Республикӑри пысӑк аслӑ шкулсенчен пӗринче, И.Н. Ульянов ячӗллӗ Чӑваш патшалӑх университетӗнче, йышӑну кампанийӗ ҫӗртме уйӑхӗн 20-мӗшӗнче пуҫланнӑ. Унчченхи ҫулсенчипе танлаштарсан хутсен икӗ мелпе йышӑнаҫҫӗ — Абитуриентӑн уйрӑм пӳлӗмӗ тата почта ҫыхӑнӑвӗн операторӗсем урлӑ.

Йышӑну комиссийӗнче 50 ытла ҫын ӗҫлет. Вӗсем ҫамрӑксен, вӗсен ашшӗ-амӑшӗн ыйтӑвӗсене йышӑнаҫҫӗ, пӑхса тухса хуравлаҫҫӗ. Кунсерен 1500 ытла шӑнкӑрав йышӑнаҫҫӗ.

Аслӑ шклута бакалавриат шайӗпе 1325 бюджет вырӑнӗ пӑхса хӑварнӑ.

Утӑ уйӑхӗн 20-мӗшӗ тӗлне 3400 ытла заявлени илнӗ. Абитуриентсем уйрӑмах суйлакан енсем ҫаксем: «Сиплев ӗҫӗ», «Педиатри», «Стоматологи», «Фармация», «Юриспруденци», «Экономика», «Строительство».

Техника факультечӗсенче 766 хысна вырӑнӗ пӑхса хӑварнӑ. Унта электроэнергетика тата электротехника, информатика и шутлав техники, радиоэлектроника тата автоматика, управлени тата социаллӑ технологи, машиностроени пӗлӗвне илме пулать.

Чӑваш Енре вӗренӳ ҫулӗ вӑхӑтра уҫӑлмалла, ачасем авӑн уйӑхӗн 1-мӗшӗнче парта хушшине лармалла. Ку вӑл студентсене те пырса тивӗ. Ҫапла шаннине пӗлтернӗ Чӑваш Ен вӗренӳ тата ҫамрӑксен политикин министрӗ Сергей Яковлев.

Министр Улатӑр хулинче тата районӗнче ӗҫлӗ ҫулҫӳревпе пулнӑ. Унта вӑл Раҫҫей ҫутӗҫ министрӗ Сергей Кравцов интервьюсенче Раҫҫей шкулӗсем авӑн уйӑхӗн 1-мӗшӗнче уҫӑлассине темиҫе хут та палӑртнине пӗлтернӗ. Паллах, санитарипе эпидемиологи мерисене пӑхӑнмалла. Вӗсене Роспотребнадзор каланине тӗпе хурса РФ Ҫутӗҫ министерстви хатӗрленӗ.

Хальхи вӑхӑтра Чӑваш Енри вӗренӳ учрежденийӗсем вӗренекенсене йышӑнма хатӗрленеҫҫӗ, вӗсенче юсав ӗҫӗсем малалла пыраҫҫӗ.

volg.mk.ru сайтри сӑн

Патшалӑхӑн пӗрлехи экзаменӗсен кӑтартавӗсем килме пуҫланӑ. Географипе, информатикӑпа тата литературӑпа экзамен тытнисем хӑйсен балӗсене пӗлеҫҫӗ.

Географие 124 ҫын тытнӑ, 12 ҫын 80 ытларах балл пухнӑ. Ҫӗнӗ Шупашкарти 6-мӗш гимназире вӗреннӗ ҫамрӑк 100 баллӑх ҫырнӑ.

Литературӑпа 192 ҫын пӗлӗвне тӗрӗсленӗ. 14-шӗ 80 балран ытларах пухнӑ. Чи нумаййи 94 балл пухаканни пулнӑ.

Информатикӑпа 626 ҫын ППЭ тытнӑ. 135 ҫын 80 балран ытларах пухнӑ. Ҫӗнӗ Шупашкарти 14-мӗш шкулта вӗреннӗ 2 ҫын, Шупашкарти 3-мӗш лицейран тухнӑ 2 ҫамрӑк, Шӑмӑршӑ шкулӗнчи тата Ҫӗнӗ Шупашкарти 6-мӗш гимназири, Шупашкарти 20-мӗш шкулти тата Ҫӗнӗ Шупашкарти 18-мӗш лицейри пӗрер ҫын 100 балл пухӑ.

