"Про Город" сайтри сӑн

Паян, нарӑс уйӑхӗн 8-мӗшӗнче, Шупашкарти Эльмен урамӗнчи чарӑнура арҫын виллине тупнӑ. Кун пирки «Про Город» хаҫата халӑх корреспонденчӗ пӗлтернӗ.

Арҫын чарӑнура сак ҫинче ларнӑ вӑхӑтрах вилсе кайнӑ. «Васкавлӑ медпулӑшу килчӗ. Арҫын ирхи 8 сехетренпех ҫапла ларнӑ теҫҫӗ», - пӗлтернӗ халӑх корреспонденчӗ «Про Город» хаҫата.

multiurok.ru сайтри сӑн

Шупашкарта пурӑнакан ҫемье тин ҫуралнӑ хӗр пӗрчине Февралина ят панӑ. Ку ята Калинин районӗн администрацийӗн ЗАГС пайӗнче регистрациленӗ.

Пӗлме интереслӗ: революци хыҫҫӑн ачасене Февраль революцине халалласа ҫакнашкал ят пама тытӑннӑ. Вӑл «февральте ҫуралнӑскер» тенине пӗлтерет.

Ҫавӑн пекех Калинин районӗн администрацийӗн ЗАГС пайӗнче Мелания ята регистрациленӗ.

"Про Город" сайтӗнчи сӑн

Нарӑс уйӑхӗн 5-мӗшӗнче Шупашкарти Алькеш поселокӗнче Гоголь урамӗнче васкавлӑ медпулӑшу пациент патне ҫитеймен. Йӑлтах - юртан тасатман ҫула пула.

Васкавлӑ медпулӑшу машини тасатнӑ ҫул таран ҫеҫ ҫитейнӗ, малалла каяйман. Амӑшӗпе ачин машина патне хӑйсен утса тухма тивнӗ. Кун пирки «Про Город» хаҫат пӗлтернӗ.

Малтанлӑха хыпарланӑ тӑрӑх, ҫав ҫулӑн участокӗ «Дорэкс» килӗшӗвӗнче ҫук. Епле майпа? Прокуратура ӗҫ-пуҫа малалла тӗпчет.

realty.rbc.ru сайтри сӑн

Кӑҫал Шупашкар хулин ҫуралнӑ кунне Раҫҫейӗн чечеклӗ карттине тӑваҫҫӗ. Тӗп хуламӑр 555 ҫул тултарӗ.

Карттӑна ҫу уйӑхӗнчех тума пуҫлӗҫ. Ун чухне чечек хунавӗсене лартма тытӑнӗҫ. Акцие ҫӗршыври тӗрлӗ регион хутшӑнӗ.

Чечексене, тӗрлӗ регионти питомникре ӳстернӗскере, кӳлмекре лартӗҫ. Хальлӗхе заявкӑсене йышӑнаҫҫӗ. Хула администрацийӗн пуҫлӑхӗ Денис Спирин пӗлтернӗ тӑрӑх, нарӑс вӗҫӗнче, пуш пуҫламӑшӗнче акцие миҫе регион хутшӑнни паллӑ пулӗ.

cheb-centr.soc.cap.ru сӑнӳкерчӗкӗ

Хӗрлӗ Чутай районӗнче ҫуралнӑ, мӗн ҫамрӑкранпа Шупашкарта пурӑнакан Галина Деомидова нумаях пулмасть 80 ҫул тултарнӑ.

Галина Кирилловна — тантӑшӗсемшӗн чӑн-чӑн тӗслӗх пулса тӑма тивӗҫ ҫын. Вӑл Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центра 10 ҫула ытла ҫӳрет. Унта кинемей тӗрлӗ спорт хусканӑвӗ тӑвакан ушкӑнпа занятисене хутшӑнать, алӑ ӗҫӗпе аппаланать. Унсӑр пуҫне вӑл Пукане тата Пантомима театрӗсенче вылять. Ыттисене мӗнпе те пулин пулӑшмалла пулсан Галина Деомидова малтисен йышӗнче.

«Социаллӑ центр мар пулсан эпӗ хама епле туяттӑм-ши — пӗлместӗп те. Кунта килсе ҫӳренӗрен ман кӑмӑл та лайӑх, хама аван туятӑп, пурнӑҫпа хавхаланса пурӑнатӑп», — хавасланса палӑртать юбиляр.

"Лиза.Алерт" шырав отрячӗн сӑнӳкерчӗкӗ

Шупашкарта икӗ арҫына шыраҫҫӗ. Вӗсенчен пӗри пӗлтӗрхи чӳк уйӑхӗн 3-мӗшӗнче ҫухалнӑ, тепри — кӑрлачӑн 11-мӗшӗнче.

Пӗлтӗрхи чӳк уйӑхӗнче ҫухални — 61 ҫулти Анатолий Кириллов. Вӑл 170 см ҫӳллӗш, начар пӳ-силлӗ, ҫӳҫӗ тӗксӗмрех хӑмӑр, куҫӗ сӑрӑ тӗслӗ. Мӗн тӑхӑнса тухса кайнине пӗлмеҫҫӗ.

