minec.cap.ru сӑнӳкерчӗкӗ

Чӑваш Ен юлашки ҫулсенче хӑйӗн продукцине чикӗ леш енне ӑсатассине самай анлӑлатнӑ. Ҫак енӗпе патшалӑх пулӑшнине те палӑртмалла.

Республикӑн Экономика аталанӑвӗн тата пурлӑх хутшӑнӑвӗсен министерствинче пӗлтернӗ тӑрӑх, пирӗн тӑрӑхран ытти регионтан ӑсанман тавар та чикӗ леш енне каять. Сӑмахран, Ҫӗнӗ Шупашкарти «Хӗвел» предприятин гетероструктурӑллӑ хӗвел модулӗсем (сӑнӳкерчӗкре). «ЧЕТРА» предприятин промышленность тракторӗсене, чӑваш хӑмлине, Чапаев ячӗллӗ производство пӗрлешӗвӗнче туса кӑларакан пӑра хирӗҫле ракетӑсене те асӑнса хӑварнӑ. Пластик турбодефлекторсене те Чӑваш Енре кӑна кӑлараҫҫӗ.

Инкеклӗ лару-тӑру министерствин Чӑваш Енри тӗп управленийӗ пӗлтернӗ тарӑх, республикӑра тепӗр ҫын путса вилнӗ. Арҫын 65 ҫулта пулнӑ.

Вӑл утӑ уйӑхӗн 7-мӗшӗнче килтен тухса кайнӑ та таврӑнман. Тепӗр кунхине, паян, ирхине 6 сехетре Йӗпреҫ районӗнчи Савкка ялӗ ҫывӑхӗнчи пӗвере унӑн виллине тупнӑ.

Палӑртмалла: Чӑваш Енре ҫулталӑк пуҫланнӑранпа 21 ҫын путса вилнӗ. Вӗсенчен иккӗшӗ – ачасем.

Аэрофлот «Победа» авиакомпанипе пӗрле пӗрлехи рейссене билетсем сутма пуҫланӑ. Пӗр авиарейсран тепӗр авиарейс ҫине Мускаври «Шереметьево» аэропортӗнче куҫса ларма май килӗ.

Код-шеринг килӗшӗвӗнче пӑхса хӑварнӑ тӑрӑх, лоукостер Аэрофлотӑн SU кочӗпе пассажирсене ӗнертенпе, утӑ уйӑхенченпе, турттарма тытӑннӑ. Кун пек мелпе самолётсем Шереметьевӑран Барнаула, Махачкалана, Ӗпхӗве, Чӗмпӗре, Владикавказа, Минеральные Воды хулине, Шупашкара, Горно-Алтайска, Петрозаводска, Нальчика, Перме тата асӑннӑ ҫав хуласенчен каялла, Мускаври Шереметьевӑна, вӗҫеҫҫӗ.

Владислав Поляшов.

Кӗҫех Японири Токио хулинче Олимп вӑййисем пусланӗҫ. Ӑмӑртусем утӑ уйӑхӗн 23-мӗшӗнче тытӑнса ҫурлан 8-мӗшӗччен пырӗҫ. Чӑваш Енрен унта тӑватӑ спортсмен хутшӑнӗ.

Спорт гимнастики енӗпе пӗрлештернӗ командӑна пирӗн республикӑри икӗ спортсмен лекнӗ. Унашкалли ку таранччен пулман. Командӑра Владислав Поляшов тата Елена Герасимова пулӗҫ.

Ирӗклӗ кӗрешӳ енӗпе Олимп вӑййисенче Сергей Козырев вӑй виҫӗ. Елена Герасимова та, вӑл та унашкал тупӑшусене пӗрремӗш хут кайӗҫ. Анжелика Сидорова та ку таранччен Олимп вӑййисенче пулман. Вӑл шӑчӑпа сиксе ӑмӑртӗ.

chelife.ru сӑнӳкерчӗкӗ

Чӑваш Енри вӗрентекенсене професси ӑсталӑхӗн конкурсӗнче ҫӗнтернӗшӗн укҫан хавхалантарӗҫ. Педагогсен республика шайӗнчи конкурсӗ ҫакӑн пек номинацисенче иртнӗ: «Чӑваш Енӗн ҫулталӑкри педагог-психологӗ», «Чӑваш Енӗн ҫулталӑкри социаллӑ педагогӗ», «Чи пултаруллӑ класс ертӳҫи», «Чӑваш Енӗн ҫулталӑкри воспитателӗ», «Чӑваш Енӗн ҫулталӑкри учителӗ».

