Яндекс.Новости сӑнӳкерчӗкӗ

Сӗнтӗрвӑрри хулинче пурӑнакан 48 ҫулти хӗрарӑм ултавҫӑсене хӑйӗн банкри счечӗ ҫинчи пур пек укҫине ҫеҫ мар, кредит учрежденийӗнчен кивҫен илсе те куҫарса панӑ.

Хӗрарӑм патне малтан банкӑн хӑрушсӑрлӑх службин ӗҫченӗ текен этем шӑнкӑравланӑ. Вӑл банкри счетсем тата вкладсем ҫинчен такамсем укҫа вӑрласшӑн тесе ӗнентернӗ, мӗнпур счет тата вклад, миҫе тенкӗ тенкӗ пуррине пӗлтерме ыйтнӑ. Кайран хӗрарӑм патне ШӖМ офицерӗ тесе темле арҫын шӑнкӑравланӑ. Хӗрарӑма вӑл 350 пин тенкӗ кредит илме сӗннӗ. Ку вӑл ултавҫӑсене палӑртма кирлӗ-мӗн. Арҫын хушнипе хӗрарӑм ҫав укҫана тата хӑйӗн счечӗ ҫинчи 170 пин тенке «хӑрушсӑр» счет ҫине куҫарнӑ.

Ултавҫӑсем кунпах лӑпланман. Счет ҫинче пур тепӗр 140 пине те куҫарттарнӑ, банкран 360 пин тенкӗ кредит илме ӳкӗте кӗртнӗ.

Сӗмсӗрскерсем хӗрарӑм валли такси чӗнсе панӑ. Машинӑн хӗрарӑма банка илсе каймалла, унта укҫа илсе куҫармалла пулнӑ. 75 пин тенке куҫарса ӗлкӗрнӗ-ха, анчах таксист хушша-хуппа кӗнӗ.

Хӗрарӑм пӗтӗмпе 734 пин те 500 тенкӗсӗр юлнӑ.

khabara.ru сӑнӳкерчӗкӗ

Чӑваш Енре коммуналлӑ пулӑшушӑн тӳлемелли хаксем ҫитес ҫулхи утӑ уйӑхӗн 1-мӗшӗнчен ӳсӗҫ. Ҫакӑн пирки республикӑри тӳре-шара ӗнерхи брифингра пӗлтернӗ.

Ҫутӑшӑн ҫитес ҫулхи хула ҫыннисем хальхинчен 12 пус ытларах тӳлеме тытӑнӗҫ, хак 3 тенкӗ те 60 пуса ҫитӗ, ялтисемшӗн тата ҫутӑ плитисемпе усӑ куракансемшӗн хак 8 пус ӳссе 2 тенкӗ те 52 пуспа танлашӗ.

Ҫутҫанталӑк газӗ пӗр куб метршӑн 6 тенкӗ те 6 пуса ларӗ.

Йӑлари хытӑ каяша турттарнишӗн хула ҫыннисем хальхинчен 2 тенкӗ те 13 пус нумайрах тӳлеме тытӑнӗҫ, ҫак тӑкак виҫи 64 тенкӗ те 89 пуса ҫитӗ; ялта 51 тенкӗ те 71 пус пулӗ е 1 тенкӗ те 69 пус хакланӗ.

Раҫҫейре иртнӗ «Моё село» (чӑв. Манӑн ял) конкурс ҫӗнтерӳҫисене хавхалантарнӑ. Кун пирки РФ Патшалӑх Думин депутачӗ Николай Малов ӗнер Фейсбукра пӗлтернӗ. Вӑл хыпарланӑ тӑрӑх, ҫӗнтерӳҫӗсене республикӑн Патшалӑх Канашӗн депутачӗпе Сергей Павловпа чысланӑ.

«Манӑн юратнӑ ялӑм» номинацире Гелфия Зейдулина ҫӗнтернӗ. Вӑл Комсомольски районӗнчи Чӗчкен шкулӗнче вырӑс чӗлхипе литератури вӗрентет. Конкурса тӑратнӑ «Ҫумӑр хыҫҫӑн. Чӗчкен ҫийӗнчи асамат кӗперӗ» иккӗмӗш вырӑн йышӑннӑ. Гелфия Ильдизяровнӑна фотоаппарат парнеленӗ.

