morgau.cap.ru сӑнӳкерчӗкӗ

Шӑматкун, юпа уйӑхӗн 14-мӗшӗнче, Муркаш муниципаллӑ округӗнчи Кашмашри культура ҫуртӗнче «Хӗрарӑм, сан умӑнта таятӑп пуҫӑма» республика конкурсӗн финалӗ иртнӗ.

Ун пек конкурс кӑҫалхипе пиллӗкмӗш хут иртет.

Финала 8 муниципаллӑ округри хӗрарӑмсем тухнӑ. Вӗсем — Ҫӗрпӳ, Канаш, Шупашкар, Муркаш, Хӗрлӗ Чутай, Сӗнтӗрвӑрри, Ҫӗмӗрле, Йӗпреҫ тӑрӑхӗсенчен.

Конкурса хутшӑннисем хӑйсен пултарулӑхне тӗрлӗ енӗпе кӑтартнӑ. Муркаш тӑрӑхӗнчи Галина Голубева (вӑл Москакассинчи культура ҫурчӗн заведующийӗ) чӑваш апатне хатӗрлемелли конкурсра хуран кукли тата ҫӳхӳ пӗҫернӗ.

Конкурса хутшӑннӑ кашни хӗрарӑмах тӗрлӗ номинацире чысланӑ.

Инкеклӗ лару-тӑру министерстви тунӑ сӑн

Паян ҫил вӑйланнӑ. Кун пирки Инкеклӗ лару-тӑру министерстви те малтанах асӑрхаттарнӑччӗ.

Вӑйлӑ ҫил Шупашкар хулинчи Николаев урамӗнчи 22-мӗш ҫурт тӑрри сиен кӳнӗ. Ҫавӑн пекех Патӑрьел тӑрӑхӗнчи Шӑнкӑртам ялӗнчи культура ҫурчӗ шар курнӑ. Унта та тӑрри сиенленнӗ.

Ултӑ муниципаллӑ округра электроэнерги пӗтнӗ. Халӗ васкавлӑ службӑсем вӗсенче ӗҫлеҫҫӗ.

Ӗнер ЧР Элтеперӗ Олег Николаев республикӑра пушара хирӗҫ режима пӑрахӑҫлани пирки хушу алӑ пуснӑ. Ҫапла документ юпа уйӑхӗн 16-мӗшӗнче вӑя кӗнӗ.

Аса илтерер: пушара хирӗҫ режим пирӗн республикӑра ака уйӑхӗн 10-мӗшӗнченпе вӑйра пулнӑ. Пӗлтӗр вӑл акан 15-мӗшӗнчен пуҫласа юпан 17-мӗшӗччен пулнӑ.

Республика влаҫӗ муниципалитетсенче те пушара хирӗҫ режима пӑрахӑҫлама сӗннӗ.

cheb.ru сӑнӳкерчӗкӗ

Чӑваш Енри тата тепӗр икӗ пульницӑна пӗрлештересшӗн. Реорганизаци текен утӑма ҫӳлтисем хысна укҫа-тенкне перекелессипе чылай чухне сӑлтавлаҫҫӗ.

Иртнӗ эрнере Республикӑн ача-пӑча клиника пульниципе Шупашкар хулинчи 2-мӗш ача-пӑча пульницине пӗрлештерме йышӑннӑ.

Асӑннӑ икӗ учреждени те унчченхилле ӗҫлӗ. Анчах та асли (ансат чӗлхепе каласан) Республикӑн ача-пӑча клиники пулӗ. Пурлӑх хуҫи те вӑл шутланӗ.

Матросовсем. Ҫемье архивӗнчи сӑн

РФ Президенчӗ Владимир Путин Чӑваш Енри нумай ачаллӑ икӗ ҫемьене награда панӑ.

Хушупа килӗшӳллӗн, Алинӑпа Алексей Матросовсем «Ашшӗ-амӑшӗн мухтавӗ» орден медальне тивӗҫнӗ. Вӗсем 4 хӗрпе 1 ывӑла кун ҫути парнеленӗ. 11 ача ҫуратса вӗсене воспитани паракан Тихоновсене вара «Ашшӗ-амӑшӗн мухтавӗ» орденпа чысланӑ. Мӑшӑр 35 ҫул пӗрле пурӑнать.

