«Ҫыхӑнура» порталти сӑн

Шупашкарта ҫу уйӑхӗн 9-мӗшӗнче, Ҫӗнтерӳ кунӗнче, Шупашкарта хӑрушсӑрлӑх мерисемпе тивӗҫтерес тесе мобильлӗ ҫыхӑну чӑрмавлӑрах ӗҫлеме пултарӗ. Ҫавӑн пекех хӑш-пӗр ҫӗрте транспорта ҫӳреттермӗҫ.

Аса илтерер: кӑҫал Шупашкарта ҫар техникин парачӗ, «Вилӗмсӗр полк», «Ҫӗнтерӳ ҫуртисем» акцисем иртӗҫ, каҫхине салют пулӗ. Ҫавӑн пекех вӑрҫӑ вӑхӑтӗнчи тумтирӗн «Ҫӗнтерӳ моди» ретро-фестиваль йӗркелӗҫ.

cheb-centr.soc.cap.ru/press-centr сӑнӳкерчӗкӗ

Ӗнер Чӑваш Енре «Победа 80» (чӑв. Ҫӗнтерӳ 80) авточупу иртнӗ. Унта хутшӑннисене салтак пӑттипе сӑйланӑ.

Авточупӑва республикӑн Ӗҫ тата социаллӑ хӳтлӗх министерстви Республикӑри ветерансен канашӗпе (ертӳҫи — Генрих Васильев) йӗркеленӗ. Авточупӑва республикӑн тӗрлӗ районӗнчи 80 автомобиль тата 160 ытла ветеран хутшӑнна.

Мероприятие республикӑн ӗҫ тата социаллӑ хӳтлӗх министрӗн ҫумӗ Лариса Арсентьева, Раҫҫей Геройӗ Николай Гаврилов, Чӑваш Енӗн Общество палатин председателӗ Ванифатий Шайкин, Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центр директорӗ директорӗ Светлана Милкина саламланӑ.

playbookpro.ru сайтри сӑн

Аслӑ Ҫӗнтерӳ пулнӑранпа 80 ҫул ҫитнӗ май Чӑваш Енре пурӑнакансемпе кунта килнӗ хӑнасем тӳлевсӗр экскурсие хутшӑнма пултараҫҫӗ.

Ҫу уйӑхӗн 8 тата 9-мӗшӗсенче Шупашкарти тӗп урамсенче тата историре юлнӑ вырӑнсенче ҫуран ҫӳремелли экскурси ирттерӗҫ. Маршрут Шупашкар Арбачӗ, Хӗрлӗ тӳрем, ҫуран каҫмалли ҫутӑ кӗперӗ, «Анне» монумент, Ҫеҫпӗл урамӗ, К .В .Иванов скверӗ тата Мускав ҫыран хӗрри патӗнчен иртӗ. Пӗрремӗш кунхине экскурси 12:00, 18:00 сехетсенче пуҫланӗ. Иккӗмӗш кунхине 12:00 тата 15:00 сехетсенче пухӑнӗҫ. Ушкӑнра 20 ҫын таран пулӗ .

Экскурсие маларах ҫырӑнмалла: заявкӑсене ҫу уйӑхӗн 6-7-мӗшӗсенче йышӑнаҫҫӗ. Ҫак номерсемпе — 8(8352) 23-20-31, 8(8352) 23-20-34 — шӑнкӑравласа тӗплӗнрех ыйтса пӗлме пулать.

Сӗнтӗрвӑрринчи мурал. Регина Антонова тунӑ сӑн

Аслӑ Ҫӗнтерӳ пулнӑранпа 80 ҫул ҫитнӗ май Шупашкарта, Сӗнтӗрвӑрринче ҫӗнӗ муралсем ӳкереҫҫӗ.

Сӗнтӗрвӑрринчи Николаев урамӗнчи 87-мӗш «а» ҫурт стени ҫине Ирӗке кӑларнӑ салтак палӑкне ӳкереҫҫӗ. Унӑн оригиналӗ Берлинта вырнаҫнӑ.

Шупашкарта ака уйӑхӗн пуҫламӑшӗнче «Ҫӗр Аннемӗр чӗнет!» палӑка ӳкерме пуҫланӑ. Вӑл Воробьев композиторсен урамӗнчи 5-мӗш ҫурт стени ҫинче пулӗ.

"Контактри" сӑн

Ӗнер Шупашкарта йытӑсен парачӗ иртнӗ. Кӑҫалхипе ӑна 3-мӗш хут йӗркеленӗ.

«Чӑваш Ен» ПТРК журналисчӗ Вероника Павлова палӑртнӑ тӑрӑх, парад ҫулсерен илемленсе те илемленсе пырать. Йытӑсене мӗнле кӑна тум тӑхӑнтартман пулӗ! Белоснежка, Хӗрлӗ Калпак, король...

