"Лиза Алерт" сайтри сӑн

Авӑн уйӑхӗн 19-мӗшӗнче 13 сехетре Евгений Семенов тусӗсемпе Мари Эл вӑрманне кӑмпана кайнӑ. Юлташӗсем киле таврӑннӑ, вӑл вара - ҫук.

64 ҫулти арҫынна юлашки хут Мари Элти Хура Кӳлӗ поселокӗ ҫывӑхӗнче курнӑ. Ӑна тӑваттӑмӗш кун шыраҫҫӗ. Хӗрӗ каланӑ тӑрӑх, ашшӗ унччен те кӑмпана ҫӳренӗ, анчах ҫухалса кайнӑ тӗслӗх пулман.

Евгений Семенов кам та пулин курнӑ тӑк ҫак номерсемпе шӑнкӑравлама ыйтаҫҫӗ: 88007005452 е 112.

artembolnica2.ru сайтри сӑн

Муркаш районӗнчи Тивӗш ялӗнче карантин пулнине палӑртнӑ. Ку - тилле пула. Унта урнӑ чирпе аптӑранӑ ҫак тискер чӗрчуна тупнӑ.

Ҫакна лабораторире те ҫирӗплетнӗ. Ҫавна май ЧР Элтеперӗ Олег Николаев ҫак ялта карантин пулни пирки хушу алӑ пуснӑ. Халӗ 1000 метр радиуслӑ территори урнӑ чир тӗлӗшпе ӑнӑҫсӑр шутланать.

Карантин Элтепер йышӑну тӑвиччен вӑйра пулӗ.

protumse.ru сайтри сӑн

Чӑваш Ен ҫитес ҫул 90 ытла троллейбус туянӗ. Кун пирки Чӑваш Ен правительстви хыпарланӑ.

ДОМ.РФ облигацисене усӑ курассипе ӗҫлекен Правительство комиссийӗ Шупашкарти агломерацин электротранспорт паркне ҫӗнетес енӗпе республикӑна ырланӑ.

Ҫавна май республика 92 троллейбус туянӗ. Пӗр пайне «Шупашкар – Ҫӗнӗ Шупашкар» маршрутпа ярӗҫ. ЧР Элтеперӗ Олег Николаев пӗрремӗш маршрута ҫулталӑк вӗҫӗнче ярассине пӗлтернӗ.

Чӑваш Енӗн Сывлӑх сыхлав мнистерствин Общество канашне кӗрес текенсен заявленийӗсене пухма пуҫланӑ.

Кандидатсен докуменчӗсене юпа уйӑхӗн 10-мӗшӗ таран йышӑнӗҫ. Вӗсене ирхи 8 сехетрен пуҫаса 12 сехетчен, 13 сехетен пуҫласа 17 сехетчен министерствӑна ҫитерсе памалла е почтӑпа тата курьер урлӑ та ӑсатма пулать.

Общество канашне камсене илме пултарасси ҫинчен хыпарланипе министерство сайтӗнче тӗпленрех паллашма пулать.

medicin.cap.ru сӑнӳкерчӗкӗ

Ҫӗнӗ Шупашкарти стоматологи поликлиникинче тӗп тухтӑрта ӗҫленӗ Лидия Яковлевӑна тава тивӗҫлӗ канӑва ӑсатнӑ.

Лидия Андреевнӑна ырӑ сӑмахсем калама республикӑн сывлӑх сыхлав министрӗ Владимир Степанов, Чӑваш Ен парламенчӗн Председателӗн ҫумӗ Ольга Петрова, Ҫӗнӗ Шупашкар хулин администрацийӗн пуҫлӑхӗн ҫумӗ Ольга Матина тата ыттисем пырса ҫитнӗ.

Лидия Яковлева – аса категориллӗ тухтӑр, сывлӑх сыхлас ӗҫӗн отличникӗ, Чӑваш Республикин тава тивӗҫлӗ врачӗ, Ҫӗнӗ Шупашкарта пародонтологи службине пуҫарса яраканӗ. Ӗҫ биографине вӑл 1982 ҫулта стоматологран пуҫланӑ.

ШӖМ тунӑ видео скринӗ

Канаш районӗнче пурӑнакан 58 ҫулти арҫын «Газпрома» укҫа хывса пуйма ӗмӗтленнӗ. Анчах тупӑш мар, тӑкак курнӑ вӑл.