Сӑмах май, Чӑваш Енре «Анне» паллӑ пур. Халӗ вара «Атте» палла йышӑнма сӗннӗ.

golos-nazrani.ru сайтри сӑн

Вӑрмар муниципаллӑ округӗнчи умламҫӑ пухнӑ 4,8 миллион тенкине ултавҫа куҫарса панӑ.

Хӑй каласа кӑтартнӑ тӑрӑх, ун патне палламан ҫын шӑнкӑравланӑ та хӑратсах пӑрахнӑ: счечӗ ҫинчи укҫана такам Украинӑна куҫарма тӑнӑ имӗш. Хайхискере пӗр тӑхтамасӑр укҫана хӑрушсӑр счет ҫине куҫарма хушнӑ. Ҫапла вӑл 1 миллион та 800 пин тенкӗсӗр тӑрса юлнӑ.

Кун тӗлӗшпе пуҫиле ӗҫ пуҫарнӑ.

"Ҫыхӑнура" порталти сӑн.

Ӗнер республикӑра ҫил вӑйлӑ пулнӑ. Ҫавна май хӑш-пӗр тӑрӑхра ҫутӑ та сӳнсе ларнӑ.

Инкеклӗ лару-тӑру патшалӑх комитечӗ пӗлтернӗ тӑрӑх, ӗнер каҫхине 19 ялта электричество сӳннӗ, 2,5 пин ытла ҫын шар курнӑ. Ҫак списока Улатӑр, Патӑрьел, Вӑрнар, Йӗпреҫ, Канаш, Муркаш, Вӑрмар муниципаллӑ округсенчи ялсем лекнӗ. Каҫхи 9 сехет тӗлне 11 бригада, пӗтӗмпе 29 ҫын, ӗҫленӗ. 22 сехет тӗлне 14 ялта ҫутӑ пулман.

Аса илтерер: ӗнер ҫил ҫеккунтра 20-25 метр хӑвӑртлӑхпа вӗрнӗ.

cap.ru сӑнӳкерчӗкӗ

Чӑваш Енре «Атте» паллӑ пама пуҫлӗҫ. Республикӑн влаҫ органӗсен официаллӑ порталӗнче пӗлтернӗ тӑрӑх, ку пуҫарӑва Олег Николаев Элтепер те ырласа йышӑннӑ.

«Атте» Чӑваш Республикин ашшӗн мухтавӗн палли» патшалӑх награине пама пуҫлассине «Ашшӗн калаҫӑвӗ» ҫавра сӗтел вӑхӑтӗнче сӳтсе явнӑ. Пуҫарупа Чӑваш Енри Ашшӗсен канашӗ (председателӗ — Алексей Мурыгин) тухнӑ иккен.

Суд приставӗсен службин архивӗнчи сӑн

Ҫӗрпӳ округӗнче пулнӑ аварире пассажир аманнӑ. Куншӑн, кӑмӑл-сипет тӗлӗшӗнчен сиен кӳнӗшӗн, водительтен укҫа шыраса илнӗ.

Ун чухне ҫанталӑк тӗтреллӗ тӑнӑ. Водитель руле итлеттереймесӗр ҫул хӗрринчи паллӑ ҫине пырса тӑрӑннӑ, унтан кювета чӑмнӑ. Салонри хӗрарӑм аманнӑ. Куншӑн суд водителе 400 пин тенкӗ тӳлеттерме йышӑннӑ. Анчах лешӗ килӗшмен.

Ҫавна май суд приставӗ ыйтнипе унӑн шалӑвӗнчен укҫа тытса юлма пуҫланӑ. Ҫавӑн пекех ӑна ют ҫӗршыва тухса ҫӳреме чарнӑ. Кун хыҫҫӑн тин арҫын пӗтӗм укҫана саплаштарнӑ.

Хӗрлӗ Чутай районӗнчи Акчикассинче пурӑнакан Перасковья Васюкова юпа уйӑхӗн 10-мӗшӗнче 102 ҫул тултарнӑ.

Унӑн пурнӑҫӗ те тантӑшӗсенни пекех пулнӑ. Вӑрҫӑ ҫулӗсем тата ун хыҫҫӑнхи йывӑр самана. Апла пулин те хӗрарӑм пуҫ усман.

Ҫуралнӑ кунӗнче ун патӗнче Хӗрлӗ Чутайӗнчи халӑхӑн социаллӑ ыйтӑвӗсене тивӗҫтерекен центр ӗҫченӗсем тата вырӑнти тӳре-шара пулнӑ, кинемее ҫуралнӑ кунпа саламланӑ.