Айӑплава пурнӑҫа кӗртессипе ӗҫлекен федераци службин Чӑваш Енри управленийӗн юсанмалли 4-мӗш инспекцийӗнче айӑплава ирттерекенсем Пӗтӗм тӗнчери дистанци олимпиадине хутшӑннӑ.

Унта колонин вӗренӳпе консультаци пунктӗнче вӗренекенсем хӑйсен пӗлӗвне тӗрӗсленӗ. Вӗсем хӑйсен ӑс-тӑнне тӗрӗс ӑслӑлӑхсенче тӗрӗсленӗ.

Айӑплава пурнӑҫа кӗртессипе ӗҫлекен федераци службин Чӑваш Енри управленийӗн пресс-службинче пӗлтернӗ тӑрӑх, асӑннӑ колонири вӗренӳпе консультаци пунктӗнче вӗренекенсем предмет конкурсӗсене: олимпиадӑсене, викторинӑсене — ҫулсерен хутшӑнаҫҫӗ.

Ӗнер математикӑпа тата физикӑпа олимпиада иртнӗ. Ӑна «Инфоурок» пӗтӗм тӗнчери дистанци олимпиадине йӗркеленӗ май пуҫарнӑ. Кӑҫалхи проекта 7-12-мӗш классенче вӗренекен 12 ҫын хутшӑннӑ.

Тӗлпулу саманчӗ

Шупашкартан тӳрех Китая вӗҫме май пулӗ. Ҫапла пӗлтерет Шупашкар хула администрацийӗн сайчӗ. Тӳре-шара Китайри Аньхой провинцийӗнчи усламҫӑсемпе тата элчисемпе тӗл пулнӑ. Унта тӳрех темиҫе тытӑмра килӗштерсе ӗҫлесси пирки калаҫнӑ: туризмра, асиасообщенире, электричество транспортне аталантарассинче тата ыттинче.

Тӗлпулура Шупашкартан Аньцина самолет вӗҫтерме пуҫласси пирки калаҫса татӑлнӑ. Ҫапла майпа икӗ хула тата ҫывӑхланӗ, ӗҫсем те ҫӑмӑллӑнах пурнӑҫланса пырӗҫ. Сӑмах май, пӗлтӗр Шупашкар Аньхой провинцийӗпе туслӑ ҫыхӑну йӗркеленӗ.

Палӑртмалла: хальлӗхе Китая Хусантан та, Чулхуларан та вӗҫме пулмасть.

Николай Муратов

Чӑваш Енӗн Культура, национальноҫсен ӗҫӗсен тата архив ӗҫӗсен министерстви хӑйне пӑхӑнакан учрежденисен ертӳҫисене суйламалли конкурс ирттернӗ. Ҫавсен шутӗнче К.В. Иванов ячӗллӗ Чӑваш патшалӑх академи драма театрӗ, Чӑваш Республикин хальхи вӑхӑтри историйӗ патшалӑх архивӗ, Культура эткерлӗхне упрассипе ӗҫлекен патшалӑх центрӗ пур. Вӗсенчен кашни валлиех министерство пуҫлӑхсем шыранӑ, анчах пӗрин валли те палӑртма май килмен.

Рита Кириллова журналист Фейсбукра пӗлтернӗ тӑрӑх, малтанхи иккӗшӗ валли пӗрер ҫын ҫеҫ конкурса хутшӑннӑ, культура эткерлӗхне упракан центр ертӳҫине ларма вара пӗр ҫын та ӑнтӑлман.

Рита Кириллова шухӑшӗпе культура отраслӗнчи «зубрсене» (вырӑс чӗлхинче ку сӑмахпа пысӑк шайри специалиста хакланӑ чух усӑ кураҫҫӗ) кӑларса яраҫҫӗ те унта ӑнтӑлакансем пуласси иккӗленӳллӗ. Пысӑк шайри специалистсен хушшинче журналист Николай Муратов (вӑл Культура эткерлӗхне упрассипе ӗҫлекен патшалӑх центрӗн пуҫлӑхӗнче ӗҫленӗ) тата Наталья Фошина (Республикӑри халӑх пултарулӑхӗн тата культура керменӗн пуҫлӑхӗнче тӑрӑшнӑ) ячӗсене асӑннӑ.

Юпа уйӑхӗн 21-мӗшӗнче Шупашкарти «Малютка» ҫуртра каллех уҫӑ алӑксен кунӗ иртӗ. Унта пӗчӗкскерсене телейлӗ ачалӑх парнелеме хатӗр ҫынсене хапӑлласах кӗтеҫҫӗ.

