rusnewshub.ru сайтри сӑн

Юпа уйӑхӗн 2-мӗшӗнче 9 сехет ҫурӑра Шупашкарти аэропорт ҫывӑхӗнче хӗр парашютпа аннӑ чухне самолет вӗҫмелли ҫул ҫине вӗҫсе аннӑ. Вӑл вӑйлӑ ҫиле пула парашюта итлеттереймен-мӗн.

Ҫав вӑхӑтра рейс самолечӗ тӳпенелле вӗҫсе хӑпарма хатӗрленнӗ. Юрать-ха, авиаци хӑрушсӑрлӑхӗн ҫыннисем хӗре вӑхӑтра пулӑшма ӗлкӗрнӗ, ӑна ҫул ҫинчен илсе кайнӑ. Унсӑрӑн вӑл хӑй парашют тыткӑнӗнчен хӑтӑлаймӗччӗ.

Ку пӑтӑрмаха пула рейспа вӗҫекен самолет темиҫе минут каярах ҫула тухнӑ.

cap.ru сӑнӳкерчӗкӗ

Шупашкар районӗнчи Ҫӗньял ялӗнче пурӑнакан Зинаида Гранцкая Ватӑсен кунӗнче, юпан 1-мӗшӗнче, 100 ҫул тултарнӑ. Ҫулне кура мар вӑр-вар вӑл - хӑнасене юрласа-ташласа кӗтсе илнӗ.

Хӑй ҫак районтах Чулкаҫ ялӗнче ҫуралса ӳснӗ, ӗмӗр тӑршшӗпе педагогикӑра ӗҫленӗ - малтан кӗҫӗн классене вӗрентнӗ, унтан - нимӗҫ чӗлхине.

Халӗ пӗр ӗмӗре парӑнтарнӑ кинемей ачисемпе, мӑнукӗсемпе, вӗсен ачисемпе савӑнса пурӑнать.

Инкеклӗ лару-тӑру министерстви туна сӑн

Шӑматкун ҫӗрле Шупашкар районӗнчи Тӑрӑн ялӗнче ҫӑва ҫинчи хурал пӳрчӗ ҫунма пуҫланӑ. Инкеклӗ лару-тӑру министерстви пӗлтернӗ тӑрӑх, ҫулӑм пӳрт тӑррине тата хушма ҫурта сиен кӳнӗ.

Кӗҫӗр вара ҫак ялтах пӳрт ҫуннӑ. Вырӑнти ҫынсем каланӑ тӑрӑх, пушар пралука пула тухма пултарнӑ. Ҫурта радиаторпа хутса ӑшӑтнӑ-мӗн. Ҫавна пула тухма пултарнӑ та ҫулӑм.

Ҫавӑн пекех канмалли кунсенче Шупашкарта, Канаш тата Шупашкар районӗсенче типӗ курӑк ҫуннӑ тӗслӗхсем пулнӑ.

Паян республика урлӑ сивӗ фрончӗ иртет. Ирхине вырӑнӑн-вырӑнӑн ҫумӑр ҫунӑ. Каҫхине тата ҫӗрле татах ҫӑвӗ.

Эрне варринче антициклон хуҫаланӗ. Сывлӑш кӑнтӑрла 15-20 градус таран ӑшӑнӗ. Юнкун чи ӑшши пулӗ. Анчах ҫил вӑйланӗ.

Сивӗ фрончӗ эрнекун татах килӗ. Шӑматкун 10-12 градус кӑна ӑшӑ пулӗ. Вырсарникун ҫумӑр вӑйлах ҫӑвӗ. Йӗпе юр ҫума пултарӗ. Ҫитменнине, ҫил вӑйланӗ.

Юпан 9-мӗшӗнче, тунтикун, ҫӗрле термометр «минус» кӑтартӗ, ҫулсем пӑрлак пулас хӑрушлӑх пур. Кӑнтӑрла 2-7 градус кӑна ӑшӑ пулӗ.

gkchs.cap.ru сайтри сӑн

Юпа уйӑхӗн 4-мӗшӗнче пӗтӗм республикипех сирена янӑрӗ. Хӑрама кирлӗ мар- - автоматизациленӗ тытӑма тӗрӗслени ҫеҫ.

Ҫав кун сиренӑсем 10 сехет те 40 минутра тата 11 сехетре янӑрӗҫ. Ҫавна май ҫынсене лӑпкӑ пулма ыйтаҫҫӗ.

Ытти чухне сирена кӑшкӑрнине илтсен ҫынсен радио, телевизор ҫутмалла та мӗн каланине итлемелле. Кайран унта мӗн каланине пурнӑҫламалла. Хыпара ыттисене те пӗлтермелле.

cap.ru сайтри сӑн

«На связи» портал нумаях пулмасть ЧР транспорт министрӗн Владимир Осиповӑн килӗнче тата ӗҫӗнче, ЧР Танспорт тата Финанс министерствинче ухтару пулни пирки пӗлтернӗччӗ.

