Олег Николаевӑн Телеграмри каналӗнче илнӗ сӑнӳкерчӗк

Шупашкарӑн 555 ҫулхине ҫурла уйӑхӗн 15-18-мӗшӗсенче уявлӗҫ. Ун чухне Шупашкара легендарлӑ «Стрижи» пилот ушкӑнӗ тата халӑх юратакан ҫӗршыври паллӑ юрӑҫ Шаман килӗҫ.

Чӑваш Енӗн Элтеперӗ Олег Николаев Телеграмри хӑйӗн каналӗнче пӗлтернӗ тӑрӑх, ҫулталӑк тӑршшӗпех тӗрлӗ пысӑк объект: спорт, вӗренӳ учрежденийӗсем, промышленность производствисем, туризмпа хӑнасене йышӑнакан объектсем уҫӑлӗҫ. Юсаса ҫӗнетнӗ Шупашкарти аэропорта та кӑҫал уҫасшӑн.

9111.ru сайтри сӑн

Шупашкарти хӗрарӑм, бухгалтерта ӗҫлекенскер, ултавҫӑсен аллине лекнӗ. Вӑл палламан ҫынсем каласа тӑнипе темиҫе кредит илнӗ. Пӗтӗмпе - 905 пин тенкӗ. Ҫак укҫана вӑл йӑлтах темӗнле счетсем ҫине куҫарнӑ.

Ун патне малтае пуҫлӑхӗнчен смс-ҫыру килнӗ, лешӗ палламан ҫынсем шӑнкӑравласан итлеме хушнӑ. Чӑннипе вара вӑл ултавҫӑ пулнӑ. Банксенчен кредит илнӗ чухне хӗрарӑм укҫа машина тата гараж илме кирлӗ тесе каланӑ. Унтан ултавҫӑсем амӑшӗн счечӗ те хӑрушлӑхра пулнине пӗлтернӗ. Хӗрӗ амӑшӗ патне кайнӑ. Амӑшӗ вара ӑна ултавҫӑсем пирки ӑнлантарнӑ, полицие кайма хушнӑ.

Кун тӗлӗшпе пуҫиле ӗҫ пуҫарнӑ.

cheb-centr.soc.cap.ru сӑнӳкерчӗкӗ

Шупашкарти кинемейсем илемлӗ сумкӑсемпе клатчсем ҫыхаҫҫӗ тата ҫӗлеҫҫӗ. Кун пек ылтӑн алӑллӑ ватӑсем Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центра ҫӳреҫҫӗ.

Унти «Кил хуҫи хӗрарӑмӗсем» клубра вӗсем тӗрлӗ ӑсталӑха алла илеҫҫӗ. Сумкӑсем ҫӗлеме тата ҫыхма кӑҫалхи ҫуркунне тытӑннӑ. Ал ӗҫне ватӑсене Ирина Ковеза ӗҫ инструкторӗ вӗрентнӗ.

«Тава тивӗҫлӗ канӑва тухиччен эпӗ машиностроени сферинче ӗҫленӗ. Ал ӗҫӗпе яланах аппаланас килнӗ, анчах вӑхӑт ҫитмен. Пӳрнесене вылятни пуҫ мимимшӗн те усӑллӑ», — тет 63 ҫулти Светлана Романова ал ӑсти.

cheb-centr.soc.cap.ru сӑнӳкерчӗкӗ

Шупашкарта пурӑнакан Людмила Порфирьева хулари халӑхӑн социаллӑ ыйтӑвӗсене тивӗҫтерекен комплекслӑ центра тусӗ сӗннипе ҫӳреме пуҫланӑ. Унта вӑл, ытти ватӑ пекех, хӑйӗн чун киленӗҫне тупнӑ.

Людмила Николаевна ал ӗҫӗпе аппаланма юратать. Вӑл ҫав енӗпе ӗҫлекен проектсене хастар хутшӑнать. Тава тивӗҫлӗ канури хӗрарӑм нумаях пулмасть татӑк-кӗсӗкрен тӗрлӗ япала ҫӗлеме тытӑннӑ. Ача пахчинче педагог-воспитатель ӗҫӗнче тимлесе пенсие тухнӑ хӗрарӑм ҫӗвӗ машини умне хаваслансах ларать.

Шупашкарӑн 555 ҫулхи юбилейне Раҫҫейри паллӑ юрӑҫ Шаман килесси пирки пӗлтернӗччӗ. Ку пуҫару – Анатолий Аксаковӑн, шӑпах вӑл ӑна чӗннӗ. Депутат ун чухнех Шамана хыснари укҫапа тӳлемессине пӗлтернӗччӗ.

Кам тӳлӗ-ха юрӑҫшӑн? Шаман пирки пӗлтерсенех Патшалӑх Канашӗн депутачӗ Константин Степанов ун вырӑнне чӑваш эстрада артисчӗсене чӗнме чӗнсе ҫырупа тухнӑ.Ун патне халӗ хурав килнӗ.

