forum.na-svyazi.ru сайтран илнӗ сӑнӳкерчӗк

Ҫӗнелнӗ кӳлмеке халӑх йышлӑн пухӑнать. Ҫынсене уйрӑмах юрӑ-кӗвӗллӗ фонтан илӗртет. Роспотребнадзорӑн Чӑваш Енри управленийӗн ертӳҫи Надежда Луговская фонтан ӗҫӗ-хӗлне чикӗлеме ыйтнӑ. Паллах, ҫакна кӑшӑлвирус инфекцийӗ сарӑласран тӑваҫҫӗ.

Утӑ уйӑхӗн 16-мӗшӗнче Шупашкарти парксемпе лапамсене тӗрӗсленӗ. Ҫав кун кӳлмекре халӑх йышлах пулман-ха. Анчах унта ҫитекенсенчен чылайӑшӗ маска тӑхӑнман, дистанцие пӑхӑнман. Шӑрӑх кунсенче вара ҫынсем фонтанра шыва кӗреҫҫӗ. Надежда Луговская кӳлмеке маскӑсӑр кӗртмелле марри пирки асӑрхаттарнӑ.

rb7.ru сайтри сӑн

Чӑваш Енре шӑрӑх ҫанталӑк тӑчӗ. Нӳрӗк ҫителӗклӗ пулманран хӑш-пӗр тӑрӑхра тӑпра типсе кайнӑ, ҫавна май тыр-пул ӑнса пуласси иккӗленӳллӗччӗ. Халӗ вара синоптиксем савӑнтараҫҫӗ: республикӑра ҫумӑрлӑ ҫанталӑк пулӗ.

Кун пек ҫанталӑк пӗр эрне тӑрӗ. «Чӑваш Енри ҫанталӑк» проект авторӗ Владимир Михайлов пӗлтернӗ тӑрӑх, ҫумӑрсем ытларах кӑнтӑрла ҫӑвӗҫ, вӑраха каймӗҫ. Аслати те авӑткалӗ. Утӑ уйӑхӗн 19-23-мӗшӗсенче Шупашкарта пӗр тӑваткал метр ҫине 23 литр таран шыв ӳкме пултарӗ.

Ҫумӑр ҫусан та сывлӑш температури ӳссех пырӗ. 20-25 градус таран ӑшӑтӗ. Уйӑх вӗҫӗнче каллех шӑрӑх килмелле. Ун чухне термометр 30 градусран ытларах кӑтартӗ.

Утӑ уйӑхӗн 16-мӗшӗнче ирхи 3 сехетре Елчӗк районӗнчи Элекҫей Тимеш ялӗ тӗлӗнчи ҫул ҫинче арҫын виллине асӑрхакансем тупӑннӑ. Вӗсем йӗрке хуралҫисене пӗлтернӗ. Пакунлисем шухӑшланӑ тӑрӑх, арҫынна машина ҫапса кайнӑ, водитель инкек вырӑнӗнчен тапса сикнӗ.

Вилнӗ ҫын камне кӗҫех палӑртнӑ. Вӑл Елчӗк районӗнчи Патреккел ялӗнче ҫуралнӑ 29 ҫулти арҫын пулнӑ.

Йӗрке хуралҫисем ҫынна ҫапса кайнӑ водителе шырама тытӑннӑ. Малтан вӗсем машинӑна шыраса тупнӑ, кайран – унӑн хуҫине. Йӗрке хуралҫисем шухӑшланӑ тӑрӑх, ҫул-йӗр ҫинчи инкеке лекнӗ арҫын – Тутарстанран, вӑл 72 ҫулта.

Чӑваш Ен Шалти ӗҫсен министерствин пресс-службинче пӗлтернӗ тӑрӑх, пӑтӑрмах сӑлтавне палӑртассипе тӗпчевҫӗсем малалла ӗҫлеҫҫӗ.

Nazaccent.ru сайтри сӑн

Шупашкарта пурӑнакан икӗ ҫын Элӗк тата Вӑрнар районӗсенче археологи япалисем шыранӑ, вӗсене тупнӑ. Анчах ҫакна тума вӗсен ирӗк пулман. Куншӑн халӗ арҫынсен суд сакки ҫине ларма тивӗ.

Следстви версийӗ тӑрӑх, пӗлтӗр утӑ уйӑхӗнче вӗсем ҫӳлерех асӑннӑ районсенче тенкӗсем, йӑлара усӑ курмалли япаласем чакаласа тупнӑ. Арҫынсем ятарлӑ хатӗрсемпе усӑ курнӑ: металлодетекторпа тата металлошыравҫӑсемпе.

