Инкеклӗ лару-тӑру министерстви тунӑ сӑн

Кӑҫал кӑрлачӑн 1-мӗшӗнче Вӑрмар районӗнчи Урнар ялӗнче пушар пулни пирки, куншӑн 51 ҫулти кил хуҫине айӑпласшӑнни ҫинчен пӗлтернӗччӗ. Аса илтерер: инкекре хӗрарӑм, унӑн икӗ хӗрӗ, 4-ри, 7-ри тата 10 ҫулти мӑнукӗсем вилнӗ. Арҫынна пӗр хӗрӗ вӑратнӑ. Анчах вӑл пурне те урама кӑларма ӑс ҫитереймен, хӑйӗн тӑрӑх шыв янӑ, утиялпа чӗркеннӗ те тухнӑ. Кӳршисем патне чупнӑ. Анчах таврӑннӑ тӗле ҫулӑм йӑлтах ярса илнӗ.

51 ҫулти арҫын тӗлӗшпе пуҫиле ӗҫ пуҫарнӑ. Халӗ суд пулнӑ. Ӑна судья колони-поселение 1 ҫуллӑха ӑсатма йышӑннӑ. Приговор хальлӗхе саккунлӑ вӑя кӗмен-ха.

Палӑртмалла: пушар ҫенӗкре ларакан кивӗ холодильнике пула тухнӑ. Срокӗ тухнӑ пулсан та кил хуҫи унпа усӑ курма пӑрахман.

Чӑваш Ен Элтеперӗ Олег Николаев хӑйӗн пӗр уйӑхри ӗҫ укҫинчен ҫуррине «Ачалӑхшӑн, ачалӑх ячӗпе» фонда уйӑрма йышӑннӑ. Кун пирки Олег Алексеевич паян ЧР Правительство ҫуртӗнче иртнӗ канашлура пӗлтернӗ.

«Фонд нуши валли уйӑхри ӗҫ укҫин 50 процентне уйӑрма заявлени ҫыртӑм», – тенӗ регион ертӳҫи.

Раҫҫейри ача-пӑча фончӗн регионти уйрӑмӗн ертӳҫи Юрий Кислов паянхи кун тӗлне республикӑра 3 миллион тенкӗ укҫа пухнине каланӑ. Марафон вӑхӑтне вӑл ҫурла уйӑхен 1-мӗшӗччен тӑсма сӗннӗ. Марафон нарӑс уйӑхӗн 18-мӗшӗнче пуҫланнӑ.

"Про Город" сайтран илнӗ сӑн

Ҫӗрпӳ районӗнче ҫынсем уйра пӑру виллисене тупнӑ. Вӗсем тӑпра ӑшӗнче пулнӑ, ҫӗрме пуҫланӑ. Кун пирки «Про Город» хаҫата ҫынсем пӗлтернӗ.

Вӗсем пӗлтернӗ тӑрӑх, пӑру виллисене тислӗкпе пӗрле тухса тӑкнӑ. Ҫавна май тавралӑха лайӑх мар шӑршӑ сарӑлать. Пӑру виллисене ачасем хӗллех йӗлтӗрпе ярӑннӑ чухне курнӑ. Халӗ вара урӑх ҫӗрте те выртаҫҫӗ. «Вуннӑран кая мар», - пӗлтернӗ ҫынсем.

Вӗсем прокуратурӑна ҫӑхав ҫырнӑ. Ял тӑрӑхӗн администрацийӗ пӗлтернӗ тӑрӑх, ҫав ҫӗрсем фермер хуҫалӑхӗн. Йӗркепе килӗшӳллӗн, выльӑх вилсен кун пирки ветеринари службине пӗлтермелле. Вӗсем анализсем туса выльӑх мӗншӗн вилнине палӑртӗҫ. Вӗсене тӑпра айне тума юрамасть.

Чӑваш Енри Профессионал ҫыравҫӑсен союзӗн правленийӗн председателӗ Лидия Филиппова паян сӑмах ӑстисен палӑкӗсем пирки сӑмах хускатнӑ. Кун пирки вӑл Фейсбукри хӑйӗн страницинче сӑмах хускатнӑ, ыйтӑвӑн ҫивӗчлӗхне ҫирӗплетме чӑваш ҫыравҫисен вил тӑприйӗсем ҫинчи палӑксене ӳкерсе илсе вырнаҫтарнӑ.