Ун патне мессенджерта ҫыру килнӗ: «Газпрома» укҫа хывса тупӑш тума пулать иккен. «Брокер Артур» ӑнлантарнӑ тӑрӑх, малтан пӗчӗк укҫа кӑна хывмалла имӗш. Анчах кайран Чӑваш Ен арҫыннине банка кайса кредит илме, «Газпрома» 9 миллион ытла тенкӗ хывма ӳкӗте кӗртнӗ. Анчах вӑл ҫак укҫана каялла кӑларайман.

Ку тӗслӗх тӗлӗшпе пуҫиле ӗҫ пуҫарнӑ.

ШӖМ тунӑ сӑн

Авӑн уйӑхӗн 16-мӗшӗнче Ҫӗрпӳ районӗнчи участковӑй Красная горка ялӗ ҫывӑхӗнче пулнӑ чухне вӑрмантан бензопӑчкӑ сассине илтнӗ те унталла кайнӑ. Чӑнах та, йывӑҫ каснӑ иккен.

Ҫав вӑхӑтра 65 ҫулти арҫын, ку тӑрӑхрах пурӑнаканскер, юман каснӑ. Ку кӑна мар иккен – унӑн кил картишӗнче тепӗр юман тупнӑ. Ӑна вӑл виҫӗ кун маларах каснӑ. Ҫапла вӑл патшалӑха 300 пин тенкӗ тӑкак кӳнӗ.

Арҫын тӗлӗшпе пуҫиле ӗҫ пуҫарнӑ.

Авӑн уйӑхӗн 30-мӗшӗнче Раҫҫей банкӗн Атӑл-Вятка наци банкӗн Чӑваш Енри уйрӑмӗнче экскурси ирттерӗҫ. Ӑна кредит учрежденийӗнчи Уҫӑ алӑксен кунӗнче йӗркелӗҫ.

Уйрӑмра ҫав кун «Время и деньги» (чӑв. Вӑхӑт тата укҫа-тенкӗ) фотокурав ӗҫлӗ. Укҫа аталанӑвӗпе паллаштаракан экскурси те пулӗ. Интерактивлӑ занятисем те кӑсӑклӑ иртессе шантараҫҫӗ. Банк кассирӗн ӗҫӗ-хӗлӗпе паллашма май килӗ, кивӗ укҫана епле тӗп туни ҫинчен те каласа кӑтартӗҫ. Хӑнасене банкнотӑсене уйӑрма вӗрентӗҫ, тӳлев инструменчӗсемпе тӗрӗс усӑ курма, ултавҫӑсенчен сыхланма вӗрентӗҫ.

Экскурсие хутшӑнас тесен Раҫҫей банкӗн сайчӗ урлӑ ҫырӑнмалла. Банк ҫуртне кӗрекенсен ҫумра паспорт пулмалла.

Банкри Уҫӑ алӑксен кунӗ Шупашкарти Карл Маркс урамӗнчи 25-мӗш ҫуртра иртӗ.

t.me/pro_cheby каналтан илнӗ сӑнӳкерчӗк

Чӑваш Енре пурӑнакансем уйӑхсерен вӑтамран 47,3 пин тенкӗ укҫа ӗҫлесе илеҫҫӗ. Пӗлтӗрхи кӑрлач-ҫурла уйӑхӗсенчипе танлаштарсан шалу виҫи 19,3 процент ӳснӗ.

Унсӑр пуҫне пирӗн республикӑра ӗҫсӗр ҫынсен шучӗ сахалланнӑ. Республикӑри предприяти-организацисенче кадрсем ытларах кирлӗ. Ку цифра 25 процент пысӑкланнӑ.

mintrud.cap.ru сӑнӳкерчӗкӗ

Ҫӗрпӳ районӗнчи администрацире тӑрӑшакан ИТ-специалист патшалӑх шучӗпе пӗлӗвне анлӑлатнӑ.

Цифра аталанӑвӗн тата информаци технологийӗсен секторӗн заведующийӗ Евгений Профоров «Демографи» наци проекчӗпе килӗшӳллӗн вӗреннӗ. 50 ҫултан иртнисене вӗрентсе кӑларнӑшӑн патшалӑх тӳлет.

ИТ-специалист Томскри патшалӑх университечӗн регионсем хушшинчи хушма пӗлӳ паракан центрӗнче вӗреннӗ. Арҫын преподавательсене те пысӑка хурса хакланӑ, ӑна вӗренме питех те килӗшнӗ.