Надина Джавадован "Контактра" страницинчен илнӗ сӑнӳкерчӗк

«Стамбул ҫинчен юратнӑ юрӑсем» ятпа ӗнер, ҫу уйӑхӗн 10-мӗшӗнче, Турцири Стамбул хулинче концерт иртнӗ.

«Вӑл пӗр самант пек иртсе кайрӗ, ырӑ аса илӳ хӑварчӗ», – тесе ҫырнӑ Стамбулта пурӑнакан чӑваш хӗрӗ Надина Джавадова халӑх тетелӗнчи хӑйӗн страницинче.

Чӑваш Енри Елчӗк районӗнче ҫуралса ӳснӗ, тахҫанах Турцинче тӗпленнӗ ентешӗмӗр пӗлтернӗ тӑрӑх, концерт вӑхӑтӗнче икӗ хор бенефисӗ иртнӗ. Стамбул хулин мэрийӗ ҫумӗнчи Турцири классика музыкин хорӗ Германири Ахен хулинчи хорпа пӗр сцена ҫине тухнӑ.

Турцинчи хор ҫывӑх вӑхӑтра Германие кайӗ.

"Контактри" сӑн

Чӑваш Енри ал ӗҫ ӑсти Светлана Куманейкина Мускавра иртекен «Раҫҫей» курав-форумра чӑннипех те тӗлӗнтернӗ. Вӑл - Улатӑр муниципаллӑ округӗнчи Анютино ялӗнчен.

Светлана курава килекенсем валли хӑйне евӗр стенд хатӗрленӗ. Унта пусмаран, мамӑкран хатӗрленӗ пуканесем, яппун вӗтӗ шӑрҫинчен хатӗрленӗ колье вырӑн тупнӑ.

Светлана Куманейкина куравра ал ӗҫ енӗпе ӑсталӑх класӗсем те ирттерет. Унта хӗрарӑмсем кӑна мар, арҫынсем те, ачасем те хаваспах хутшӑнаҫҫӗ.

Ҫу уйӑхӗн пуҫламӑшӗ нормӑран 7 градус сивӗрех пулнине палӑртнӑ. Кун пекки юлашки хутчен 1999 ҫулта пулнӑ.

Хӑҫан ӑшӑтать? Синоптиксем мӗн калаҫҫӗ? Телее, чи сивӗ кунсем иртсе кайнӑ, малалла ӑшӑтма тытӑнӗ.

Иккӗмӗш декада нормӑран 3 градус кӑна сивӗрех пулӗ. Ҫитес кунсенче нӳрӗк нумайланса пырӗ кӑна. Ыран ҫумӑр ҫӑвӗ. Шӑматкун ҫӗрле йӗпе юр ҫума пултарать. Кайран каллех шӑнтӗ. Вырсарникун юр, ҫумӑр ҫумӗ. Ҫӗрле вара шӑнтма пултарӗ.

Юнкун ҫумӑр ҫӑвӗ, эрнекунччен ҫуса тӑрӗ. Ситес эрнере канмалли кунсенче 15 градус таран ӑшӑтӗ.

pravlife.org сайтри сӑн

Шупашкар муниципаллӑ округӗнче прокуратура муниципалитет пурлӑхӗпе мӗнле усӑ курнине тӗрӗсленӗ.

Ҫакӑ палӑрнӑ: пӗр территори уйрӑмӗн пуҫлӑхӗ служба машинипе хӑйӗн тӗллевӗсемпе усӑ курнӑ. Вӑл кӑҫал нарӑс тата пуш уйӑхӗсенче канмалли тата уяв кунӗсенче хӑйӗн ӗҫӗсемпе ярӑнса ҫӳренӗ, округ тулашне те тухнӑ.

Прокуратура пуҫлӑх тӗлӗшпе административлӑ ӗҫ пуҫарнӑ. Материалсене миравай суда пӑхса тухма янӑ. Суд йышӑнӑвӗпе килӗшӳллӗн, должноҫри ҫыннӑн штраф тӳлемелле.

"Чӑваш Ен" ПТРК видеовӗнчен илнӗ сӑнӳкерчӗк

Чӑваш Ен наци вулавӑшӗ пуҫарнипе регионсем хушшинче «Чӗре йыхравӗ» поэзи фестивалӗ иртнӗ. Ӑна Ҫеҫпӗл Мишши сӑвӑҫ ҫуралнӑранпа 125 ҫул ҫитнине халалланӑ.

