foto.cheb.ru сайтри сӑн

Республикӑра крематори тӑвасси пирки унчченех калаҫатчӗҫ. Вӑл Шупашкар районӗнчи Явӑш ялӗ ҫывӑхӗнче пулӗ.

Анчах Явӑшра пурӑнакансем ҫакна хирӗҫ. Вӗсем ку ыйтупа РФ Президенчӗ Владимир Путин патне видеоҫыру янӑ. Ял ҫыннисем унта палӑртнӑ тӑрӑх, вӗсемпе крематори ыйтӑвӗ пирки никам та калаҫман, нимӗнле сасӑлав та ирттермен. «Эпир хамӑрӑн, тӑвансен, ҫывӑх ҫынсен сывлӑхӗшӗн хӑратпӑр. Сире ку объекта урӑх ҫӗре куҫарассине витӗм кӳме ыйтатпӑр», - тенӗ ҫынсем видеоҫырура.

Паян 16 сехетре явӑшсене Шупашкар хула администрацине чӗнсе илнӗ.

РИА Новости архивӗнчи сӑн

Чӑваш Енри тӑваттӑмӗш ҫын Ҫӗпӗр мурӗпе чирленине пӗлтернӗ. Аса илтерер: ӗнер виҫҫӗмӗш ҫын пулнӑ. Вӗсем иккӗшӗ те Мускав облаҫне ӗҫлеме кайнӑ пулнӑ. Арҫынсене унта пульницӑна вырттарнӑ.

Анчах каярахпа ку хыпар тӗрӗсех маррине пӗлтернӗ. Ҫав икӗ арҫыннӑн Ҫӗпӗр мурӗ мар иккен: диагноз ҫирӗпленмен.

Аса илтерер: Ҫӗрпӳ районӗнчи Кивӗ Тутайкассинче упӑшкипе арӑмӗ Ҫӗпӗр мурӗпе чирленине палӑртнӑ. Вӗсем килте вӑкӑр пуснӑ хыҫҫӑн чирленӗ. Мускав олаҫне ӗҫлеме кайнӑ ҫав 2 арҫын, кӳршисем, вӗсене выльӑха пусма пулӑшнӑ.

Йошкар-Олари аш-какай комбиначӗ Вӑрнарти аш-какай комбинатӗнчен суда тавӑҫ тӑратса 5 миллион тенкӗ ыйтнӑ. Вӑрнарти предприяти вӗсенни евӗр этикеткӑпа усӑ курнӑ-мӗн.

Ку тушенкӑна пырса тивет. Йошкар-Олари комбинат палӑртнӑ тӑрӑх, хӗрлӗ-сарӑ йӗрлӗ этикеткӑсемпе малтан вӗсем усӑ курма пуҫланӑ, ҫакна йӗркепех ҫирӗплетнӗ. Анчах Вӑрнарти комбинат та ҫавнашкалтарах этикеткӑсемпе усӑ курнӑ.

Икӗ предприяти килӗшӳ тупса калаҫса татӑлнӑ: Вӑрнарти аш-какай комбиначӗ текех ун пек этикеткӑсемпе усӑ курмӗ. Вӗсем Йошкар-Оларине 5 миллион мар, 150 пин тенкӗ тӳлӗҫ. Кунсӑр пуҫне ҫав тушенкӑна ҫур ҫулта суту-илӳ ҫаврӑнӑшӗнчен кӑлармалла. Ҫак условисене пӑссан тата 300 пин тенкӗ тӳлеме тивӗ.

cap.ru сайтри сӑн

Хӗрлӗ Чутай шкулӗнче ӑс пухакан ачасем «ӑслӑ» вӗлле шутласа кӑларнӑ. Ку ӗҫ хальлӗхе вӗҫленмен-ха.

ЧР Ял хуҫалӑх министерстви пӗлтернӗ тӑрӑх, ӑна ачасем пуҫтараҫҫӗ. Проекта вырӑнти фермер Данис Лобастов шутласа кӑларнӑ. Ачасем «ӑслӑ» вӗллене тӑватӑ урокра туса пӗтерме шантарнӑ.

Мӗнле велле-ха вӑл? Унпа дистанци мелӗпех ӗҫлеме пулать. Смартфон ҫинчи пускӑча пуссах пыла банкӑсене тултарма май пур. Ачасем пыл сӑпасӗнче ку хатӗрпе пӗрремӗш хут пыл пуҫтарӗҫ.

cap.ru сӑнӳкерчӗкӗ

«Мӗн авалтан чӑвашсем пӗрне-пӗри пулӑшса, тимлӗх уйӑрма тӑрӑшнӑ, йывӑр чухне те яланах алӑ пама пӗлнӗ. Пурне те марафона хутшӑнма чӗнсе калатӑп. Ачасене пулӑшу пани, каяллах ырӑпа таврӑнассине пурсӑмӑр та лайӑх пӗлсе тӑратпӑр. Вӗсем — пирӗн пуласлӑх. Ырӑ пурнӑҫпа пурӑнма кашни ача тивӗҫлӗ, ҫак ӑнлава пурин те асра тытмалла», — тесе каланӑ Чӑваш Ен Элтеперӗ Олег Николаев Раҫҫейри Ача-пӑча фончӗн председателӗпе Дмитрий Лихановпа ирттернӗ ӗҫлӗ тӗлпулура.