Ҫӗнӗ Шупашкарти Технологипе управлени академийӗнче хӑй вӑхӑтӗнче «Биотехнологи» центрӗ йӗркеленӗ. Ҫав ӗҫе Технологипе управлени академийӗн ректорӗ, биологи ӑслӑлӑхӗсен докторӗ Иван Селиванов профессор пуҫарнипе уҫнӑ. Халӗ асӑннӑ центр ертӳҫи пысӑк чыса тивӗҫнӗ.

Раҫҫей Федерацийӗн ӑслӑлӑхпа техникӑн хисеплӗ ӗҫченӗ, биологи ӑслӑлӑхӗсен докторӗ, Ҫӗнӗ Шупашкарти Технологипе управлени академийӗн «Биотехнологи» центрӗн ертӳҫи Александр Самоделкин Раҫҫей Правительствин ӑслӑлӑхпа техника премйӗн лауреачӗ пулса тӑнӑ.

Александр Геннадьевич чӗрчунсен сывлӑхне хӳтӗлессипе, выльӑх-чӗрлӗх продукцине туса илессипе ҫӗнӗ меслет шутласа кӑларнӑ. Пултаруллӑ ӑслӑлӑх ӗҫченне Раҫҫей ӑслӑлӑхӗсен академине чӗнсе илсе чысланӑ. Наградӑна тивӗҫнӗ ентешӗмӗре академин вице-президенчӗ Ирина Донник тата Юрий Лачуга академик саламланӑ.

Чӑваш Республикин Вӗренӳ тата ҫамрӑксен политикин министерстви Вӗренӳ институчӗпе пӗрле «Хунав» фестиваль-конкурса килнӗ ӗҫсене хакласа пӗтӗмлетнӗ. Унта шкулчченхи вӗренӳ организацийӗсене ҫӳрекен ачасенэм хутшӑннӑ

Фестивалӗн республика тапхӑрне район е хула шайӗнче ҫӗнтернӗ ачасем пурӗ 62 номерпе хутшӑннӑ.

Фестиваль-конкурс 3 номинаципе иртнӗ: «Илемлӗ чӑваш юрри», «Асамлӑ юмах тӗнчи», «Янра, сӑввӑм, хыттӑнрах».

Тӳресем конкурс ҫӗнтерӳҫисемпе призёрӗсене палӑртнӑ.

Дипломсемпе сертификатсем каярах пулассине хыпарланӑ. Вӗсене хӑҫан пырса илесси ҫинчен Чӑваш Ресӑубликин Вӗренӳ институчӗн сайтӗнче пӗлтерӗҫ.

detkino.ru сайтри сӑн

Чӑваш Енре математика предмечӗпе Патшалӑхӑн пӗрлехи экзаменӗ иртнӗ. Вӗренӳ министерстви пӗлтернӗ тӑрӑх, экзаменра йӗркене пӑснӑ тӗслӗхсем пулнӑ.

Математикӑпа 3468 ҫын ППЭ тытнӑ. Вӑл утӑ уйӑхӗн 10-мӗшӗнче иртнӗ. Аудиторирен 3 ҫынна кӑларса янӑ. Вӗсен ҫумра телефон, шпаргалкӑсем пулнӑ.

Аудиторисенче видеосӑнав вырнаҫтараҫҫӗ пулин те экзамена телефон, шпаргалка йӑтса кӗрекенсем пур. Экзамен мӗнле иртнине тӗрлӗ ведомство сӑнаса тӑрать.

Экамен кӑтартӑвӗсем утӑ уйӑхӗн 24-мӗшӗнче паллӑ пулӗҫ.

Кашмашра шкул пулатех. Муркаш районӗнчи Кашмашра ҫӗнӗ шкул тутарас ыйтупа виҫ-тӑват ҫул каялла хытах шавланӑччӗ. Кашмашра пурӑнакансем «Беспредел в Чувашии» (чӑв. Чӑваш Енри йӗркесӗрлӗх) «Youtube» видеохостингра видеочӗнӳ те вырнаҫтарнӑччӗ. Аса илтерер: Кашмашри шкула 1931 ҫулта хӑпартнӑ. Унти ачасене ҫывӑхри хӑтлӑ шкула автобуспа турттарма йышӑннӑччӗ.