Лидия Ивановна пӗлтернӗ тӑрӑх, палӑксен шӑпи пирки пӗлтӗрех, «Капкӑн» сатира журналне йӗркеленӗ Иван Мучи юбилейне хатӗрленнӗ чухнех сӑмах хускатнӑ. Шупашкарти Богдан Хмельницкий урамӗнчи масарта иртнӗ ӗмӗрӗн 30-мӗш ҫулӗсенче пытарнӑ ҫыравҫӑсен палӑкӗсем япӑхни пирки хула влаҫӗсем патне ҫыру та ҫырнӑ иккен.

Ҫӑва ҫинче шӑматкунлӑх ирттернӗ-ха. Анчах вӑхӑт иртнӗҫемӗн чӗрмеленсе, ҫурӑлса пӗтнӗ палӑксем патне хальлӗхе никамӑн та алӑ ҫитеймен. Кӑҫал, ав, чӑвашсенчен халӑх поэчӗ ята пуҫласа тивӗҫнӗ Николай Шелепи ҫуралнӑранпа 140 ҫул ҫитнине уявлӗҫ. Ирӗксӗрех палӑк пирки те аса илӗн.

Лидия Филипповӑна Иван Мучин, Хумма Ҫеменӗн, Иван Ивникӑн, Николай Шелепин, Илле Тӑхтин, Даниил Эльменӗн тата ыттисен палӑкӗсен тӑрӑмӗ пӑшӑрхантарать. «Патшалӑх политиксӗр, е, тен, депутатсен пулӑшӑвӗсер май ҫуках-тӑр», — тесе шухӑшлать Лидия Филиппова.

Малалла...

Регион управленийӗн центрӗ Канашри пысӑк кӳлленчӗке пӗтернине пӗлтернӗ. Асӑннӑ органа пӗлтӗр, ҫулталӑк вӗҫӗнче йӗркеленӗччӗ. Вӑл кӑлтӑксем пирки ҫынсем тӗнче тетелӗнче хыпарланине сӑнаса тӑрать, яваплӑ органсене евитлет.

Маларах «Контактра» халӑх ушкӑнӗнчи пабликсенчен пӗринче Канашри пӗр хастар Пушкин урамӗнчи 46-мӗш ҫурт тӗлӗнче шыв кӳлленчӗкӗ тӑнине хыпарланӑ. Ҫав вырӑна шапасем килӗштернӗ, унта васкаса иленнӗ.

Регион управленийӗн центрӗ кӳлленчӗк пирки Канаш хула администрацине систернӗ, ыйтӑва татса памалли пирки асӑрхаттарнӑ. Унтисем вӑрах кӗттермен — кӑлтӑка пӗтернӗ.

Регион управленийӗн центрӗ Инстаграмра ҫырнӑ тӑрӑх, Канашри шапасен урӑх вырӑн шырама тивӗ.

my-kanash.ru сӑнӳкерчӗкӗ

Федерацин налук службин республикӑри управленийӗ ҫитес вӑхӑтра районсенчи штата чакарассине пӗлтернӗ.

Шӑмӑршӑра, Елчӗкре, Элӗкре, Тӑвайра, Сӗнтӗрвӑрринче, Вӑрмарта, Красноармейскинче, Хӗрлӗ Чутайра, Пӑрачкавра, Етӗрнере тата ытти хӑш-пӗр ҫӗрте территорири ӗҫ вырӑнӗсене пӗтерӗҫ. Ҫапла вара пулӑшу илме малашне Шупашкарти, Ҫӗнӗ Шупашкарти, Ҫӗмӗрлери, Улатӑрти, Канашри, Патӑрьелти, Муркашри тата ытти ҫӗрти районсем хушшинчи инспекцисене кайма тивӗ.

Налукҫӑсем ӑнлантарнӑ тӑрӑх, штата чакарас юхӑм Мускавранах килет. Прогреса чараймӑн, компьютерсем ҫынсене хӗссе кӑлараҫҫӗ. Налук тӳлекенсем чылай ыйтӑва хӑйсен уйрӑм пӳлӗмӗсем урлӑ татса параяҫҫӗ.

ntv.ru сайтри сӑн

Элӗк районӗнчи Мартынкассинчи реабилитаци центрне вӑхӑтлӑха хупса хунӑ. Вӑл – «Ирӗклӗх» реабилитаци центрӗн филиалӗ.

