t.me/mchs_chuvashia сӑнӳкерчӗкӗ

Паян, чӳк уйӑхӗн 6-мӗшӗнчи ирхине, Шупашкарти нумай хваттерлӗ ҫуртсенчен пӗринче пушар тухнӑ. Вӑл ҫурт хулари 9-мӗш пилӗкҫуллӑх урамӗнче, 5-мӗш ҫуртра вырнаҫнӑ.

Малтанласа палӑртнӑ тӑрӑх, пушарта пӗр ҫын пурнӑҫӗ татӑлнӑ, 1 ҫынна пульницӑна ӑсатнӑ.

Нумай хваттерлӗ ҫуртӑн саккӑрмӗш хутӗнчи икӗ пӳлӗмлӗ хваттерти пушар пирки ҫӑлавҫӑсене ирхи 7 сехетре пӗлтернӗ. Пушара сӳнтерме 30 ҫӑлавҫӑ, 11 единица техника пырса ҫитнӗ. 22 ҫынна (ҫав шутра 9 ачана) эвакуациленӗ.

Ҫӗмӗрлери "Новая Реальность" телеканал ушкӑнӗнчи сӑнӳкерчӗк

Ӗнер, чӳк уйӑхӗн 5-мӗшӗнче, Ҫӗмӗрлери ятарлӑ автомобильсен завочӗн вокалпа инструментсен ансамбльне Андрей Малаховӑн кӑларӑмӗнче кӑтартрӗҫ.

Андрей Малахов ертсе пыракан «Песни от всей души» шоуна шӑматкунсерен тата вырсарникунсерен «Россия1» телеканалпа кӑтартаҫҫӗ. Ӗнерхи кӑларӑмра Ҫӗмӗрлери заводӑн «Трудовые резервы» вокалпа инструментсен ансамблӗ пулчӗ. Ушкӑнра — заводра тӑрӑшакан арҫынсем. Вӗсем пӗлтернӗ тӑрӑх, репетицие эрнере икӗ хутчен пухӑнаҫҫӗ.

t.me/nikapavlo каналтан илнӗ сӑнӳкерчӗксем

Шупашкарта юпа уйӑхӗн 20-мӗшӗнче ҫамрӑк художниксен «Юн» куравӗ уҫӑлнӑ.

Вӑл Ярославль урамӗнчи 42-мӗш ҫуртри «Нехудожник» галерейӑра ӗҫленӗ.

Ӑна йӗркелекенсем пӗлтернӗ тӑрӑх, курава чӑваш ҫӗрӗ ҫинчи ӳнерпе паллаштарас, ун ҫинчен ытларах каласа кӑтартас тӗллевпе ирттернӗ. Экспозици никӗсӗнче — этносра хӑйсене шыракан ҫамрӑксем.

«Самоотречение. Самоосознание!» лозунгпа ирттернӗ куравра 17 ҫамрӑк пултарулӑхӗпе паллашма май килнӗ.

Курава ҫамрӑксем хутса ӑшӑтман, ҫутӑсӑр пӳлӗмре йӗркеленӗ. Чунсӑр ҫурта чун кӗртнӗ темелле-тӗр.

Куравра Настасия, Юратса Амайа, Ксения Кошелева (Чувишенка), Юрий Никандров, Федорова Нина, Алкания Туктарова, Михаил Маюшкин, VALERI, Полина Серафимова, Юма Андреева, Катико, Олич Алеха, rv, Лиза Шаплина, Савӑнпи, Коля Т, Анастасия Сайкова ӗҫӗсем пулнӑ.

Следстви комитечӗ тунӑ сӑн

Чӑваш Енре Чӑмпӗр облаҫӗн арҫыннине тытса чарнӑ. Вӑл ҫынна хӗнесе вӗлернӗ тесе шутлаҫҫӗ.

Ҫак 23 ҫулти арҫын Улатӑр муниципаллӑ округӗнчи Иванькоао-Ленино ялне ӗҫтешӗпе стройка ӗҫне килнӗ.

Юпа уйӑхӗн 27-мӗшӗнче вӑл пӗлӗшӗпе эрех ӗҫнӗ. Хайхискерсем хирӗҫсе кайнӑ. 23-ри арҫын пӗлӗшне кӗлеткин тӗрлӗ пайӗнчен тапнӑ, ҫапнӑ. Лешӗ йывӑр сурансене пула ҫавӑн чухнех вилнӗ.

Денис Спирин архивӗнчи сӑн

Паян Шупашкарта пурӑнакан Анастасия Шорникова 100 ҫул тултарнӑ. Ӑна саламлама Шупашкар хулин пуҫлӑхӗ пулнӑ Денис Спирин (нумаях пулмасть вӑл та, Шупашкар мэрӗ Евгений Кадышев та ӗҫрен кайнӑ, ку реформӑпа ҫыхӑннӑ) саламлама ҫитнӗ.

Анастасия Михайловна ҫур ӗмӗр ытла шкулта ачасене вӗрентнӗ. Хулари 23-мӗш шкулта ӑна халӗ те астӑваҫҫӗ. Анастасия Михайловна хӑй вӗрентнӗ ачасемпе халӗ те ҫыхӑну тытать.

Халӗ Анастасия Шорникова 2 ачипе, 2 мӑнукӗпе, икӗ кӗҫӗн мӑнукӗпе савӑнса пурӑнать.

Чӑваш литератури илемпе сӑнарлӑх хӑватне ҫухатманшӑн чылай ҫул савӑнса пурӑнтӑм. Ӗмӗр чиккинче Хӗветӗр Агивер, Василий Эктель, Анатолий Смолин, Арсений Тарасов, Борис Чиндыков, Николай Исмуков, Николай Ыдарай, Виталий Захаров тата ҫамрӑксем ҫырнисене ырласа вулаттӑм.