Шкул тӑвассине тӳре-шара шантарнӑччӗ. Анчах каярах. Халӗ Кашмашра шкул тума палӑртнӑ-палӑртнах. Вӑл 108 вырӑнлӑх пулӗ. Республикӑн вӗренӳ тата ҫамрӑксен политикин министрӗ Сергей Яковлев пӗр ларура пӗлтернӗ тӑрӑх, строительство организацине палӑртма кӑҫалхи утӑ-ҫурла уйӑхӗсенче аукцион иртӗ. Шкул тума 211 миллион тенкӗ уйӑрӗҫ.

mordovmedia.ru сайтран илнӗ сӑн

Кӑҫал Раҫҫейри шкулсенче авӑнӑн 1-мӗшӗнче йӑлана кӗнӗ уяв линейкисем пулмӗҫ. РФ Ҫутӗҫ министерстви ҫапла йышӑннӑ. Ку мӗнпе ҫыхӑнни каламасӑрах паллӑ ӗнтӗ.

Сергей Кравцов министр ачасем авӑнӑн 1-мӗшӗнче парта хушшине ларасса питӗ шанать. Анчах кӑшӑлвирус сарӑлнине пула требованисене урӑхлатма тивӗ. Ҫакна чир-чӗр ан сарӑлтӑр тесе тӑваҫҫӗ.

Сергей Кравцов авӑн уйӑхӗн 1-мӗшӗнче пур шкулта та уяв линейки вырӑнне дистанци мелӗпе вӗреннин пӗтӗмлетӗвӗпе «шкул ачисен пӗлӗвӗн диагностикине» йӗркелӗҫ. Куншӑн паллӑ лартмӗҫ, педагогсем ачасен пӗлӗвне ҫеҫ тӗрӗслӗҫ.

53news.ru сайтри сӑн

Сӗнтӗрвӑрри хулинчи шкул авариллӗ лару-тӑрура. Ӑна 1953 ҫулта хута янӑ. Вӑл СанПиНа тата пушар хӑрушсӑрлӑхне тивӗҫтермест. Пӳлӗмсем сахал пулнӑран ачасем икӗ сменӑпа вӗреннӗ.

Сӗнтӗрвӑрринчи Коновалово микрорайонта ҫӗне шкул хута ярасшӑн. Проектпа смета документацийӗсене хатӗрлеме тытӑннӑ. Вӑл экспертиза витӗр тухсан шкул строительствине плана кӗртӗҫ.

Ҫӗнӗ шкулта 375 ача валли вырӑн пулӗ. Пӗлӳ ҫуртне тумашкӑн 343 миллион тенкӗ уйӑрма палӑртнӑ.

cap.ru сайтри сӑн

Куславкка районӗнчи Куснар ялӗнче строительство ӗҫӗ хӗрсех пырать. Ӑна авӑн уйӑхӗн 1-мӗшӗччен вӗҫлемелле. Куснарта ҫӗнӗ вӗренӳ ҫулӗ тӗлне ҫӗнӗ шкул хута яма шантарнӑ.

ЧР Вӗренӳ министерстви пӗлтернӗ тӑрӑх, строительство ӗҫӗн 83 процентне вӗҫленӗ. Шкула ҫурла уйӑхӗн 15-мӗшӗ тӗлне туса ҫитермелле.

Шкулта 165 ача валли вырӑн пулӗ. Пӗлӳ ҫурчӗ ҫумӗнче ача пахчи тӑвӗҫ. Унта вара 40 шӑпӑрлан ҫӳрӗ. Шкулта стадион та тӑваҫҫӗ.

Подряд организацийӗ шалти ӗҫсене пӗтернӗ. Халӗ киплӗ хатӗр-хӗтӗре туянаҫҫӗ.

Сӑмах май, кӑҫал Куславкка хулинче 160 шӑпӑрлан валли ача пахчи тума тытӑнӗҫ.