tomsk.aif.ru сайтри сӑн

Коммерци банкӗнче ӗҫлекен, Ҫӗнӗ Шупашкарта пурӑнакан 31 ҫулти хӗрарӑм ултавҫӑсен аллине лекнӗ. Вӑл брокер сайтӗнче укҫа ӗҫлесе илме ӗмӗтленнӗ.

Хӗрарӑм авӑн уйӑхӗнчен пуҫласа чӳкчен брокер сайтне укҫа хывма шантарнӑ "специалиста" укҫа куҫарса тӑнӑ. Пӗтӗмпе - 150 пин тенке яхӑн. Кӗҫех лешӗ ҫыхӑнӑва тухма пӑрахнӑ. Ҫӗнӗ Шупашкар хӗрарӑмӗ хӑйне улталанине тинех ӑнланнӑ.

Шупашкарта пурӑнакан 42 ҫулти хӗрарӑм та ҫапла майпах улталаннӑ. Вӑл палламан ҫынна 700 ытла пин тенкӗ куҫарса панӑ. Хай вӑл ниҫта та ӗҫлемест.

cap.ru сӑнӳкерчӗкӗ

Яла ӗҫлеме килнӗ вӗрентекенсене преми пама йышӑннӑ. Хушӑва ЧР Элтеперӗ Олег Николаев алӑ пуснӑ. Вӑл 2023 ҫулхи кӑрлачӑн 1-мӗшӗнче вӑя кӗрӗ.

Ялта пӗрремӗш ҫул ӗҫлекен педагогсене ҫулталӑкне 20-шер пин тенкӗ хушса тӳлӗҫ. Иккӗмӗш ҫул вӑй хуракансене - 40-шер пин,виҫҫӗмӗш ҫул ӗҫлекенсене 60-шар пин тенкӗ парӗҫ.

50 пин ҫынран сахалрах пурӑнакан хулара тӑрӑшакан вӗрентекенсене малтанхи ҫул ҫулталӑкне - 10 пин, кайран - 20 пин, виҫҫӗмӗш ҫулхине 30 пин тенкӗ хушса тӳлӗҫ.

quotar.org сайтри сӑнӳкерчӗк

Хӑш-пӗр ҫын документ илес тесе кӑна пӗрлешет. ШӖМ пӗлтернӗ тӑрах, кӑҫал унашкал ултӑ тӗслӗх пулнине палӑртнӑ.

Ведомство кӑҫал ют ҫӗршывран килнӗ 6 ҫын тӗлӗшпе пухнӑ материала прокуратурӑна ярса панӑ. Вӗсем пирӗн республикӑра суя мелпе пӗрлешнӗ. Йӗрке хуралҫисем ҫав ҫемьесене саккуна пӑсса ҫавӑрнине палӑртмашкӑн материалсем пухнӑ.

Суд икӗ ҫынӑнне Раҫҫейре вӑхӑтлӑх пурӑнма ирӗк паракан документне пӑрахӑҫлама йышӑннӑ. Теприн кунта пурӑнма май паракан документне пӑрахӑҫланӑ. Виҫҫӗшӗ те пирӗн ҫӗршывран кайнӑ.

nn.mk.ru сайтри сӑн

Канашра пурӑнакан 62 ҫулти хӗрарӑи хӑйӗн хваттерӗнче ют ҫӗршыв ҫыннисене пропискӑна тӑратнӑ. Пӗр-иккӗшне кӑна мар, 8 ҫынна.

Следстви пӗлнӗ тӑрӑх, Тутарстанра пурӑнакан 60 ҫулти арҫын ҫак хӗрарӑма Таджикистанри 3 ҫынна тата Узбекистанри 3 ҫынна ҫулталӑк вӗҫлениччен пропискӑна тӑратма ӳкӗте кӗртнӗ. Кайран хайхискер кил хуҫипе ҫав ҫынсене нумай функциллӗ центрта тӗл пултарнӑ, унта кирлӗ документсене хатӗрленӗ.

Канаш хӗрарамӗ ҫак мелпех Таджикистанри тепӗр 2 ҫынна пропискӑна тӑратнӑ. Халӗ ҫак хӗрарӑмӑн суд сакки ҫине ларма тивӗ. Унпа пӗрле Тутарстан арҫынни те явап тытӗ.

"Про Город" сайтӗнчи сӑн

Паян Ҫӗрпӳ районӗнче свалка ҫунма тытӑннӑ. Кун пирки "Про Город" хаҫата халӑх корреспонденчӗ пӗлтернӗ.

Ҫӗрпӳ районӗнчи Кӑнар поселокӗ патнелле пӑрӑнмалли ҫул ҫывӑхӗнчи свалка ҫунма пуҫлани 15 сехет ҫурӑра паллӑ пулнӑ.

