Шупашкарти Ф. Павлов ячӗллӗ музыка училищин сӑнӳкерчӗкӗ

Ака уйӑхӗн 1-мӗшӗнче, 18 сехет те 30 минутра, Шупашкарти Ф. Павлов ячӗллӗ музыка училищинче Тиля Хазанзун концертмейстер ҫуралнӑранпа 110 ҫул ҫитнине халалласа концерт лартса парӗҫ. Унӑн ячӗ Чӑваш Енӗн профессилле музыка ӳнерӗнче ылтӑн саспаллипе ҫырӑнса юлӗ.

Тиля Хазанзун — Чӑваш патшалӑх оперӑпа балет театрӗн пӗрремӗш концертмейстерӗ тата Шупашкарти музыка училищин педагогӗ пулнӑ. Училищӗре вӑл концертмейстер класӗн тата камера ансамблӗн уйрӑмне йӗркелесе янӑ.

Ятлӑ-сумлӑ чӑваш композиторсем ӑна пӗрремӗш номерлӗ концертмейстер теме юатнӑ. Раҫҫейӗн Чӑваш радион фончӗсем валли хайлавсем ҫырса илнӗ чухне концертмейстер пулма яланах Тиля Хазанзуна шаннӑ.

«Музыкальное приношение» программӑна музыка училищин студенчӗсемпе преподавателӗсем хутшӑнӗҫ. Концертмейстерӑн тӑванӗсене те йыхравланӑ.

pravsarov.ru сайтри сӑн

Ҫитес вӑхӑтра Чӑваш Ене Калмӑк Республикинчи тӗн еткерлӗхне илсе килӗҫ. Пуш уйӑхӗн 24-мӗшӗнче пирӗн пата Элистан епархийӗн ҫветтуйӗсем ҫитӗҫ.

Вӗсем - Риза Господня пайне упракан хӗрес-мощевик тата Матрона Московскаян ковчегӗ. Вӗсене Шупашкарти Введени кафедра соборӗнче кӗтсе илӗҫ. Унта кӗлле Савватий митрополит ертсе пырӗ.

Ҫветтуйсем соборта пушӑн 31-мӗшӗччен пулӗҫ. Кайран вӗсене республикӑри чиркӳсене илсе кайӗҫ. Ҫветтуйсем Чӑваш Енре ака уйӑхӗн 28-мӗшӗччен пулӗҫ.

Прокуратура архивӗнчи сӑн

Шупашкарта пурӑнакан 33 ҫулти арҫын пӗлтӗр кӑрлач-авӑн уйӑхӗсенче 6 ҫулти ывӑлне пӗрре мар хӗненӗ. Вӑл арӑмӗ пулнӑ хӗрарӑм тата ывӑлӗ пурӑнакан хваттере килсе ҫӳренӗ, хирӗҫнӗ. Ача вара амӑшне хӳтӗленӗ. Куншӑн ашшӗ ӑна хӗненӗ, тумтир упрамалли ещӗке питӗрсе хунӑ.

Куншӑн арҫынна явап тыттарнӑ. Судра вӑл айӑпне йышӑннӑ, ӳкӗннӗ. Ҫапла мӗншӗн хӑтланнине те ӑнлантарнӑ: ӳсӗр пулнипе.

Суд ӑна тӗрмене хупмасӑр 4 ҫуллӑха айӑпланӑ. Тӗрӗслев срокӗ – 3 ҫул.

cap.ru сӑнӳкерчӗкӗ

Канаш округӗнчи Юмансар ялӗнче пурӑнакан Анна Никитина паян 100 ҫулхи юбилейне паллӑ тунӑ. Ӑна сумлӑ уявпа саламлама вырӑнти артистсем те килнӗ.

Анна Никитична нумай ачаллӑ ҫемьере ҫуралнӑ. Шкул пӗтерсен колхозра ӗҫлеме тытӑннӑ, шкулта техслужащире чылай вӑхӑт тӑрӑшнӑ.

Христофор Максимовичпа ҫемье ҫавӑрсан вӗсем 8 ача ҫуратса ӳстернӗ. Хальхи вӑхӑтра Анна Никитична ывӑлӗн ҫемйипе пурӑнать. Унӑх халӗ 17 мӑнук, 12 кӗҫӗн мӑнук пур.

cap.ru сӑнӳкерчӗкӗ

Кӑҫал Чӑваш кӗнеке издательствинче «Чувашское народное творчество» ярӑмпа «Ыр-усал халапӗсем. Былички» икӗ чӗлхеллӗ кӗнеке пичетленсе тухнӑ. Ӑна филологи наукисен кандидачӗсем Галина Ильина тата Елена Федотова хатӗрленӗ. Халапсене истори наукисен кандидачӗ Алексей Леонтьев хатӗрленӗ.

Кӑларӑма Чӑваш патшалӑх гуманитари ӑслӑлӑхӗсен институчӗн ученӑйсен канашӗ пуҫарнипе пичетленӗ.

