wink.ru сӑнӳкерчӗкӗ

Чӑваш патшалӑх академи драма театрӗ куракансене кӑҫал черетлӗ премьерӑсемпе паллаштарӗ. 2024 ҫулти пӗрремӗш премьера «Пӗртен-пӗр шанӑҫ» камит пулӗ. Ӑна Михаил Задорнов паллӑ ҫыравҫӑ-сатирик ӗҫӗпе Алексей Герасимов режиссёр хатӗрлет. Куракансем ҫӗнӗ ӗҫе нарӑс уйӑхӗн 28-мӗшӗнче пуҫласа курӗҫ.

Андриян Николаев космонавт ҫуралнӑранпа 95 ҫул ҫитнине халалласа «Чӑваш кӑйкӑрӗн ҫӑлтӑрлӑ ҫулӗ» спектакль хатӗрлеҫҫӗ. Ӑна ака уйӑхӗн 10-мӗшӗнче сцена ҫине кӑларма палӑртса хунӑ. Режиссерӗ — Борис Манджиев.

Ака уйӑхӗн 26-мӗшнче Арсений Тарасов драматургӑн «Хӗрлӗ кӗпеллӗ телей» пьеси тӑрӑх Валерий Яковлев лартнӑ ӗҫпе паллашма май килӗ.

Чӑваш тӗррин кунӗ тӗлне Наталия Сергеева режиссёр Николай Симунов пьеси тӑрӑх «Сурпан тӗрри» спектакль лартӗ.

Алексей Герасимов режиссёр вара ачасем валли «Улӑп» юмах хатӗрлӗ. Чӑваш халапӗсем тӑрӑх пьесӑна Александр Пӑртта ҫырнӑ. Ӑна раштав уйӑхӗнче кӑтартӗҫ.

ШӖМ видеовӗнчен илнӗ сӑнӳкерчӗк

Паян ирпе Шупашкарта икӗ троллейбус ҫапӑннӑ. Вӗсем 5-мӗш тата 9-мӗш маршрутпа ҫӳрекенскерсем. Пӑтӑрмах ирхи 7 сехетре пулса иртнӗ.

Чӑваш Енӗн Шалти ӗҫсен минисерствин пресс-службинче хыпарланӑ тӑрӑх, «Николаев урамӗ» чарӑнӑва ҫитнӗ чухне 5-мӗш троллейбус водителӗ 9-мӗш маршрутпа ҫӳрекеннипе пырса ҫапӑннӑ. Малтанласа шухӑшланӑ тӑрӑх, пӑтӑрмах транспорт пӗр-пӗр хушшинче пулмалли инҫӗше пӑхӑнманнипе ҫыхӑннӑ.

Троллейбуссенчен пӗрин водительне, 25 ҫулти каччӑна, тата пилӗк пассажира тухтӑр пулӑшӑвӗ кирлӗ пулса тухнӑ.

Синоптиксем пӗлтернӗ тӑрӑх, кӑрлач уйӑхӗ ҫакӑн пек сивӗ ҫанталӑкран пуҫланни 37 ҫул пулман. Хӑҫан ӑшӑтӗ?

Паян-ыран кӑштах юр ҫӑвӗ. Вырсарникун уяр ҫанталӑк тӑрӗ. Синоптиксем пӗлтернӗ тӑрӑх, ҫитес вӑхӑтра шартлама сивӗ пулмӗ. Анчах ҫил вӑйлӑ пулнӑран 27-32 градус сивӗ пек туйӑнӗ.

Тунтикун ӑшӑтма пуҫлӗ, 5-10 градус кӑна сивӗ тӑрӗ, ҫил кӑнтӑр енчен вӗрӗ, юр ҫукалӗ. Ытларикун термометр 0 градус патнелле кӑна кӑтартӗ. Юнкун юр вӑйлах ҫума пултарӗ. Кӗҫнерникун вара каллех сивӗтӗ, ҫил вӑйланӗ. Эрнекун циклон килӗ, ӑшӑтма пултарӗ. Вырсарникун вара каллех сивӗ таврӑнӗ.

