cap.ru сайтри сӑн

Ҫӗнӗ ҫул хыҫҫӑнхи каникулта, кӑрлачӑн 1-8-мӗшӗсенче, республикӑра 158 ача ҫуралнӑ: 75 арҫын ача тата 83 хӗрача. Вӗсен йышӗнче – икӗ йӗкӗреш.

Ҫӗнӗ 2024 ҫулта ҫуралнӑ чи пӗрремӗш ача кӑрлачӑн 1-мӗшӗнче ҫур ҫӗр иртни 2 сехет те 40 минутра кун ҫути курнӑ. Хӗрача 3720 грамм тайнӑ, 52 сантиметр тӑршшӗ пулнӑ. Ача – ҫемьери виҫҫӗмӗш пепке.

Шупашкар хулинче пурӑнакан 14 ҫулти ача карас телефонӗ туянас тенӗ. Ӑна Ҫӗнӗ ҫулта ҫывӑх ҫыннисем укҫа парнеленӗ. Ача ҫав укҫапа ҫӗнӗ йышши телефонлӑ пулма ӗмӗтленнӗ.

Смартфон сутасси ҫинчен калакан пӗлтерӗве каччӑ паллӑ мессенджерсенчен пӗринче асӑрханӑ. Ун пек телефон 100 пин тенкӗ ытла тӑрать. Пӗлтерӳре телефона 10 пинрен те йӳнӗрехпе туянма май пуррине пӗлтернӗ.

Ача Ҫӗнӗ ҫулта хӑйне парнеленӗ укҫана, 11 пин тенке, куҫарса панӑ. Анах унтан татах укҫа ыйтнӑ. Каччӑ хӑйне улталанине ӑнланса илнӗ хыҫҫӑн пакунлисенчен пулӑшу ыйтнӑ.

forum.na-svyazi.ru сӑнӳкерчӗкӗ

Ӗнер Шупашкарти «Университет-2» микрорайон пӗр вӑхӑтлӑха ҫутӑсӑр тӑрса юлнӑ. Ҫутта унти ҫуртсенче 17 сехет те 40 минутра сӳнтернӗ. Малтанласа пӗлтернӗ тӑрӑх, Лукин тата Миначев урамӗсенчи нумай хваттерлӗ 12-14 ҫурт ҫутӑсӑр тӑрса юлнӑ.

Сӑмах май каласан, асӑннӑ ҫуртсенчен чылайӑшӗнче уйрӑм газ кӑмакисем вырнаҫтарнӑ, вӗсем вара ҫутӑсӑр ӗҫлемеҫҫӗ. Апла пулсан, ҫутӑ сӳнсен хватерсенче ӑшӑ та пулмасть.

trip-for-the-soul.ru сӑнӳкерчӗкӗ

Ҫӗнӗ ҫул тӗлӗнчи канмалли кунсенче Чӑваш Ене 40 пине яхӑн турист килнӗ. Ку цифрӑна республикӑн Правительствинче эрнесерен иртекен канашлура экономика аталанӑвӗн тата пурлӑх хутшӑнӑвӗсен министрӗ Дмитрий Краснов асӑнса хӑварнӑ.

«2023 ҫулти Ҫӗнӗ ҫул уявӗсен тӗлӗнче пирӗн тӑрӑха 22 пин ҫын килнӗ пулсан, хӑна ҫурчӗсем кӑҫал пӗлтернӗ тӑрӑх, 40 пине яхӑн турист килнӗ. Унччен хӑна ҫурчӗсенчи номерсенчен 40 процентӗнче ҫынсем йышӑннӑ пулсан, халӗ — 55 процента яхӑн. Ку вӑл Шупашкар тата Чӑваш Республики туристсене илӗртнине пӗлтерет», — тенӗ министр.

Людмила Иванова архивӗнчи сӑнӳкерчӗк

Бельгире пурӑнакан чӑваш хӗрӗ ятарлӑ ҫар операцине хутшӑнакан салтаксене халалласа сӑвӑ ҫырнӑ.

Людмила Иванова Вӑрмар районӗнчи Тикаш ялӗнче ҫуралнӑ. Испани каччипе 2002 ҫулта мӑшӑрланнӑ хыҫҫӑн ҫемье пӗр вӑхӑт Испанри Мадридра пурӑннӑ, 2013 ҫулта Бельгири Брюссель хулине куҫса кайнӑ.

Ҫамрӑк чухне хореограф пулса ӗҫленӗскер пушӑ вӑхӑтне балета халаллать. «Ку вӑл маншӑн — чун киленӗҫӗ», — тет ентешӗмӗр. 20 ҫӳл ӗнтӗ Людмила туризм сферинче тӑрӑшать.

еще балетом занимаюсь в свободное время, хобби. Я конечно хореографом работала в молодости. 20 лет уже работаю в сфере туризма.

