«Про Город» сайтран илнӗ сӑн

Авӑн уйӑхӗн 27-мӗшӗнче Шупашкарта пурӑнакан 91 ҫулти Никитин Михаил Никитич ҫухалнӑ. Тӑванӗсем ӑна халӗ те тупаймаҫҫӗ. Тӑван ҫӗршывӑн Аслӑ вӑрҫин ветеранӗн ӑс-тӑнӗ арпашӑнать, хӑй ӑҫта пулнине пӗлмест.

Ватӑ ҫынна полицейскисем те шыраҫҫӗ. Тӑванӗсем вӑл ҫухалнӑ кунах заявлени ҫырнӑ. «Унччен те вӑл ҫухалкаланӑ, анчах ӑна 1-2 кунран тупаттӑмӑрччӗ», - ҫапла каласа кӑтартнӑ ветеранӑн мӑнукӗ Наталья.

Михаил Никитич 160 сантиметр ҫӳллӗш, вӑтам пӳ-силлӗ, ҫӳҫӗ шуралнӑ, куҫӗ хӑмӑр. Ҫухалнӑ кунхине вӑл фуражка, хура пальто, шурӑ ҫӑмран ҫыхнӑ кофта, кӑвак шӑлавар, хӑмӑр пушмак тӑхӑннӑ пулнӑ.

Ветеран пирки мӗн те пулин пӗлетӗр пулсан 02 номерпе шӑнкӑравлӑр.

twitter.com сайтри сӑн

Китай инвесторӗсем Чӑваш Енре савут ҫӗклеме палӑртнипе халӑх ниепле те килӗшмест. Шпупашкар районӗсем ку ыйтупа каллех митинга тухасшӑн. Кун пирки Александр Андреев депутат пӗлтерет.

Митинг юпа уйӑхӗн 5-мӗшӗнче Кӳкеҫре 9 сехетре «Колосок» (Сад урамӗ, 5-мӗш ҫурт) ача пахчи умӗнче иртӗ.

Аса илтерер: пӗрремӗш митинг та Кӳкеҫрех иртнӗччӗ. Утӑ уйӑхӗн 13-мӗшӗнче Шупашкар районӗн ҫыннисем плакатсем йӑтса тухнӑччӗ. Вӗсене ял хуҫалӑх ҫӗрӗсене промышленноҫ категорине куҫарма хӑтланни килӗшмен. Митинга ун чухне 300 ытла ҫын пухӑннӑ.

dnpr.com.ua сайтри сӑн

Канашра пурӑнакан 43 ҫулти хӗрарӑм крипотвалюта илес тесе ултавҫӑсен аллине ҫакланнӑ. Вӑл вӗсене 1 миллион ытла тенкӗ куҫарса панӑ.

Хӗрарӑм полицейскисене акӑ мӗн каласа кӑтартнӑ: икӗ уйӑх каялла вӑл тӗнче тетелӗнче биткоина укҫа хывса ҫӑмӑллӑнах ӗҫлесе илме май пурри пирки вуласа пӗлнӗ. Хайхискер ҫавсемпе ҫыхӑннӑ, лешсем малтан 500 тенкӗ хывмаллине пӗлтернӗ. Анчах хӗрарӑмӑн ун чухлӗ укҫа пулман – вӑл кредит илнӗ.

Ку укҫана куҫарса панӑ хыҫҫӑн лешсем каллех шӑнкӑравланӑ: «раскрутка» тума тепӗр 520 пин кирлӗ-мӗн. Хӗрарӑм ку суммӑна та куҫарса панӑ. Анчах темӗн чухлӗ кӗтсен те тупӑш пирки никам та, нимӗн те шарламан. Ҫавӑн чухне тин хӗрарӑм ӑна шӑнман пӑр ҫине лартса хӑварнине ӑнланнӑ.

gtrk.tv сайтри сӑн

Елчӗк районӗнче пурӑнакан 34 ҫулти арҫынна ватӑ ҫынна мӑшкӑллама хӑтланнӑшӑн айӑпласшӑн. Ҫитменнине, вӑл вӗлерессипе хӑратнӑ. Ун тӗлӗшпе пуҫарнӑ пуҫиле ӗҫе следовательсем тишкерсе пӗтернӗ, суда ярса панӑ. Кӗҫех ӑна Елчӗк районӗн сучӗ пӑхса тухӗ.