Арҫынсем ҫӗр сийне сиенлетнӗ. Вӗсем тупнӑ япаласем – 18-мӗш ӗмӗрти, истори, ӑслӑлӑх тата культура пӗлтерӗшлисем.

progorod21 сӑнӳкерчӗкӗ

Паян Чӑваш Енре кӑшӑлвирус сарӑлнине хирӗҫ ӗҫлекен оперативлӑ штабӑн ларӑвӗ иртнӗ. Республикӑн сывлӑх сыхлав министрӗ Владимир Степанов пӗлтернӗ тӑрӑх, ӳпкене искусствӑлла майпа сывлаттаракан аппаратпа 23 пациента ҫыхӑнтарнӑ. Министр каланӑ тӑрӑх, ун пек аппаратсем пульницӑсенче ҫителӗклех. COVID-19 чирӗллисем валли республикӑра 1955 койка пӑхса хӑварнӑ.

Чирлекенсен шучӗ Шупашкарпа Ҫӗнӗ Шупашкарта ӳснине пӗлтернӗ. Чирлисенчен 42 проценчӗ – Шупашкарта пурӑнакансем. Юлашки эрнере ку цифра тата ӳснӗ, 52-64 процента ҫитнӗ. Унсӑр пуҫне республикӑри 14 районта чирлисем йышлӑ. Ҫавна май республика чару мерисене пӑрахӑҫлама хатӗр мар.

Чирлекенсенчен ытларахӑшӗ – 50-59 тата 40-49 ҫулсенчи ҫынсем.

⠀

Чӑваш Енре кӑшӑлвируса парӑнтарма ниепле те май килмест. Иртсе кайнӑ талӑкра COVID-19 диагнозне тата тепӗр 55 ҫынӑнне тупса палӑртнӑ. Вирус пандемийӗ пуҫланнӑранпа пирӗн республикӑра 6 110 ҫын кӑшӑлвируспа чирленине шута илнӗ. Ҫав вӑхӑтра 3307-ӑн чире ҫӗнтернӗ.

Чӑваш Енӗн влаҫӗсен тӗнче тетелӗнчи официаллӑ страницинче утӑ уйӑхӗн 8–17-мӗшӗсенчи цифрӑсене илсе кӑтартнӑ. Утӑ уйӑхӗн 8-мӗшӗнче кӑшӑлвируспа чирлекен 69 ҫынна шута илнӗ, тепӗр кунхине – 67 ҫынна, 10-мӗшӗнче – 61 ҫынна. Ҫӗнӗ кӑшӑлвируспа чирлекенсен шучӗ юлашки ҫичӗ кунта ултӑ теҫеткерен иртмен.

Шел те, ку амак ҫын пурнӑҫне те татать. Пандеми пуҫланнӑранпа кӑшӑлвирус диагнозӗллӗ 48 ҫын вилнӗ.

Шупашкар хулинче икӗ ача пахчи тума пуҫланӑ. Халӗ мӗнпур ӗҫе тенӗ пек тӗрлӗ наци проекчӗпе килӗшӳллӗн хӑпартаҫҫӗ. Ача-пӑча учрежденийӗсене «Демографи» нацпроектпа килӗшӳллӗн тӑваҫҫӗ. Ача пахчисене 2021 ҫулта хута ямалла.

«Радужный» микрорайонта 250 вырӑнлӑх 3 хутлӑ ача пахчи пулӗ. Ӑна тӑвассипе ӗҫлекен строительство организацийӗ учреждени вырӑнне хатӗрлет. Ҫитес эрнере унта сӑвай ҫапма пуҫлӗҫ.

«Солнечный» (чӑв. Хӗвеллӗ) микрорайонта 110 вырӑнлӑх икӗ хутлӑ учреждени тӑваҫҫӗ. Унта строительсем ҫӗр ӗҫӗсене вӗҫлеҫҫӗ, ҫуртӑн цоколь хутӗнчи урайне хӑйӑр сарма тытӑннӑ. Утӑ уйӑхӗн вӗҫӗнче стенасене хӑпартма пуҫлӗҫ.

Журналист ҫум ҫумланинчен ним тӗлӗнмелли те ҫук-ха. Хӗрлӗ Чутай районӗнчи «Пирӗн пурнӑҫ» хаҫатӑн Инстаграмри страницинчи хыпарта район центрне тасатманни пирки каланӑ.