Уҫӑ алӑксен кунӗнче пулас ашшӗ-амӑшӗ ачасем мӗнле условисенче пурӑннипе паллашма, пепкене усрава илесси пирки специалистсемпе калаҫма пултарӗҫ.

Шупашкарти Калинин районӗн администрацийӗн ачалӑха сыхлакан пайӗ кунашкал мероприятин витӗмӗ пуррине палӑртать. Уҫӑ алӑксен кунне ирттерни ҫынсене ача ҫурчӗ пирки ытларах пӗлме май парать.

Кӑмӑл пур тӑк сире ҫак адреспа хапӑлласа кӗтеҫҫӗ: Шупашкар, Мир проспекчӗ, 36-мӗш «а» ҫурт.

Мӑн Сӗнтӗрти чиркӳ

Паян Муркаш районӗнчи Депутатсен пухӑвӗ иртнӗ. Унта чылай ыйту пӑхса тухнӑ, ҫав шутра — пурлӑхпа ҫыхӑннисене те. Кун йӗркине кӗртнӗ ыйтусене Муркаш район администрацийӗнче пӗлтерӗшлӗ тесе хаклаҫҫӗ. Кун пирки унтисем район администрацийӗн сайтӗнче ҫырнӑ.

Депутатсем муниципалитет пурлӑхне Мӑн Сӗнтӗр тата Оринин ял тӑрӑхӗсене парасси ҫинчен калакан йышӑну проектне ҫирӗплетнӗ. Кунсӑр пуҫне Арҫынсен Шупашкарти Ҫветтуй Троицки православи мӑнастирне пурлӑх парас ыйтӑва та тишкернӗ. Вырӑс православи чиркӗвӗн Епархине икӗ чиркӳ ҫурчӗ тата вите пама йышӑннӑ. Мӑн Сӗнтер тата Оринин ял тӑрӑхӗсене шыв башнисене Муркаш район администрацийӗн харпӑрлӑхӗнчен куҫарса панӑ. Малашне вӗсемшӗн вырӑнтисем яваплӑ пулӗҫ.

Юпа уйӑхӗн 12-мӗшӗнчен112 тытӑм Чӑваш Енре те туллин ӗҫлесе кайнӑ. Ҫапах та ҫакна палӑртмалла: пушар сӳнтерекенсен, йӗрке хуралҫисен, васкавлӑ пулӑшӑвӑн, газ службин кӗске номерӗсем те (01, 02, 02, 04 — стационарти телефонсенчен, 101, 102, 103, 104 — карас телефонӗсенчен) малтанхиллех ӗҫлӗҫ.

112 тытӑм Шупашкарти Калинин урамӗнчи 112-мӗш ҫуртра вырнаҫнӑ.

Пӗлменнисене пӗлтерер: 112 тытӑм Раҫҫейри васкавлӑ службӑсемпе ҫыхӑнтарать. Инкек, пушар, обществӑри йӗркелӗхе пӑссан ҫав номерпе хыпарлама пулать. Унтисем тивӗҫлӗ службӑсене хыпарлӗҫ.

СИМ-карттӑ лартнӑ телефонпа шӑнкӑравласан тытӑм ҫын ӑҫтине те палӑртать. СИМ-карттӑ пулмасан та инкек пирки хыпарлама май пур. Диспетчер инкек пирки тӗплӗн ыйтнишӗн кӳренме ыйтмаҫҫӗ, ку вӑл лару-тӑрӑва хаклама кирлӗ.

Сӗнтӗрвӑрри районӗнчи Шӗнерпуҫ ял тӑрӑхӗн экс-пуҫлӑхӗ тӗлӗшпе пуҫиле ӗҫ пуҫарнӑ. Следстви шухӑшӗпе, вӑл пысӑк ҫӗр лаптӑкӗсене саккуна пӑсса сутнӑ.

Следовательсем пуҫиле ӗҫе вӗҫленӗ, ӑна суда пӑхса тухма панӑ. Следстви версийӗ тӑрӑх, пӗлтӗрхи юпа уйӑхӗнче Шӗнерпуҫ ял тӑрӑхӗн пуҫлӑхӗ суту-илӳ тумасӑрах коммерци организацине виҫӗ ҫӗр лаптӑкне тара панӑ. Лаптӑк пӗтӗмпе 1,5 миллион тӑваткал метр йышӑннӑ. Тепӗр виҫӗ уйӑхран хайхискер ҫӗре 750 пин тенкӗпе сутса янӑ. Чӑн хакӗ вара 20 миллион тенке яхӑн пулмалла. Ҫапла вӑл хака 26 хут пӗчӗклетнӗ, хыснана тӑкак кӳнӗ.