Шупашкар хула администрацийӗ ҫырура пӗлтернӗ тӑрӑх, Шаманшӑн хулари предприятисем тӳлӗҫ. Ҫавӑн пекех чӑваш эстрада артисчӗсем те концерт лартасси пирки хыпарланӑ.

"На связи" форумри сӑн

Шупашкарта Анне палӑкӗ умӗнче виҫӗ матрӳшке вырнаҫтарӗҫ. Ӳнерҫӗсем паян вӗсене ӳкерсе илемлетме тытӑннӑ ӗнтӗ.

Ҫак матрӳшкесен авторӗ – Ксения Кокель тата Василий Чапай пултаруллӑ ӳнерҫӗсем. Ҫапла вӗсем 555 ҫул тултаракан тӗп хуламӑра парне тума шутланӑ /юбилея ҫурла уйӑхӗнче паллӑ тӑвӗҫ/. Эскизсен дизайнерӗ – Яна Иванова.

Сӑмах май, унччен Ксения Кокель «Каскад» суту-илӳ центрӗ ҫывӑхӗнче Нарспи сӑнарне ӳкернӗ, Василий Чапай вара троллейбуса ӳкерсе илемлетнӗ.

"Про Город" сайтӗнчи сӑн

Паян Шупашкарта каллех автобус ҫуннӑ. Ку 12 сехетре «Наци вулавӑшӗ» чарӑну патӗнче, Ленин проспектӗнче, пулнӑ.

«Про Город» хаҫата халӑх корреспонденчӗ пӗлтернӗ тӑрӑх, пассажирсем тӗтӗмленме пуҫланӑ автобусран хӑвӑрт тухнӑ, аяккарах кайса тӑнӑ.

Ҫакна курнӑ ҫынсем каланӑ тӑрӑх, тӗтӗм астобусӑн малти пайӗнчен тата мотор отсекӗнчен тухнӑ. Халӗ общество транспорчӗ мӗншӗн ҫунма тытӑннине уҫӑмлатаҫҫӗ.

Галина Григорьева страницинчен илнӗ сӑнӳкерчӗк

Ӗнер Шупашкарти Юханшыв порчӗ умӗнчи лапамра хӑйӑр кӳлепесем тума пуҫланӑ. Кун пирки Галина Григорьева халӑх тетелӗнчи хӑйӗн страницинче пӗлтернӗ.

«Асамлӑ хӑйӑр» фестивале Екатеринбургри Андрей Кокорин, Красноярскри Сергей Асеев, Тӗменти Александр Скареднов, Ижевскри Лев Брюханов тата Мария Соловатова, Красноярскри

Дмитрий Бакламенко, Екатеринбургри Максим Беспалов, Питӗрти Ирина Алимурзаева, Шупашкарти Светлана Карцева, Анна Мартынова, Андрей Молоков, Елена Карнаева хутшӑнаҫҫӗ.

Шупашкарта вӑйлӑ ҫил чарӑнӑва ҫавӑрса ҫапнӑ, машинӑсем ҫине тимӗр хӳмесене вӗҫтерсе янӑ.

Ҫавӑн пек пӑтӑрмах ҫу уйӑхӗн 10-мӗшӗнчи вӑйлӑ ҫил вӑхӑтӗнче пулнӑ. Ӗмӗр сӳнми ҫулӑм патӗнчи тимӗр карта вара вӗҫсе кайса ҫывӑхри икӗ ҫӑмӑл машина: «Ладу-Калинӑпа» «Инфинити» – ҫине пырса кӗнӗ.

Машинӑсен хуҫисем йӗрке хуралҫисене чӗнсе илнӗ. Транспорта хуҫисем суда заявлени пама хатӗрленеҫҫӗ.

21.мвд.рф сӑнӳкерчӗкӗ

Шупашкарти банксенчен пӗринче ӗҫлекен Людмила Симакова ултӑ ҫынна ултавҫӑсен капкӑнне лекессинчен сыхласа хӑварнӑ. Ҫапла майпа вара хайхисен 2 миллион та 300 пин тенки ют алла куҫса каяйман.

Ҫу уйӑхӗн 7-мӗшӗнче хӗр Шалти ӗсен министерствин Шупашкарти управленийӗ пуҫлӑхӗ Александр Темнов хӑй тав тунӑ. Людмила Симакова аслӑ менеджер хирурга ултавҫӑсене 460 пин тенкӗ куҫарса парассинчен тытса чарнӑ. Врач ялтан ятарласа хулана килнӗ, банка кайнӑ.

Банкра ҫулталӑк ҫурӑ ӗҫленӗ вӑхӑтра хӗр ултӑ ҫынна ултавҫӑсенчен ҫӑлса хӑварнӑ.