Ентешӗмӗр тӑван тӑрӑхне питӗ юратать. Ҫуралнӑ ҫурчӗн сӑнӳкерчӗкне вӑл хитре рамка ҫине вырнаҫтарса стена ҫине ҫакса хунӑ. Тӑван тӑрӑхне кашни ҫулах килсе каять.

Ентешӗмӗр тӑван ҫӗршыва та чунтан юратать. Нумаях пулмасть вӑл Украинӑри ятарлӑ ҫар перацине хутшӑнакан салтаксене халалласа сӑвӑ ҫырнӑ.

gov.ru сайтри сӑн

Кӑрлач уйӑхӗн 5-мӗшӗнче Раҫҫее Турцирен 19 тонна ҫӑмарта кӳрсе килнӗ. Пӗтӗмпе - 316800 ҫӑмарта. Ку - иккӗмӗш парти. Пӗрремӗш партие кӑрлачӑн 3-мӗшӗнче кӳрсе килнӗ. Ун чухне те ҫавӑн чухлех тонна пулнӑ.

Турцирен кӳрсе килсе Раҫҫейри лавккасенче ҫӑмарта хакне чакарасшӑн тата дефицита пӗтересшӗн. Ҫӑмартана чикӗ леш енчен илсе килнӗ чухне унра сиенлӗ тата усӑ курма юраман япаласем пуррипе ҫуккине тӗрӗслеҫҫӗ.

Аса илтерер: юлашки вӑхӑтра Раҫҫейри лавккасенче ҫӑмарта хакӗ палӑрмаллах ӳснӗ.

forum.na-svyazi.ru форумри видеоран илнӗ сӑнӳкерчӗк

Шупашкар тӑрӑхӗнчи Карачура патӗнчи масар тӗлӗнчи ҫул пӑрӑнчӑкӗ тӗлӗнче пӗр автомобилист 5 пӑши асӑрханӑ. Вӗсем ҫул хӗррипе чупса иртнӗ. Юрать, ҫул ҫине сиксе тухман.

Тискер чӗрчунсем автомобиль ҫулӗ ҫине сиксе тухнипе инкексем час-часах пулаҫҫӗ.

Сӑмах май каласан, 2021 ҫулта Шупашкар ҫыннисем маларах каланӑ вырӑнта 4 пӑши асӑрханӑ.

zdorovieinfo.ru сайтри сӑн

Ҫӗнӗ ҫул хыҫҫанхи каникулти кунсем сивӗ килчӗҫ. Шел те, шӑнса вилекенсем те пулнӑ.

Чӑваш Ен Элтеперӗн администрацийӗ паян хыпарланӑ тӑрӑх, республикӑра ҫулталӑк пуҫланнӑранпа 7 ҫын шӑнса вилнӗ. Тепӗр 28 ҫын ӳтне тӑм илтернӗ.

Сӑмах май, пӗлтӗр Ҫӗнӗ ҫулти каникулта 5 ҫын шӑнса вилнӗ, 14 ҫын ӳтне тӑм илтерсе пульницӑна лекнӗ.

@batyrevosos каналти сӑн

Кӑрлач уйӑхӗн 8-мӗшӗнче Патӑрьелте шкул автобусӗ ҫунса кайнӑ. Ку патӑрмах 2-мӗш шкулта пулнӑ.

Малтанлӑха пӗлтернӗ тӑрӑх, инкекре шар курнисем пулман. округра пурӑнакансем каланӑ тӑрӑх, шкул автобусӗ – ҫӗнӗскерех.

Сӑмах май, юлашкинчен Патӑрьел муниципаллӑ округне шкул автобусӗсемпе раштав уйӑхӗн вӗҫӗнче тивӗҫтернӗ. Ҫав партири автобус ҫуннӑ-и е ҫук-и – пӗлтермен.

cheb-centr.soc.cap.ru сӑнӳкерчӗкӗ

Ӗнер, кӑрлач уйӑхӗн 8-мӗшӗнче, Чӑваш Республикин тава тивӗҫлӗ художникӗ, чӑваш халӑх художникӗ Раиса Терюкалова 85 ҫул тултарнӑ.

Вӑл Улатӑр районӗнчи (халӗ — муниципаллӑ округ) Кувакино ялӗнче ҫуралнӑ. 1961 ҫулта вӑл Шупашкарти ӳнер училищинчен вӗренсе тухнӑ, 1967 ҫулта — Ленинградри В.И. Мухина ячӗллӗ ӳнерпе промышленность аслӑ училищинчен.

Унӑн куравӗсем темиҫе хут та музейсенче уҫӑлнӑ. Художник ӗҫӗсем музейра ҫеҫ мар, Раҫҫейри тата чикӗ леш енчи уйрӑм ҫынсенче упранаҫҫӗ.

Юбилей ячӗпе художника Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центр ӗҫченӗсем саламланӑ.