uchiprof.ru сайтри сӑн

Шупашкарти тухтӑр, 67-ри хӗрарӑм, ултавҫӑсене 3 млн тенкӗ ытла куҫарса панӑ.

Ӑна полицейскисем, банк ӗҫченӗсем, ӗҫтешӗсем укҫа куҫармалла мар тесе ӳкӗте кӗртме тӑрӑшнӑ. Анчах вӑл никама та итлемен. Ывӑлне кун пирки пӗр уйӑхран кӑна каласа кӑтартнӑ. Кун хыҫҫӑн ывӑлӗ ҫине тӑрса ӑна полицие кайма ыйтнӑ. Тинех килӗшнӗ вӑл.

Акӑ мӗн пулса иртнӗ: хӗрарӑм патне «пенси фончӗн ӗҫченӗсем», «Роскомнадзор, ФСБ, Тӗп банк ӗҫченӗсем» пӗр вӗҫӗм шӑнкӑравланӑ, ултавҫӑсем унӑн укҫине Укаринӑна пулӑшма ярасшӑн тесе хӑратса пӗтернӗ, счет ҫинчи пухнӑ укҫине, пӗлӗшӗсенчен кивҫен илсе йӑлтах «резерв фонда» куҫарма хушнӑ.

cheb-centr.soc.cap.ru сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта паян ҫӑкӑр пӗҫернӗ. Тӗрӗссипе каласан, ку вӑл психолог унта ӗҫлекенсемпе ирттернӗ тренингӑн пӗр пайӗ шутланать.

Йывӑрлӑхри хӗрарӑмсене пулӑшакан пай психологӗ Елена Филиппова шухӑшланӑ тӑрӑх, социаллӑ сферӑра ӗҫлекенсен ҫынна пулӑшнипе пӗрлех хӑйсен та вӑй-хал пухма пӗлмелле. Ҫакна тӗрлӗ мелпе тума пулать, ҫав шутра чун киленӗҫӗпе те. Тӗрӗс апатланни те питех те пӗлтерӗшлӗ. Психолог меслечӗпе ҫӑкӑр пӗҫерме вара ӑсталӑх лаҫҫинче хӑнӑхнӑ.

Шупашкарта «В.Н.Тарасов строитель скверӗ» пулӗ. Ҫӗнӗ вырӑна ҫапла ят парасси пирки йышӑнӑва Шупашкар мэрӗ Станислав Трофимов алӑ пуснӑ.

Сквер «Богданкӑра» 8-мӗш микрорайонта пулӗ. Сквера ҫапла ят парассине адрес комиссийӗнче пӑхса тухнӑ, нихӑш пайташ та хирӗҫ пулман.

Хальлӗхе ҫав вырӑнта – уй.

life.ru сайтри сӑн

Ҫӗнӗ Шупашкарта икӗ радио ӗҫлеме ирӗк илнӗ: «Радио Вера» тата Relax FM. Ҫапла йышӑну тунӑ федераци конкурс комиссийӗн черетлӗ ларӑвӗнче.

Сӑмах май, ҫак икӗ радиостанци пӗлтӗрхи ҫу уйӑхӗнче Шупашкарта эфира тухма ирӗк илнӗ. «Радио Вера» — тӗн тата культура радиостанцийӗ. Хальхи вӑхӑтра вӑл Раҫҫейри 142 хулара тата ют ҫӗршывсенче эфира тухать.

Relax FM – лӑплантаракан юрӑ-кӗвӗ радистанцийӗ, эфирта диджейсем ҫук.

Яндекс сӑнӳкерчӗкӗ

Шупашкарта «Мир Луксор» чарӑну текех пулмӗ. Тӗрӗсрех каласан, апла мар-ха: чарӑнӑвӗ пулӗ, анчах урӑх ятлӑ. Тата ята паян-ыранах улӑштармӗҫ, «Уҫӑ хула» порталта сасӑлав ирттернӗ хыҫҫӑн.

Чарӑну ятне улӑштарма республикӑн Патшалӑх Канашне КПРФ парти ячӗпе суйланнӑ Александр Андреев депутат ыйтнӑ. Шупашкар хулинчи адрес комиссийӗ сӗнӗве ырланӑ, комисси йышӗнчи пур ҫичӗ ҫын та пӗр шухӑшлӑ пулнӑ.

Чарӑнӑва ҫапларах ят пама сӗннӗ: ООТ «Детский Мир» (чӑв. Ача-пӑча тӗнчи), ООТ «Торговый Дом «Детский» (чӑв. «Ачасен» суту-илӳ ҫурчӗ), ООТ «Проспект Ленина» (чӑв. Ленин проспекчӗ).

Сӑмах май каласан, «Мир Луксор» кинотеатра тахҫанах сутма хӑтланаҫҫӗ иккен.

ШӖМ тунӑ сӑн

Ӗнер каҫхине Шупашкарти Ярмӑрккӑ урамӗнче икӗ арҫын пистолетран сывлӑшалла пенӗ. Вӗсене тытса чарнӑ.

Мӗн пулса иртнӗ-ха унта? 37 ҫулти арҫын ӑнлантарнӑ тӑрӑх, вӑл ҫутӑ-сасӑллӑ патронлӑ пистолета 2021 ҫулта хӑйне хӑрушсӑрлӑхпа тивӗҫтерес тесе туяннӑ. Ӗнер вара тусӗпе эрех ӗҫнӗ те ӑна пистолетран персе пӑхма сӗннӗ.

