«Ю» телеканал лутра ҫынсем пирки ятарлӑ кӑларӑм пуҫарнӑ. Унта 150 сантиметртан лутрарах ҫынсем хутшӑнаҫҫӗ.
Иккӗмӗш кӑларӑма Питӗрти артист тата шоумен Петр Чубко хутшӑннӑ. 29 ҫулти каччӑ 120 сантиметр ҫӳллӗш. Вӑл туйсене, корпоративсене, ҫуралнӑ кунсене ертсе пырать, 8 кинокартинӑра ӳкерӗннӗ. Петр Шупашкарти Марийӑпа 4 ҫул пурӑнать. Хӗр амӑшӗпе Чӑваш Енрен Питӗре куҫса кайнӑ.
Петр Марийӑран 5 ҫул аслӑрах. Хӗр 170 сантиметр ҫӳллӗш. Вӗсем тахҫанах пӗрлешӗччӗҫ-ха, анчах Марийӑн амӑшӗ Инесса Евгеньевна ҫакна хирӗҫ. «Ю» телеканалти кӑларӑм ҫак ҫемьери лару-тӑрӑва уҫӑмлатасшӑн.
Вакцинациленнисен хушшинче Раҫҫей правительстви лоторея ирттерни пирки унччен пӗлтернӗччӗ. Вӑл раштавӑн 1-мӗшӗнче вӗҫленмеллеччӗ. Анчах Правительство лотерейӑна ҫулталӑк вӗҫӗччен тӑсма йышӑннӑ.
Ҫӗнтерӳҫӗсен йышне 2 пин ҫын кӗрӗ. Кашнине 1-ер пин тенкӗ парӗҫ. Унччен палӑртнӑ тӑрӑх, лотерейӑна 1 пин ҫын хушшинче ирттермеллеччӗ. Лотерея авӑн уйӑхӗн 1-мӗшӗнче пуҫланнӑ. Ҫӗнтерӳҫӗсене компьютер хӑй суйлӗ. Ҫӗнтернӗ сертификат номерӗсене «Бонус за здоровье» порталта пичетлеҫҫӗ. Патшалӑх пулӑшӑвӗсен потралӗнче те информацие пӗлме пулать.
Укҫана илес тесен «Мир» банк карттин номерне кӑтартмалла, ҫакна 3 уйӑхран кая юлмасӑр тумалла. Кун хыҫҫӑн укҫа счет ҫине куҫӗ.
Раҫҫейри шкулсенче массӑллӑ мероприятисене ирттерме чарнӑ. Ку чару 2022 ҫулхи кӑрлаччен вӑйра пулмаллаччӗ. Чару мерисене тӑснӑ, массӑллӑ мероприятисене 2024 ҫулхи кӑрлач уйӑхӗччен ирттерме юрамӗ. Ку йышӑнӑва Раҫҫейӗн тӗп тухтӑрӗ Анна Попова алӑ пуснӑ.
Ку чару ятарлӑ 18 ҫул тултарман ҫӳрекен учрежденисене, спорт организацийӗсене те пырса тивет. Анчах ку чару аслӑ шкулсене, техникум-колледжсене пырса тивмест.
Малашне те ачасем пӗр класра вӗренӗҫ, пӳлӗмсене уҫӑлтарӗҫ, кашнин ӳт температурине виҫӗҫ. Сӑмах май, шкул ачисен каникулӗ чӳк уйӑхӗн 8-мӗшӗнче вӗҫленӗ.
Вӑраха тӑсӑлакан канмалли кунсем вӗҫленсен аслӑ шкулсене дистанци мелӗпе вӗрентме ирӗк панӑ. Хушӑва РФ Вӗрентӳпе ӑслӑлӑх министерстви хатӗрленӗ.
Документра палӑртнӑ тӑрӑх, чӳк уйӑхӗн 8-мӗшӗнчен аслӑ шкулсен тата ӑслӑлӑх организацийӗсен дистанци мелӗпе вӗрентмешкӗн ирӗк пур. Анчах вӗренекенсене кун пирки виҫӗ кун маларах пӗлтермелле, методика тӗлӗшпе пулӑшмалла. Ҫав вӑхӑтрах вӗренӳ пахалӑхӗ упранса юлтӑр тесе вӗренекенсем мӗнле ӗлкӗрсе пынине тӗрӗслемелле.
Аса илтерер: Чӑваш Енре канмалли кунсем чӳк уйӑхӗн 7-мӗшӗччен тӑсӑлӗҫ.
Раҫҫейре халӑх ҫыравӗ пырать. Хула ҫыннисем, тен, кун пек хӑнасене хапӑл мар. Анчах Красноярск крайӗнчи Казанка ялӗнче пурӑнакансем вӗсене кӗтсе илме хавас. Ял аякра вырнаҫнӑ, унта 249 ҫын пурӑнать, вӗсен 98 проценчӗ – чӑвашсем.