Следстви комитечӗ пӗлтернӗ тӑрӑх, кӑҫал ҫурла уйӑхӗн 9-мӗшӗнче ҫак ӳсӗр арҫын ентешӗ патне пирус ыйтма кӗнӗ. Кӑштахран ӑна лешӗн амӑшӗ урама кӑларса янӑ.

Арҫын урамра ватӑ хӗрарӑма мӑйӗнчен ярса тытнӑ, аллипе тутине хупланӑ та кӳршӗри ҫурта илсе кӗнӗ, вӗлерессипе хӑратса мӑшкӑллама тӑнӑ. 78 ҫулти кил хуҫи картишӗнче пулнӑ, кӑшкӑрашнӑ сасӑ илтсен хӗрарӑмӑн таванӗсем патне чупнӑ. Лешсем ӳсӗрскере усал ӗҫ тӑвасран тытса чарнӑ.

Территориясмыслов.рф сайтри сӑнӳкерчӗк

Чӑваш Енре пурӑнакан студентсем Чӑваш Ен Элтеперӗн Михаил Игнатьевӑн укҫине тивӗҫӗҫ. Грант уйӑрасси ҫинчен калакан хушӑва республика ертӳҫи авӑн уйӑхӗн 27-мӗшӗнче алӑ пуснӑ.

Элтепер укҫине памалли 10 ҫамрӑк йышӗнче ҫаксем: Сергей Емелин тата Ксения Прокопьева (Регионсем хушшинчи комметенци центрӗ – Шупашкарти электромеханика колледжӗ), Алексей Лазарев (Улатӑрти технологи колледжӗ), Сафар Назмутдинов (Канашри транспортпа энергетика техникумӗ), Василий Никитин тата Никооай Хурамаев (Шупашкарти апатланупа коммерци техникумӗ), Елена Павлова тата Екатерина Шилова  (Шупашкарти Н.В. Никольский ячӗллӗ колледж), Нина Романова (Канашри педагогика колледжӗ), Андрей Степанов (Ҫӗрпӳри аграрипе технологи техникумӗ. Вӗсем 2019-2020 ҫулсенчи ҫӗнӗ вӗренӳ ҫулӗнче уйӑхсерен 10-шар пин тенкӗ илсе тӑрӗҫ.

Чӑваш Енри тӳре-шара патне people@cap.ru электрон адреспа малашне ҫыру яраймӑн. Ҫакна ЧР Элтеперӗн Администрацийӗн ҫынсен ҫырӑвӗсемпе ӗҫлекен пайрисем уйрӑм ҫын пирки пӗлтерме юраманни ҫинчен калакан саккунпа сӑлтавлаҫҫӗ.

Ҫапах та ҫыру ҫырма малашне те май килӗ. Апла пулсан, евитлеме, ыйтса ҫырма, пӑшӑрхантараканнине пӗлтерме чармӗҫ. Электрон ыйтусене интерактивлӑ йышӑну пӳлӗмӗ урлӑ ӑсатмалла. Вӑл ҫак адреспа вырнаҫнӑ.

Электрон ҫырусене Чӑваш Ен Элтеперӗ Михаил Игнатьев, Министрсен Кабинечӗн Ертӳҫи Иван Моторин, мӗнпур министерствӑна ӑсатма май пур.

Маларах эпир кӑтартнӑ каҫӑпа иртсен, сӑмах май каласан, районсемпе хуласен администрацийӗсене те ҫыру яма пулать.

Хваттерсене ӑшӑ парас ыйтупа канашлу ирттернине пӗлтернӗ Чӑваш Ен Элтеперӗ Михаил Игнатьев @mihail_ignatiev_chuvashiya Инстаграмра. Ҫав хыпара вуланисенчен пӗри, @svetlana_lyallina, «Патӑрьелсем мӗншӗн ӑшӑсӑр, шывсӑр тата газсӑр 12 ҫул пурӑнаҫҫӗ?» тесе ҫырса хунӑ.

Хӗрарӑм Патӑрьел ял администрацийӗ суд йышӑнӑвне пӑхӑнманни пирки пӗлтернӗ. Вӑл ҫырни тӑрӑх хакласан, суд хваттерсене шыв тата газ кӗртмелле йышӑну кӑларнӑ.

