Ҫеҫпӗл Мишши ячӗллӗ Чӑваш патшалӑх ҫамрӑксен театрӗ кӑҫал туса ирттермелли плансене палӑртнӑ.

Культура учрежденийӗн директорӗ Елена Николаева пӗлтернӗ тӑрӑх, кӑҫалхи ҫулталӑк юбилейсемпе пуян. Чӑваш АССР искусствӑсен тава тивӗҫлӗ ӗҫченӗ, актриса, режиссер, педагог, РСФСР культура тава тивӗҫлӗ ӗҫченӗ Зоя Ярдыкова ҫуралнӑранпа кӑҫалхи нарӑс уйӑхӗн 5-мӗшӗнче 100 ҫул ҫитӗ. Пуш уйӑхӗн 10-мӗшӗнче Раҫҫей Федерацийӗн халӑх артисчӗ, Чӑваш Республикин халӑх артисчӗ Василий Павлов 70 ҫулхине уявлӗ, Чӑваш Республикин тава тивӗҫлӗ артисчӗ пуш уйӑхӗн 8-мӗшӗнче 60 ҫул тултарӗ, Чӑваш Республикин тава тивӗҫлӗ артистки Светлана Дмитриева ҫу уйӑхӗн 25-мӗшӗнче — 50 ҫул.

Ҫуралнӑранпа 80 ҫул ҫитнӗ май тата нумай ҫул хушши чӑваш поэзине аталантарма сумлӑ тӳпе хывнӑшӑн Чӑваш Республикин ҫыравҫӑсен пӗрлӗхӗн членне, Чӑваш халӑх поэтне тата Чӑваш Республикин тава тивӗҫлӗ культура ӗҫченне, Петӗр Хусанкай, Нестер Янкас, Фатих Карим ячӗллӗ литература премийӗсен лауреатне Юрий Семёнович Семёнова (Юрий Сементере) Нестер Янкас ячӗллӗ культурӑпа искусство тата литература пӗрлӗхӗ «Чӑваш культурипе искусствине тата литературине аталантарма тӳпе хывнӑшӑн» («За вклад в развитие чувашской литературы, искусства и культуры») орденпа чыслама йышӑннӑ.

robot-review.com сайтри сӑн

Китайри ӑсчахсем самолетра усӑ курмалли сасӑ хӑвӑртлӑхӗнчен самай ирттерме пултаракан Sodramjet ятлӑ двигатель ӑсталанӑ. Ӑна аэропӑрӑхра тӗрӗслеме те ӗлкӗрнӗ ӗнтӗ, унта вӑл сехетре 11 000 ҫухрӑмлӑ хӑвӑртлӑха кӑтартма пултарнӑ.

Китай эксперчӗсемшӗн тӗрӗслев кӑтартӑвӗсем кӗтменлӗх пулнӑ, анчах та, ӑслӑлӑх академийӗнче пӗлтернӗ тӑрӑх, ку вӑл двигатель кӑтартма пултаракан чи пысӑк хӑвӑртлӑх мар. Сӑлтавӗ вара ҫакӑнта: аэродинамика пӑрӑхне чи пысӑк хӑвӑртлӑхпа ӗҫлеттернӗ, анчах двигателӗн пӗтӗм хӑватне кӑтартма май килмен, апла пулсан унӑн ахаль те пысӑк хӑвӑртлӑхне сехетре 19 500 ҫухрӑма яхӑн ӳстерме май пур тесе шутлаҫҫӗ.

Юлашкинчен ӑсчахсем ҫапла пӗлтернӗ: двигателе усӑ курма хатӗрлесе ҫитериччен тата икӗ ҫул кирлӗ пулӗ — ӑна тарӑнрах тӗпчемелле, конструкцине мӗнлерех ӑсталасси пирки шутламалла.

Inosmi сайтӗнчен илнӗ сӑн

Еврей автономи облаҫӗнчи Ленин районне кӗрекен Ҫӗнӗ Троицк ялӗнчи пӗр фермера чутах кашкӑр ами ҫурса тӑкман, телее вӑл ӑна нимсӗр-мӗнсӗрех ҫӗнтерме май тупнӑ.

Тискер кайӑк вӑрмантан кӑрлачӑн 2-мӗшӗнче тухнӑ. Видеосӑнав камерисем кӑтартнӑ тӑрӑх вӑл килти выльӑхсене хӑваланӑ. Кашкӑр ами малтан икӗ йытта пӑвса пӑрахнӑ, лашана хытӑ ҫыртса пӗтернӗ, ун хыҫҫӑн вара арҫынна тапӑнма пуҫланӑ. Пӗр хут вӑл ӑна ҫыртса илме те май тупнӑ. Фермер хирӗҫ тӑма пуҫланӑ — ҫапла май вӑл тискер кайӑка ҫара алӑпах пӑвса пӑрахнӑ.