Тӗрлӗ халӑх ҫыравҫисем Ҫеҫпӗл ялӗнчи Асӑну комплексӗнче пулса курнӑ, Шӑхасанта вулакансемпе курнӑҫнӑ.

Марина Карягина тележурналист пӗлтернӗ тӑрӑх, Мускавран, Хусантан, Ӗпхӳрен, Саранскран килнӗ хӑнасем Ҫеҫпӗл Мишши сӑввисене чӑвашла, вырӑсла, тутарла, пушкӑртла, ирҫелле янӑратнӑ.

Чӑваш Ен ПТРК видеовӗнчен илнӗ сӑнӳкерчӗк

Элӗк тӑрӑхӗнчи Татмӑш ялӗнче пурӑнакан Владислав Дубинин тӑванӗсене вунӑ сыпӑк таран тӗпченӗ. «Ҫак сӑваплӑ ӗҫе пуҫӑниччен вӑл тӑван ялӗн историне тишкернӗ», – пӗлтернӗ «Чӑваш Ен» патшалӑх телерадиокомпанийӗ.

2014-мӗш ҫулта ҫут тӗнчерен уйрӑлса кайнӑ ҫав тӑрӑхри паллӑ таврапӗлӳҫӗ Александр Ананьев хӑй вӑхӑтӗнче кӗнеке кӑларма ӗмӗтленнӗ. Ял ҫинчен чылай материал тупнӑ, вун-вун статья ҫырнӑ. Унӑн аслӑ хӗрӗ Татьяна Евдокимова ашшӗ ӗҫне Владислав Дубининпа малалла тӑснӑ.

Владислав хӑйӗн несӗлӗсемпе те кӑсӑкланма тытӑннӑ. Вӗсен ҫемйине Чукмар тесе чӗннӗ-мӗн.

«Чукмар ратнинчен тухнӑскерем Китайра ҫеҫ мар, Норвеги, Америка ҫӗршывӗсенче те пурӑнаҫҫӗ.  Ҫапла майпа "Чукмары из Татмыш" кӗнеке кун ҫути курнӑ – тӑванӗсене 10 сыпӑк таранах тӗпченӗ унта автор. Дубининсем, Дубиковсем, Дубинскисем, Дубровскисем тата Константиновсем – пурте Чукмарсем иккен», — хыпарланӑ Вероника Павловӑпа Димитрий Макаров хатӗрленӗ сюжетра.

Чӑваш халӑх юмахӗсенче мана кӑсӑклӑ сюжет мар, вӗрентсе калани килӗшет. Чӑваш халӑхӗн ӑсӗ вӗсенче пит вырнаҫуллӑ вырнаҫнӑ. Пӗрре эс кӑсӑклӑ сюжетпа каҫӑхса кайса паллашатӑн, тепре — унта хывса хӑварнӑ ӑса ӑша хыватӑн.

Ҫавна май 1982 ҫулта тухнӑ «Чӑваш юмахӗсем» кӗнеке, Г. Ф. Юмарт пухса хатӗрленӗскер, симӗс хуплашкаллӑскер, маншӑн пурнӑҫа вӗрентекен кӗнекесенчен пӗри шутланать. Ытти юмах пуххисем аван пулӗ те, анчах шӑп ҫак кӑларӑмра ман шутпа пурнӑҫа вӗрентекен юмахсем чылай кӗнӗ. Ачалӑхра вӑл ман пурччӗ, анчах упранса юлаймарӗ. Кайран вара тепӗр экземпляра эп хамӑн юлташран ыйтса тупнӑччӗ. Чӑрмаланса пӗтнӗскер пулин те ман кӗнеке ҫӳлӗкӗнче вӑл чи пӗлтерӗшлӗ вырӑн йышӑнать.