Педагог-психологсенчен конкурсра Шупашкарти 65-мӗш вӑтам шкулти Ксения Яранова ҫӗнтернӗ, социаллӑ педагогсенчен — Ҫӗнӗ Шупашкарти 12-мӗш вӑтам шкулти Светлана Шемякина, класс ертӳҫисенчен — Шупашкарти 1-мӗш гимназири Ксения Коллэ. Вӗсене 50-шер пин тенкӗ тивӗҫӗ.

Воспитательсенчен Ҫӗмӗрлери «Рябинушка» 16-мӗш ача пахчинчи Екатерина Чимрова логопед ҫӗнтернӗ. Ӑна 100 пин тенкӗ парса хавхалантарӗҫ. Учительсенчен Ҫӗнӗ Шупашкарти 12-мӗш вӑтам шкулти Василиса Егорова мала тухнӑ. Ӑна 150 пин тенкӗ тивӗҫӗ.

Катастрофа медицинин тата васкавлӑ медпулӑшу центрӗ тунӑ сӑн

Шупашкарти тухтӑрсем тепӗр ачана вертолетпа урӑх региона илсе ҫитернӗ. Хальхинче – Пензӑна. Ҫул ҫинче 2,2 сехет иртнӗ. Пензӑра 2 эрнери ачан чӗрине операци тунӑ. Вӑл ку енӗпе хавшакрах ҫуралнӑ.

Каялла килнӗ чухне тухтӑрсем операцие чӑтса ирттернӗ ачана илсе ҫитернӗ. 1 уйӑхри пепкен сывлӑхӗ йывӑртарах, ӑна ИВЛ аппаратпа сывлаттарнӑ, зонд витӗр ҫитернӗ.

Вертолетра васкавлӑ медпулӑшу анестезиолог-реаниматологӗ Валерий Ильин тата Республикӑри ача-пӑча клиника пульницин тухтӑрӗсем – Мария Курсова, Вероника Костюкова - пулнӑ.

Прокуратура, Роспотребнадзор тата Инкеклӗ лару-тӑру министерстви Елчӗк районӗнчи шкул ҫумӗнчи уйлӑхсене тӗрӗсленӗ. Прокуратура пӗлтернӗ тӑрӑх, йӗркене пӑснӑ тӗслӗхсем пулнӑ.

Аслӑ Елчӗкри Волков ячӗллӗ шкулта, Андреев ячӗллӗ Лаш Таяпа шкулӗнче, Кушкӑ шкулӗнче санитарипе эпидемиологи йӗркисене пӑснӑ. Вӗсенче ачасене апатлантарнӑ чухне те йӗркене пӑснӑ. Тӗслӗхрен, аш-какайӑн чи пӗчӗк виҫин нормине пӑхӑнман. Апат-ҫимӗҫе тӗрӗс мар упрани те пулнӑ. Ҫавӑн пекех чашӑк-тирӗке кирлӗ пек дезинфекцилемен.

Прокуратура ҫак шкулсен директорӗсем тӗлӗшпе представлени ҫырнӑ.

Чӑваш Енрен тухса каяс кӑмӑллисен шучӗ ӳснӗ. Кӑҫалхи кӑрлач-ака уйӑхӗсенче пирӗн тӑрӑхран 4 244 ҫын тухса кайнӑ, кунта 3 632 ҫын куҫса килнӗ. Ҫапла вара республикӑра миграцие пула халӑх шучӗ 612 ҫын чакнӑ, ку вӑл 2020 ҫулхи танлаштаруллӑ тапхӑртинчен чӗрӗк пай чухлӗ ытларах (пӗлтӗр ҫын шучӗ чакни 458-па танлашнӑ).