Ҫак ӗҫ пулса иртнӗ хыҫҫӑн ялта пӗтӗм выльӑх-чӗрлӗхе урса каясран вакцинӑланӑ. Кашкӑр амин юнне тата тирне илсе вӗсене тӗпчеме лабораторие ӑсатнӑ. Тапӑннӑ арҫын сывлӑхӗ мӗнлерех пирки информаци хатӗрӗсем пӗлтермеҫҫӗ.

"На связи" сайтри сӑн

«Мускав – Шупашкар» рейспа вӗҫекен самолетӑн Шупашкарта 10 сехет те 25 минутра анса лармалла. Анчах «тимӗр кайӑк» ҫӗр ҫине 11 сехет те 4 минутра ларнӑ. Йӑлтах – юр ҫунине пула. Паян кӑнтӑрлаччен республикӑра юр самай вӑйлӑ ҫурӗ.

Самолет анса лармалли меллӗ самант кӗтсе сывлӑшра ҫаврӑм тунӑ. «Победа» авиакомпанин «тимӗр кайӑкӗ» каялла Мускава 12 сехет те 8 минутра вӗҫсе кайнӑ. Расписанипе вара 12 сехет те 25 минутра унӑн Мускаври Внуково аэропортӗнче пулмалла. Анчах ҫанталӑка пула самолет паян вырӑна 13 сехет ҫурӑсенче ҫеҫ ҫитнӗ.

21.xn--b1aew.xn--p1ai сайтри сӑн

Полицейски Хӗл Мучи тумне тӑхӑнса службӑра вилнӗ ӗҫтешӗн ачи патне Ҫӗнӗ ҫулпа саламлама килнӗ. Кун пирки ЧР ШӖМӗ пӗлтерет.

Ҫул-йӗрпе патруль службин инспекторӗ Андрей Макаров 2010 ҫулхи ҫурла уйӑхӗнче службӑра вилнӗ. Унӑн хӗрӗ ҫурма тӑлӑха юлнӑ. Валерия халӗ 3-мӗш класра вӗренет. Вӑл Хӗл Мучи килсен хаваспах сӑвӑ каласа кӑтартнӑ, шкулта лайӑх вӗреннине пӗлтернӗ.

Хӗл Мучи хӗрачана пылак ҫимӗҫ парнеленӗ. Валерия куншӑн питӗ савӑннӑ. Пакунлисем леш тӗнчене куҫнӑ ӗҫтешӗсене, вӗсен ҫемйисене манмаҫҫӗ.

ptzgovorit.ru сайтри сӑн

Чӑваш Енре кӑшӑлвируспа инфекциленнисен йышӗ 17 пине ҫитсе пырать – паянхи кун тӗлне 16905 ҫын чирленӗ. Вӗсенчен 15232-шӗ сывалнӑ.

Вилнисем кашни кун нумайланса пыраҫҫӗ. Ҫулталӑк пуҫланнӑранпа кашни кун 10-11 ҫын вилнӗ. Паян 10 ҫыннӑн пурнӑҫӗ татӑлнӑ. Кӑшӑлвируса пула пурнӑҫран уйӑлнисен йышӗ 580 ҫынна ҫитнӗ.

Пӗр талӑкра чирлекенсен йышӗ чакса пырать – 100 ҫын инфекциленнӗ. 87 ҫын сывалнӑ.

Палӑртмалла: халӗ республикӑра койкӑсен 26 проценчӗ пушӑ.

«Рождественская сказка» спектакльти сӑнӳкерчӗк. Театрӑн Фейсбукри страницинчи сӑнӳкерчӗк

Театрсем кашни сезонтах куракансене ҫӗнӗ ӗҫсемпе савӑнтараҫҫӗ. Чӑваш патшалӑх ҫамрӑксен театрӗ те ҫавах. 2021 ҫулта унта ҫичӗ премьера хатӗрлеме ӗмӗтленеҫҫӗ.

Культура учрежденийӗнче пӗлтернӗ тӑрӑх, виҫӗ спектакле «Пӗрлӗхлӗ Раҫҫей» партин «Театр – ачасем валли» проекчӗпе килӗшӳллӗн лартасшӑн. Проекта лекнӗ спектакльсем ҫаксем: Александр Пушкинӑн «Метель» (12+) повеҫӗ, Алексей Толстойӑн «Тайна Золотого ключика» повеҫ-юмахӗ (0+), Левтина Марьен «Мухтанчӑк Автан» пьеси (0+).

Чӑвашла лартма палӑртнӑ спектакльсем татах пур: Владислав Николаевӑн пьеси тӑрӑх «Сӑр сиввисем» (6+), Ольга Туркайӑн «Савтепийӗ» (12+), Александр Пӑрттан «Шыв ҫинчи юратӑвӗ» (12+).