Тарӑхса ҫыракан пост авторӗ Чӑваш Ен Элтеперне ял тӑрӑхӗсен пуҫлӑхӗсене мӗншӗн витӗм кӳрейместӗр тесе ӳпкеленӗ. «Ачасене, пенсионерсене тата сусӑрсене йӗркеллӗ, этемле пурӑнма май парӑр! Мӗншӗн коммуналлӑ пулӑшу парассине саккуна пӑсса чарса лартма ирӗк панӑ? Намӑс мар-и?» — кӑмӑлсӑрланнӑ пост авторӗ.

cheb.ru сайтри сӑн

Ҫӗмӗрле арҫыннине кӑҫал ҫу уйӑхӗнче тытса чарнӑ. Анчах ӑна пульницӑна хирурги уйрӑмне сиплеме хунӑ. Вӑл ан тартӑр тесе конвой сыхланӑ.

Анчах конвой та уншӑн пӑтӑрмах кӑларса тӑратман – вӑл пульницӑран тухса тарнӑ. Хайхискер пӗр кунхине туалета кайма ирӗк ыйтнӑ. Унта пӗччен тӑрса юлсан пациент чӳречерен тухса тарнӑ.

Анчах ирӗкре нумай пурӑнайман вӑл – ӑна ҫав кунах тытса чарнӑ. Арҫынна Пушкин урамӗнчи пӗр ҫурт чартакӗ ҫинче тупнӑ. Халӗ унӑн йӗплӗ пралук леш енче тата нумайрах ларма тивӗ: суд ӑна 3,9 ҫуллӑха хупма йышӑннӑ.

Инкеклӗ лару-тӑру министерстви тунӑ сӑн

Юпа уйӑхӗн 1-мӗшӗнче сирена сассине илтсен хӑраса ан ӳкӗр: ку вӗренӳ ҫеҫ пулӗ. «Республикӑра пурӑнакансене лӑпкӑ пулма, ӗҫ вырӑнӗнчех ларма ыйтатпӑр», - ҫапла пӗлтернӗ Инкеклӗ лару-тӑру министерстви.

Юпа уйӑхӗн 1-мӗшӗнче Чӑваш Енре автоматизациленӗ пӗлтерӳ тытӑмне планпа килӗшӳллӗн тӗрӗслӗҫ. Граждан хӳтӗлевӗн тренировки пуҫланни пирки урамри сиренӑсем тата громкоговорительсем пӗлтерӗҫ. «Внимание всем!» (чӑв. «Пурне те тимлӗ пулма ыйтатпӑр!») тени икӗ хутчен янӑрӗ: 10 тата 10.30 сехетсенче.

Палӑртмалла: кунашкал тӗрӗслевсене ҫулсеренех Граждан хӳтӗлевӗн кунӗ умӗн ирттереҫҫӗ. Уява юпа уйӑхӗн 4-мӗшӗнче паллӑ тӑваҫҫӗ.

73.rodina.news сӑнӳкерчӗкӗ

Чӑваш Енри предприятисем промышленноҫа цифра ҫине куҫарма хыснаран укҫа илме пултараҫҫӗ. Кун пирки Чӑваш Ен Цифра аталанӑвӗн, информаци порлитикин тата массӑллӑ коммуникацисен министерстви пӗлтерет.

Тупрана федераци хыснинчен уйӑраҫҫӗ. Субсиди цифра платформисемпе программа продукчӗсем хатӗрлесе тӑкакланнин пайне саплаштарма кайӗ.

Укҫана пысӑк технологиллӗ промышленность продукцине туса илме хатӗрленӗ проектсем валли уйӑраҫҫӗ. Кунта робот тата сенсорика компоненчӗсемпе, нейтротехнологисемпе, искусствӑлла ӑс-тӑнпа, пӑралуксӑр ҫыхӑнупа, виртуаллӑ тата квант технологийӗсемпе усӑ курнине кӗртме пулать.

Субсиди виҫи тӑкаксен 50 процентӗнчен иртмӗ. 2018 кӑрлач уйӑхӗн 1-мӗшӗ хыҫҫӑн пурнӑҫланӑ проект пулмалла.

Заявкӑсене кӑҫалхи юпа уйӑхӗн 16-мӗшӗччен йышӑнӗҫ. Ыйтса пӗлмелли телефон: +7 (495) 870-29-21 (хушма номер 22575).