«Паян мана: «Ӳкерсе ҫӳреме ҫеҫ пӗлетӗн, ҫум курӑк пӑшӑрхантарать пулсан тыт та ҫумла», – терӗҫ. Эпӗ ҫумларӑм...», – ҫырнӑ постра.

Журналист Инстаграмра сторис вырнаҫтарнӑ хыҫҫӑн тепӗр пилӗк минутран Хӗрлӗ Чутай ял тӑрӑхӗнчи рабочисем ҫум ҫумлама тухнӑ...

Район центрӗн тӗп лапамне нумаях пулмасть ҫӗнетнӗ, илемлетнӗ. Анчах вӑл ҫӳп-ҫап айне пулма пуҫланӑ. Хӗвелҫаврӑнӑш вӑрри, усӑ курнӑ медицина маскисем ӑна илемсӗрлетеҫҫӗ. Ирпе вара ҫав лапама пӗрре пуҫтарнӑ...

ira-pavlova.livejournal.com сӑнӳкерчӗкӗ

Чӑваш Ен экономика аталанӑвӗн тата пурлӑх хутшӑнӑвӗсен министрӗн тивӗҫӗсене вӑхӑтлӑх пурнӑҫлама министрӑн пӗрремӗш ҫумне Инна Антоновӑна шаннӑ.

Хушӑва республика Элтеперӗн тивӗҫӗсене вӑхӑтлӑх пурнӑҫлакан Олег Николаев паян алӑ пуснӑ. Ӗҫлӗ хута республикӑн влаҫ органӗсен официаллӑ порталӗнче вырнаҫтарнӑ. Ҫавӑнтах кӑсӑклӑ тепӗр документ та пур.

Чӑваш Ен Министрсен Кабинечӗн Ертӳҫин ҫумне – экономика аталанӑвӗн тата пурлӑх хутшӑнӑвӗсен министрне Иван Моторина ӗҫрен кӑларасси ҫинчен хушу тухнӑ. Ӑна республика ертӳҫи Олег Николаев паян, утӑ уйӑхӗн 17-мӗшӗнче, алӑ пуснӑ. Иван Моторинпа ҫыхӑннӑ йышӑнӑвӑн сӑлтавне хушура ӑнлантарса тӑман.

Ку вӑхӑтра пахчара тата уйсемпе хирсенче пӑрҫа пиҫсе ҫитет. Ӗлӗк ку культурӑна самай акатчӗҫ, халь вара, выльӑх-чӗрлӗхе сахалрах тытма пуҫланипе-ши ҫакӑ ҫыхӑннӑ, пӑрҫа уйӗсем ҫуккипе пӗрех.

Чӑваш Республикипе Чӗмпӗр облаҫӗнчи Россельхознадзор тытӑмӗ пирӗн редакцине пӑрҫа пӗрчи (гороховая зерновка) пирки информаци вырнаҫтарма ыйтрӗ. Паллах, вӗсем вырӑсла ярса пачӗҫ. Ун пирки пӗлтерни сирӗншӗн те усӑллӑ пулӗ тесе эпир ку информацие чӑвашла вырнаҫтарас терӗмӗр. Унсӑр пуҫне икчӗлхеллӗ корпусшӑн та паха пулӗ — вӑл пуянланӗ.

Пӑрҫа пӗрчи — Bruchus йӑхӗнчи пысӑках мар нӑрӑ, пӑрҫан культурӑлатнӑ сорчӗсене сиен тӑвакан сӑтӑрҫӑ. Вӑл хура тӗслӗ, тӗкӗ шурӑ, мӑйӑх тӗпӗ, малти чӗркуҫҫисем тата урисем хӗрлӗ-сарӑ. Раҫҫейре пӗрремӗш хут ӑна 1857 ҫулта асӑрханӑ.

Ҫуркунне вӑранать, ҫамрӑк пӑрҫа хутаҫҫи ҫине сарӑ ҫӑмарта хӑварать (200-е яхӑн, пӑрҫара пӗр хурт пулать). Хурчӗсем пӗрерӗн ҫамрӑк пӑрҫа ӑшне кӑшласа кӗреҫҫӗ; кӗркунне, пӑрҫана пуҫтарса илнӗ хыҫҫӑн, кипкеленме пуҫлаҫҫӗ. Нӑрӑсем пӑрҫаран тепӗр ҫуркунне ҫавра шӑтӑк кӑшласа тухаҫҫӗ.

Малалла...