Кӑҫалхи тӑватӑ уйӑхра Чӑваш Енрен ҫӗршывӑн тӗрлӗ регионне 3 635 ҫын тухса кайнӑ, ытти ҫӗршыва — 609 (ҫав шутра СНГ ҫӗршывӗсене — 437). Ют регионсенчен 2 889 ҫын килсе ҫитнӗ, ытти ҫӗршывран — 743.

Хула ҫыннисен шучӗ мигрантсене пула 1 463 ҫын таран йышланнӑ (ҫав шутра Шупашкарта — 1 298 ҫын), ялта халӑх шучӗ 2 075 ҫын сахалланнӑ.

Шупашкарта пурӑнакан хӗрарӑм ӑнсӑртран киле ҫӗлен йӑтса килнӗ. Вырӑна ҫӑлавпа шырав службин ӗҫченӗсем ҫитнӗ. Анчах вӗсем ҫӗлене тупайман.

Хулари «Октябрь: 50 ҫул» урамра пурӑнакан хӗрарӑм утӑ уйӑхӗн 7-мӗшӗнче киле ҫитсен хутаҫне уҫнӑ та унтан ҫӗлен шуса тухнӑ. Ӑна кӳрши те тытма хӑтланнӑ, анчах ҫӗлен урайпа стена хушшинчи ҫурӑка кӗрсе кайнӑ. Ӑна ҫӑлавҫӑсем те тупайман.

Ҫав кунах Нефтебаза урамӗнчи хӗрарӑм ҫӑлавҫӑсене чӗннӗ. Вӑл та ҫӗлене асӑрханӑ, ӑна сӑн ӳкерме ӗлкӗрнӗ. Анчах ҫӗлене ҫӑлавҫӑсем тытайман.

Шупашкарти Львовсем

Паян Шупашкарта «Атӑлҫи тӑрӑхӗнчи ӑнӑҫлӑ ҫемье» конкурс ҫӗнтерӳҫисене чысларӗҫ.

Конкурса кӑҫал 14 ҫемье хутшӑннӑ. Чӑваш Ен чысне Шупашкарта пурӑнакан Львовсем хӳтӗлерӗҫ.

Икӗ куна пынӑ тупӑшӑва Чӑваш патшалӑх оперӑпа балет театрӗнче пӗтӗмлетрӗҫ.

Конкурса пӗтӗмлетиччен РФ Президенчӗн Атӑлҫи тӑрӑхӗнчи полномочиллӗ представителӗн заместителӗ Олег Машковцев Николайпа Татьяна Тихоновсене тата Эдуардпа Наталия Степановсене «Ашшӗ-амӑшӗн мухтавӗ» орденсемпе (ӑна пама Раҫҫей шайӗнче йышӑннӑ) чысларӗ. Шупашкарти Васильевсем тата Вӑрнар районӗнчи Немиловсем «Юратупа шанчӑклӑхшӑн» ордена тивӗҫрӗҫ.

Конкурса хутшӑннӑ ҫемьесенчен тӑваттӑшне 4 номинацире чысларӗҫ. «Манӑн ҫемье – манӑн пуянлӑхӑм» номинацире Пенза облаҫӗнчи Валякинсене палӑртӗҫ, «Ҫемье – йӑла-йӗрке управҫи» — Чулхула тӑрӑхӗнчи Шутливсене, «Ырӑ чӗре» — Самар облаҫӗнчи Филипповсем, «Куракансем килӗштернӗ ҫемье» – Мордва Республикинчи Мещеряковсем.

Пӗрремӗш степеньлӗ диплома Пермь крайӗнчи 22 ачаллӑ Абакшинсем тивӗҫрӗҫ; иккӗмӗш степеньлине – Чӑваш Енри Львовсем, виҫҫӗмӗш степеньлине – Удмурт Республикинчи Корякинсем.

Малалла...