Сасартӑк лару-тӑру хирӗҫле улшӑнчӗ. Литература ӗҫӗ пӑтранма пуҫларӗ. Ҫыравҫӑсен пӗрлешӗвӗ 100 ҫул ҫитнине уявланӑ кунсенче паянхи пирки шутламалли пайтах хускалчӗ.

«Ҫӗнӗлле йӗркелӳ» пӑтравӗ вӑраха пычӗ. Писательсен, художниксен, краеведсен пӗрлӗхӗсене астарса-хистесех иккӗ-виҫҫе пайларӗҫ. Аркату прорабӗсем паллӑ. Вӗскӗртекенӗсем ҫеҫ аякран пулчӗҫ.

2009 ҫултанпа Чӑваш писателӗсен тӗп союзне Сергей Павлов ертсе пычӗ. Тепӗр съездра та ӑнах председательте хӑварчӗҫ. Ертӳлӗхе (правление) унпа пӗрле Денис Гордеева, Николай Ишентее, Геннадий Максимова, Марина Карягинӑна, Елен Нарпие тата писатель мар Виталий Родионовпа Валентин Абрамова суйларӗҫ. «Хирӗҫсе пайламалли ҫук» тесе пӗлтерчӗ съезд. Анчах хӑйсемех хирӗҫӗве ҫивӗчлетрӗҫ. Шупашкарта виҫӗ союз пулни ҫитмерӗ, 2015 ҫулта тӑваттӑмӗшне йӗркелерӗҫ: ҪИП (ҫыравҫӑсен ирӗклӗ пӗрлешӗвне) турӗҫ.

Малалла...

Пӗрремӗш канал ӳкернӗ видео скринӗ

Ӗнер Пӗрремӗш каналпа эфира тухнӑ «Асамлӑ уй» кӑларӑма Куславккара пурӑнакан Любовь Малькова хутшӑннӑ. Вӑл пушӑ алӑпа кайман - хӑй ӑсталанӑ пуканесене парнеленӗ. Пӗри Якубович сӑнлӑ, тепри - чӑваш пики.

Любовь ача пахчинче ӗҫлет. Кӑларӑма каясси пирки вӑл каласа ҫӳремен, ку хыпара хӑй ӗҫлекен ача пахчинче кӑна пӗлнӗ.

Любовь Малькова пӗрремӗш турта ҫӗнтерсе финала тухнӑ. Унта та вӑл ҫӗнтернӗ. Ҫапла Любовь супервӑййа хутшӑнма килӗшнӗ. Анчах унта сӑмаха пӗлмен. Ҫапах Леонид Якубович вӑл суйланӑ пӗр парнене - юр тасатмалли хатӗре - асӑнмалӑх Чӑваш Енри хӗрарӑма пама йышӑннӑ.

2008-2010 ҫулсенче Ҫӗнӗ Шупашкар хулин пуҫлӑхӗ пулнӑ Михаил Козлов пурнӑҫран уйрӑлнӑ. Вӑл 76 ҫулта пулнӑ.

Михаил Васильевич 1948 ҫулта ҫуралнӑ. Ӗҫ биографине вӑл слесарь-монтажникрен пуҫланӑ. 1991 ҫулта ЖКХ тытӑмӗнче ӗҫлеме тытӑннӑ. Кун хыҫҫӑн тӗрлӗ ҫӗрте вӑй хунӑ.

2010 ҫулта Михаил Федоров «Пӗрлӗхлӗ Раҫҫей» партирен Кӑнтӑр суйлав округӗнчен Ҫӗнӗ Шупашкар хулин депутатсен пухӑвне суйланма тӑнӑ, анчах хӑйӗн кандидатурине хӑй тӑратнӑ ҫынна выляса янӑ. Тепӗр ҫултан Патшалӑх Канашне ЛДПРтан суйланма тӑнӑ, анчах выляса янӑ.

ШӖМ тунӑ сӑн

Паян 10 сехет ҫурӑра Шупашкарта Кӑнтӑр-хӗвеланаҫ бульварӗнчи 8-мӗш ҫурт ҫывӑхӗнче ҫӳп-ҫап турттаракан машина хӗрарӑма таптаса кайнӑ.

Малтанлӑха пӗлтернӗ тӑрӑх, ҫӳп-ҫап турттаракан машина каялла чакнӑ чухне хӗрарӑм ҫине пырса кӗнӗ. Вӑл ҫавӑнтах вилнӗ. Хайхискер кам пулнине тӳрех палӑртайман.

Ҫӳп-ҫап турттаракан машина рулӗ умӗнче 37 ҫулти арҫын пулнӑ.

novoorsk56.ru сайтри сӑн

Паян Чӑваш наци музейӗнчн Пысӑк этнографи диктантне ҫырнӑ. «Раҫҫейӗн тӗрленӗ картти» упранакан зала 30 ҫын пухӑннӑ. Ҫав йышра ЧР Элтеперӗ Олег Николаев та пулнӑ.

Акци кӑҫалхипе саккӑрмӗш хут иртнӗ. Унта хутшӑнакансен йышӗ ҫуллен ӳссе, географийӗ анлӑланса пырать.

Диктанта чӳк уйӑхӗн 8-мӗшӗччен онлайн майпа та ҫырма пулать. Тестра 30 ыйту. Вӗсенчен 10-шӗ республикӑпа ҫыхӑннисем. Диктанта ҫырма 45 минут уйӑрса параҫҫӗ.