Кӑрлач уйӑхӗн 11-мӗшӗнче 49 ҫулти Андрей Николаев ҫухалнӑ. Вӑл 166 см ҫӳллӗш, вӑтам пӳ-силлӗ, ҫӳҫӗ ҫырӑ, куҫӗ хӑмӑр. Капюшонлӑ кӑвак куртка, сӑрӑ тӗслӗ спорт шӑлаварӗ, хура атӑ, хура калопак тӑхӑннӑ.

"Чеб.ру" сайтри сӑн

Атӑл леш енчи Сосновкӑри ача пахчине Ҫурҫӗр, Первомайски тата Октябрьски поселокӗсенче пурӑнакан шӑпӑрлансем те ҫӳреҫҫӗ. Ҫулӗ ҫывӑхах мар, ҫавӑнпа Шупашкар хула администрацийӗн ачасене автобуспа илсе ҫӳремелле.

Автобусӗ 2022 ҫулхи нарӑс-ҫӗртме уйӑхӗсенче ҫӳренӗ-ха, анчах кайран рейс ҫула тухма пӑрахнӑ. Кун хыҫҫӑн прокуратура суда тавӑҫ тӑратнӑ. 2023 ҫулхи ҫӗртмере суд йышӑннӑ тӑрӑх, 3 уйӑх хушшинче ачасене автобуспа илсе ҫӳреме тытӑнмалла пулнӑ. Чӳк уйӑхӗнче автобус рейса тухнӑ. Анчах ҫак кунсенче транспорт ҫӗмӗрӗлнӗ, хальлӗхе вӑхӑтлӑх автобус ачасене илсе ҫӳрет.

ШӖМ тунӑ сӑн

Ҫӗнӗ Шупашкарта пурӑнакан 64 ҫулти арҫын патне мессенджерта палламан ҫын шӑнкӑравланӑ. Ҫав хӗрарӑм пӗлтернӗ тӑрӑх, арҫыннӑн патшалӑх пулӑшӑвӗсен порталӗнчи харпӑр кабинета ҫӗмӗрнӗ иккен. Кунпа усӑ курса ултавҫӑсем унӑн ячӗпе кредит илесшӗн имӗш.

Ҫак хӗрарӑм хушнипе арҫынпа арӑмӗ банка 500 пин тенкӗ кредит илме кайнӑ. Укҫана вӗсен «хӑрушсӑр счет» ҫине куҫармалла пулнӑ.

Банк менеджерӗ сисчӗвленнӗ: арҫын пӑлханнӑ, ыйтусене йӗркеллех хуравламан. Банк ӗҫченӗ ултавҫӑсем усӑ куракан мел пирки каласа кӑтартсан тин арҫын йӑлтах каласа панӑ. Менеджер ӑна полицие кайма сӗннӗ.

Мария Большакова менеджера вара ШӖМӗн Тав хучӗпе чысланӑ.

triptonkosti.ru сайтри сӑн

Шупашкарти 32-ри хӗрарӑм Леонардо Ди Каприопа курнӑҫма ӗмӗтленнӗ. Тӗнче тетелӗнче унпа ҫыхӑнас тесе комментарисем хӑварнӑ, ҫырусем янӑ. Кӗҫех ун патне электронлӑ ҫыру килнӗ, Ди Каприоран-мӗн. Актер ӑна юратнине пӗлтернӗ. Вӗсем 5 уйӑх хутшӑннӑ.

Кайран ӑна суперфанатсен йышне кӗме сӗннӗ, ҫапла актерпа видео урлӑ калаҫма пулать иккен. Анчах ку укҫалла-мӗн. Хӗрарӑм 80 пин тенкӗ кредит илсе куҫарса панӑ.

Анчах вӑл ултавҫӑсемпе калаҫнине чухламан.

Хайхи «актер» видео урлӑ чӑнах та шӑнкӑравланӑ. Анчах - пӗр ҫеккунтлӑха кӑна. Хӗрарӑм ӑна курса та юлайман.

Кайран вӗсем малалла ҫырӑннӑ. «Леонардо ди Каприо» Шупашкара килме шантарса ҫул укҫишӗн тӳлеме ыйтнӑ. Ӑна каялла тавӑрса парать имӗш. Ҫавӑн чухне тин 32-ри хӗрарӑм вӑл Голливуд ҫӑлтӑрӗпе мар, ултавҫӑпа калаҫнине ӑнланнӑ.

"На связи" форумри сӑн

Шупашкарти аэропорт ҫулла Сочи хулине вӗҫмелли билетсене сутма пуҫланӑ. Nordwind Airlines компани ун чухне эрнере икӗ рейс тӑвӗ - тунтикун тата эрнекун.

Самолет Сочие ака уйӑхӗнче вӗҫме тытӑнӗ, октябрьте чарӑнӗ. Шупашкартан унта 3 сехет те 20 минут вӗҫмелле пулӗ. Билет хакӗ - 5796 тенкӗрен пуҫласа.