Ял-хуларан аякра вырнаҫнӑ Казанкӑра халӑх шучӗ чакнӑ тетӗр-и? Ҫук. 2010 ҫулта унта 240 ҫын пурӑннӑ. Кӑҫал 9 ҫын ытларах. Унта ҫынсем ял хуҫалӑхӗ тытаҫҫӗ, ачасем ҫуратса ӳстереҫҫӗ. Халӑха ялта юлма мӗн хистет-ха? Унта ҫитме ансат мар: Галанино сали таран машинӑпа темиҫе сехет каймалла, унтан паромпа Енисей урлӑ каҫмалла та 50 ҫухрӑм парӑнтармалла. Тавралла – тайга. Красноярскран ҫитме 5 сехет кирлӗ.
Ҫырав ирттерекенсене унти чӑвашсем наци тумне тӑхӑнса ҫӑкӑр-тӑварпа кӗтсе илнӗ. Унта тӗнче тетелӗ ҫукпа пӗрех. Ҫапах стационар телефонсем, спутник антеннӑсем пур. Ҫынсем унта ҫыхӑнусӑр пурӑнаҫҫӗ темелле, кунӗ-ҫӗрӗн телефонра чакаланмаҫҫӗ. Автобус вара тӑтӑшах ҫӳрет.
Казанка ҫыннисем культура ҫуртӗнче пӗчӗк музей йӗркеленӗ, унта йӑх несӗлтен юлнӑ япаласене пухнӑ. Ҫынсем чӑвашлах калаҫаҫҫӗ, наци уявӗсене паллӑ тӑваҫҫӗ, юрра-ташша манмаҫҫӗ. Шкулта ҫулталӑкне пӗрре чӑваш эрнине ирттереҫҫӗ.
Ҫӗнҫӗпӗр хулинчи пӗр шкулта виҫӗ ҫын вӗри шывпа тулнӑ шӑтӑка кӗрсе ӳкнӗ. ТАСС хыпарланӑ тӑрӑх, ҫакӑн пирки МИХсенче пӗлтернӗ хыҫҫӑн следовательсем пӑтӑрмаха пирки тӗрӗслев пуҫарнӑ.
12-мӗш лицей путвалӗнчи урай ишӗлнӗ хыҫҫӑн шӑтӑка виҫӗ арҫын персе аннӑ. «Ҫӗпӗр генераци компанийӗн» пресс-служби каласа панӑ тӑрӑх вӗсем унта ӑшӑ пӑрӑхӗсене тӗрӗслеме килнӗ пулнӑ. Шар курнисене пурне те пульница ӑсатнӑ.
Вӗсен сывлӑхӗ пирки регионти васкавлӑ пулӑшу паракан тӗп врач Ирина Большакова пӗлтернӗ. Вӑл рабочисене пиҫсе кайнисене сиплекен уйрӑмне хунине пӗлтернӗ. Ку самант тӗлне паллӑ ӗнтӗ: ҫынсем шӑпах вӗри шыв ӑшне ӳкнӗрен суранланнӑ. Ҫав вӑхӑтрах вырӑнти Сывлӑх министерстви пӗлтернӗ тӑрӑх виҫҫӗшӗ те халӗ реанимацире выртаҫҫӗ, лару-тӑру вӗсен йывӑр.
Ҫӗнҫӗпӗр облаҫӗн прокуратури хӑрушсӑрлӑх техникине, ҫавӑн пекех ӗҫ сыхлавӗпе ЖКХ саккунӗсене епле пӑхӑнса ӗҫленине тӗрӗслеме пуҫланӑ.
Маларах, юпа уйӑхӗн 13-мӗшӗнче, вӗри шывлӑ шӑтӑка Ҫӗнҫӗпӗрте тӑратса хӑварнӑ машшинсем кӗрсе ӳкнӗ. Ун чухне вӗсен айӗнчи асфальт вӗри шывлӑ пӑрӑх шӑтнӑран путнӑ.
Раҫҫей УФСБ-ӑн Саха (Якути) Республикинчи следстви уйрӑмӗ Свердловск облаҫӗнче ҫуралнӑ хӗрарӑм тӗлӗшпе пуҫиле ӗҫ пуҫарнӑ, ӑна хаклӑ метала пысӑк калӑпӑшпа саккуна пӑсса упранӑшӑн айӑплаҫҫӗ (Раҫҫей УК 191 ст. 4-мӗш пайӗ).
УФСБ ӗҫченӗсем оперативлӑ-шырав мероприятийӗсем ирттернӗ май 1960 ҫулта ҫуралнӑ Нерюнгри хӗрарӑмӗнчен пӗтӗмӗшле 6,6 кг ытла таякан сапаланнӑ ылтӑн туртса илнӗ. Ҫутҫанталӑк чӗртаварне хӗрарӑм урӑх тӑрӑхра сутма хатӗрленнӗ. Ҫак тӗллевпе вӑл ӑна «Нерюнгри – Пассажирски» чукун ҫул вокзалӗн патӗнчи вокзалҫум тӳремне илсе ҫитернӗ.
РФ Тӗп банкӗн котировки тӑрӑх туртса илнӗ хаклӑ металӑн хакӗ 32 млн тенке яхӑн танлашать.