Прокуратура тӗрӗслеме пынӑ чухне унта эрехпе, наркотикпе туслӑ 14 ҫын сипленнӗ. Ведомство палӑртнӑ тӑрӑх, филиала уҫнӑ чухне пурӑнмалли ҫурта пурӑнмалли мар категорие куҫарман. Кунсӑр пуҫне пӗрремӗш хутри коридорта тата унти ӗҫченсен пӳлӗмӗнче электропралуксене изоляци туман. Эвакуаци ҫулӗ ҫинче сӗтел-пукан ларнӑ, картлашка айӗнче ҫунакан метариалсем тата япаласем упраннӑ.

Тепӗр хутчен тӗрӗслеме килсен прокуратурӑна каллех тивӗҫтермен: пушар хӑрушсӑрлӑхӗн йӗркине пӑснӑ тӗслӗхсем пулнӑ. Ҫавна май ведомство филиала вӑхӑтлӑха хупма суда тавӑҫ тӑратнӑ. Суд килӗшнӗ.

Муркашри фельдшер Алевтина Павлова

Ҫанталӑк шӑрӑх тӑрать. Хӗвел ҫинче ҫынсем анранӑ тӗслӗхсем те нумайланнӑ. Юрать, унашкаллисене вӑхӑтра пулӑшу парса пурнӑҫне ҫӑлса хӑварнӑ.

Ҫу уйӑхӗн 14-мӗшӗнче Муркашра 64 ҫулти хӗрарӑм хӗвел ҫинче чылай вӑхӑт пулнӑ та ӑна япӑх пулса кайнӑ, тӑнне ҫухатнӑ. Иртен-ҫӳрен ҫакна курсан васкавлӑ медпулӑшу чӗннӗ. Тухтӑрсем пӗрремӗш пулӑшу парсан пульницӑна илсе ҫитернӗ.

Ҫу уйӑхӗн 14-мӗшӗнченпе республикӑра хӗвел ҫинче шар курнӑ тӑватӑ ҫын тухтӑрсенчен пулӑшу ыйтнӑ. Астӑвӑр: ҫынна хӗвел ҫинче япӑх пулса кайсан ӑна сулхӑна илсе каймалла, шыв нумай ӗҫтермелле.

pixabay.com сайтри сӑн

Чӑваш Енре арҫын кимӗпе кайнӑ та утрав патӗнчен тухайман. Кимӗ чарӑнса ларнӑ та тапранман.

Ку ҫу уйӑхӗн 14-мӗшӗнче Смолкинск утравӗнче пулнӑ. Оперативлӑ дежурнӑй пулчӗ ҫине хыпар ҫитнӗ: арҫын утравран хӑй тӗллӗн тухаймасть, унӑн киммин моторӗ чарӑнса ларнӑ.

Ҫӑлавҫӑсем вырӑна ҫийӗнчех ҫитнӗ. Вӗсем кимме туртса килнӗ, арҫынна та хӑварман – вӑл та пӗрлех пынӑ.

ok.ru сайтри сӑн

РФ Президенчӗ Владимир Путин Чӑваш Енри икӗ ҫемьене «Ашшӗ-амӑшӗн мухтавӗ» орденпа чысланӑ. Сумлӑ наградӑна Сӗнтӗрвӑрри районӗнчи Степановсем тата Шупашкарти Терентьевсем тивӗҫнӗ.

Степановсем 27 ҫул пӗрле пурӑнаҫҫӗ. Вӗсем 7 ачана воспитани параҫҫӗ, вӗсенчен иккӗшӗ 18 ҫултан иртнӗ. Ҫемье пуҫӗ Эдаурд – харпӑр усламҫӑ, строительство тытӑмӗнче ӗҫлет. Мӑшӑрӗ Наталья та усламра тӑрӑшать, массаж тӑвать.

Терентьевсем 24 ҫул пӗрле. Вӗсен 11 ача, виҫҫӗшӗ – 18 ҫул тултарнӑ. Упӑшки Владимир ачасене пӑхать, арӑмӗ ача садӗнче кӗҫӗн воспитательте тӑрӑшать.