"Чебмедиа" сайтри сӑн

Шупашкар хула администрацийӗн пуҫлӑхӗн Денис Спиринӑн тӳлевсӗр ӗҫлекен канашҫӑсем пулӗҫ. Хальлӗхе унӑн – пӗр канашҫӑ. Вӑл – ҫамрӑксемпе ӗҫлекен Кирилл Мухин, унччен спецназ пулнӑскер.

Йышӑну проектӗнче палӑртнӑ тӑрӑх, канашҫӑсем сити-менеджер хушӑвӗпе тӳлевсӗр ӗҫлӗҫ, должноҫсене йышӑнаймӗҫ. Вӗсене хула администрацийӗн пуҫлӑхӗ мӗн чухлӗ вӑхӑт ӗҫленине кура палӑртаҫҫӗ, хӑйсем заявлени ҫырсан тивӗҫе пурнӑҫлама шанаҫҫӗ.

ЧР Элтеперӗ Олег Николаев вӗрентекенсене, строительсене, юристсене тата ыттисене сумлӑ ят парасси пирки хушу алӑ пуснӑ. Вӗсен йышӗнче Шупашкарти икӗ педагог та пур.

Хушупа килӗшӳллӗн Шупашкарти 1-мӗш шкулта музыка тата чӑваш чӗлхи учительне Татьяна Васильевӑна «Чӑваш Республикин тава тивӗҫлӗ учителӗ» ята панӑ. Вӑл – аслӑ категориллӗ учитель, стажӗ – 38 ҫул.

Шупашкарти 40-мӗш шкулта ачасене чӑваш чӗлхипе литературине вӗрентекен Александр Степанова та ҫак ятах панӑ.

ҪҪХПИ тунӑ сӑн

Полицейскисем ӳсӗр водителе тытса чарма пулӑшнӑ арҫынна тав туса парнепе хавхалантарнӑ.

Юпа уйӑхӗн 23-мӗшӗнче «Шупашкар – Сӑрҫи» автоҫул ҫинче «тӑваттӑмӗш» модель водителӗ эвакуатор умне тухса авариллӗ лару-тӑру туса хунӑ. Ҫакна курнӑ тепӗр водитель кун пирки ҪҪХПИе пӗлтернӗ. Ку кӑна мар – пакунлисем ҫитиччен ҫав водитель хыҫҫӑн пынӑ.

Лешне тытса чарнӑ. Анчах вӑл ӳсӗррипе ӳсӗр маррине тӗрӗслеме тест витӗр тухма килӗшмен. 65 ҫулти арҫынна куншӑн правасӑр хӑварма, штраф тӳлеттерме пултараҫҫӗ.

Юпа уйӑхӗн 20-мӗшенче Патӑрьелте анатри чӑвашсен фольклорӗн «Ӗмӗрсен эрешӗсем» регионсем фестивалӗн гала-концерчӗ иртнӗ.

Мероприятие «Трактор тӑвакансен культура керменӗ» халӑх пултарулӑхӗн республикӑри центрӗ вырӑнти клуб тытӑмӗпе пӗрле йӗркеленӗ.

«Анатри» этнографи ушкӑнне кӗрекен чӑвашсен, ҫавӑн пекех Чӑваш Енре пурӑнакан вырӑссемпе мордвасен фольклорпа этнографи культурине сарас тӗллевпе ирттернӗ мероприятире тӗрлӗ жанрлӑ юрӑсем янӑранӑ, кӗвӗ-ҫемӗпе, йӑла-йӗркепе паллаштарнӑ.

Фестивале Улатӑр, Патӑрьел, Йӗпреҫ, Канаш, Комсомольски, Шӑмӑршӑ, Тӑвай, Елчӗк тӑрӑхӗсенчи, Пензӑпа Самар облаҫӗсенчи, Тутарстанри 200 ытла ҫын пуҫтарӑннӑ.

Вячеслав Христофоровӑн халӑх тетелӗнчи страницинчен илнӗ сӑнӳкерчӗк

Чӑваш юрӑҫине Вячеслав Христофорова орден медалӗ панӑ. «Янра, юрӑ» ушкӑнӑн илемлӗх ертӳҫине, солист-вокалиста «Чӑваш Республики умӗнчи тава тивӗҫлӗ ӗҫсемшӗн» орден медалӗпе наградӑласси ҫинчен калакан Хушӑва республика ертӳҫи Олег Николаев ӗнер, юпа уйӑхӗн 24-мӗшӗнче, алӑ пуснӑ.

Вячеслав Христофоров кӑҫалхи ҫурла уйӑхӗн 11-мӗшӗнче 60 ҫул тултарнӑ. Вӑл Елчӗк районӗнчи (халӗ — муниципаллӑ округ) Ҫӗнӗ Пӑва ялӗнче ҫуралнӑ. Культурӑпа ҫутӗҫ училищинче, Хусанти патшалӑх консерваторийӗнче вӗреннӗ. Хӑй вӑхӑтӗнче Чӑваш патшалӑх юрӑпа ташӑ ансамблӗнче ӗҫленӗ, Чӑваш патшалӑх филармонийӗн «Ҫавал» эстрадӑпа фольклор ансамблӗн солисчӗ пулнӑ, Ф.П.Павлов ячӗллӗ музыка училищинче преподавательте тӑрӑшнӑ.