— Ҫирӗплетнӗ айӑплав пӗтӗмлетӗвлӗ пуҫиле ӗҫе Саха (Якути) Республикин Нерюнгрин хула судне тӗплӗ пӑхса тухма янӑ, — пӗлтерет Саха (Якути) Республикин Раҫҫей УФСБ пресс-служби.
Биробиджан хӗррипе юхса иртекен Бира юханшыв тӗлӗнтермелле хурмӑллӑ пӑрпа витӗннӗ. Шыв ҫийӗнче пухӑнса ларнӑ хӑйне евӗр пӑрлӑ «икерчӗсене» вырӑнти халӑх ӳкерсе илсе халӑх тетелне вырнаҫтарнӑ. Хӑшӗ-пӗри пӑр калӑпне пиццӑпа танлаштарнӑ.
Тӗлӗнмелле ҫутҫанталӑк феноменӗ чылай хула ҫыннин кӑмӑлне ҫӗкленӗ, вӗсем ку пулӑм пирки тӗрлӗрен шӳтлеме пикеннӗ, теприсемсем вара хӑйсен шиклӗхне кӑтартнӑ. Тепӗр тесен, юлашки вӑхӑтра экологи пӑтӑрмахӗсем чылай пулса иртнӗрен, ҫакнашкал шиклӗх ҫавах ӑслӑ-тӑнлӑ пулнине пӗлтерет. Биробиджансем ҫак феномен сӑлтавне шыв ҫинче ҫуллӑ ункӑсем тӑвакан нефть юхса тухнипе ӑнлантарса пама пӑхнӑ. Анчах та «икерчӗсенчен» пӗрине ирӗлтерсен шӗвекре нефть тупайман.
Хулари гидрометеорологи бюровӗн ертӳҫи Елена Чернобровина каланӑ тӑрӑх, тӗрӗслесе пӑхнӑ пӑрта йӳҫекпе сӗлтӗ балансӗ йӗркеллӗ, пӑр катӑкӗсем хӑрушӑ мар. Вӗсен ҫапла хурмӑллӑ пулнин сӑлтавӗ вара температура хӑвӑрт улшӑннипе тата ункӑланса хытса ларма май панӑ ятарлӑ кӑпӑк тухнипе ҫыхӑннӑ.
Биробиджан — Еврей автономи облаҫӗн административлӑ центрӗ, унта 70 пин ытла ҫын пурӑнать. Бира — Амур шывӗн сулахай юппи.
Татьяна Голикова вице-пермьер юпа уйӑхӗн 30-мӗшӗнчен пуҫласа чӳкӗн 7-мӗшӗччен Раҫҫейре канмалли кунсем тума сӗнни пирки пӗлтернӗччӗ. Ку кӑшӑлвирус сарӑлнипе ҫыхӑннӑ.
Паян РФ Президенчӗ Владимир Путин йышӑну тунӑ. Ҫак кунсенче канмалли кунсем пулӗҫ. Кӑшӑлвирус енчен йывӑр лару-тӑруллӑ регионсенче юпан 23-мӗшӗнченпех кану кунӗсем тума сӗннӗ. Унашкаллисен чӳкӗн 7-мӗшӗ хыҫҫӑн та каникула тӑсма ирӗк пур.
Владимир Путин канмалли кунсенче те ӗҫченсен шалӑвӗ ҫавӑн пекех сыхланса юлмаллине каланӑ.
Паян Пӗтӗм Раҫҫейри халӑх ҫыравӗ пуҫланнӑ. Вӑл 1 уйӑх пырӗ, чӳк уйӑхӗн 15-мӗшӗнче вӗҫленӗ.
Чӑваш Енре 370 участок ӗҫлет. Вӗсем шкулсем, культура ҫурчӗсем, вулавӑшсем, нумай функциллӗ центрсем ҫумӗнче уҫӑлнӑ. Кӑҫал ҫырава технологисем пулӑшнипе ирттереҫҫӗ. Унта виҫӗ мелпе хутшӑнма пулать.
Пӗрремӗшӗ: киле пыракан ҫыравҫа кӗтсе илмелле. Иккӗмӗшӗ: хӑвӑр участока пыма пултаратӑр. Виҫҫӗмӗшӗ: Патшалӑх пулӑшӑвӗсен порталӗ урлӑ. Палӑртмалла: порталта хуравсем ҫине чӑвашла та хуравлама май пур (тӗрӗсленӗ хыҫҫӑн хӑш-пӗр ыйтусен хуравӗсем ҫеҫ вырӑсла пулнине калама пулать, пӗтӗмӗшле йӗркеллех куҫарнӑ).
Ҫыравҫӑн хӑй ҫумӗнче паспорт, планшет пулмалла. Ҫырава хутшӑнакансен 33 ыйтӑва хуравламалла. 23-шӗ – пӗтӗмӗшле ыйтусем: ӳсӗм, ҫемьери статус, чӗлхе тата ытти те. 10 ыйту ҫурт-йӗре пырса тивет. Ыйтусене хуравлама вӑтамран 23 минут кирлӗ. Пӗр ҫын пӗтӗм ҫемьешӗн хуравлама пултарать.
+0.3 °C