Конкурса «Ял ҫемйин сӑнӗ» номинацие ӗҫ тӑратнӑшӑн Красноармейски районӗнчи Александр Терентьев усламҫа тата «Хресченӗн пултаруллӑ ӗҫӗ» енӗпе хутшӑннӑшӑн Вӑрмар районӗнчи Чӑлкассинчи шкулти чӑваш чӗлхипе литературине вӗрентекен Елена Семёновӑна дипломпа хавхалантарнӑ.

bizbi.ru сайтри сӑн

Чӑваш Енре кӑҫал юлашки Спорт кунне раштав уйӑхӗн 19-мӗшӗнче, паян, ирттермеллеччӗ. Анчах кӑшӑлвирус пандемине пула мероприятие йӗркелемен. Кун пирки ЧР Спорт министерстви пӗлтерет.

ЧР Элтеперӗн 2020 ҫулхи ҫӗртме уйӑхӗн 20-мӗшӗнчи Хушӑвӗпе килӗшӳллӗн, республикӑра тренировкӑсене тата спорт мероприятийӗсене куракансемсӗр ирттерме юрать. Ҫав вӑхӑтра пӳлӗмре 25 ҫынран ытларах пулмалла мар, уҫӑ лапамра – 50 ҫынран ытларах мар.

Аса илтерер: пандемине пула Роспотребнадзор кафесенче корпоративсем ирттерме чарнӑ.

progorodsamara.ru сайтри сӑн

Чӑваш Енре юлашки талӑкра 10 ҫын кӑшӑлвируса пула вилнӗ. Кун пирки федераци информаци центрӗ пӗлтерет.

Ку таранччен каварлӑ инфекци 410 ҫыннӑн пурнӑҫне татнӑ. Раштав уйӑхӗнче рекорд пырать – 19 кунра 132 ҫын вилнӗ. Ку кӑшӑлвируса пула вилнӗ ҫынсен 32 проценчӗ.

Паянхи кун тӗлне 14959 ҫын инфекциленнӗ. Вӗсенчен 13329-шӗ сывалнӑ. Юлашки талӑкра 127 ҫын чирленӗ, сывалакансем 107-ӗн пулнӑ.

Хальхи вӑхӑтра тухтӑрсем «кӑшӑлвирус» диагноз ҫирӗпленнӗ 1215 ҫынна сӑнаса тӑраҫҫӗ.

Юхма Мишши хатӗрленӗ «Ылтӑн ҫӳпҫе» кӗнекери статьясемпе малалла паллаштаратпӑр (ку ӗҫе тахҫантанпах тӑвайманччӗ-ха...). Аса илтеретпӗр, кӗнекен иккӗмӗш ячӗ — «Чӑваш сӑмахӗсен вӑрттӑнлӑхӗ». Ӑна 1993 ҫулта кӑларнӑ («Вучах» библиотекинче).

Тӳре. Тӳре-шара. Тӳре-шара килсе капланчӗ…

Тӳре вӑл судьяна пӗлтерет, тетпӗр хӑш чухне.

Унӑн чӑн пӗлтерӗшӗ ҫапла: Ылтӑн Орда вӑхӑтӗнчи ку сӑмах Чингизида, урӑхла каласан, Чингиз-хан йӑхӗнчен тухнӑ ҫын тенине пӗлтернӗ.

Ылтӑн Орда вӑхӑтӗнчен паянхи куна ҫити пурӑнса сӑмах хӑйӗн авалхи пӗлтерӗшне ҫухатнӑ. Анчах ҫеҫенхирсенче пурӑнакан чылай халӑх чӗлхинче тӳре (тюра) халь те авалхи пӗлтерӗшне упрать. Казахстанра пурӑнакан вырӑс писателӗ Алексей Брагин хӑйӗн «Деды и прадеды» повеҫӗнче ӑна ҫав авалхи пӗлтерӗшӗпех анлӑн усӑ курать.

Хушса калани. Ку сӑмаха тӗрӗслемесен те юрӗччӗ те, анчах ҫавах хамӑр та кӑшт тишкерсе тухар-ха.

Чӑн та, тӳре «судья»-на пӗлтерет. «Тӳре-шара» — пӗтӗм чиновниксене палӑртмалли мӑшӑр сӑмах.

Малалла...

projunior.ru сайтри сӑн

Роспотребнадзорӑн Чӑваш Енри управленийӗ пӗлтернӗ тӑрӑх, ҫулталӑк пуҫланнӑранпа республикӑра 200 ытла шкул ачи кӑшӑлвируспа чирленӗ. Хальхи вӑхӑтра 16 ҫӗрте шкул ачисем чирленӗ тӗслӗхе шута илнӗ.