Пирӗн республикӑра ҫак эрнере «Ачалӑхшӑн, ачалӑх ячӗпе» марафон пуҫланнӑ. Ӑна Раҫҫейри Ача-пӑча фончӗн Чӑваш Енри уйрӑмӗ кӑҫалхипе 35-мӗш хут ирттерет.

Телеграмри "Провинцивиль" сайтри сӑн

Ҫӗрпӳ районӗнче пурӑнакан тепӗр ҫыннӑн Ҫӗпӗр мурӗ пулнине палӑртнӑ. Ку – виҫҫӗмӗш тӗслӗх.

Ӗнер каҫхине тухнӑ хыпара ӗненес тӗк, арҫыннӑн сулахай хӑлхи ҫинче тӗттӗм тӗслӗ пӑнчӑ тухнӑ.

Аса илтерер: Ҫӗрпӳ районӗнчи Кивӗ Тутайкассинче пурӑнакан арӑмӗпе упӑшки вӑкӑр пуснӑ хыҫҫӑн Ҫӗпӗр язвипе чирленӗ. Ку ялта карантин пулнине йышӑннӑ: машинӑсене кӗртмеҫҫӗ, кӑлармаҫҫӗ. Чирлисемпе хутшӑннӑ 130 ҫынна сӑнаса тӑраҫҫӗ.

Евгений Лебедев архивӗнчи сӑн

Сӑр юханшывӗнче, Пӑрачкав тӗлӗнче, пӑр кайма тытӑннӑ. Кун пирки Пӑрачкав районӗн пуҫлӑхӗ Евгений Лебедев Телеграм-каналӗнче пӗлтернӗ.

"Ҫуркунне! Сӑр! Пӑр тапраннӑ! Пӑр паян, ытти ҫулхинчен чылай маларах кайма пуҫланӑ", - ҫырнӑ вӑл.

Вӑл палӑртнӑ тӑрӑх, Сӑр юханшывӗнчи пӑр ӗнер, пушӑн 21-мӗшӗнче, тапраннӑ.

t.me/Chuv_today сӑнӳкерчӗкӗ

Шупашкарта пурӑнакан ремесленник пӗчӗк пушмаксем ӑсталать.

Радик Смирнов коллекцийӗнче — тӑпӑл-тӑпӑл та пӗчӗк 200 ытла атӑ, ҫулла тӑхӑнмали уҫӑ туфли, лодочки, кроссовки, сабо.

Анчах ҫавсене урана тӑхӑнса ҫӳреймӗн. Чи пӗчӗк пушмак тӑршшӗ — 4 миллиметр.

Нумаях пулмасть ӑста Шупашкарти ача пахчисенчен пӗринче пулнӑ, шӑпӑрлансене хӑй ӑсталанӑ атӑ-пушмакпа паллаштарнӑ. Пӗчӗк атӑ-пушмака епле туни ҫинчен те каласа кӑтартнӑ.

fishki.net сайтри сӑн

Иртнӗ канмалли кунсенче Чӑваш Енре пурӑнакан ҫын «Спортлотора» выляса 4 миллион тенкӗ илнӗ. Вӑл – 69297-мӗш участник.

Пирӗн ентеш 4 миллион тенкӗ те 188 тенкӗ выляса илнӗ. Хальлӗхе ҫакӑ паллӑ: вӑл укҫана илме документсене тӑратман. Ҫак ҫын мобильлӗ сарӑмра 60 тенкӗпе билет туяннӑ иккен.

Лотерея йӗркипе килӗшӳллӗн, билетри иккӗмӗшпе виҫҫӗмӗш ретсенчи пӗтӗм хисепсене пӗлмелле. Чӑваш Ен ҫынни вара пурне те тӗрӗс палӑртса миллионер пулса тӑнӑ.

m.region29.ru сайтри сӑн

Республикӑра наркӑмӑшлӑ пултӑранпа кӗркуннеччен ҫине тӑрсах кӗрешесшӗн. Пӗлтӗр вӑл 839,2 гектар ҫинче сарӑлнине палӑртнӑ. Кӑҫал вара лаптӑк 12 процент нумайланӗ - 938 гектарпа танлашӗ.

Наркӑмӑшлӑ пултӑран ытларах Етӗрне, Йӗпреҫ, Куславкка районӗсенче ӳснине палӑртнӑ. Канаш, Улатӑр, Ҫӗмӗрле районӗсенче вӑл сахалрах сарӑлнӑ. Шӑмӑршӑ районӗнче вара ҫак курӑк ҫуккине пӗлтереҫҫӗ.

Наркӑмӑшлӑ пултӑранпа юпа уйӑхӗн 1-мӗшӗччен кӗрешӗҫ. Ку тӗллевпе 20,9 миллион тенкӗ уйӑрӗҫ.