Пурнӑҫа вӗрентни вара унта пит нумай. Калӑпӑр, «Тилӗ тус» юмах хыҫҫӑн эп ҫӗнӗ япала туянсан кивӗ япалана тӳрех кӑларса пӑрахмастӑп. Ҫӗнни чӑн та йӗркеллӗ пулнине тӗрӗслесе ӗненсен кӑна киввинчен хӑтӑлатӑп (вӗсене пухса пыни те йӗркеллӗ мар-ҫке). «Лаша шырани» юмах евӗрли хампа та пӗрре пулса иртнӗччӗ — пӗррехинче каҫса кайсах алӑри телефона шырарӑм (кунта пурнӑҫа вӗрентни ҫук ӗнтӗ, анчах юмах сюжетне чӑн пурнӑҫран илни куҫ кӗрет)…

Ку умсӑмах пулчӗ.

Малалла...

"Чӑваш Ен" ПТРК тунӑ видео скринӗ

Ака уйӑхӗнче Мускаври «Центр» шырав отрячӗн хастарӗсем Ржев хули ҫывӑхӗнче каска тата медальонри документсен пӗр пайне тупнӑ. Вӗсем тӑрӑх салтакӑн ятне-шывне палӑртнӑ. Вӑл - Вӑрнар районӗнчи Эпшик ялӗнче ҫуралнӑ Михаил Игнатьевӑн. 1942 ҫулта 19-ти Михаил фронта кайнӑ, тӳрех «Ржев мясорубкине» лекнӗ, унта пуҫ хунӑ.

Чӑваш Енри «Веда» отряд шыравҫисем салтак виллин юлашкине республикӑна илсе ҫитерме пулӑшнӑ. Ҫу уйӑхӗн 5-мӗшӗнче паттӑр салтака тӑван ялӗнче чыслӑн пытарнӑ. Палӑртмалла: Эпшик ялӗнчен 77 ҫын Тӑван ҫӗршывӑн вӑрҫине тухса кайнӑ. Вӗсенчен 38-шӗ каялла таврӑнман.

Халӗ чӑваш шыравҫисем Волгоград облаҫӗнче ӗҫлеҫҫӗ. Вӗсем 5 салтак юлашкине тупнӑ. Хальлӗхе вӗсен ятне-шывне палӑртайман-ха.

cap.ru сӑнӳкерчӗкӗ

Йӗпреҫ округӗнчи Алшик ялӗнче пурӑнакан ветерана Василий Иванова киле пырса Ҫӗнтерӳ кунӗпе саламланӑ, концерт лартса панӑ. Урамра лайӑхах мар ҫанталӑк хуҫаланнӑ пулсан та концерт ветеранӑн кӑмӑлне ҫӗкленӗ.

Вӑрҫӑ пуҫланнӑ чухне Василий Иванов 15 ҫулта кӑна пулнӑ. Фронта вӑл 17-ре кайнӑ, Инҫет Хӗвелтухӑҫ фронтӗнче пулнӑ. 1945 ҫулта Ҫӗнтерӳ кунне питӗ лайӑх астӑвать. Пилоткӑсем ҫӳлелле вӗҫнӗ, «Ура!» кӑшкӑрнӑ. Ҫавӑнтан пӗлнӗ вӑл вӑрҫӑ пӗтнине.

Василий Иванович халӗ 98 ҫулта. Вӑрҫӑ ҫулӗсене вӑл куҫҫуль витӗр аса илет.

Концерт кадетсем марш утнипе, вӑрҫӑ юррисем янӑранипе вӗҫленнӗ.

chuvdram.ru сайтран илнӗ сӑнӳкерчӗк

Калмӑк Республикин тӗп хулинчи, Элистӑри, Б. Басангов ячӗллӗ наци драма театрӗ ҫу уйӑхӗн 23-мӗшӗнче Чӑваш академи драма театрӗн сцени ҫине тухӗ. Гастрольпе килекен артистсем чӑваш сцени ҫине вырӑс классикӗн Александр Грибоедовӑн «Горе от ума» пьесине кӑтартӗҫ.

Писатель асӑннӑ хайлава 200 ҫул каялла, 1824 ҫулта, ҫырнӑ. Спектакле Раҫҫей, Калмӑк тата Тыва республикисен искусствӑсен тава тивӗҫлӗ ӗҫченӗ Борис Манджиев лартнӑ. Вӑл шухӑшланӑ тӑрӑх, пьеса паян та актуаллӑ.

Артистсем Шупашкара ҫу уйӑхӗн 23-мӗшӗнче килӗҫ.