Халӗ ҫӗре патшалӑх харпӑрлӑхне тавӑрса панӑ. Экс-пуҫлӑх вара тӑкака хӑйӗн ирӗкӗпе саплаштарнӑ.

2018-2019 ҫулсенче Патӑрьел тата Ҫӗрпӳ районӗсенчи икӗ плотинӑна юсӗҫ. Вӗсене ҫӗнетмешкӗн пӗтӗмпе 17 миллион тенке яхӑн тӑкаклӗҫ. Ку хушӑва ЧР Министрсен Кабинечӗн пуҫлӑхӗ Иван Моторин алӑ пуснӑ.

Документра палӑртнӑ тӑрӑх, Патӑрьел районӗнчи Люля юханшывӗ ҫинчи плотинӑна икӗ ҫул юсӗҫ. Ку тӗллевпе федераци тата республика хыснисенчен 14 миллион тенкӗ уйӑрӗҫ. 13 миллион тенке яхӑнӑшӗ – федераци хыснинчен.

Ҫӗрпӳ районӗнчи Чӑрӑш ялӗнчи плотинӑна та тӗпрен юсӗҫ. Ун валли 2,7 миллион тенкӗ ытла уйӑрӗҫ. Ку плотина авариллӗ лару-тӑрура. Ейӳ вӑхӑтӗнче яла шыв илет-мӗн. Ҫулталӑк каялла район администрацийӗ плотинӑн проект ӗҫне тумашкӑн 100 пин тенкӗ уйӑрнӑ.

Авӑн уйӑхӗн 22-мӗшӗнче ирхи 9 сехетре Шупашкарти васкавлӑ медпулӑшу пульницинчен пациент ҫухалнӑ. Петр Григорьевич Никитин ҫав кун пульницӑран пирус туртма тухнӑ, анчах палатӑна каялла таврӑнман.

Тӑванӗсен шухӑшӗпе, арҫын пирус илме кайма пултарнӑ. Ахӑртнех, вӑл ҫавӑн чухне ҫухалса кайнӑ. Петр Никитин 33 ҫулта, Патӑрьел районӗнчи Аслӑ Чемен ялӗнчен. Вӑл хулана пачах пӗлмест, пӗччен ҫӳреме хӑрать. Арҫын тӑванӗсене номерӗсене те пӑхмасӑр пӗлмест.

Арҫын ӑс-тӑн енчен арпашӑнма пултарать. Тӑванӗсем ӑна шыраса тупмашкӑн пулӑшу ыйтаҫҫӗ. Ӑна курсан ҫак номерпе шӑнкӑравлама ыйтаҫҫӗ: 8-937-395-71-20. Полици ӑна шарама пуҫланӑ ӗнтӗ.

Ӳсӗр чухне темӗн те пулать вӗт. Етӗрнере пурӑнакан хӗрарӑм, ӳсӗрскер, йӑнӑшпа уксус ӗҫсе пульницӑна лекнӗ. Кун пирки ЧР ШӖМӗ пӗлтерет.

63 ҫулти хӗрарӑм юпа уйӑхӗн 11-мӗшӗнче килӗнче ӳсӗр пулнӑ. Хайхискер 22 сехетре эрех ӗҫес тенӗ те уксус кӗленчине ярса тытнӑ. Унӑн пырӗ ҫав самантрах пиҫсе кайнӑ. Ӑна районти пульницӑна часрах ӑсатнӑ.

Сӑмах май, утӑ уйӑхӗн 12-мӗшӗнче кунашкал пӑтӑрмах Вӑрмар районӗнче те пулнӑ. 43 ҫулти хӗрарӑм та эрех ӗҫес тесе йӑнӑшпа уксус кӗленчине тытнӑ. Вӑл килӗнче 20 грамм ҫутӑ шӗвек тупнӑ, анчах вӑл уксус пулнине ҫӑвара хыпсан ҫеҫ пӗлнӗ. Тӑванӗсем пӗр тӑхтамасӑр васкавлӑ медпулӑшу чӗннӗ.