Валентин Афонин ӗҫӗ тӑрӑх лартнӑ «Мымрёнок» спектакле (0+) ҫӗнетме палӑртнӑ, Шарль Перрон «Золушка» (0+) спектакльне кӑҫал лартӗҫ.

Инкеклӗ лару-тӑру министерстви тунӑ сӑн

Ҫӗнӗ ҫул хыҫҫӑн, кӑрлачӑн 1-мӗшӗнче, Вӑрмар районӗнчи Урнар ялӗнче ултӑ ҫын пушарта ҫунса вилни пирки пӗлтернӗччӗ. Вӗсенчен виҫҫӗшӗ – ачасем.

Паян кӑшӑлвируса сарӑлассипе кӗрешекен оперативлӑ штабӑн черетлӗ ларӑвӗнче ҫак пушар пирки те калаҫнӑ. Инкеклӗ лару-тӑру патшлӑх комитечӗн пуҫлӑхӗ Вениамин Петров ҫак ҫемье ҫинче чарӑнса тӑнӑ. Ҫемье 2020 ҫулхи ҫурла уйӑхӗнченпе Урнарта пурӑннӑ, Ҫӗрпӳ районӗнчен куҫса килнӗ. Икӗ хӗрӗ /вӗсенчен пӗрин ачасем пулнӑ/ амӑшӗ тата унӑн арҫынни патне пурӑнма килнӗ. Амӑшӗ вара арҫыннипе виҫӗ ҫул пурӑннӑ. Пурӑнмали условисем япӑх пулнӑран ҫемье Ҫӗрпӳ районӗнче шутра пулнӑ.

7-ри тата 10 ҫулти ачсем шкулта вӗреннӗ, 4-ри хӗрача ача пахчине ҫӳремен, мӗншӗн тесен ку ялта вӑл пулман та. Соцӗҫченсем ҫемьене пӗрре мар килнӗ. Юлашки хутчен раштавӑн 26-мӗшӗнче пынӑ, ачасене сиплев учрежденине вӑхӑтлӑха вырнаҫтарма сӗннӗ. Амӑшӗ Ҫӗнӗ ҫула ҫемьепе ирттерес тенӗ, уяв хыҫҫӑн пыма шантарнӑ.

Вениамин Петров малтанлӑха пӗлтернӗ тӑрӑх, пушар юсавсӑр холодильнике пула тухма пултарнӑ. Пӗртӑвансенчен пӗри ҫулӑм тухнине сиссен кил хуҫине вӑратнӑ. Лешӗ вара мӗн тумаллине пӗлмен ахӑртнех – хӑйӗн тӑрӑх шыв янӑ, утиялпа чӗркеннӗ те кӳршисенчен пулӑшу ыйтма васканӑ.

Малалла...

Редакцирен: Тимофеев Владимир Николаевич пирӗн пата хӑйӗн черетлӗ чӗнӗвне ярса пачӗ. Эпир сире унпа паллаштаратпӑр.

Наци телекуравӗнче ирхи чӑвашла кӑларӑмсем пулмалла

Ирхине 5 сехетрен пуҫласа 6 сехетччен Наци Телевиденийӗпе чӑваш чӗлхиллӗ передачӑсем ҫеҫ пулччӑр! Рекламӑсем вырӑсла пулччӑр.

Чӑвашсем ура ҫинче. Ҫак вӑхӑтра вӗсен чӑваш чӗлхиллӗ кӑларӑмсене пӑхасчӗ! Чӑваш чӗлхине пӗлмен ҫынсем ку вӑхӑтра ҫывӑраҫҫӗ ҫавах! Ҫывӑрмасан та, асту, чӑваш наци телевиденийӗн передачисене пӑхаҫҫӗ пуль!

Икӗ патшалӑх чӗлхи тетпӗр. Талӑкра 23 сехет хушши вырӑс чӗлхи хуҫаланать! Ҫывӑрас килнӗ вӑхӑтра ирхине (5 сехетрен пуҫласа 6 сехетччен) пӗр сехет хушши чӑваш чӗлхи хуҫалантӑрччӗ! Ирхине 5 сехетре вӑранса чӑваш ҫынни вырӑс чӗлхине тӑван чӗлхе вырӑнне йышӑнма вӗрентӗр-и? Россия1-Чувашия телеканалпа чӑваш чӗлхиллӗ кӑларӑмсем 9 сехетре тин пуҫланаҫҫӗ!

Тутарсен ТНВ каналӗнчен тӗслӗх илмелле!

Ирхине 5 сехетрен пуҫласа 6 сехетччен экран ҫинчи этемсем вырӑс чӗлхипе калаҫмасран, вырӑс чӗлхи илтӗнмесрен, вырӑс чӗлхипе пыракан кӑларӑмӗсене итлемешкӗн (тӑнламашкӑн) майӗ ҫухаласран хӑраса ӳкрӗмӗр-ши?

Малалла...