Синптиксем малтанлӑха пӗлтернӗ тӑрӑх, ҫакнашкал улшӑнса тӑракан ҫанталӑк кӑрлач вӗҫӗчченех пулӗ.

cap.ru сайтри сӑн

Куславкка муниципаллӑ округӗнчи Тӗрлемес шкулӗнче вӗреннӗ Анастасия Немова тыр-пул культурин ҫӗнӗ сортне кӑларма пулӑшнӑ. Вӑл республикӑра кире пуканӗн спортменки пек те паллӑ. Анастасия – ку сорт тӗсӗпе тӗнче класлӑ спорт мастерӗ. Халӗ вӑл Чӑваш патшалӑх аграри университетӗнче ӗҫлет, унтах вӑл аслӑ пӗлӳ илнӗ.

Анастасия Немова – биотехнологи тата агрономи факультечӗн аспиранчӗ. Пӗлтӗр университетри ӑсчах-агрономсем ҫурхи тритикален ҫӗнӗ сортне туса кӑларнӑ. Ӑна вӗсем «Нарспи» ят панӑ. Ҫак сортпа 10 ҫул каяллах ӗҫлеме пуҫланӑ. Ҫак ӗҫе университетӑн тӑватӑ преоподавателӗ, ҫав шутра Анастасия Немова та, хутшӑннӑ.

Ҫемье архивӗнчи сӑн ӳкерчӗк

Шупашкарта пурӑнакан хӗрарӑм ывӑлӗ ӑҫта пулнине чӳк уйӑхӗнченпе пӗлмест. Вӑл полицие пулӑшу ыйтма пынӑ.

Руслан Любинарский чӳк уйӑхӗн 23-мӗшӗнче килтен тухса кайнӑ. Унтанпа вӑл килсе курӑнман, тӑванӗсемпе ҫыхӑнӑва тухман. Хӑйӗнпе ҫумӑн докуменчӗсем те пулман унӑн.

Ҫухалнӑ кун Руслан хура куртка, сарӑ кофта, сӑрӑ джинс шӑлавар, хура пушмак тӑхӑннӑ пулнӑ. Унӑн сулахай куҫ харши ҫийӗн суран йӗрӗ пур. Руслана куракансене полицие 02 номерпе шӑнкӑравлама ыйтаҫҫӗ.

Антон Кудряшов. Василий Петров страницинчен илнӗ сӑнӳкерчӗк

Чӑваш Енри ҫамрӑк шахматист Раҫҫей кубокӗнче палӑрнӑ. Антон Кудряшовӑн ҫитӗнӗвӗ пирки республикӑн спорт министрӗ Василий Петров тӗнче тетелӗнчи хӑйӗн страницинче пӗлтернӗ.

Ҫамрӑк ентешӗмӗр Раҫҫейре кӑҫал иртнӗ ача-пӑча ӑмӑртӑвӗсенчен пӗринче хӑйне тивӗҫлипе кӑтартма пултарнӑ.

«Н.И. Мухамедзянов мемориалӗ» ятпа иртнӗ кубока ҫӗршыври спортсемнсем Хусан хулинче пуҫтарӑннӑ. Чӑваш Енри ача 13 ҫултан кӗҫӗнрех арҫын ачасем хушшинче кӗмӗл медале тивӗҫнӗ.

old.chuvsu.ru сӑнӳкерчӗкӗ

Чӑваш Енре литературӑпа ӳнерти 2023 ҫулти ӗҫсемшӗн преми илме конкурса ӗҫсене малалла йышӑнаҫҫӗ.

Асӑннӑ премие пирӗн республикӑра ҫулсерен параҫҫӗ. Ӑна тивӗҫ ӗҫсен ҫӗнӗлӗхпе уйрӑлса тӑмалла, вӗсене халӑх пысӑка хурса йышӑнни тата наци культурине аталантарма пысӑк тӳпе хывни кирлӗ.

Асӑннӑ ӗҫсем музыка, ӳнер. театр, хореографи тата эстрада ӳнерӗпе, дизайнпа, кинопа тата телекуравпа, халӑх пултарулӑхӗпе ҫыхӑнма пултараҫҫӗ.