Парада прютри йытӑсем ертсе пынӑ. Вӗсем те хитре тумланнӑ.

«Контактри» сӑн

Кӑҫал Шупашкарта «Вилӗмсӗр полк» акци онлайн мелпе мар, ахаль чухнехи пек иртӗ. Вӑл ҫу уйӑхӗн 9-мӗшӗнче, Ҫӗнтерӳ кунӗнче, пулӗ.

Акцие хутшӑнакансене ҫав кун Наци вулавӑшӗ умӗнче 11 сехетре кӗтеҫҫӗ. 12 сехет те 20 минутра утма тытӑнӗҫ.

Сӑмах май, Ҫӗнӗ Шупашкарта ку массӑллӑ мероприятие ирттермессине пӗлтернӗ. Ҫакна хӑрушсӑрлӑхпа ҫыхӑнтарнӑ.

cap.ru сайтри сӑн

Шупашкарти йывӑҫсене 4 ҫул сӑрламан. Ку ӗҫе Алексей Ладыков хула администрацийӗн пуҫлӑхӗ пулнӑ чухне пӑрахӑҫланӑ. 2021 ҫулта вӑл кун валли уйӑрнӑ укҫана хунавсем лартмашкӑн яма хушнӑ. Ун чухне пӗлтернӗ тӑрӑх, Шупашкарта ҫулсерен йывӑҫсене шуратма 290 пин тенкӗ тӑкакланнӑ.

Хальхи ертӳҫӗ Владимир Доброхотов вара ку ӗҫе ҫӗнӗрен пуҫарнӑ: йывӑҫсене ҫу уйӑхӗнчи уявсем пуҫланиччен шуратса пӗтерме хушнӑ. Ӗҫ пырать: Ашмарин, Дзержинский, Гузовский урамӗсенче йывӑҫсене шуратнӑ.

"Контактри" сӑн

Ака уйӑхӗн 18-мӗшӗнче Ҫӗнӗ Шупашкарта Совет тата Винокуров урамӗсенчи суту-илӳ центрӗсенче мина хунӑ тесе хыпар килнӗ. Кинолог йытӑпа вырӑна тӗрӗслеме ҫитнӗ. Телее, нимӗнле мина та пулман. Ҫынсене те эвакуацилеме тивмен.

Шӑнкӑравлакана тупнӑ. Вӑл – 34 ҫулти хӗрарӑм. Вӑл ӳсӗрле хӗр тусӗн телефонӗнчен шӑнкӑравласа мина хуни пирки пӗлтернӗ. Ун тӗлӗшпе пуҫиле ӗҫ пуҫарнӑ. Ӑна 700 пин тенкӗ таран штраф тӳлеттерме е 5 ҫул таран тӗрмене хупма пултараҫҫӗ.

cap.ru сӑнӳкерчӗкӗ

Улатӑрти ращара 26 йывӑҫ ҫухалнине хула ҫыннисем асӑрханӑ. Вырӑна Вӑрман хуралӗн инспекторӗсем ҫитнӗ. Вӗсем 4 хурӑн, 5 юман тата 17 тирек ҫуккине палӑртнӑ.

Материалсене Улатӑрти полици уйрӑмне пӑхса тухма панӑ. Ведомство йывӑҫсене кам каснине тӗпчӗ.

Йывӑҫ каснине асӑрхасан ҫак номерсемпе шӑнкӑравлама ыйтаҫҫӗ: 8 (8352) 40-24-00 тата 8-800-100-94-00.

Шупашкар хулинче Тӑван ҫӗршывӑн аслӑ вӑрҫине хутшӑннӑ ветерансем ҫинчен фильм ӳкереҫҫӗ. Ку ӗҫе ачасене те явӑҫтарнӑ.

Хулари шкулсенче вӗренекен, асӑннӑ социаллӑ центрпа туслӑ ҫыхӑну тытакан хастар ачасем вӑрҫа хутшӑннӑ ветерансемпе тӗл пулаҫҫӗ, вӗсенчен интервью илеҫҫӗ, хӑйсен аллипе ӑсталанӑ открыткӑсемпе савӑнтараҫҫӗ, сӑвӑ вуласа параҫҫӗ. Вӗсемпе пӗрле центрӑн пресс-секретарӗ ҫӳрет.

Кайран ҫав кӗске видеосенчен та видео хатӗрлеме палӑртаҫҫӗ. «Ку ӗҫ питех те калӑпӑшлӑ та яваплӑ. Хамӑр та пӑлханатпӑр», — теҫҫӗ центрта.