"Сывлама ҫук. Пӗтӗм тӗтӗм Кӑнар поселокӗ тата ҫывӑхри ялсем еннелле каять. Мӗн те пулин тума ыйтатпӑр. Тен, свалкӑна рекультиваци тумалла", - тенӗ унти ҫынсем.

cap.ru сӑнӳкерчӗкӗ

Пирӗн республикӑра иртнӗ "Чӑваш Ен туризмӗ" форумра РФ Патшалӑх Думин депутачӗ Сергей Казанков тухса калаҫнӑ. Вӑл пирӗн патра чи пысӑк сӑра фонтанӗ тума сӗннӗ.

Мӗн тӗллевпе? Депутат каланӑ тӑрӑх, ку Чӑваш Ен символне, хӑмлана, анлӑ сарӑлма пулӑшӗ.

"Чӑваш Ен хӑмла туса илессипе пӗрремӗш вырӑн йышӑнать пулсан, анчах ҫакна ҫынсене ӑнлантарма йывӑр тӑк, тен, кунта чи пысӑк сӑра фонтанӗ тумалла? Мӗншӗн вӑл пирӗн патра мар, Европӑра вырнаҫнӑ? Вара вау-эффект пулать, пӗтӗм тӗнчери ҫынсене хӑнана чӗнсе тӗлӗнтерме пулать", - тенӗ депутат.

ru.best-wallpaper.net сайтри сӑн

Инкеклӗ лару-тӑру министерстви ыран республикӑра хӑрушсӑрлӑхӑн "сарӑ" шайӗ пулассине пӗлтерет. Паян ҫӗрле тата ыран ирхине тӗтре карса илӗ. Хӑш-пӗр вырӑнта 500 метртанах нимӗн те курӑнмӗ.

Паян ҫӗрле 18-23 градус сивӗ пулӗ, хӑш-пӗр вырӑнта - 25 градус таранах. Сывлӑшри нӳрӗк - 80 процент.

Асӑрханӑр: ҫул ҫинче пӑрлак.

mintrans.cap.ru сӑнӳкерчӗкӗ

Муркаш районӗнче метан заправка уҫӑлнӑ. Вӑл — Ситуккасси ялӗ тӗлӗнче.

Заправкӑра икшер колонка вырнаҫтарнӑ. Кашнинче пӗр харӑсах икшер машина заправка витӗр тухайӗ.

Чӑваш Енӗн Транспорт тата ҫул-йӗр хуҫалӑхӗн министерствинче пӗлтернӗ тӑрӑх, ҫӗнӗ заправка пулӑшӑвӗпе сехетре 10 машинӑран кая мар, талӑкне вара 55 машина таран усӑ курайӗ.

Шупашкарпа Чулхула хушшинче унччен апла заправка пулман иккен. Унтах автомобильсен зарядка станцине те вырнаҫтарнӑ.

Канаш районӗнче те метан заправка уҫӑлӗ. Ӑна раштав уйӑхӗн ҫурринче ӗҫлеттерсе ярасшӑн.

cap.ru сӑнӳкерчӗкӗ

Ҫӗмӗрлере икӗ хӗрарӑм сусӑр ачасене савӑнтарса ҫӳренӗ. Вӗсем Наташӑпа Галина кинемейсем.

ЧР Ӗҫлевпе социаллӑ хӳтлӗх министерстви пӗлтернӗ тӑрӑх, кинемейсем сусӑр ачасене юмах кӑтартнӑ, парнесемпе савӑнтарнӑ.

Вӗсем пӗчӗкскерсене хӑйсем ҫыхнӑ нускисене, шӑккалат парнеленӗ.

"Кирек мӗнле ҫын та тимлӗх уйӑрма пултарать. Сусӑрсем ҫынпа сахалрах хутшӑнаҫҫӗ. Ҫӗмӗрлере пурӑнакан сусӑрсене те кӑмӑл-сипет тӗлӗшӗнчен пулӑшу кирлӗ", - ҫапла палӑртнӑ тивӗҫлӗ канури кинемейсем.

fikiwiki.com сайтри сӑн

Республикӑра 2 пин ытла ҫын ҫутӑсӑр ларать. Ку - ҫанталӑка пула. Вӑйлӑ ҫиле пула пулман ку, йывӑҫсем ҫине пӑр пухӑннӑ. Ҫавна май йывӑҫсем, туратсем хуҫӑлаҫҫӗ.

Ӗнер 10 районти 34 ялта ҫутӑ сӳннӗ. 3280 ҫуртра ҫутӑ пулман. Вӗсенче 6444 ҫын пурӑнать, вӗсенчен 789-шӗ ачасем.

Паян 11 сехет тӗлне 13 ялта электроэнерги пулман.

Республикӑра электроэнергипе ҫыхӑннӑ аварисене пӗтерес ӗҫре 4 бригада, пӗтӗмпе 11 ҫын, тата 4 техника тӑрӑшать.