Ӗҫсене Чӑваш Енӗн Культура министерствинче нарӑс уйӑхӗн 1-мӗшӗччен йышӑнӗҫ. Ыйтса пӗлмелли телефон номерӗ 8(8352) 56-50-48.

Следстви комитечӗ тунӑ сӑн

Канаш хулинче тӳнсе кайнӑ автокран рабочие суранлатнӑ. Следстви ку тӗслӗх тӗлӗшпе пуҫиле ӗҫ пуҫарнӑ.

Ку пӑтӑрмах пӗлтӗр чӳк уйӑхӗн 18-мӗшӗнче тимӗр-тӑмӑртан япаласем туса кӑларакан предприятире пулнӑ. Кран ӗҫленӗ чухне тӳнсе кайнӑ, вӑл йӑтма пуҫланӑ тимӗр листа предприяти водителӗ ҫине ӳкнӗ. Ҫапла ку унӑн сывлӑхне йывӑр сиен кӳнӗ.

Халӗ следовтельсем ӗҫ-пуҫа уҫӑмлатаҫҫӗ.

Чӑваш кӗнеке издательствинче «Чун вӗҫевӗ. Полет души» нотӑланӑ юрӑ пуххи пичетленсе тухнӑ.

Издательствӑра пӗлтернӗ тӑрӑх, кӑларӑм авторӗ – Валентина Тарават (Валентина Николаевна Игнатьева), Раҫҫей Федерацийӗн Ҫыравҫӑсен союзӗн членӗ (1995), Раҫҫей Федерацийӗн культурӑн тава тивӗҫлӗ ӗҫченӗ (1996), Чӑваш Республикинчи Композиторсен ассоциацийӗн членӗ (1996), Чӗмпӗр облаҫӗн хисеплӗ гражданинӗ (2007), «Браво, Маэстро!» преми лауреачӗ (2023). Ҫӗнӗ кӑларӑмӑн музыка редакторӗ – Александр Васильев, издательство редакторӗ – Ольга Иванова, художникӗ – Дмитрий Литаврин. Тиражӗ – 800 экземпляр.

Нотӑланӑ юрӑ пуххине Валентина Тарават кӗвӗленӗ хайлавсем кӗнӗ. Сӑввисен авторӗсем – Валентина Тарават, Анатолий Ырьят, Николай Ларионов, Раиса Сарпи, Олег Прокопьев, Анатолий Чебанов, Галина Матвеева, Надежда Силпи, Любовь Мартьянова, Светлана Матлина. Ачасем валли ҫырнӑ произведенисем те пур.

drama21.ru сӑнӳкерчӗкӗ

Чӑваш халӑх артисчӗ Петр Иванов ҫуралнӑранпа кӑрлач уйӑхӗн 8-мӗшӗнче 80 ҫул ҫитнӗ.

Ҫӗмӗрле районӗнчи (халӗ — муниципаллӑ округ) Красная Звезда посёлокра 1944 ҫулта ҫуралнӑ, 1997 ҫулта ҫут тӗнчерен уйрӑлса кайнӑ.

Ҫӗмӗрлери ремесла училищинчен столяра вӗренсе тухнӑскере Череповецкри сӗтел-пукан комбинатне ӗҫлеме янӑ. 1962 ҫулта ентешӗмӗр Карелие чукун ул тунӑ ҫӗре ӗҫлеме каять. Унтан ҫар ретне тӑрать. 1966 ҫулта тӑван тӑрӑха таврӑнсан Чӑваш телевиденийӗ ҫумӗнчи актер студийӗнче пултарулӑхне туптама тытӑнать. Тепӗр ҫулхине ӑна Ҫамрӑксен театрне ӗҫе илеҫҫӗ. Унта вӑл 14 ҫул артист пулса тӑрӑшать. 1981 ҫулта ӑна Чӑваш академи драма театрне йыхравлаҫҫӗ. 1988 ҫулта «Чӑваш АССР тава тивӗҫлӗ артисчӗ», 1996 ҫулта «Чӑваш Республикин халӑх артисчӗ» ятсене тивӗҫет.

Сцена ҫинче 29 ҫул вылянӑ вӑхӑтра вӑл 100-е яхӑн роле калӑпласа ӗлкӗрнӗ.