Полицейскисем пистолета туртса илнӗ, ӑна экспертизӑна парӗҫ. Халӗ ӗҫ-пуҫа малалла тишкереҫҫӗ.

forum.na-svyazi.ru сӑнӳкерчӗкӗ

Шупашкарти В.А. Архипов генерал-майор ячӗпе хисепленекен кадет шкулӗнче вӗренекен ачасем ҫанталӑк сиввине пӑхмасӑрах урама тухса тӑнӑ.

Вӗсем ҫул-йӗр хӑрушсӑрлӑхӗн правилисене ҫапла майпа аса илтереҫҫӗ иккен. Акцие республикӑн патшалӑхӑн ҫул-йӗр хӑрушсӑрлӑхӗн инспекцийӗпе пӗрле ирттернӗ.

Граждан урамӗнче вӗсем плакатсемпе урама тухнӑ.

Паян Шупашкарта 27 градус сивӗ пулнӑран 1–9-мӗш класс ачисене килтен вӗренме ирӗк панӑ.

ШӖМ тунӑ сӑн

Шупашкарта 22 ҫулти воспитатель ултавҫӑсен аллине лекнӗ. Вӑл вӗсене 1 млн тенкӗ ытла куҫарса панӑ.

Палламан ҫын ун патне шӑнкӑравласа унӑн сим-карттӑпа усӑ курмалли вӑхӑт вӗҫленнине пӗлтернӗ. Килӗшӗве тӑсмалла тесе смс-ҫырупа килнӗ кода калама ыйтнӑ.

Унтан пикепе воспитательпе банк тата ФСБ «ӗҫченӗсем» ҫыхӑннӑ. Такам унӑн ячӗпе кредит илнӗ-мӗн, укҫана Украинӑна куҫарасшӑн имӗш. Палламан ҫын укҫана сыхласа хӑвармали мел пирки те каланӑ, ҫапла воспитатель микрозаймсем тата пӗлӗшӗсенчен кивҫен илнӗ, ҫав укҫана пӗтӗмпех ултавҫӑсем каланӑ счетсем ҫине куҫарнӑ.

Ултав серепине лекнине ӑнлансан вӑл полицие кайнӑ.

cheb-centr.soc.cap.ru сӑнӳкерчӗкӗ

Шупашкарта пурӑнакан 87 ҫулти Нина Шушканова чунне юрласа уҫать. Кинемее хулари халӑхӑн социаллӑ ыйтӑвӗсене тивӗҫтерекен комплекслӑ центрӑн социаллӑ ӗҫченӗ Ольга Филиппова пӑхса пулӑшать.

Инженер шухӑшлавӗллӗ хӗрарӑм тӗрӗс наукӑсене аван пӗлсен те чунӗпе ҫемҫе, юрлама ӑста. Хӗрарӑм инженер пулса Трактор заводӗнче, ВНИИРта, Электроаппаратура заводӗнче нумай ҫул ӗҫленӗ.

Урама уҫӑлма тухсан та (унта тухса кӗме ӑна социаллӑ ӗҫчен пулӑшать) вӑл юрлама хатӗр. Унӑн репертуарӗнче — халӑх юррисемпе хӑй ҫамрӑк пулнӑ ҫулсенчи шлягерсем.

Нина Ивановнӑна Ольга Валентиновна соцӗҫчен ӑшӑ сӑмахпа та хавхалантарса тӑрать.

miloserdie.ru сайтри сӑн

Шупашкарти 15 ҫулти хӗрача ултавҫӑсене 370 пин тенкӗ куҫарса панӑ. Йӑлтах палламан ҫын шӑнкӑравланинчен пуҫланнӑ.

Ҫак арҫын сим-карттӑ срокӗ тухнӑ, ӑна тӑсмалла тесе ӗнентернӗ, смс-ҫырупа килнӗ кода калама хушнӑ. Хӗрача пӗтӗмпех пӗлтернӗ. Ҫав кунах ун патне «Чӑваш Енри Тӗп ҫар округӗн Ҫар прокуратурин юстици советникӗ» шӑнкӑравланӑ, унччен шӑнкӑравланӑ палламан арҫын ултавҫӑ пулнине, вӑл хӗрача ячӗпе счет уҫнине, унти ҫур миллион тенке Украина ҫарӗсем валли куҫарма хӑтланнине пӗлтернӗ. Куншӑн хӗрачана явап тыттараҫҫӗ тесе хӑратнӑ. Анчах кун пирки никама та калама хушман. Хӗрача хӑраса ӳкнӗ, палламан ҫын хушнине пурнӑҫласа пынӑ — амӑшӗ ҫывӑрнӑ вӑхӑтра унӑн телефонӗ урлӑ онлайн майпа 370 пин тенкӗ кредит илнӗ, ӑна тӗрлӗ счет ҫине куҫарнӑ.

Аферистсем юлашкинчен хӗрачана тур паллисем тӑрӑх биометри тумалла тесе ӗнентернӗ, тумне хывса камера умӗнче ҫаврӑнма хушнӑ.