«Ыр-усал халапӗсем. Былички» кӗнекене 461 текст кӗнӗ, ҫав шутра 286 алҫыру пуҫласа кун ҫути курнӑ. Текстсенчен чылайӑшӗ маларах асӑннӑ институтӑн Ӑслӑлӑх архивӗнче, Чӑваш Республикин патшалӑх архивӗнче, Чӗмпӗр облаҫӗнчи патшалӑх архивӗнче упранать.

chrio.rchuv.ru сӑнӳкерчӗкӗ

Чӑваш чӗлхине литературине вӗрентекенсем Чӑваш Республикин вӗренӳ инстиутутӗнче пӗлӗве ӳстернӗ.

Ятарлӑ курса уҫнӑ май чӑваш чӗлхипе литература кафедрин доценчӗ Анна Егорова урокра тата класс тулашӗнче вулав культурине йӗркелемелли мелсемпе меслетсем ҫинче чарӑнса тӑн, предметӑн концепт никӗсӗн уйрӑмлӑхӗсене тишкернӗ.

Институтра пӗлтернӗ тӑӑх, Надежда Иванова тӗрлӗ урока проектламалли ӗҫ майӗсемпе паллаштарнӑ, урок тӗсӗсен тытӑмӗпе содержанийӗ улшӑнни ҫинчен каласа панӑ, вӗренӳ предмечӗн нормативлӑ докуменчӗсемпе усӑ курса урок тӗллевӗпе предмет результатне шайлаштармалли ҫул-йӗре уҫӑмлатнӑ.

Курса хутшӑннисем ҫӗннине тата нумай пӗлнӗ.

chrio.rchuv.ru сӑнӳкерчӗкӗ

Пуш уйӑхӗн 30-мӗшӗнче Чӑваш Республикин Вӗренӳ институтӗнче Чӑваш ҫамрӑкӗсен 2-мӗш форумӗ иртӗ. Вӑл 10 сехетре пуҫланӗ.

Институтра пӗлтернӗ тӑрӑх, «форум тӗллевӗ — чӑвашла калаҫмалли хутлӑх йӗркелесси, тӗрлӗ сферӑра ӗҫлекен ҫамрӑксемпе паллаштарасси, кӑсӑклӑ проектсем ҫинчен пӗлтересси».

Форума йӗркелекенӗсем – чӑвашсен «Хавал» пуҫару ушкӑнӗ тата «Ҫамрӑксен хаҫачӗ».

Чӑваш ҫамрӑкӗсен 2-мӗш форумне шкул ачисене, студентсене тата ытти ҫамрӑка йыхравлаҫҫӗ.

Форума хутшӑнас тесен https://goo.su/C3qJfb3 каҫӑпа кӗрсе регистрациленмелле.

Чӑваш ҫамрӑкӗсен 1-мӗш форумӗ 2019 ҫулхи нарӑс уйӑхӗнче И.Я. Яковлев ячӗллӗ Чӑваш патшалӑх педагогика университетӗнче иртнӗ.

cap.ru порталтан илнӗ скриншот

Чӑваш Енӗн транспрт тата ҫул-йӗр хуҫалӑхӗн министрӗн ҫумӗ пулма Роман Краснова шаннӑ. Ун пек хушӑва республика ертӳҫи Олег Николаев иртнӗ эрнере алӑ пуснӑ.

Унччен Краснов асӑннӑ ведомствӑра автоҫулсене аталантарассипе ӗҫлекен пай пуҫлӑхӗнче тӑрӑшнӑ.

Транспорт министрӗн Максим Петровӑн паян икӗ заместитель: Роман Краснов тата Юрий Арлашкин.

cap.ru сайтри сӑн

Ака уйӑхӗн 13-мӗшӗнчен Шупашкарта ял хуҫалӑх ярмӑрккисем ӗҫлеме пуҫлӗҫ. Вӑл яланхи пекех виҫӗ лапамра иртӗ: «Шупашкар» суту-илӳ ҫурчӗ умӗнче, «Николаевски» суту-илӳ комплексӗнче, Эльгер урамӗнчи фермерсен суту-илӳ речӗсенче.

Ярмӑрккӑра республикӑри производительсем тата Чӑвашпотребсоюз организацийӗсем ял хуҫалӑх продукцине сутӗҫ. Пахча ҫимӗҫ, пулӑ, аш-какай, сӗт юр-варӗ, вӑрлӑх… - темӗн те туянма май пулӗ унта. Суту-илӳ вырӑнне йышӑннӑшӑн укҫа тӳлемелле мар. Ҫавна май продукци йӳнӗрех пулӗ.

Хурлӑхлӑ хыпар: Борис Филатов фотограф вилнӗ. Вӑл 59 ҫулта пулнӑ.

Борис Евгеньевич 1965 ҫулта Йошкар-Олара ҫуралнӑ, «Марийская правда» тата «Советская Россия» хаҫатсенче фотокорреспондентра ӗҫленӗ. 2000 ҫулта Шупашкара куҫса килнӗ. Борис Филатов ЧР Элтеперӗ пулнӑ Михаил Игнатьевӑн фотографӗ пулнӑ.

Борис Евгеньевичпа ӑҫта тата хӑҫан сывпуллашассине хальлӗхе пӗлтермен.