Чукун ҫул

Алтай крайӗнче пурӑнакан хӗрарӑм хӑйӗн ҫуралнӑ кунӗ умӗн чукун ҫулӗ ҫинче ҫывӑрса кайса тӗлӗнмелле майпа ҫӑлӑнса юлнӑ, ун ҫийӗн 29 пуйӑс вакунӗ иртсе кайнӑ. Ҫапла РИА Новости агентствӑна РФ ШӖМӗн Алтайри линейлӑ управленийӗн пресс-службинче пӗлтернӗ.

«Хӗрарӑм чӑнах та чукун ҫул ҫинче ҫывӑрса кайнӑ. Халӗ эпир лару-тӑру мӗнле пулса иртнине палӑртатпӑр. Поезд 46 вакунран тӑни паллӑ ӗнтӗ, ун урлӑ 29-шӗ иртсе кайма ӗлкӗрнӗ», — палӑртнӑ пресс-службӑра.

Пресс-службӑра палӑртнӑ тӑрӑх, машинист ӑна курнӑ та васкавлӑн чарӑнма пикеннӗ, ҫавна пула пуйӑс хӗрарӑм ҫийӗн чарӑннӑ.

РИА Новостине регионти вӑй тытӑмӗнчи ҫӑлкуҫ пӗлтернӗ тӑрӑх, хӗрарӑм ӳсӗр пулнӑ, вӑл чукун ҫул ҫине канма выртнӑ. Ҫакна та палӑртмалла: тӗлӗнмелле пӑтӑрмах Алтай ҫыннин юбилейӗ умӗн пулса иртрӗ — тепӗр кунне вӑл 50 ҫул тултарнӑ.

Ҫӑлкуҫ: c-news

Кӑнтӑр Корейӑри ял хуҫалӑх продукцине валеҫекен савутра робот йӑнӑшпа ҫынна конвейер ленти ҫумне лапчӑтса хунӑ. Sky News хыпарланӑ тӑрӑх арҫын вилмеллех суранланнӑ.

Пӗр робототехника фирмӑн (ятне асӑнман) специалисчӗ валеҫекен центра ӑна тӗрӗслемелле тапратиччен робот датчикӗсен юсавлӑхне пӑхса илме ҫитнӗ. Роботӑн пахча ҫимӗҫ ещӗкӗсене поддонсем ҫине вырнаҫтармалла пулнӑ.

Пӑтӑрмах пулса иртнӗ Кенсан-Намдо провинцийӗн полицийӗ пӗлтернӗ тӑрӑх, робот техника специалистне ещӗк вырӑнне йышӑннӑ та «ирӗке тухма май памасӑр пичӗпе кӑкӑрне лапчӑтса» конвейер ленти ҫумне хӗстерсе хунӑ. Шар курнӑскере пӗр тӑхтамасӑр пульницӑна ӑсатнӑ. Ҫапах та арҫын пурнӑҫӗ сурансене пула татӑлнӑ.

Йӗрке хуралҫисем валеҫекен центрӗнче сотрудниксен хӑрушсӑрлӑхне мӗнле тивӗҫтернине хак парӗҫ. Пӑтӑрмахшӑн яваплӑ ӗҫченсем тӗлӗшпе хӑйсен ӗҫне тивӗҫлӗ шайра туманшӑн, тен, пуҫиле ӗҫ те уҫӗҫ. Савут хуҫи шутланакан компанире разработчиксене системӑна ҫынна суранлама пултарасран лайӑхлатма ыйтнӑ.

Рамзан Кадыров. Ҫӑлкуҫ: «Бизнес онлайн»

Чечня Республикин Пуҫлӑхӗ Рамзан Кадыров нумай пулмасть хӑш-пӗр тӳре-шарана ӗҫрен хӑтарассипе хӑратнӑ. Сӑмах ачисем вырӑсла кӑна пӗлекен чиновниксем пирки пырать.

«Чеченла калаҫман тата шухӑшламан ӑрӑвӑн пуласлӑх ҫук», — тенӗ Рамзан Кадыров. Ку сӑмаха вӑл «Нохчийн меттан говзанча» республикӑри конкурсӑн пӗтӗмлетӗвӗнче каланӑ.

«Чечен чӗлхине аталантарас тӗлӗшпе эпир пысӑк ӗҫсем туса ирттеретпӗр. Анчах чылай чухне ман командӑна кӗрекен ҫынсен ачисем чечен чӗлхине пӗлмеҫҫӗ. Унашкаллисене эп хамӑн командӑран кӑларма пуҫлӑп. Тӑван чӗлхене чи малтан ашшӗ-амӑшӗ вӗрентмелле. Ача пахчисемпе шкулсенче вырӑсла вӗрентеҫҫӗ, ашшӗ-амӑшӗ чылай чухне ҫакна ырлать. Ҫавна май ачасем вырӑсла та шухӑшлама тытӑнаҫҫӗ. Чеченла калаҫман тата шухӑшламан ӑрӑвӑн пуласлӑх ҫук», — палӑртнӑ Кадыров.

forum.na-svyazi.ru сайтри сӑн

Пӑрачкав муниципаллӑ округӗн прокурорне ҫирӗплетнӗ. Ку тивӗҫе Алексей Мочалова шаннӑ. Унччен вӑл Элӗк муниципаллӑ округӗн прокурорӗн ҫумӗ пулнӑ.

Алексей Валерьевич 1982 ҫулта Шупашкар районӗнче ҫуралнӑ. 2005 ҫулта И.Н.Ульянов ячӗллӗ ЧПУн юридици факультетне пӗтернӗ. Ҫавӑн чухнех вӑл прокуратура органӗсенче ӗҫлеме пуҫланӑ.