Ӑна 1998 ҫулта Чӑваш Республикин тава тивӗҫлӗ артисчӗ ят панӑ, 2011 ҫулта — Тутарстанӑн тава тивӗҫлӗ артисчӗ ята, 2005 ҫулта — Чӑваш Республикин халӑх артисчӗ ята.

ШӖМ тунӑ сӑн

Ӗнер каҫхине 6 сехетре Ҫӗмӗрле муниципаллӑ округӗнче «Шупашкар – Сӑрҫи» ҫул ҫинче, Турхан ялӗ ҫывӑхӗнче, «Лада Ларгус» ҫынна таптаса кайнӑ.

Малтанлӑха пӗлтернӗ тӑрӑх, 30 ҫулти водитель ҫулпа утакан ҫын ҫине пырса кӗнӗ. Лешӗ тӗттӗм тум тӑхӑннӑ пулнӑ. Арҫын ҫавӑнтах вилнӗ.

Ҫакӑ паллӑ: водитель урӑ пулнӑ. Халӗ ӗҫ-пуҫа уҫӑмлатаҫҫӗ.

cap.ru сайтри сӑн

Ӗнер Тӑвай муниципаллӑ округӗн депутачӗсем уҫӑ сасӑлав ирттерсе администраци пуҫлӑхне суйланӑ. Ҫак должноҫе администраци пуҫлӑхӗн ҫумӗ пулнӑ Олег Ломоносов йышӑннӑ.

Олег Анатольевич 45 ҫулта. Вӑл Тӑвайрах ҫуралса ӳснӗ, И.Н.Ульянов ячӗллӗ ЧПУра «истори» специальноҫпе вӗреннӗ. Кайран Атӑл-Вятка академи патшалӑх службинче пӗлӳ илнӗ.

Унӑн ӗҫ стажӗ – 23 ҫул, вӗсенчен 20-шне вырӑнти хӑйтытӑмлӑх органӗсенче вӑй хунӑ.

vk.com/chgign_1930 сӑнӳкерчӗкӗ

Чӑваш патшалӑх гуманитари ӑслӑлӑхсен институтӗнче «Гурий Ивановчи Комиссаров – этнограф, историк, писатель» ҫав сӗтел иртнӗ. Ӑна учёнӑй ҫуралнӑранпа 140 ҫул ҫитнине халалланӑ.

Аса илтерер, Гурий Комиссаров-Вантер — чӑваш фольклористикине, чӑваш этнологине, историне тата краеведенине тӗпченӗ. Писатель, публицист, тӑлмач, литературовед, чӗлхеҫӗ, педагог, философ, историк. Гурий Комиссаров-Вантер 1883 ҫулхи юпа уйӑхӗн 3-мӗшӗнче хальхи Ҫӗрпӳ районӗнчи Патӑрьел ялӗнче ҫуралнӑ. Етӗрне уесӗнчи тата Епхӳри вӗренӳ заведенийӗсенче ӗҫленӗ. 1969 ҫулхи нарӑс уйӑхӗн 25-мӗшӗнче пурнӑҫран уйрӑлнӑ. Ӑна Киров облаҫӗнчи Санчурск поселокӗнче пытарнӑ.

vk.com/chgign_1930 страницӑран илнӗ сӑнӳкерчӗк

Юпа уйӑхӗн 26-мӗшӗнче, 14 сехетре, Чӑваш Енӗн Наци вулавӑшӗнче Атнер Хусанкай учёнӑйӑн 75 ҫулхи юбилейне халалласа «Язык, филология и феномены чувашской культуры» (чӑв. Чӗлхе, филологи тата чӑваш культурин палӑрӑмӗсем) ятпа ҫавра сӗтел иртӗ.

Унта Виталий Родионов, Галина Семёнова профессорсем, филологи наукисен кандидачӗсем Геннадий Дегтярёв, Алевтина Долгова тата Эдуард Лебедев, искусствоведени кандидачӗ Антонина Мордвинова, истори наукисен кандидачӗ Алексей Леонтьев туха калаҫӗҫ.

Атнер Хусанкай 1948 ҫулхи юпа уйӑхӗн 8-мӗшӗнче Шупашкарта ҫуралнӑ.

medicin.cap.ru сӑнӳкерчӗкӗ

Республикӑн ача-пӑча клиника пульницинчи оториноларингологи тата янах шӑммипе пит хирургийӗн уйрӑмне сӑмсана пирсинг ҫӑтса янӑ хӗрачана илсе пынӑ. Пӗчӗк хӑлха ҫаккине вӑл сывланӑ чухне сӑмсипе туртса илнӗ.

Ачан ашшӗ-амӑшӗ каланӑ тӑрӑх, хӗрача аппӑшӗ пек сӑмси ҫине пирсинг лартса ҫӳреме ӗмӗтленнӗ. Ҫавӑн чухне вӑл ӑна ӑнсӑртран сӑмсана туртса илнӗ.