Паян акӑ транспорт министрӗ отставкӑна кайни пирки хыпарланӑ. Хӑйӗн ирӗкӗпе ӗҫрен кайма ыйтса ҫырнӑ заявление ЧР Элтеперӗ Олег Николаев алӑ пуснӑ. Олег Алексеевич хӑйӗн телеграм-каналӗнче Владимир Осипова юлашки виҫӗ ҫулта тунӑ ӗҫсемшӗн тав туса ҫырнӑ.

«Чеб-ру» портал пӗлтернӗ тӑрӑх, «Хӑрушсӑр тата пахалӑхлӑ ҫулсем» наци проекчӗпе килӗшӳллӗн уйӑрнӑ укҫа-тенке вӑрланӑ тӗлӗшпе пуҫиле ӗҫ пуҫарнӑ.

cheb-centr.soc.cap.ru сӑнӳкерчӗкӗ

Ӗнер, юпа уйӑхӗн 1-мӗшӗнче, Чӑваш Енӗн Наци вулавӑшӗнче ватӑ ҫынсем Финанс чемпионатне пухӑннӑ. Ун пек ӑмӑртӑва кӑҫал иккӗмӗш хут йӗркеленӗ. Финанс пӗлӗвне пӗлнине тест ыйтӑвӗсене хуравласа кӑтартса пама тивнӗ.

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центра ҫӳрекенсенчен унта тӑватӑ ватӑ хутшӑннӑ. Ҫавсенчен пӗри, Надежда Быченкова, финанс ӑмӑртӑвӗнче пӗлтӗр те пулнӑ. Тава тивӗҫлӗ канури хӗрарӑм кӑҫал пӗрремӗш вырӑна тухнӑ. Юпа уйӑхӗн 16-мӗшӗнче вӑл Финанс чемпионачӗн федераци тапхӑрне хутшӑнӗ.

stylishbag.ru сайтри сӑн

Айӑплава пурнӑҫлакан федераци службин Чӑваш Енри управленийӗ 24 тонна маринадланӑ хӑяр туяннӑ. Ҫавна май ятарласа аукцион иртнӗ.

Чи малтанах ведомство 1 млн та 528 пин те 80 тенкӗ сӗннӗ. Мускаври «Платон» организаци 24 тонна хӑяра 1 млн та 107 пин те 438,4 тенкӗпе кӳрсе пама килӗшнӗ.

Хӑяр - 3 литрлӑ банкӑсенче, вӗсене тимӗр виткӗчпе питӗрнӗ, упрамалли срокӗ 15 уйӑхран кая мар. Организацин тавара Шупашкарти Лапсар тӑкӑрлӑкӗнчи 17-мӗш ҫурта илсе килмелле.

Паян тӑвансем патӗнчен таврӑннӑ май Шупашкартан Ҫӗнӗ Лапсара М7 урлӑ каҫакан ҫул ҫинче авари асӑрхарӑм. Пысӑк тиев машини тӑрать, темиҫе васкавлӑ пулӑшу машинисем, ГИБДД транспорчӗ хӑйӗн ҫуттисемпе мӗлтлетсе тӑрать... Каярах «Руль умӗнче» автофорума пӑхрӑм та — иккен, ку тиев машини васкавлӑ пулӑшӑва ирттерсе яман. Темиҫе видео та пур.

Видеосене пӑхсан ҫакӑ паллӑ: тиев машини пысӑк хӑвӑртлӑхпа светофорӑн симӗс ҫути ҫине васканӑ. Ҫав вӑхӑтра васкавлӑ пулӑшу машини Ҫӗнӗ Лапсар поселокне каҫса ӳкес тенӗ. Уншӑн хӗрли ҫутӑлнӑ пулнӑ ӗнтӗ, анчах вӑл, мӗлтлетмӗшне ҫутса, сасӑ кӑларса каҫса каясах тенӗ пулас. Икӗ машина пӗр-пӗрне тӗл пулнӑ, васкавлӑ пулӑшу машининче виҫҫӗн аманнӑ.

Чӑн та, ку ҫул тӑваткалӗ ытла та инкеклӗскер. Пӗрре ман куҫ умӗнчех кунашкал евӗр пӑтӑрмах сиксе тухнӑччӗ. Ун чухне те пулӑмсем йӑлт ҫакӑн пекччӗ. Росгварди машини, светофор ҫинче кӗтсе тӑрас мар тесе (вӗсен ӑҫта васкас-ха тата?) мӗлтлетмӗшпе тата сасӑ кӑларса Ҫӗнӗ Лапсара каҫас терӗ.

Малалла...

Следстви комитечӗ тунӑ сӑн

Авӑнӑн 27-мӗшӗнче Улатӑр районӗнчи Кире поселокӗнче 63 ҫулти арҫынна вӗлернӗ. 54-ри арҫынна тытса чарнӑ.

Следстви версийӗ тӑрӑх, лешӗ ун патӗнче хӑнара пулнӑ. Вӗсем вӑрҫӑнса кайнӑ. Кил хуҫи хӑнана ҫурӑмӗнчен ҫӗҫӗпе чикнӗ. Лешӗ ҫав вырӑнта темиҫе сехетрен вилнӗ.

54 ҫулти арҫын тӗлӗшпе пуҫиле ӗҫ пуҫарнӑ. Следователь ыйтнипе ӑна следстви вӑхӑтӗнче хупса усрама йышӑннӑ.