑйсем ҫулӑма 1 сехетре сӳнтернӗ. Ҫурт вӑйлах сиенленнӗ. Юрать-ха, хӑть кӳршӗри пӳрте ҫунса кайма паман: пушарнӑйсем тӑрӑшнипе ҫулӑм ун ҫине куҫман.

ogastrite.ru сайтри сӑн

Кӑҫалхи пӗрремӗш квартала пӗтӗмлетнӗ тӑрӑх, Чӑваш Енре эрехпе наркӑмӑшланнӑ ҫынсен 1,3 проценчӗ Канаш районӗнче пурӑнать. Ҫакна кура район администрацийӗ чи урӑ урама тата чи урӑ яла палӑртас тӗллевпе конкурс ирттерет. Ҫӗнтерӳҫӗсене укҫан хавхалантарӗҫ.

Ҫавӑн пекех Канаш районӗнче эрех-сӑрапа тӑтӑшах айкашакан ҫынсен списокне хатӗрленӗ. Вӗсене нарколог патне сипленме ярасшӑн.

Кунсӑр пуҫне районти медӗҫченсем рейдсем ирттереҫҫӗ, ҫав вӑхӑтра эрехпе иртӗхекен ачасемпе ашшӗ-амӑшне тупса палӑртаҫҫӗ.

Чӑваш Енре Республика кунӗнче, ҫӗртме уйӑхӗн 24-мӗшӗнче, автокросс енӗпе чемпионат тата первенство ирттерме палӑртнӑ. Ӑмӑртӑва Шупашкар районӗнчи Чӑрӑшкассинче йӗркелӗҫ.

Классем «Д3-спринт», «Д3-мини», Д-2-юниор», «д2-1600», «Д2Н, «Д-2- классика» спортсменсем валли кӑна пулӗҫ.

Аса илтерер: Республика кунӗнче «Раҫҫей ҫӑлкуҫӗсем», «Руҫ маҫтӑрӗсем» фестивальсем, ытти мероприяти иртӗ.

Марина Якимова страницинчен илнӗ сӑнӳкерчӗк

Шупашкар районӗнчи Иккассинчи шкул Николай Шупуҫҫынни ячӗпе хисепленсе тӑма пуҫланӑ. Ку хыпара асӑннӑ шкулта вӗреннӗ Марина Якимова халӑх тетелӗнчи хӑйӗн страницинче хыпарланӑ.

Асӑннӑ информаци тӑрӑх хакласан, ҫав пулӑм ячӗпе шкула сумлӑ хӑнасем, шкулта тӗрлӗ ҫулта вӗреннисем пуҫтарӑннӑ.

Николай Васильевич Шупуҫҫынни (Васильев) 1889 ҫулхи раштавӑн 8-мӗшӗнче Хусан кӗпӗрнинчи Шупашкар уесӗнчи Иккасинче ҫуралнӑ. Чӗмпӗрти чӑваш шкулӗнче вӗренме ӗмӗтленнӗскере революци юхӑмне хутшӑннӑшӑн пӗлӳ заведенийӗнчен кӑларса яраҫҫӗ. Талпӑнуллӑскер кӑштахран Чӗмпӗре таврӑннӑ, куҫару комиссийӗнче К.В. Ивановпа пӗрле ӗҫлеме тытӑннӑ. 1909 ҫулта Чӗмпӗрти гимназире учитель ятне илме экстерн йӗркипе экзамен тытнӑ. Литература ӗҫне вӑл 1906 ҫулта пуҫӑннӑ.