Ӗнер, раштав уйӑхӗн 17-мӗшӗнче, каланӑ тӑрӑх, республикӑра 13 класа дистанци мелӗпе вӗренме янӑ. Ҫапла майпа 301 ача хальлӗхе килте пӗлӳ илет.

Кадет корпусӗнчи пӗр класра ачасем ОРВИпе чирленине палӑртнӑ. Класра 20 проценчӗ ку амакпа аптӑранӑ-мӗн. Ҫавна май вӗсене дистанци мелӗпе вӗренме янӑ. Ҫапла пӗлтернӗ Роспотребнадзорӑн Чӑваш Енри управленийӗн пуҫлӑхӗн ҫумӗ Вера Головач.

ap22.ru сайтри сӑн

Муркаш районӗнче пурӑнакан арҫын ачисене тивӗҫлӗ воспитани паман. Вӑл вӗсемпе хӑйне хаяррӑн тытнӑ. Кун пирки ЧР прокуратури пӗлтерет.

2019 ҫулхи юпа уйӑхӗнчен пуҫласа кӑҫалхи ҫурлаччен 49 ҫулти арҫын ӗҫлемесӗр килте ларнӑ. Унӑн вара 18 ҫул тултарман 4 ача пур. Ҫак тапхӑрта вӑл ачисемпе харкашнӑ. Ывӑлӗ-хӗрӗ йӗркеллӗ канайман. Ашшӗ вӗсен режимне пӑснӑ.

Ашшӗ ачисен пурнӑҫне хӑрушлӑха та кӗртсе ӳкернӗ. Вӑл вӗсене килтен кӑларса яркаланӑ. Хӗрне психика тӗлӗшӗнчен те хӑртнӑ, хӗненӗ.

Судра унӑн ваккачӗ пуҫиле ӗҫе чарса лартма ыйтнӑ. Ашшӗ хӑйӗн айӑпне йышӑннӑ, хӑйне каҫарттарас тесе ачисене телефон туянса панӑ. Анчах прокуратура кунпа килӗшмен. Суд арҫынна 150 сехет ӗҫлеттерме йышӑннӑ.

m.123ru.net сайтри сӑн

Ҫанталӑк сивӗ тӑчӗ те юр ҫума пуҫларӗ. Юлашки икӗ кунра Шупашкарта 7 сантиметр юр ҫуса лартнӑ. Паян Чӑваш Ен циклон тыткӑнӗнче-ха – атмосфера пусӑмӗ ӳсет, термометр кӑтартӑвӗ те анма пуҫлать. Халӗ сывлӑш температури 8-13 градус сивӗ патнелле ҫывхарать.

Ыран ирхине вара пушшех те сивӗтӗ. Термометр тӑрук 19-24 градус кӑтартӗ. Вырӑнӑн-вырӑнӑн тата сивӗрех. Ыран ҫӗрле те шартлама сивӗ тӑрӗ.

Ҫитес эрнере те кунашкал ҫанталӑк хуҫаланӗ. Кӑнтӑрла 10-15 градус тӑрӗ. Ҫитес канмалли кунсем валли ҫеҫ ӑшӑтӗ. Раштавӑн 26-27-мӗшӗсенче юр нумай ҫума пултарӗ.

podarki.ru сайтри сӑн

Шупашкарта пурӑнакан 54 ҫулти арҫын юрҫӳрен туянас тесе укҫасӑр тӑрса юлнӑ. Ултавҫӑсем унран 300 пин тенкӗ сӑптӑрса илнӗ.

Ҫак арҫын тӗнче тетелӗнче юрҫӳрен шыранӑ. Унӑн куҫӗ умне пӗр пӗлтерӳ тӗл пулнӑ: юрҫӳрен питӗ йӳнӗ тӑрать. Хайхискер сутуҫӑпа телефонпа калаҫнӑ. Лешсем илсе ҫитерсе пама шантарнӑ та ку укҫа – 300 пин тенкӗ — куҫарса панӑ. Транспорт компанийӗпе ярса парасси пирки хут килнӗ. Анчах вӗсем суя пулнӑ, сутуҫӑ телефонне те сӳнтерсе лартнӑ.

Раштавӑн 15-мӗшӗнче арҫын полицие пырса каласа кӑтартнӑ. Кун тӗлӗшпе пуҫиле ӗҫ пуҫарнӑ.