|
Раҫҫейре
 tamvesti.ru сӑнӳкерчӗкӗ Паян ҫӗршыв Президенчӗ Владимир ️Путин РФ Пенси тата Социаллӑ страховани фончӗсене пӗрлештересси ҫинчен калакан саккуна алӑ пуснӑ. Вӗсем малашне пӗрлехи Социаллӑ фонд шутланӗҫ. Ҫӗнӗлӗх патшалӑха социаллӑ тӳлевсене оперативлӑ, адреслӑ йӗркелесе пыма май парӗ. Раҫҫей Федерацийӗн пенси тата социаллӑ страховани фончӗ (Социаллӑ фонд) ӗҫе 2023 ҫулхи кӑрлач уйӑхӗн 1-мӗшӗнчен тытӑнӗ. Куҫӑм тапхӑрӗ 2 ҫула та тӑсӑлма пултарӗ. Ҫынсен пулӑшу ыйтма унчченхи адреспах каймалла. Хыпар ҫӑлкуҫӗ:
|
|
Статистика
 shlakov.net сайтри сӑн Кӑҫал 6 уйӑхра республикӑра 720 ҫын вӑйлах наркӑмӑшланнине палӑртнӑ. Вӗсенчен 325-шӗ эрех-сӑрапа минренӗ. 94 ҫын эрехпе наркӑмӑшланнине пула вилнӗ. 17 ҫула ҫитмен 34 ача спирт шӗвекӗ ӗҫсе хӑйне япӑх туйнӑ. 14 ҫула ҫитменнисен йышӗнче 14 яш-хӗр эрех ӗҫнине палӑртнӑ. Эрехпе ытларах Элӗк, Красноармейски, Патӑрьел, Канаш, Муркаш, Пӑрачкав, Шӑмӑршӑ районӗсенче, Шупашкарта, Улатӑрта наркӑмӑшланнӑ. Кӑмпапа наркӑмӑшланнӑ тӗслӗхсем те пулнӑ. Унашкал 7 тӗслӗхе шута илнӗ. Хыпар ҫӑлкуҫӗ:
|
|
Хулара
 21.мвд.рф сайтран илнӗ сӑнӳкерчӗкӗсемпе усӑ курса хатӗрленӗ коллаж Ҫӗнӗ Шупашкарти пляжра пӗр хӗрарӑм укҫа тупнӑ. Пурӗ 4 купюра. Вӗсем – 5 пинлӗскерсем. Укҫана 31 ҫулти хӗрарӑм асӑрханӑ. Купюрӑсем япӑхнӑскерсем пулнӑ. Вӗсем чӑн укҫан туйӑнманран хӗрарӑм укҫана кӑтартма банка кайнӑ. Чӑн та, суя укҫа пулнӑ. Йӗрке хуралҫисем хӗрарӑма суя укҫапа лавккара татӑлма хӑтланманшӑн ырлаҫҫӗ. Хӑйсем вара ҫав купюрӑсем пляжа епле пырса лекнине палӑртассипе ҫине тӑрассине пӗлтернӗ. Хыпар ҫӑлкуҫӗ:
|
|
Хулара
 Шупашкар хула администрацийӗ хӑш-пӗр троллейбус маршрутне улшӑнусем кӗртесшӗн. Ку 6-мӗш, 8-мӗш, 9-мӗш тата 11-мӗш маршрутсене пырса тивет. Ҫавӑн пекех 5-мӗш троллейбуса каллех ҫӳреттерме пуҫласшӑн. Тӗслӗхрен, 8-мӗш троллейбуса Чукун ҫул вокзалӗнчен Роза Люксембург урамӗ таран ярасшӑн. Ҫапла Алькешре пурӑнакан ҫынсем Трактор тӑвакансен проспектне ҫӑмӑллӑнах ҫитме пултараҫҫӗ. 6-мӗш троллейбус ҫулне улӑштарсан Ленин Комсомолӗн урамне ҫитме май пулӗ. Хыпар ҫӑлкуҫӗ:
|
|
Персона
 forum.na-svyazi.ru сӑнӳкерчӗкӗ Шупашкар хулинче Семён Ислюкова асра тытнине палӑртса палӑк лартӗҫ. Халӗ хула мэрийӗн архитектурӑпа градостроительство управленийӗ проектсен конкурсне ирттерессине пӗлтернӗ. Малти виҫӗ вырӑна йышӑннӑ проектсемшӗн преми парӗҫ. Премин пӗтӗмӗшле фончӗ – 100 пин тенкӗ. Семен Ислюков пирӗн республикӑна 30 ҫул – 1955-1985-мӗш ҫулсенче – ертсе пынӑ. Чӑваш АССРӗн Верховнӑй Совечӗн президиумӗн председателӗ, РСФСР Верховнӑй Совечӗн президиумӗн председателӗн заместителӗ, СССР Верховнӑй Совечӗн депутачӗ пулнӑ. Семён Ислюков республикӑна ертсе пынӑ ҫулсенче Шупашкарта Агрегат тата Трактор завочӗсем, Пир-авӑр тата хими комбиначӗсем, гидроэлектростанци туса лартнӑ. Шупашкарта Семён Ислюков урамӗ тата вӑл пурӑннӑ Шупашкарти Ленинград урамӗнчи 14-мӗш ҫурт ҫине асӑну хӑми вырнаҫтарнӑ. Хыпар ҫӑлкуҫӗ:
|
|
Пӑтӑрмахсем
 21.мвд.рф сайтран илнӗ сӑнӳкерчӗкӗсемпе усӑ курса хатӗрленӗ коллаж Утӑ уйӑхӗн 9-мӗшӗнче Муркаш районӗнчи Калайкасси ялӗ патӗнче микроавтобус КамАЗпа ҫапӑнса иртсе кайнӑ. Никам та шар курман. Апла пулин те пӑтӑрмах пирки йӗрке хуралҫисене пӗлтернӗ. «Форд Транзит» микроавтобус водителӗн права та пулман, машини те хӑйӗн мар иккен. Ҫапла пӗтӗмлетнӗ ҫул-йӗр хӑрушсӑрлӑхӗн инспекторӗсем. 27 ҫулти ҫамрӑк Шупашкарта хӑналаннӑ, ир енне килне кайма тухнӑ. Ҫула май вӑл хӑй унччен ӗҫленӗ автосервиса кӗнӗ, унта ларакан микроавтобуса хускатса ҫула тухнӑ. Каччӑ тӗлӗшпе пуҫиле пӗр ӗҫ, административлӑ виҫӗ ӗҫ пуҫарнӑ. Хыпар ҫӑлкуҫӗ:
|
|
Пӑтӑрмахсем
 t.me/nikamran каналтан илнӗ сӑнӳкерчӗк Чӑваш Енӗн тӗп хулинче, Шупашкарта, пурӑнакансене пыл хурчӗсем тапӑннӑ. Пӑтӑрмаха хулари Университет тата Граждан урамӗсенче пурӑнакансем ҫакланнӑ. Аптӑранипе вӗсем Республикӑн шыравпа ҫӑлав службине шӑнкӑравланӑ. Специалистсем вырӑна пырса ҫитнӗ. Хӳтлӗх тумӗ тӑхӑннӑскерсем пыл хурчӗсен ҫемйине пуҫтарнӑ, вӑрмана илсе кайса янӑ. Специалистсем пыл хурчӗсен ушкӑнне курсан ҫывӑха пымалла мар тесе ҫирӗп асӑрхаттараҫҫӗ. Хыпар ҫӑлкуҫӗ:
|
|
Хулара
 "Чеб.ру" сайтри сӑн Ӗнер 21 сехет те 58 минутра ҫӑлав службине хыпар ҫитнӗ: Шупашкарти Октябрь кӗперӗ ҫинчен хӗр сикесшӗн-мӗн. Ҫӑлавҫӑсем вырӑна хӑвӑртах ҫитнӗ. Вӗсем аялалла сикме хатӗрленнӗ хӗрпе психологи калаҫӑвӗ ирттернӗ. Ҫамрӑкскер ҫӑлавҫӑсемпе калаҫнӑ хыҫҫӑн ҫак ӑссӑрла утӑма тӑвас шухӑша пӑрахӑҫланӑ. Ҫапла вӑл лӑпланнӑ та киле кайнӑ. Аса илтерер: нумаях пулмасть Шупашкарти кӗпер ҫинчен ҫамрӑк арҫын ӳкнӗччӗ. Телее, вӑл чӗрех юлнӑ, урине ҫеҫ хуҫнӑ. Хыпар ҫӑлкуҫӗ:
|
|
Республикӑра
 chfila.ru сайтран илнӗ скриншот Чӑваш патшалӑх филармонийӗн директорӗ пулма Максим Матросова шаннӑ. Йышӑнӑва республика ертӳҫи Олег Николаев ӗнер, утӑ уйӑхӗн 12-мӗшӗнче, алӑ пуснӑ. Документа республикӑн влаҫ органӗсен официаллӑ порталӗнче вырнаҫтарнӑ. Филармонире илемлӗх ертӳҫи пулса Николай Казаков тӑрӑшать. Максим Юрьевичӑн заместителӗсем иккӗн: Татьяна Фролова пӗтӗмӗшле ыйтусемпе ӗҫлет, Ирина Фролова – экономика тата финанс енӗпе. Хыпар ҫӑлкуҫӗ:
|
|
Пӑтӑрмахсем
 "Чеб.ру" сайтри сӑн Ӗнер, утӑ уйӑхӗн 12-мӗшӗнче, ирхи 9 сехет ҫурӑра Шупашкарти Ишлей тӑкӑрлӑкӗнче пушар пулнӑ. Унта "Аврора" тулли мар яваплӑ обществӑн склачӗ ҫуннӑ. Кун пирки Инкеклӗ лару-тӑру патшалӑх комитечӗ пӗлтерет. Складра упраннӑ эрех-сӑра ҫунса кайнӑ. Ҫулӑм ҫавӑн пекех шалти отделкӑна сиенлетнӗ. Хальлӗхе тӑкак мӗн чухлӗ пулнине шутламан. Сӑмах май, иртнӗ талӑкра республикӑра 9 пушар пулнӑ. Хыпар ҫӑлкуҫӗ:
|
+14.3 °C