Сӑмах май, Пӑрачкав тӑрӑхӗнче унччен Сергей Парамонов прокурор пулнӑ. Кӑҫал ҫулла ӑна Вӑрнар муниципалитет округӗн прокурорне ҫирӗплетнӗ. Аса илтерер: нумаях пулмасть Шупашкарӑн ҫӗнӗ прокурорне ҫирӗплетни пирки пӗлтернӗччӗ.

cap.ru сайтри сӑн

ЧР Элтеперӗ Олег Николаев каллех тӳрӗ лини ирттересси пирки пӗлтернӗ. Хальхинче вӑл «Радио дорожных дорог» радио хумӗсем ҫинче иртӗ.

Тӳрӗ эфир кӑнтӑрла, 12 сехетре, пуҫланӗ. Ыйтусене маларах Патшалӑх пулӑшӑвӗсен порталӗ урлӑ ятарлӑ формӑна тултарса пама пулать. Ҫавӑн пекех «Контактра» халӑх тетелӗнчи постра комментарисем ҫырма май пур.

Тӳрӗ эфир вӑхӑтӗнче те шӑнкӑравласа ҫитме пулать: 8-800-222-10-02.

Ҫак кунсенче Кӳкеҫри «Бичурин тата хальхи самана» музейра хӑйсен чаплӑ ентешӗ ҫуралнине палӑртса хатӗрленӗ «Г.Ф. Трифонов» фотокурав ӗҫлет.

Чӑваш наци вулавӑшӗнче 2023 ҫулхи чӳк уйӑхӗн 10-мӗшӗнче чӑваш халӑхӗн шанчӑклӑ ывӑлӗ, геологӗ, философӗ, профессорӗ Геннадий Федорович Трифонов /1938-2020/ ҫуралнӑранпа 85 ҫул ҫитнине паллӑ турӗҫ. Унта философ пурнӑҫӗпе пултарулӑхӗ ҫинчен хӗрӗсемпе мӑнукӗсем, студентсем, ентешӗсемпе тӗпчевҫӗсем тухса калаҫрӗҫ, ятарласа кӑларнӑ кӗнекене хӑтларӗҫ.

Хаваслӑ каҫ 18 сехетре веҫленчӗ. Унта халӑх йышлӑ пулчӗ.

cap.ru сайтри сӑн

Чӳк уйӑхӗн 14-мӗшӗнче Ҫеҫпӗл Мишши ячӗллӗ Чӑваш патшалӑх ҫамрӑксен театрӗнче Иосиф Дмитриева /Трер/ халалланӑ регионсен хушшинчи «СеспельФЕСТ» фестиваль уҫӑлать.

Фестиваль кӑҫалхипе ҫиччӗмӗш хут иртет. Вӑл чӳк уйӑхӗн 17-мӗшӗччен пырӗ. Унта Мари Элти, Тутарстанри, Чӑваш Енри ҫамрӑксен театрӗсем хутшӗнӗҫ. Спектакльсем Шупашкарта Ҫамрӑксен театрӗнче тата Чӑваш патшалӑх пукане театрӗнче пулӗҫ.

Пӗрремӗш кунхине Мари ҫамрӑксен театрӗ «Обломов. Теперь или никогда» спектакльпе паллаштарӗ. Ӑна Иван Гончаровӑн романӗ тӑрӑх хатӗрленӗ.

chgtrk.ru сайтри сӑн

Мускври ВДНХра «Раҫҫей» курав-форум малалла ӗҫлет. Аса илтерер: унта Чӑваш Ен 6 метр ҫӳллӗш тухья экспозицийӗпе те паллаштарать.

ЧР Экономика министерствинче ӗҫлекенсем 20 ытла регион элчисене «Раҫҫейӗн тӗрленӗ картти» открыткӑсене парнеленӗ. Открыткӑсене кашни субъект валли уйрӑм хатӗрленӗ. Вӗсене ятарласа курав валли пичетлесе кӑларнӑ.

Палӑртмалла: курав-форума малтанхи кунсенче ҫур миллион ытла ҫын килсе курнӑ.

siktivkar.bezformata.com сайтри сӑн

Улатӑрта Киров урамӗнчи 38-мӗш ҫуртра пушар пулнӑ. Унти икӗ пӳлӗмлӗ хваттер ӗнер ирхи 7 сехетре ҫунма пуҫланӑ.

Ҫулӑм шалти отделкӑна, пӗтӗмпе 2 тӑваткал метра, сиенлетнӗ. Юрать-ха. никам та вилмен. 64 ҫулти кил хуҫи хӗрарӑмӗ пушарта алли-урине пӗҫертнӗ.

Малтанлӑха пӗлтернӗ тӑрӑх, ҫулӑм ҫунакан лампадӑран тухма пултарнӑ. Ӑна кил хуҫи хӗрарӑмӗ пӑхмасӑр хӑварнӑ.

Патшалӑх Думин сайтӗнчи сӑн

Шупашкарти пӗр сквера Раҫҫейри паллӑ политик Владимир Жириновский ячӗпе хисеплеме сӗнни пирки унччен сайтра хыпарланӑччӗ. Шупашкар хула администрацийӗнче ку ыйтӑва пӑхса тухнӑ.

Комиссири 6 ҫын сквера Жириновский ятне парассине ырланӑ. Пӗр ҫын хирӗҫ пулнӑ. Ҫапла ку ыйтӑва тивӗҫтернӗ. Шупашкарти хӑш сквера Жириновский ятне парассине каярах пӑхса тухӗҫ.

Аса илтерер: хулари пӗр сквера Владимир Жириновский ячӗпе пама ЛДПР парти пайташӗ Эдуард Петров кӑҫал ҫӗртме уйӑхӗнче сӗннӗ.